Jeremías 5
5
Jerusalén'na ben ake' daxhinj
1Xanllon nee:
Lechaj yoyte nez ke Jerusalén'na,
lewiayian, na le wayirj lawya ka',
narachk cha wallelere be'nn
gun yel korchis,
na yenle gunee da nak dalixhej.
Cha wallelere, na sixhena ke Jerusalén'na.
2Lakse ne're: nban Xanllon,
ne' nawsre ziyere.
3Xana, rwen llayirjo be'nn de baran.
Bsakzi akoe, axha bijel akre,
ba bchochj'blan akoe, axha bi wen akre wzenay ake'.
Nakll raxhdao aken war ke yajen,
na bi wen akre yeyo ake' nez.
4Nada' bena xbab:
Zerawze be'nn yiach ka' llun ake' ka be'nn bi llajnie,
le bines akre bixhan llenle Xanllon,
na bixhan llenle Diozen gun ake'.
5Na' lljawia be'nn braw ka',
nench'na weren ake' di'll.
Le aken nez akre bixhan llenle Xanllon,
na bixhan llenle Diozen gun ake'.
Axha yoy akte ba bayechj ake' Diozen,
biwen akre wzenay ake'.
6Kelen'na lloj bell yix ka' sjalla lo yixta'on wlleyiba le ake'.
Na bekw yiw ka' sjalla latj yu bill dachen wxhoxjba le ake',
na ba ka' nzi leopardo semba le ake' lloa yell xhen'na,
na wxhoxjtimba le ake' keten ye'n akre lloj aken,
le dazan daxhinj ba ben ake'.
Na ba nian damar ke ake' ka'.
7Xanllon ba nee:
¿Akre gunza yezixhena ko'o raw yoyte daki cha'?
Xhi'nno ka' ba bsanlall akbe nada',
na llwal akbe dios wxhiye ka'.
Yajlaw yelwao be akabe,
axha bi bdap akbe nada' baran,
na' badup ballay akbe lo yo' rill nor ree ka'.
8Llun ake' ke to kabay ba nerjxen, na lleneba wazuba,
llusia ake', na llen akre nor ke be'nn loellj ake'.
9¿Na bi wsakzia le ake' kan llun aken?
¿Bi llayal si be'nn yell ka' da llayal si ake' cha'?
10Be'nn ka' llwiere le aken llajlleyi ake' lba uvas ke ake' ka',
lakse bi wlleyi ake' yoyten.
Na llzoy ake' xhoze kaze,
le bill nak aken lba uvas kia.
11Yell ke Israelen, na yell ke Judán ba bayechj ake' nada'.
Nada', Xanle ba bnia ka'.
Llixjwere kan sakzi aken
12Israelen rente Judán ba ben akre Xanllon kaze,
ba bnee ake' bi zu Diozen.
Bitbi damar gak kello,
nike nu' tilrenze lliw, na nike tesllo win.
13-14Be'nn ka' llayixjwe xtill Diozen to llne'e xhen akzen,
le xtill Xanllon bi zerenen le ake'.
Axha kin ba bnee
Xanllon nap doxhente yelwaken:
Ke nake di'll ka' ba bnee aken
ki gak ke ake':
Guna ke di'll kia ka'
aken ke to yi' lo llwaon,
na be'nn yell ka' gak ake' ke way,
na wzey yi'n le ake'.
15Xanllon ba bnee:
Israel, guna nench yed
to yell da za' zit,
to yell da nak war, na da lli kenate'.
Rwe' bi numbiero xtill aken
na nike llejniezero bixha di'llen llwe aken.
16Yoy akte nak ake' be'nn rall-lluy, na be'nn war ake',
na' ya ke ake' ka' nsan yelgut.
17Gaw ake' da ka' ba brapon, na pan ko'o ka',
na xhi'nno bi biew ka', na bi nor ka'.
Na gaw ake' xhir ka', na bell ka',
na uvas ka', na higos ko'o ka'.
Na kone ya ke ake' ka' wlleyi ake'
yell xhen ka' nechj ze war ka' nxenlallon.
18Xanllon ba bnee: na keten llin lla'na, bi wlleyia dokenakre. 19Na keten wnab akre rwen: ¿Bixhchen Xanllo Diozen benze yoyte da ki kone lliw? Balli xtill aken: Kan ben akse bsanlall ake' Xanllon, na bzuraw ake' bxenlall ake' dios ka' llwerao be'nn zit ka' sjalla raw rall aken, na kakse gun ake' xchin be'nn zit ka' sjalla yell zit ka'.
Llixjwere Israelen
20Lechixjwe gan llnebia yell ke Israelen,
na le ye be'nn ka' sjalla Judán:
21Bzenay dani yell bi llajnie, na da wednay,
zute yajrao, na bi llrero,
zute yell nayo, na bi llzenayo.
22Nada', Xanle, llnia:
¿Bixha re' bi llebre nadan cha'?
¿Bi xhisre keten ze re' kwitan?
Nada' bnita yuxh ka' nench'na llzayen nista'on,
bzoa to da llzay nista'on nench'na bi teteren.
Lakse cha llasen llebraz
na llunen llakia, axha bi gak teteren.
23Raxhdaoren naken zid, na da wednay,
bsanlallre nada', na zeyajre.
24Bi bayun re' xbab, na bi bnere:
Gapllo Xanllo Diozen baran,
le llune'e nis yejw kello keten yalljen,
ket ba bde da zay, na ket ba bde dazeyen,
na llune'e to latj nench llerapllo.
25Axha daxhinj kere ka' ba ben aken nench'na bi llaklayre,
na bi zire banez da ka' ba sjade keren.
26Le zajlla raw yell kian be'nn sjanak be'nn mar ake',
llinaw ake', kan llun be'nn ka' zen byinn ka',
na llixj ake' ga lldol be'nn ka' yela.
27Llaslla lo yo' ke aken dawan ka' ba jalan aken,
kan nak lo rill byinn ka' llellate sjalla akba loen.
Kan ben ake' nallen nap ake' yelwak, na bnia ake',
28llejllaw ake' wen, na sjanak ake' be'nn xhen.
Nike llayullze damar ke aken,
bi llun ake' yel korchis ke be'nn wazeb ka',
na nike llazak aksre dan nak dalixhej ke be'nn yiach ka'.
29¿Bi wsakzia le ake' kan llun aken?
¿Bi wazia wzon be'nn ka' llun ka'?
Nada' Xanle ba bnia ka'.
30Da kwis da ba llakze
latj yell-liw ni.
31Da ka' llixhjoe be'nn ka' llayixjwe di'llen naken di'll wxhiyeze,
bxus ka' llnebia ake' kon ke llazrall ake',
na kaksen llazrall be'nn yell kian.
Axha, ¿akre gun re' keten llin lla gak da kenxhien cha'?
Zur Zeit ausgewählt:
Jeremías 5: ZPUPAT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Society of Mexico
Mehr über die Be'nnka'be Xti'll Dios erfahren