Jeremías 7
7
Jeremíazen be'e di'll lo yoda'on
1Xanllon bne'e Jeremíazen na gulle'e le'e: 2Bze lloa reij yodao ke Xanllon, na be'ren ake' ke di'll ki: Yoyte re' sjallare Judán, na llo're lloa reij ka' nench'na llweraore Xanllon, lewzenay di'll 3ke Xanllon nap doxhente yelwaken, Dios ke Israelen: Lewaze wen raw yelnban keren, na legun sre dawen, na guna' latj sure' yell-liw ni. 4Bi wxenlallre be'nn ka' da ziyen, na ne ake': Gani' zu yodao ke Xanllon, gani' zu yodao ke Xanllon.
5Cha wazere wen raw yelnban keren, na gunle sre dawen, na gunle sre dalixhej kone be'nn loelljre ka', 6na cha bi kwiachare be'nn zit ka', be'nn billzu xa' xna, na nor wazeb ka', na bill gutre be'nn ka' bi nap dol latj ni, na bi weraore dios ka' yela, le kone le aken'na llak damar ke re', 7nada' gunlla latj sure gani', yell-li'on bia xustawre ka' ke chnare.
8Re' nxelallre di'll wxhiye ka', na nike bi gukre llunzen ke re'. 9Llbanle, llutre, llgu xtu re', llnere di'll wxhiye, dlliare yar raw dios wxhiyen nzi Baal, llweraore dios ka' bi numbieren, 10na llayull'na lledre lo yodao ni, gan llwerao ake' nadan, na lladsere rawan, na llakyianere gakll gunle kan nawre llunre dan bi llazrallan. 11¿Llakere ke lo yodao kia ni naken lo yo' rill be'nn wan cha'? Nada' ba brera doxhente dani. Nada' Xanle ba bnia ka'. 12Lechaj latj kian nzi Siló, gan nak xhirall gan berawre nada' danell, na lewia kan blleyian xtol damar ke yell kia Israelen. 13Lakse welse ba bdixjwera re' yel kan llun keren, re' bi llzenayre kia, na nike ne' wallisre xtillan. Nada' Xanle ba bnia ka'. 14Kan benksa ke Siló xhirallen, ka gunksa ke yoda'on gan llweraore nadan, dan bena' re', na xustawre ka', na dan nxenlallren. 15Walliya re' kale, kan balliya kale be'nn bich re' ka', xhi'nn xhasoa Efraín'na.
Israelen bi llunen dalixhaj
16Rwe' Jeremías, bi wnabo ke yellni, bi wchiero nada', na' bi gatyoero nada' nike le ake', le bi wzenaya xtillon. 17¿Bi llrero kan llun ake' yell xhen ke Judán, na tnez ke Jerusalén'na? 18Xhi'nn ake' ka' lljatup akbe way, na xa' akbe ka' llxhen ake' yi', na nor ka' llzad ake' kwa nench'na llun ake' yet, na lljaxoa aken raw diozen nsi ake' nor llnebia llia le yeba. Lladyi' ake' nada', na lekse ka' llwe ake' zu ke uvan dios yub akre. 19Axha kere lladyi' akze nadan, le akzen lladyi' kwin ake' kanake llun ake' yelsdo ke kwin akzen. Nada' Xanle ba bnia ka'. 20Kelen'na nada' Xanle, wasja yel llruk kian latj ni, na kone be'nn ka', na kone bayix ka', na kone yay ka' sjalla lixen, na da ka' llarapren. Gaken ke da galninen, na bi wayursen.
21Xanllon nap doxhente yelwaken, Dios ke Israelen, lle'e yell ke'en: Lewe yoyte da ka' llazarallren, na kon da ka' llenere wzeyre, na le gaw beren. 22Le kan babeja xustawre ka' Egipton, bi gull ake' bi da wzey ake', na bi gull ake' gut ake' bayix. 23Tuze da gulla le ake' gun ake', wzenay ake' kia, na kone ka gaka Dios ke ake', na le aken gak ake' yell kia. Na gull aktie gun ake' dan llayal gun aken, nench'na gak wen ke ake'. 24Axha bi bzenay ake' kia, na ben akse kon kan nak yichj raxhdao ake' maren. Loraz da seren ake' nada', na bayechj ake' nada'. 25Kan balloj xustawre ka' Egipton xte na', ba bsela be'nn ka' llayixjwe xtillan kone re'. 26Axha re' bi bzenayre kia, na bentell raxhdaoren warlle ke xustaw re' ka'.
27Rwe' Jeremías, gull ake' yoyte daki, lakse bi wzenay ake' ko'o, besiakse, lakse le aken bi wzenay ake'. 28Gull ake': Latj yell xhen'nin bi llzenayen ke Xanllo Diozen, na bi llenlen wayon nez. Dan nak dalixhejen ba ballojen lo llwaren.
Llwerao ake' loe lsak ka' Jerusalén'na
29Jerusalén, bzoy yich yichjon na bllone'n.
Bllell yiach raw rum llerllib ka',
Le Xanllon llaklle'e be'nn ko'o ka',
ba bsanlalle le ake', na ba bllonlalle le ake'.
30Xanllon ba bnee: Be'nn ka' sjalla Judán ba ben ake' to da bi llazralla: Ba btitj akre lo yodao kian, ba nlla aken loe lsak ka'. 31Gan de rachen nbanle Ben-hinom, na ba benchaw ake' to bkuy gan nzi Tófet nench'na wzey ake' xhi'nn ake' bi biew ka', na bi nor ka', ba ben ake' to da bi gulla le ake' gun ake', na nike bdezen lo yichj raxhdawa. 32Kelen'na nada', Xanle ba bnia, baza llan bill wsi aken Tófet ni Rach ke Ben-hinom, axha wsi aken Rach ga llut ake' be'nn. Na gan nzi Tófet, gana' llajkoach ake' be'nn wat ka', le bill gat latj ga llajkoach ake' le ake'. 33Na be'nn wat ka' gaw chud le ake', na bayix snia ka', na nuno llra' wray le akba. 34Walana yell xhen ka' nbanle Judán, na tnez ka' sjade Jerusalén'na gan llun ake' lni' ka', na gan sjalla ake' llul ake' gan llak yel wachuyna ka', doxhente latjen yegane'n to latj dach yu bill.
Zur Zeit ausgewählt:
Jeremías 7: ZPUPAT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Society of Mexico
Mehr über die Be'nnka'be Xti'll Dios erfahren