Galatia 1
1
Keyagi warinakike wene
1-2Kit Allah aʼburi o Galatia yi ai ndi ai nandorligogi mende nagarlagi nirugi o. An Paulus nagarlagi nirugi ninom, Allah aʼburi amberek o yoma ninom werek mende inebe taʼbokogonat ninom nen wene yi kolal mbalogo kinoba laʼbi wago. An nayonggo ʼbiluk laʼbani wagikemo wagagi eti erlo akoni nen ʼbuk. Nen, ap omanggi wene oba warogo ʼbiluk laʼbani wagike ʼbugat o. Mende, at Yesus Kristus ebe watlagikemo ombae Allah nen ilugut disike mende etnogo imbisak nenat nayonggo ʼbiluk laʼbani wagukama wagagi o. 3Ninombae Allah inom, ninewe Endaganggok Yesus Kristus inom, imbisak inobabut pano etnogo nen pano mende wokisigik, kinendainggen kambukogo kinanggorlem welagik, kagako dogowak o. 4Nit weyak kagarigogi eti paga ninombae Allah akla nen,
“Esigit diluk kagasuwak,” yiluk akla ambasike paga, at Yesus Kristus nen nit akoni agat oba mende yoma ndil ninabigiluk endainggen nenat nit ninobabut weyak mondok kagarigogi mende eti wene at enggaerek nen oba ʼbakalok watlagike o. 5Eti paga, at Allah at pogorako mondok doguwok. Esigit diluk yigi eti,
“Ebeat asuwak,” yu kak,
“Amin,” yigi o.
“Pano wene mbere dek. Omanggiat o,” yiluk yogisasike wene
6At Allah nen, kit Kristus obabut pano mende etnogo kinom kunik dogobagik nen yiluk kinayonggo ʼbisike mende, togot diyalok ibat nomokogo pano wene salek ninat mende oba ebesi liligogi eti an nayuk arigogo. 7Wene pano wene ninat omanggi dogoligogo mondok dekmaat o. Mende, it akoni amberek nen pano wene Kristus nen kagakike wene eti mende ninat kagarogo nuket kinabuwogoluk yokisiligogi eti paga yigi o. 8Mende, ta nen, it ap eti nen a, nit nen a, malaikat mbogot oba mende nen a, pano wene nit nen yokisasugu mende eti togot diyalok ninat mende, yokisagun kalok, Allah nen alem ʼbuwagat o. 9Eti, wene paganeat yokisasigi kak, yabunggane dagakogo yokisak. Ap sani nen wene kit waganggigip mende etnogo togot diyalok ninat mende yokisa wago kalok, Allah nen alem ʼbuwagat o. 10An nane yigi eti akoni nen,
“Kat pano yegen,” yiluk yoknisuwagaluk yiligogo a? At te, Allah nen,
“Kat pano yegen,” yiluk, yoknisuwagaluk yiligogo a. Akoni inakla arlenggen kowagaluk yiligogo kalok, an nebe Kristus anduwanengge yusak degat o. Mende, an Allah akla arlenggen kowagaluk yiligogo o.
“An Kristus nen nayonggo ʼbiluk laʼbanggike,” yiluk yogisasike wene
11Nagarlagi, nirugi o. An nen pano wene yogisilik noko lagi eti akoni inane mende yogisilik noko lagi dek eti kit kinilu asusagat o. 12Wene eti akoni nen yoknikik, yanggul nikik, yisukama waganggigi ʼbuk. At te, wene eti at Yesus Kristus akla limago welagike mende at nenat selekma yanggul nikikemo waganggigi o. 13An alebat nit Yahudi mende ninawene aʼbetogo pago dogolik, akoni Allah aʼburi mende yi aik ndi aik kagarinakik, inebe mondok deget diyawagaluk nobatnerogo kagakik, kagako lagagi mende eti nabok kit kinasuk kolko lagagibat o. 14Wene nit Yahudi mende ninakombalak inom nen yanggul nisasuka mende etnogo pago dogolik, it an nagarlagi ninom ndak-ndak mende nen inakla mbuk negen kagako nggorlek, anat, nobatnerogo kagako lagagi o. 15Esigit diluk mende, at Allah obabut pano etnogo nen pagane nagoya akla nen awan endak nakidek werek nggorlegat, nebe miknakike. 16Miknakikesik nen, pano wene aʼbut Yesus kagakike wene etnogo akoni sikmangge mende yogisilik noko dogowagaluk aʼbut ebe selekma inugut niyasikemo, wene akoni amberek inoba kinok waganggidegat o. 17Nen, it amberek Yesus nen inayonggo ʼbiluk laʼbiyasike mende yomenogo, o Yerusalem werekma inoba dagiluk degat o. Mende, o akoni Arab mende inaguma etoma lagagisik nen, yabunggane niyogoba o Damsyik wagagi o. 18Wagagisik, 3 tahun welagigisik nen, yabunggane Petrus etnogo ebe nilurogo yiluk oba o Yerusalem dagasigi. Dagasigisik nen, at aguma ninggi 15 hari nimbisak etoma welagagu. 19Dogolik, it Yesus nen inayonggo ʼbiluk laʼbiyasike mende yomenogo inebe amberek ninom abuk agidek. Ninewe Endaganggok agot Yakobus etnogo arligat nimbisak abuk agagu. 20Wene an nen kolal mbalogo kinoba laʼbi wagi eti Allah il obaat eberogonat yigi o. Nenggalat yiluk dek o. 21Etoma welagigisik nen, yabunggane o Siria inom, Kilikia inom, wagagi o. 22Eta amot, it Allah aʼburi Kristus inom kunik dogolik o Yudea nandoko laguka mende nen an nebe inonggodegat welaguka. 23Esigit diluk nebe inonggodegat dogolik, it akoni amberek nen nabogat men yisinem inasuk kolko laguka,
“Ap alep nit yi aik ndi aik kagat ninakik, pano wene deget diyawagaluk kagakik, kagako lagike mende etnogo, yogondak akoni pano wene etnogo eberogonat yiluk waganuwagaluk yogisilik liligogo,” yiluk nabok yisinem inasuk kolko laguka. 24Esigit diluk kolko dogolik, an pasik Allah pogorako laguka.
Zur Zeit ausgewählt:
Galatia 1: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.