Galatia 2
2
Petrus agarlagi inom nen, “Paulus Kristus nen ayonggo ʼbiluk laʼbi wagikemo,” yiluk yogisasuka wene
1Esigit diluk yisukama, an 14 tahun welagigisik nen yabunggane Barnabas nimbisak nen at Titus ebe wolok, o Yerusalem lagagu. 2Esigit diluk lagagu eti Allah nen,
“Kat o Yerusalemat dagusak o,” yiluk yoknikike eti paga dagisigisik nen, pano wene eti it akoni sikmangge mende yogisilik noko lagi eti pasik,
“Wene ebe esigit diluk,” yiluk dikogo yogisagaluk, an paganeat nen, yogondak ya nen, nobatnerogo kagako lagi mende eti wirlikogo kagat lasunogo yiluk, it ineugi mende inebe inasokneat ʼbiyalok yogisasigi. 3At Titus eti ebe Yunani mende ninom lagagu mende, it ineugi nggokndek yomenogo nen,
“Kowado kenggarlimo mende mbalusak,” yiluk inane obatnerogo yogokidek. 4Esigit diluk mende, it ninat mende nen, ninagarlagi Allah aʼburi mende negen kagat latluk lelokogo limago unggi witluk nen, inowado inenggarlimo mende mbaluwagaluk yisukaat. Esigit diluk limago unggi witluk nen, nit Kristus ninom omanggi atluk ninasokneat dogolik ninobabut kagarigogi mende eti, it nen,
“Erlo ninggit diluk nen kagat lagakasik kagarigogi,” yiluk erlo kweyasuwogoluk unggi waguka. Esigit diluk kweyaʼbiluk nen inapma ʼbinaniluk, it kagarigogi mende eti kagako dogowagaluk inilenggen ʼbitniya unggi waguka. 5Mende, wene pano wene eti kit kinake panorogo irli waganogo pakisek doguwogoluk, it nen esigit diluk yisinem, nit nen it inane kologo nininggi omanggiat paga,
“E o,” yiluk, yigidek. 6It amberek inakla nen,
“Inendaganggokndek werek, irat,” yiligogi mende eti nen wene an yogisilik liligogo mende etnogo yabunggane ninat yogisilik noko dogowak nen yiluk yoknikidegat. Allah nen akoni inowado sikmangge arlek ilenggen iyalok nen,
“Yi weyak. Yi pano,” yiluk yiligogo dek eti paga, an it eti pasik alebat inendaganggokndek welagaka mende a? Dek a, yiluk, wene munini ebeko lagagi dek o. 7-8Allah nen, at Petrus akoni Yahudi inowado inenggarlimo mende mbalek mende inoba erlok lowagaluk ayonggo ʼbiluk laʼbigik, nen an, akoni sikmangge mende inowado inenggarlimo mende esigit diluk mbalek dek mende inoba erlok lowagaluk nayonggo ʼbiluk laʼbanggik, kagakike eti paga, it ap inendaga nggokndek eti inakla nen,
“Allah nen Petrus nen pano wene nit akoni Yahudi mende yanggul nisawagaluk ayonggo ʼbisike kak, at Paulus nen pano wene it akoni sikmangge mende esigit diluk yanggul isawagaluk ayonggo ʼbisikemo kogo,” yiluk enggagat didinangguka. 9Esigit diluk didinanggukasik nen, it Yakobus inom, Petrus inom, Yohanes inom, Allah aʼburi nen,
“Nit nineugi it werek,” yiluk yiligogi mende nen,
“Kit nen, wene akoni sikmangge mende yogisilik lano o. Nen, nit nen akoni Yahudi mende inake yogisilik lugun. Ninom kunik mondok kagako doguwok,” yiluk nen, Barnabas nimbisak nininggi pak-pak keyagi watninakuka. 10Keyagi watninakukasik nen, ninasuk warogo negen wene men arlek yoknisasuka,
“Akoni nit mende amberek inamende dek mende yoma inoba eberek dogolik, yamagiyasi dogono,” yiluk, yoknisasuka eti, an nen esigit diluk nakla arlenggen kasi dogolik nobatnerogo kagarigogo mendeat yoknisasuka o.
At Paulus nen Petrus kagako lagike mende pasik ʼbukakogo mberikike wene
11Mende, at Petrus o Antiokia wagikesik nggorlo kagako lagikemo, an nen,
“Kat kagako lagan eti weyak o,” yiluk, ʼbukakogonat mberikigi. 12Eti men kagako lagike paga mberikigi. Alebat, at Yakobus nen agoromi laʼbiya wagike mende awan wagidek werek nggorlek, at Petrus etnogo it akoni sikmangge mende inom kimbiri dambukogo nasi laguka. Mende, it wagukasik oba nen, at Petrus akla nen,
“Nit mende inowado inenggarlimo mbalek mende amberek nen nena yoknisugun,” yiluk, ayuk nen it inom kimbiri ninggidek togot diluk selokogo dukisike o. 13At ane mbere dogolik selokogo dukisike kak, it akoni Yahudi mende amberek inebe taʼbokogonat inom dukisi dogolik, at Barnabas etnogo akla nggagalogo yabunggane it inane mbere mende eti inom lambel diluk dukisikeat. 14Esigit diluk dukisukama, an nakla nen,
“Wene eberogonat mende, pano wene yi mendeat, it inobabut, pano wene yanggul isasi dogolik kagasusak mende kagarigogi dek kigi,” yiluk, akoni taʼbokogonat inil oba Petrus wene men yiluk yogokigi,
“Kat kebe Yahudi mendeat ogwe, akoni Yahudi mende kagarigogi kak kagakidek, akoni sikmangge mende nen kagarigogi kak kagako dogoligat, it sikmangge mende yogisasi dogolik,
Kit kinobabut akoni Yahudi mende kagarigogi kak, inobabut waganogo kagako dogono, yiluk obatnerogo yanggul isaligogon eti nenaluk,” yiluk ʼbukakogo mberikigi.
Akoni Yahudi mende inom, sikmangge mende inom, inendainggen Kristus oba panggot disinem, ndil inabusagat o,” yiluk yogisasike wene
15Nit ninebe Yahudi mendeat endak lagagu. It sikmangge weyak kagarigogi mende eti kak endak lagagu ʼbuk. 16Mende, akoni wene Allah nen ninasuk wakike mende etnogo motogo kagakonem, Allah nen wene inoba mende nggorogo togot diluk inom yabunggane suguluk kunogo ʼbiyiligogo dek. Mende, inendainggen Yesus Kristus oba panggot disinem arlek, kunogo ʼbiyiligogo yiluk kiniluat o. Wene eti pasik Allah wene paga kolal men mbalek werek,
Akoni amberek nen mot-mot kagakonem, wene inoba mende nggorogo togot diluk, inom yabunggane suguluk kunogo ʼbiyiligogo dek o, (Mzm. 143:2)
yiluk kolal mbalogo ʼbisuka eti paga, nit nen wene Allah nen ninasuk wakike mende etnogo motogo kagakonem ʼbuk. At te, ninendainggen Kristus oba panggot disinem wene ninoba mende nggorogo togot diluk at ninom suguluk kunogo ʼbinanuwagaluk, ninendainggen Kristus Yesus oba panggot disugu o. 17Nit Kristus ninom kunggonem, Allah nen wene ninoba mende nggorogo togot diluk, ninom yabunggane suguluk kunogo ʼbinanuwagaluk, ninobatnerogo walkasi dogoligat, ninobabut akoni sikmangge mende inobabut kagarigogi kak ninom ndak-ndagat werek, yiluk enggagat arigogo eti paga, nit weyak kagarigogi mende eti erlo at Kristus yiluk yusak a? Mondok dek o. 18O miyal diluk yabunggane paligogi kak, an nen nit akoni Yahudi kagarigogi mende arat togot diyasigi mende yabunggane kagako dogolepma, Allah wene sagalogo togot diluk kagarigogo mende yiluk enggagat atlep o. 19Mende, wene Allah nen ninasuk wakike mende eti nen nebe warek mende negen kagat nakemo, an nebe niluk dogolik Allah ake kagako dogigiluk, wene eti pasik warek negen werek o. Eti Kristus ebe o paga mendiluk wakuka eti nimbisagat ninakuka o. 20Nen, yogondak nebe niluk werek yi, nenggaerek nobatne paga werek ʼbuk. At te, at Kristus at nakla dogolik iluk dogoligogo o. At ebe Allah aʼburat dogolik, nebe naʼbuwa nen an pasigat,
“Nasuwak,” yiluk akla ambasike paga ebe wakuka o. Nen, an nendainggen at oba panggot diluk werekma, at ebe nakla werekma, niluk werek o. 21Allah obabut pano nen panot ninabigogo wene eti an nen sagalogo togot diligogo dek. Wene Allah nen ninasuk wakike mende etnogo paga, wene ninoba mende nggorogo togot diluk ninom suguluk kunogo ʼbinanilepma, Kristus watlagike eti yugunat wirlikogo watlatlep o.
Zur Zeit ausgewählt:
Galatia 2: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.