2Korintus 13
13
At Paulus nen wene ilugun oba inasuk wakik, keyagi warinakik, kagakike wene
1An alep ninggi mbere paga kinoba wagagisik nen, yabunggane omanggi wisigin o. Allah wene paga kolal men yiluk mbalek werek,
“Akoni nen it amberek yi wene ndi wene inoba ʼbisi kalok, akoni inebe mbere a, kenagan a, weyak kagako inilenggen kega mende nen,
eberogonat, yisi kalok, eberogonat, yiluk didusak,” (Ul. 19:15)
yiluk yisike eti paga, an witluk nen esigit dilugat kagasi wisigin o. 2An alep ninggi omanggi paga wagagisik oba nen yabunggane wagagi eti paga, it akoni mende amberek alebat weyak kagakuka mende inom, nen it amberek o etoma mende inebe taʼbokogonat inom, inasuk wakigi mende yogondak an nebe walegat dogolik inakla eberogo yogisaginat o. An yabunggane witluk nen, it eti sebelogo ʼbiya wisigin dek. At te, wene inoba ʼbi wisigin o. 3Kit nen,
“Paulus eti, Kristus akla dogolik yiligogo a? Dek a,” yiluk naren mbaluwogoluk yegep eti, nebe wagonem enggagat didanugun o. At Kristus kit kagarigogi eti ake ebe erlok dek nen obakanini puk arigogo ʼbuk. At kit kinom dogolik obatneat werek o. 4At Kristus ebe erlok dek werekma o paga mendiluk wakuka mende, at Allah obatne paga ilugut disikemo ilugut dogoligogo. Eti kagat, nit at ninom kunik dogolik erlok dek welago mende, at Kristus ninom kunik niniluk dogolik nen, Allah obatne paga kit kinake kagasi wisugun o.
5Kit nen,
“Nit ninendainggen Kristus oba panggot disugu etnogo panggoksegat werek a? Dek a,” yiluk kinenggaerek nen kinaren dikogo mbalano. Mbalasi dogolik, erlok dek agidek kalok,
“Yesus Kristus ninakla werek,” yiluk enggagat kugun o. 6Nen, kit nen, nit ninaren mbalko dogolik,
“Paulus agarlagi inom inaren mbalko mende erlok dek agidek. Kristus nen eberogonat inayonggo ʼbisikemo,” yiluk enggagat niyasi lagap ambigi. 7Nit nen, kit weyak omanggi kagasunogo yiluk, Allah ayonggo ʼbiligogi o. Eti, kit nen kinilenggen niyasi dogolik,
“Paulus agarlagi inom pano kagarigogi,” yiluk ninaren mbalogo nen yisi dogobagik nen yiluk nit yiligogi dek o. Nit ninaren mbalkonem, kit nen,
“It erlok dek kagat lagaka,” ambegep kalok, yugunat. Togot diyano o. Kirat pano kagako dogobagik nen yiluk kit kinake Allah ayonggo ʼbiligogi o. 8Eti, nit nen ebe wene sagalusak, erlok dek. At te, legesusagat werek o. 9Nit erlok dek werek nggorlek, kit kinobatne werek dogusak kalok, pano yiluk, ninakla arlenggen kiligogi. Esigit diluk pasik, kit kinendainggen ʼbogokogo korle asuwagaluk, Allah ayonggo ʼbiligogi o. 10Eti paga, nebe walegat dogolik wene yi kolal mbalogo laʼbiligogo. Nebe yabunggane witluk nen, ninom dogolik, nane korleyak mbet kisaunogo yiluk, kolal esigit diluk mbalogo ʼbiligogo o. Ninewe Endaganggok nen obatne woknikikemo inderek werek eti, kit kinebe weyagat kinabuwagaluk ʼbuk. Kinendainggen korlet kinabuwagaluk inde danggike o.
11Nagarlagi nirugi o. Wene ilugun oba arat men yokisak. Kinakla arlenggen kigik, kinendainggen ʼbogokogo korlet dakigik kagako dogono o. Wene kinasuk warik wagi eti, kinasuk panorogo kolino o. Kinendainggen omanggiat dogolik, kinom dambukogo dogono o. Esigit diluk kagako dogogun kalok, Allah akoni inaʼbuwa kigik, inom dambukogo pano ʼbiyigik, kagarigogo mende etnogo kinanggorlem dogogin o. 12Kit-kit nen, Allah ake keyagi kinambe sarluk wat-wat kagarik lano o. Allah aʼburi yoma mende taʼbokogonat nen, keyagi watkinakaat o. 13Ninewe Endaganggok Yesus Kristus obabut pano etnogo nen panot kinakik, ninombae Allah nen kinaʼbuwa kigik, Agurengge nen dambukogo ʼbinagagik, kagako dogowak o.
Zur Zeit ausgewählt:
2Korintus 13: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.