1 Korinti 15
15
Guntǝm Kiristii A Bwaa
1A kǝngkɔ, kambɔ, mǝ bʊʊla jem bʊʊla fulon kɛl lǝmɨ nɨ mǝ sʊwa jeni, wʊnɨ jǝ́ yoi, wʊnɨ jǝ́ bwangtǝnɨ. 2Nǝn gɔ jǝ bʊʊ jen nɛ nǝnɨ, na jǝ́ ta fulon kɛl lǝmɨ nɨ mǝ kiyo jemi a bʊm bʊmɨ. Na jǝ́ ta bɔ a kwamɨ, nǝtǝm bɨlǝngkɛlɔ jenɔ nǝn tɨkǝgaɨ, n jǝl nǝn kwan.
3Kɛl nɨ a laa jǝl dangǝn wʊnɨ mǝ sʊwa jeni, nǝn gɔ nʊ nɨ mǝ yoi, gɔ, Kiristi a bʊla a dul bwɨlangkɛl bǝn kanga mʊlalɨ kɛl Kwaamaɨ a sʊwaɨ. 4Nǝngɔ ja fʌl gǝnɨ. A gun a kum na taalɔ gǝm kanga langǝn bwangǝn Kwaamaɨ a sʊwaɨ. 5A nʊng Bitrus dul gǝnɔ, nǝngɔ la a nʊng bɛtɔ twama gǝnɔ nɨ kʊb jeli yoi. 6Nǝngɔ la a nʊng kambɔ nɨ ja shu fʊlkʊb nʊɨ dul gǝnɔ naagɔ wini. Kɔrɔ jinɔ wo ba la nǝn kǝngkɨɨ, kaamɨ a daa dum. 7Nǝngɔ a nʊng Yakubu dul gǝnɨ. Nǝngɔ a nʊng dul gǝnɔ a daagɔ tangǝn bɛtɔ twamagɔ woi. 8Nǝn gul gwamɨ, nǝngɔ a nʊng ɨɨ, mǝ nɨ ja bʌ i bɔ na tangǝn kambɨɨ.
9Nǝmǝ mǝ maa dǝm a mʊgɔ bɛtɔ twamagɨɨ, mǝ la bɔ ja sʊwa gɔ mǝ bwɛ twama, jʊ a bwɨɨ n nǝ mʊrkalɨ nǝb bwangtǝm Kwaamaɨ gaalan. 10N lǝma Kwaamaɨ mǝ yǝlam nyɨɨ. Lǝma nɨ a maa mɨɨ, mɨ nǝn kwan. N laa ji maajɨ gwam, n ke bɔ mǝ, n lǝma Kwaamaɨ nɨ jǝbɔ mɨɨ. 11Na nǝmɨɨ, na nǝjii, nǝn sʊwa fulon kɛl lǝmɨgɔ nyɔ, n jʊ jǝ́ nǝ bɨlǝngkɛlɨ.
Guntǝm A Bwaa
12Jǝ kiyo fulon kɛl lǝmɨ Kiristii lɛ gɔ, Kwaama a gung gǝn a bwaaɨ, a maa nyǝn tangǝn jenɔ sʊwa lɛ gɔ, mɨ guntǝm bwaa woi? 13Na na mɨ guntǝm bwaa woi, na Kwaama a gung bɔ Kiristi. 14Na na Kwaama a gung bɔ Kiristii, na fulon kɛl nɨ nǝn kiyoi, a yɔ nǝn kwan. Nǝtǝm bɨlǝngkɛl jenɔ a yɔ nǝn kwan tag. 15A yǝlam nǝn gabakɛl lɛ a dul Kwaamaɨ, jʊ a bwɨɨ nǝn sʊwa nǝn gɔ Kwaama a gung Kiristi, a wʊnɨ a gun bɨɨ, na na n bɨlǝngkɛlɨ Kwaama a gung bɔ bwaagɔ. 16Jʊ a bwɨɨ na na Kwaama a gung bɔ bwaagɨɨ, na Kiristi a gun bɔ. 17Na na a gung bɔ Kiristii, na nǝtǝm bɨlǝngkɛl jenɔ a yɔ nǝn kwan, jǝ́ nǝngǝn nǝn bwɨlangkɛl jenɔ. 18Na na gǝ na nyɨɨ, nǝb nɨ a daa dum jǝ na a Kiristii, na ja kala nǝn kwan. 19Na na yatǝm nǝl bǝnɔ a daa Kiristi woi n kɛl kʊlɨ nɨ kwaagɨɨ, na bǝ laa nǝbɔ gwam yǝlamtǝm jǝ bʊnatǝm.
20N bɨlǝngkɛl Kwaama a gung Kiristi a bwaa. Nǝn gɔ a yǝlam nǝ tɨkǝga a nǝb nɨ a bʊlaɨ. 21Kanga bwaagɔ a bɛ a gola nǝlɨ, guntǝmɔ a bwaaɨ bɛ a gola nǝlɨ tag. 22Kanga nɨ gwam bǝ bʊla a kɛl dul Adamui, na nyɔ, Kwaama fulo nǝn bǝn gwam a kɛl dul Kiristii. 23Gwam bǝnɔ Kwaama gung bǝn gung win win. Kiristi nǝn gɔ tɨkǝga guntǝmɨ, na a yǝla a bɛɨ, nǝbam gǝnɔ gwam gun gun.
24Dɨltǝm yooligɔ bɛ bɛ, nǝn kwama a kalǝm fɔlɔn Mammɨ gwam jǝbɔ kwaan gǝnɨ, sǝla nǝn gul a nǝ Kwaama Tɛtɛ fɔlɔnɔ. 25Jʊ a bwɨɨ Kiristi maa maa fɔlɔnɔ, ba la nǝn kwama nɨ falam nǝb kiim gǝnɔ lɛɨ. 26Nǝ kii na gulɔ gǝ kal lɛɨ, nǝn bwaa. 27A mʊla mʊlaɨ gɔ, “Kwaama a ya kanjǝlɔ gwam a mʊgɔ kwaan gǝn.” Na ja sʊwa gɔ, “Kwaama a bǝla kanjǝlɔ gwam a mʊgɔ kwaan gǝnɨ,” gǝ na a talɨ, nʊ nɨ Kwaama a bǝla kanjǝlɔ gwam a mʊgɔ kwaan gǝnɨ, Kwaama a na bɔ a mʊgɔ gǝn. 28Gǝ nʊ nɨ Kwaama a bǝla kanjǝlɔ gwam a kwaan gǝnɨ, bwɛ nǝn kang gǝn tǝgǝn a bǝla dul gǝnɔ a daa nʊ nɨ a bǝla kanjǝlɔ a mʊgɔ kwaan gǝnɨ. Kwaama nǝn gɔ n dul kanjǝlɔ gwamɨ.
29Na na mɨ guntǝm wo a bwaaɨ, wɛ bwɨ lɛ nǝn nǝb nɨ ja yʊ ji mwɛ sagsag a dul nǝbɔ a bʊla bʊlaɨ? Na na mɨsɔ jǝ gung nǝb nɨ lɛ a bʊla bʊlaɨ, n wɛ a bwɨ jǝ yʊ kaamɨ mwɛ lɛ a kɛl dul nǝb nɨ a bʊla bʊlaɨ? 30Na gǝ na nyɨɨ, n wɛ a bwɨ nǝn dǝg dul nǝnɔ lɛ a bwaa kwangkwangɨ? 31Mǝ sʊwa jen nɛ kambɔ, n kɛl lɨyal nɨ mǝ maa lɛ nǝn jen a mʊgɔ Kiristi Yesui, Tɛlalɔ bǝn, kwangkwang mǝ miyo kʊlɨ mɨ lɛ a bwaaɨ. 32Na mǝ losam jǝbɔ namɔ kuuli a Afisa a kɛl dul nyatǝm nǝfilii, n bwili wɛ mǝ nyaɨ? Na na ja gung bɔ bwaagɨɨ, na
“Ya bǝ ja lɛ, ya bǝ nɔɔ lɛ,
kanga bǝ nyǝm fʌng bǝ bʊla bʊlaɨ.”
33Ka ja swag jen nɛ! “Yɨm jǝbɔ nǝb bwɨlan gǝ kal kal nǝ nya.” 34Jǝ́ yǝla jǝ́ bɛ a bʊʊlalɨ nyan jenɔ gǝm. Jǝ́ bǝla yɨmɔ wo a mʊgɔ bwɨlangkɛl. Kaam jenɔ a nyǝm bɔ Kwaama. Mǝ sʊwa nyɔ, sǝ jǝ́ nyʊwa gunidul.
Guntǝm Bʊtɔ
35Kaa nǝl bʌ bʌ gɔ, “Jǝ gung nǝb nɨ a bʊlaɨ nyǝn? N jelkalǝng wɛ jǝ jel lɛ nǝnɨ?” 36Mʊ nǝ swɛlalɨ! Jʊ nɨ mʊ kwalɨ, mɨsɔ gi lɛ, na a bʊla bɨɨ. 37Jʊ nɨ mʊ kwalɨ, mɨsɔ gi lɛ nǝn bʊtɔ jʊgɔ mʊ kwalɨ, n nu gǝn nǝn kwan, na jaamɨ, na kaa dʊʊm nǝn kwanɨ. 38Kwaamagɔ nǝ gǝn bʊtɔ nɨ gǝ swɨ lɛɨ. Dʊʊmɔ gwam Kwaama gǝ nǝ ji bʊtɔgɔ nǝn dʌmʌn. 39Ke bɔ nya namɔ gwam wini. Nǝfitʌmɔ nǝngǝn a jinɔ, yʊwaltɨnɔ nǝngǝn a jinɔ, lǝbɨtɨnɔ nǝngǝn a jinɔ, jʌngitɨnɔ tʌji nǝngǝn a jinɔ. 40Kanjǝl dʌbʌlɔ wo, kanjǝl tǝmɔ wo. Dʊʊlǝn a dʌbʌlɔ kwaagɔ, a tǝmɔ tǝgǝn kwaagɔ. 41Dʊʊlǝn nu kwamagɔ kwaagɔ, a bwaalagɔ kwaagɔ, a nyanyamɨtɨnɔ kwaagɔ. Kaa nyanyamɨ gǝ laa laa kaa nʊngtǝm a dʊʊlǝnɔ gǝm.
42Na nyɔ tag a guntǝm bwaagɔ gǝm. Ja kwal ji nǝn bʊtɔ bʊtatǝm. Jǝ gun nǝn bʊtɔ nɨ mɨsɔ bʊta lɛ woi. 43Ja kwal nǝn sogan. Jǝ gun nǝn dʊʊlǝn. Ja kwal mɨ nǝn kwaan. Jǝ gun nǝn kwaan. 44Ja kwal nǝn bʊtɔ nǝfilii. Jǝ gun nǝn bʊtɔ yʊwa.
Na bʊtɔ nǝfiligɔ woi, bʊtɔ yʊwagɔ wo. 45A mʊla mʊlaɨ nyɔ gɔ, “Nǝ tɨkǝgagɔ nǝn Adamu a yǝlam nǝn kʊlɨɨ.” Adamu gulɔ n yʊwa nɨ nǝ kʊlɨ lɛɨ. 46Nʊ nɨ n yʊwaɨ a bɛ bɔ dɨn, n nǝ bʊtɔgɔ a bɛɨ. Nǝn gul nǝngɔ la nʊ nɨ n yʊwaɨ a bɛɨ. 47Nǝfili na tɨkǝgagɔ a jel a tǝm, n boli. Na yogɔ a jel a dʌbʌl. 48Kanga nǝfitʌmɔ gwam nǝngǝn nǝn bʊtɔ tǝm na a Adamui, gǝ na nyɔ bʊtɔ dʌbʌlɔ yǝlam na a Kiristii. 49Kanga ja bʌ bǝn bǝ do jelkalǝng nǝfilii, n kanga bǝ do jelkalǝng nʊ nɨ lɛ a dʌbʌli.
50Mǝ sʊwa jen kɛl nɨ kambɔ, mɨsɔ maa lɛ bʊtɔ jǝbɔ tʊʊm a nya kʊla fɔlɔn lɔ Kwaamaɨ. A na nyɔ tag, bʊtɔ bʊtatǝmɔ mɨsɔ nya kʊla lɛ a daa nɨ mɨ bʊtatǝm woi. 51N wɔ mǝ sʊwa jen kaa jʊ nɨ lɛ ja yʊ yʊɨ. Ke bɔ gwam bǝnɔ bǝ bʊla lɛɨ, gwam bǝnɔ Kwaama fʌto bǝm fʌto bʊtɔgɔ. 52Bwɨ bwɨ nyɔ tʌgo a kang, na kʊmtǝm nu, a nyʊwatǝm guutǝm jum na gulɔ. Jǝ guu guu jumɔ, Kwaama gung gung nǝbɔ a bʊlalaɨ nǝn bʊtɔ nɨ mɨsɔ bʊta lɛ woi. Kwaama fʌto fʌto bʊtɔ bǝnɔ. 53Bʊtɔ nɨ bʊta lɛɨ, Kwaama fʌto fʌto nǝn bʊtɔ nɨ mɨsɔ bʊta lɛ woi. Bʊtɔ nɨ bʊla lɛɨ, Kwaama fʌto fʌto nǝn bʊtɔ nɨ mɨsɔ bʊla lɛ woi. 54Na bʊtɔ nɨ bʊta lɛɨ a fʌto bʊtɔ nɨ mɨsɔ bʊta lɛ woi, na bʊtɔ nɨ bʊla lɛɨ a fʌto bʊtɔ nɨ mɨsɔ bʊla lɛ woi, kɛl nɨ ja mʊlaɨ a yii, wʊnɨ sʊwa lɛ gɔ,
“Ja kaa bwaagɔ,
ja ku jelʌn a dul gǝn.”
55“Mʊ bwaagɔ,
mʊ ku jelʌn a fee?
Mʊ bwaagɔ,
twalǝm mʊnɔ n fee?”
56Bwɨlangkɛlɔ nǝn gɔ n twalǝm bwaagɨɨ. Diilɔ nǝn gɔ n kwaan bwɨlangkɛlɨ. 57Buutǝm kangɔ na a Kwaamaɨ, wʊnɨ a dǝg bǝn bǝ ku jelʌn a gola Tɛlalɔ bǝn Yesu Kiristii.
58Gǝ na nyɔ, kɛtǝlam mɨ nɨ mǝ swɨ lɛɨ, jǝ́ tɨ nǝn kwaan, ka kaa jǝl ya mǝg jen nɛ, kwangkwang jǝ́ maa maajɨ Tɛlalɔɨ nǝn kwaan bʊtɔ, jʊ a bwɨɨ jǝ́ nyǝm gaalan jenɔ a kɛl dul Tɛlalɔɨ, mɨsɔ yɔ lɛ nǝn kwan.
Valgt i Øjeblikket:
1 Korinti 15: DBD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation