1 Korinti 14
14
Nǝtǝm Lǝma Nyiyo Jǝbɔ Kuwotǝmkǝga
1Jǝ́ kwam tʌgo a swɨkanɔ gǝm. Jǝ́ ya kwaan a saatǝm kanjǝl nǝtǝm lǝma Yʊwa. Jǝ́ do kuwotǝmkǝgagɔ a laa ji. 2Nʊ nɨ sʊwa kɛl lɛ nǝn kaa nyiyoi, ke bɔ nǝb gǝ sʊwa kɛl lɛ jǝbɔ jii, gǝ sʊwa Kwaama. Mɨ nʊ nɨ wo a nyǝm jʊ gǝ sʊwa lɛɨ, jʊ a bwɨɨ n jʊ nɨ ja yʊ yʊɨ gǝ sʊwa lɛ a gola Yʊwa Kwaamaɨ. 3Nʊ nɨ maa kuwotǝmkǝga lɛɨ, n nǝb gǝ sʊwa kɛl lɛ jǝbɔ jii, sǝ a nǝ ji kwaan, a kʊʊ jim nǝl, sǝ a nǝ ji kʊtǝm nǝl. 4Nʊ nɨ gwam sʊwa kɛl lɛ nǝn kaa nyiyoi, gǝ fɛ dul gǝn. Nʊ nɨ maa kuwotǝmkǝga lɛɨ, gǝ fɛ mʊrkalɨ nǝb bwangtǝm Kwaamaɨ. 5Mǝ swɨ lɛ gwam jenɔ jǝ́ sʊwa kɛl nǝn kaam nyiyo. Jʊ mǝ swɨ lɛ a laa jǝlɨ, jǝ́ maa kuwotǝmkǝga. Nʊ nɨ a maa kuwotǝmkǝgaɨ, a laa nʊ nɨ a sʊwa kɛl nǝn kaam nyiyoi. Na kaa nǝl fɛta fɛta nǝbɔ jʊ nɨ gǝ sʊwa lɛɨ, ga fɛ mʊrkalɨ nǝb bwangtǝm Kwaamaɨ.
6Kambɔ, na n bɛ jem mǝ sʊwa kɛl lɛ nǝn kaam nyiyoi, n wɛ maa jem lɛɨ, na mǝ bɛ jem bɔ nǝn jʊ Kwaama a nʊng ɨɨ jǝbɔ nyǝmtǝm jǝbɔ kuwotǝmkǝga jǝbɔ mɛlalɨ kɛl Kwaamaɨ? 7Na kanjǝl nɨ mɨ nǝn kʊlɨɨ, bǝ jwal jǝbɔ gǝlǝnggǝlǝng, diil jinɔ mɨ jel lɛ dangǝnɨ, maa nyǝn nǝl nyǝm jʊ lɛ jǝ guu lɛ jǝbɔ jʊ jǝ ga lɛɨ? 8Na ja guu bɔ jumɔ nǝn diili, nuwo fɛka lɛ a jel kuni? 9Gǝ na nyɔ a daa jen woi. Na jǝ́ sʊwa kɛl nǝn kaa nyiyo, a wʊnɨ ja nyǝm bɨɨ, maa nyǝn nǝl nyǝm jʊ lɛ jǝ́ sʊwa lɛɨ? Jǝ́ sʊwa kɛl nǝn kwan! 10Bɨlǝngǝn nyiyotɨnɔ nǝn dʌmʌn a yooli nɨ, mɨ nʊ nɨ wo mɨ nǝn jʊ nʊng lɛɨ. 11Na mǝ nyʊwa bɔ nyiyo nǝlɨ, n yǝlam faabɨ a daa nʊ nɨ sʊwa ɨ kɛl lɛɨ. Nʊ nɨ sʊwa ɨ kɛl lɛɨ, a yǝlam faabɨ a daa mǝ woi. 12Gǝ na nyɔ a daa jen woi. Na nɨ jǝ́ saa nǝtǝm lǝma Yʊwagɨɨ, jǝ́ ya kwaan a fɛkalɨ mʊrkalɨ nǝb bwangtǝm Kwaamaɨ.
13Nʊ nɨ sʊwa kɛl lɛ nǝn kaa nyiyoi, bɛ ga maa keli, Kwaama a nǝ gǝn lǝma fɛtatǝmɔ. 14Na n maa keli nǝn kaa nyiyoi, n dʊʊmɨ mɨ maa keli lɛɨ, bʊʊlalɨ mǝndɨ a maa mɨ bɔ kaa jǝl. 15Mǝ maa nyǝn? Mǝ maa keli nǝn dʊʊmɨ mɨ, mǝ maa nǝn bʊʊlalɨ mɨ tag. Mǝ ma nafɨ Kwaamaɨ nǝn dʊʊmɨ mɨ, mǝ ma nǝn bʊʊlalɨ mɨ tag. 16Na mʊ bǝlá Kwaama nǝn dʊʊmɨ mʊnɔ kwaagɨɨ, maa nyǝn nʊ nɨ a nyǝm bɨɨ sʊwa lɛ gɔ, “A daa nyɔ,” a dul buutǝm kang nɨ mʊ maa lɛɨ, na a nyǝm bɔ jʊ nɨ mʊ sʊwa lɛɨ? 17Ń buu Kwaama gǝm kang dangǝn sul, kɨla mɔ a sʊ bɔ nǝn kaa jǝl. 18N buu Kwaama gǝm kang mǝ sʊwa kɛl lɛ nǝn kaam nyiyo a laa a jenɔ gwam. 19A mʊrkalɨ nǝb bwangtǝm Kwaamaɨ, laa mɨ laa jǝl n sʊwa katɨgɔ nʊ wʊnɨ nǝbɔ nyǝm lɛɨ na n mɛla jimi, na mǝ sʊwa sʊwa kaamɨ katɨgɔ fʊlkʊblǝn kʊb nǝn kaa nyiyo nɨ ja nyǝm bɨɨ.
20Kambɔ, ka jǝ́ maa lɛ bʊʊlalɨ bɛtɨɨ. A daa shil, bɛ jǝ́ yǝlam na bɛtɔ fetʌn. A daa maatǝm bʊʊlalɨ, bɛ jǝ́ yǝlam na dʊʊm. 21A mʊla mʊlaɨ a mʊgɔ diilɔ gǝm sʊwa lɛ gɔ,
“Mǝ sʊwa sʊwa kɛl
jǝbɔ nǝb nɨ a gola nǝb nɨ
nǝngǝn nǝn nyiyo fɨɨ,
jǝbɔ nyiyo faabǝmɨ,
mɨsɔ jǝ nyʊwa ɨ lɛ tag,
a sʊwatǝm Tɛlalɔɨ.”
22Nyiyotɨnɔ n jǝ nʊngtǝm, ke bɔ a daa nǝb nǝtǝm bɨlǝngkɛlɔ woi, na a nǝb nɨ a nǝ bɔ bɨlǝngkɛlɨ. Kuwotǝmkǝga gɔ na a nǝb nǝtǝm bɨlǝngkɛlɨ, ke bɔ a nǝb nɨ a nǝ bɔ bɨlǝngkɛlɨ. 23Na mʊrkalɨ nǝb bwangtǝm Kwaamaɨ gwam a mʊrkaɨ, jǝ sʊwa kɛlɔ lɛ nyiyogɔ nǝn dʌmʌni, na kaam faabǝm, jǝbɔ nǝb nɨ ja nǝ bɔ bɨlǝngkɛlɨ ja dɔɨ, mɨsɔ jǝ sʊwa lɛ gɔ wabɨ twɛl jen nɛɨ ka? 24Na gwam jǝ́ maa kuwotǝmkǝga lɛɨ, kaa nʊ nɨ a nyǝm bɔ bɨlǝngkɛlɨ jǝbɔ nʊ nɨ a nyǝm bɔ jǝlɨ a dɔɨ, kɛl jenɔ dɔ gǝn dɔ a nyǝm gɔ gǝ nǝ bwɨlangkɛl, jǝ maa gǝm maa borang. 25Jʊ nɨ ga yʊ a nǝl gǝnɨ, jel jel a talɨ. Gǝla jʊng jʊng a bǝlá Kwaama, sʊwa lɛ gɔ, “Bɨlǝngǝn Kwaama gǝ na a kʊm jen.”
Jǝ́ Maa Bǝlátǝmɔ Kanga A Daa Tʌgoi
26Kambɔ bǝ maa jʊ nɨ nyǝn? Kwama jǝ́ mʊrka dakinii, kaa gǝ ma nafɨ bǝlátǝm Kwaamaɨ, kaa gǝ maa mɛlalɨ kɛl Kwaamaɨ, kaa gǝ sʊwa jʊ Kwaama a nʊng gǝnɨ, kaa gǝ sʊwa kɛl nǝn kaa nyiyo, kaa fɛtatǝm nyiyo. Bɛ jǝ́ maa kanjǝlɔ gwam sǝ a fɛ mʊrkalɨ nǝb bwangtǝm Kwaamaɨ. 27Na kaamɨ sʊwa sʊwa kɛl nǝn kaa nyiyoi, ka shu lɛ nǝbɔ yo, na lada bʊrɨ nǝbɔ taal. Ji tʌji na nʊ nɨ a sʊwaɨ, kaa a bwangtǝn a fɛta. 28Na mɨ nǝ fɛtatǝm woi, bɛ ja yɨ shig a mʊgɔ mʊrkalɨ nǝb bwangtǝm Kwaamaɨ, gǝ sʊwa dul gǝn jǝbɔ Kwaama.
29Nǝbkuwotǝmkǝgagɔ, nǝbɔ yo a yɔ nǝn a taal ja sʊwa kɛl, tangǝnɔ ja dʌng kɛl jinɔ. 30Na Kwaama a nʊng kaa nǝl win wʊnɨ yǝm yǝmɨ, nǝ tɨkǝga nɨ sʊwa kɛl lɛɨ, bɛ ga yɨ shig. 31Gwam jenɔ jǝ́ maa maa kuwotǝmkǝga win win sǝ nǝbɔ a mɛla, ja nya kʊʊtǝm nǝl. 32Yʊwa kuwotǝmkǝgagɔ gǝ na a daa nǝbkuwotǝmkǝgagɔ woi. 33Jʊ a bwɨɨ, Kwaama n ke bɔ Kwaama bwaalɨ, n Kwaama yɨm kwamɨgǝn.
Kanga kaam mʊrkalɨ nǝb bwangtǝm Kwaamaɨ maa lɛɨ, bɛ jǝ́ maa nyɔ tʌjen. 34Bɛ nɔɔtǝmɔ a yɨ shig a mʊrkalɨtɨn nǝb bwangtǝm Kwaamaɨ, ja nǝ ji bɔ gola sʊwatǝm kɛl. Bɛ ja bwangtǝn nǝb dʊʊmɔ kanga diil Musaɨ a sʊwaɨ. 35Na kaa jǝl wo a wʊnɨ jǝ swɨ lɛ ja nyǝmɨ, bɛ ja bʌ batǝlam jinɔ a lɔ, jʊ a bwɨɨ n jǝ gunidul nɔɔlɨ a sʊwa kɛl a kʊm mʊrkalɨ nǝb bwangtǝm Kwaamaɨ.
36N dul jen kɛl Kwaamaɨ a tǝlɨ ka? N daa jen woi kɛl Kwaamaɨ a la kwaagɨɨ ka?
37Na kaa nǝl do dul gǝnɔ lɛ gɔ gǝ nǝkuwotǝmkǝgaɨ, na gǝ na nǝn nǝtǝm lǝma Yʊwaɨ, bɛ ga nyǝm, jʊ nɨ mǝ mʊla jem lɛɨ n diil a daagɔ Tɛlalɔ woi. 38Na a kɔ nyʊwatǝm jʊ nɨɨ, gǝ tǝgǝn mɨsɔ jǝ nyʊwa gǝn nɛ. 39Kambɔ, bɛ jǝ́ ya kwaan jenɔ a kuwotǝmkǝga. Ka jǝ́ kaa lɛ nǝ sʊwatǝm kɛl nǝn kaam nyiyo. 40Bɛ jǝ́ maa kanjǝlɔ gwam a gola nɨ a bʊmɨ, nǝn fɛkalɨ.
Valgt i Øjeblikket:
1 Korinti 14: DBD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation