1 Korinti 16
16
Kɛtǝm Kemʌn Tɨkalɨ Nǝb Bwangtǝm Kwaamaɨ
1Kǝngkɔ, a kɛl kɛtǝm kemʌn maatǝm tɨkalɨ mʊrkalɨ nǝb bwangtǝm Kwaamaɨ, kanga mǝ sʊwa nǝb bwangtǝmɔ a Galatiyaɨ, n kanga jǝ́ maam lɛ tʌjeni. 2Na nǝn dibɨlɨɨ, bɛ gwam jenɔ jǝ́ saa kemʌn ya jǝ́ ya lɛ dǝngdǝng nyatǝm jenɔ. Ka jǝ́ yam lɛ na n bɛɨ, sǝla jǝ́ mʊr tɨkalɨ jenɔ. 3Na n bɛɨ, sǝ n twam nǝb nɨ jǝ́ jǝla nǝn jii nǝn langǝn bwangǝn, sǝ ja yɔ nǝn tɨkalɨ jenɔ a Urushalima. 4Na bʊm bʊm mǝ tǝmɨ n yɔɨ, nǝn yɔ dakini.
Fɛkalɨ Yɔmɔ
5Mǝ bɛ bɛ fɔla a daa jen woi na ba n dɔ a tǝm Makidoniyaɨ, jʊ a bwɨɨ mǝ ya nǝl lɛ ba mǝ yɔ a Makidoniya. 6Kɛna mǝ ta bʊtɔ lɛ a daa jen woi, n ja shenagɔ wo, sǝ jǝ́ ywa ɨ a daa nɨ mǝ yɔ lɛ wo gwamɨ. 7Ke bɔ swɨtǝm mɨ n kuwo jen, n shu. Mɨ nyɔ. Mǝ ya nǝl lɛ n maa kumtɨnɔ a gǝlala a daa jen woi, na Tɛlalɔ a jǝlaɨ. 8Mǝ tɨ tɨ a Afisa ba la nǝn kum Fentikosɔ, 9jʊ a bwɨɨ ja wum mɨ kaa gola dʊʊn na maatǝm maajɨ nyan. Nǝb kiimɔ wo a lada.
10Na Timoti a bɛɨ, bɛ jǝ́ bǝla gǝn a kwɨ bʊtɔ a kʊm jen, jʊ a bwɨɨ gǝ maa maajɨ Tɛlalɔɨ kanga mǝ maam lɛɨ. 11Ka jǝ́ soga gǝn nɛ. Jǝ́ ywa gǝn nǝn lǝma a gola, a yǝla a daa mǝ woi, jʊ a bwɨɨ mǝ dʌng gola gǝnɔ lɛ nǝbɔ kambɔ.
12A kɛl kɨla bǝn Afolosi, n kela gǝn dangǝn mǝʊ a yɔ a daa jen woi dakini jǝbɔ tangǝn kambɔ. A gǝnɔ a ya bɔ nǝl yɔtǝm kǝngkɔ. Yɔ yɔ nǝn kwama nɨ a kuwo a bʊm gǝmɨ.
Gʊtǝm Lɔl Jǝbɔ Yaltǝm
13Jǝ́ yɨ yɨm fɛkalɨ. Jǝ́ bɨ nǝl a nǝtǝm bɨlǝngkɛl jenɔ gǝm. Jǝ́ kʊʊ nǝl. Jǝ́ tɨ nǝn kwaan. 14Gwam jʊ nɨ jǝ́ maa lɛɨ, jǝ́ maa nǝn swɨkan.
15Kambɔ, jǝ́ nyǝm nyɔ nǝbɔ lɔ Istifanusi nǝji ja nǝ bɨlǝngkɛl nǝn tɨkǝga a tǝm Akayaɨ, ja dǝg dul jinɔ dangǝn a maatǝm tɨkalɨ nǝb sagsagɨɨ. Mǝ kela jen nɛ kambɔ, 16jǝ́ nǝ nǝb nɨ dʊʊn gwam, jǝbɔ nǝb nɨ n fatǝm maajɨ bǝn jǝbɔ gaalan bǝnɨ. 17N maa fulotǝm nǝl nǝn bɛtǝm Istifanusi, jǝbɔ Fartunatas jǝbɔ Akaikas, jʊ a bwɨɨ ja dem mɨ gaalan yɔtǝmɔ a daa jen woi. 18Ja kʊʊ mɨ nǝl dangǝn kanga ja maa jem tʌjeni. Bɛ jǝ́ nǝ ji dʊʊn.
19Mʊrkalɨtɨn nǝb bwangtǝm Kwaamaɨ a Asiyaɨ, yal jen nɛ. Akila jǝbɔ Bilkisu jǝbɔ mʊrkalɨ nǝb bwangtǝm Kwaamaɨ nɨ mʊrka lɛ a lɔ jii, jǝ yal jen nɛ dangǝn a mʊgɔ dun Tɛlalɔɨ. 20Kambɔ gwam yal jen nɛ. Jǝ́ yalka nǝn kwalkatǝm sagsag.
21Mǝ Bulus, nǝmǝ mǝ mʊla yaltǝm nɨ lɛ nǝn kang mɨɨ. 22Nʊ nɨ gwam mɨ swɨ Tɛlalɔ lɛɨ, bɛ a yǝlam nǝ lagtǝm. Tɛlalɔ bǝn, bɛ! 23Bɛ lǝma Tɛlalɔ bǝn Yesui a ta tʌgo gwanggwang a daa jen woi. 24Bɛ swɨkan mǝndɨ a na jǝbɔ jen a mʊgɔ Kiristi Yesui.
Valgt i Øjeblikket:
1 Korinti 16: DBD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation