Жаратылыу 17
17
Аллах Ибрам бла кесамат этеди. Сюннет – кесаматны белгиси
1Ибрам 99 жыллыкъ болгъанда, Раббий анга кёрюнюп:
– Мен – Къудуретли Аллахма, – деди. – Сен, Мени аллымда ачыкъ жашап, айыпсыз бол. 2Мен а сени бла кесаматымы саллыкъма эм сени тукъумунгу бек, бек кёп этерикме.
3Ибрам жерге къапланып, сежда#17:3 Сежда – энишге ийилиу, баш уруу адет. этгенди. Аллах а анга дагъыда былай айтды:
4– Ма, сени бла этген кесаматым: сен кёп миллетлени атасы боллукъса. 5Мындан арысында атынг Ибрам боллукъ тюйюлдю, атынг Ибрахим#17:5 Ибрам атны магъанасы – «уллу ата». Ибрахим атны магъанасы – «кёплени атасы». боллукъду. Нек десенг, Мен сени кёп миллетлени атасы этгенме. 6Сени тукъумунгу бек, бек кёп этип жаярыкъма, сенден миллетле жаратырыкъма, сенден патчахла да тууарыкъдыла. 7Мен сени бла эм сени тёлюден тёлюге келлик туудукъларынг бла ёмюрлюк кесаматымы саллыкъма. Мен сени Аллахынг эм келлик туудукъларынгы Аллахы боллукъма. 8Бу сен кёчюп айланнган жерни, битеу Кенанны жерин санга эм сени келлик туудукъларынга ёмюрлюк мюлкге берликме эм аланы Аллахы боллукъма.
9Дагъыда Аллах Ибрахимге былай айтды:
– Сен да, сени келлик туудукъларынг да, Мени кесаматымы тёлюден тёлюге тутугъуз. 10Сени бла эм келлик туудукъларынг бла салгъан, сиз тутаргъа борчлу болгъан кесаматым ма буду: битеу эр кишилеригизге сюннет этилсин. 11Сюннет этген адетни тутугъуз. Бу Мени бла сизни арабыздагъы кесаматны белгиси боллукъду. 12Сизде тёлюден тёлюге хар улан сабийге туугъаныны сегизинчи кюнюнде сюннет этилсин. Юйюнгде туугъан неда туудукъларынгдан болмагъан, бир тюрлю башха миллетден кюмюш ахчагъа сатылып алыннган къуллагъа да сюннет этилсин. 13Юйюнгде туугъаннга да, сен ахчанга сатып алгъан адамгъа да сюннет этилмей къалмасын. Аны бла Мени кесаматым ёмюрлюк кесамат болгъанына сизни чархыгъызда белги болур. 14Сюннет этилмеген хар эр киши кесини халкъындан къурутуллукъду. Ол Мени кесаматымы бузгъанды.
15Дагъыда Аллах Ибрахимге:
– Къатынынг Сарайгъа энди Сарай деп айтма, аны аты Сара#17:15 Сарай атны магъанасы – «бийче къыз». Сара атны магъанасы – «бийче». болсун. 16Мен анга алгъыш этерикме да, санга андан улан берликме. Анга алгъыш этерикме, ол миллетлени анасы боллукъду, андан халкъланы патчахлары да жаратыллыкъдыла, – дегенди.
17Ибрахим жерге къапланып, кюлгенди да, кеси ичинден: «Керти да, жюз жыллыкъ къартдан улан болурму? Токъсан жыллыкъ Сара да, керти да къозлармы?» – дегенди. 18Сора Ибрахим Аллахха:
– Ой, Исмаил Сени ыразылыгъынг бла жашагъа эди! – дегенди.
19Аллах а былай айтханды:
– Угъай. Къатынынг Сара табарыкъды санга улан, сен да анга Исхакъ атарыкъса. Кесаматымы аны бла этерикме, аны келлик туудукъларына ол ёмюрлюк кесамат боллукъду. 20Исмаилны юсюнден да Мен тилегинги къабыл этгенме: ма, Мен анга алгъыш этерикме, анга кёп сабий берип, туудукъларын бек, бек кёп этерикме. Андан онеки бий тууарыкъды эм Мен андан уллу миллет жаратырыкъма. 21Алай болгъанлыкъгъа, Мен кесаматымы, экинчи жыл бу заманда санга Сара табарыкъ, Исхакъ бла этерикме.
22Аллах, Ибрахим бла сёзюн бошагъандан сора, андан кётюрюлюп кетгенди.
23Сора Ибрахим уланы Исмаилны да, юйюнде туугъан эм ахчасына сатылып алыннган къулланы барысын да – Ибрахимни юйюню битеу эр киши адамларын – алып, Аллах анга айтханы кибик, ол кюн окъуна алагъа сюннет этгенди. 24Ибрахимге сюннет этилген заманда, ол токъсан тогъуз жыллыкъ эди. 25Уланы Исмаил а сюннет этилген заманында онюч жыллыкъ эди. 26Ибрахимге да, уланы Исмаилгъа да тамам ол кюн сюннет этилген эди. 27Ибрахимни юйюню битеу эр киши адамларына – юйюнде туугъан эмда башха миллетлиледен ахчагъа сатылып алыннганлагъа да – аны бла бирге сюннет этилген эди.
Dewis Presennol:
Жаратылыу 17: МалкъСК
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Институт перевода Библии, 2020-2024