Жаратылыу 15
15
Аллах Ибрам бла этген кесамат
1Бу болуннган ишледен сора Ибрамгъа кёрюнюуде Раббийден быллай сёз келгенди:
– Къоркъма, Ибрам,
сени къоруулаучу – Менме.
Аллыкъ саугъанг бек уллуду.
2Ибрам:
– Я Раббий-Таала! Сен манга не берликсе? Мени сабийим жокъду, мюлкюм да дамасклы Элиезерге къаллыкъды, – деди.
3Дагъыда Ибрам:
– Сен манга туудукъ бермегенинг себепли, мюлкюме, ма, мени юйюмде туугъан къул ие боллукъду, – деп айтды.
4Анга жууапха Раббийден быллай сёз келгенди:
– Сени мюлкюнге иелик этерик ол тюйюлдю, алай а сени уланынг боллукъду.
5Сора Раббий аны чатырдан тышына чыгъарып:
– Кёкге къарап, жулдузланы санап кёр: аланы санаяллыкъмыса? – деди.
Сора:
– Сени туудукъларынг да алай кёп боллукъдула, – деп къошду.
6Ибрам Раббийге ийнаннганды да, Раббий муну анга тюзлюклюлюкге санагъанды.
7Дагъыда анга:
– Бу жерни санга мюлкге берир ючюн, сени къасдийлилени Ур шахарындан чыгъаргъан Раббий Менме, – деди.
8Ибрам:
– Я Раббий-Таала! Мен бу жерге ие боллугъуму неден билликме? – деп сорду.
9Раббий:
– Манга ючжыллыкъ къунажин, ючжыллыкъ эчки, ючжыллыкъ къочхар, бир къумру#15:9 Къумру – кёгюрчюннге ушагъан къанатлы. эм бир кёгюрчюн бала алып кел, – деди.
10Ибрам аланы барын да алгъанды, хар бирин да эки жарып, бир жартысын бир жартысыны тенгинде салгъанды, къанатлыланы уа жармагъанды. 11Жыртхыч къанатлыла учуп келип, мыллыклагъа басыннгандыла, Ибрам а аланы къыстап тургъанды. 12Кюн батар кезиуге Ибрамны къаты жукъу басханды. Сора ма, анга уллу къоркъуу, уллу къарангылыкъ тюшгенди.
13Раббий Ибрамгъа:
– Сени туудукъларынг киши жерде киргинчиле боллукъларын билип къал, – деди. – Аланы анда къул этерикдиле да, ала тёртжюз жыл азап чегерикдиле. 14Алай а аланы къул этген миллетге Мен сюд этерикме. Андан сора ала андан уллу мюлк бла чыгъарыкъдыла. 15Сен а ата-бабаларынга ырахатлыкъ бла къошулурса, бек узакъ ёмюрлю болуп, ёлюп, асыраллыкъса. 16Аморлуланы аманлыкъларыны мардасы алыкъа толмагъаны себепли, туудукъларынг бери тёртюнчю тёлюде къайтырыкъдыла.
17Кюн батып, къарангы болгъан заманда, тютюн этген мангал бла жаннган от эки жарылгъан хайыуанланы аралары бла ётгендиле. 18Ол кюн Раббий Ибрам бла кесамат этип:
– Мисирни сууундан башлап, уллу Эфрат суугъа дери бу жерни: 19кенлилени, кенизлилени, кадмонлуланы, 20хитлилени, перизлилени, рефалыланы, 21аморлуланы, кенанлыланы, гиргашлыланы эм эбуслуланы жерлерин, – сени туудукъларынга береме, – деди.
Dewis Presennol:
Жаратылыу 15: МалкъСК
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Институт перевода Библии, 2020-2024