रोमियो 2

परमेसर को नियाय

1 # मत्‍ती 7:1; लूका 6:37 इसताँई दूसरे के ऊपर दोस लगानै बारे, तू चाँए कोई काए ना हो, तेरे धौंरे कोई बहानो ना है, कैसेकै जिस बात मै तू दूसरे के ऊपर दोस लगाबै है, उसई बात मै अपने आपकै बी दोसी ठैराबै है, कैसेकै तू जो दोस लगाबै है खुदई बौ काम करै है। 2हम जानै हैं कै जो इन बुरे कामौ कै करै हैं उनकै सच्‍चाई के हिसाब सै परमेसर की ओर सै डन्ड मिलै है। 3ऐ आदमी तू जो ऐंसे ऐंसे काम कन्‍नै बारौं मै दोस लगाबै है, और खुद बेई काम करै है, तू का जौ समजै है कै परमेसर की डन्ड की आगियाँ सै बच जागो? 4का तू परमेसर की महान दया, सैनसीलता और धीरज कै नकारै है? तू ना समजै है कै परमेसर की दया तेकै गलत काम सै मन फिरानै की ओर ले जावै है। 5पर तू अपने बुरे कामौ सै मन ना फिरानै और अपने हटीले मन की बजै सै बाके कोप के दिन के ताँई जिसमै परमेसर को सच्‍चो नियाय परकट होगो, उस दिन के ताँई परमेसर को कोप कै इखट्‍टो कर रओ है। 6परमेसर हर एक कै उनके कामौ के हिसाब सै फल देगो। 7जो लोग धीरज के संग भलाई करते भए महिमा और आदर और अमर जिन्‍दगी की खोज मै हैं, उनकै बौ हमेसा की जिन्‍दगी देगो। 8और जो लोग मतलबी हैं, सच्‍चाई कै ना मानै हैं पर बुराई मै चलै हैं, इनके ऊपर परमेसर की घुस्सा और कोप पड़ैगो। 9बुराई कन्‍नै बारे हर एक आदमी कै पैले यहूदी फिर गैर यहूदी कै दुख और मुसीबत सैहनी पड़ंगी। 10और भलाई कन्‍नै बारे हर एक आदमी कै पैले यहूदी और गैर यहूदी कै बड़ाई, इज्‍जत और सान्‍ति मिलैगी। 11कैसेकै परमेसर किसी के संग भेदभाब ना करै है।

12इसताँई जिनौनै बिना नियम पाए पाप करे, बे बिना नियम के नास बी हौंगे और जिनौनै नियम पाकै पाप करे उनकै डन्ड नियम के अनुसार मिलैगो। 13कैसेकै परमेसर की नजर मै नियम के सुन्‍नै बारे धरमी ना, पर नियम मै चलनै बारे धरमी ठैराए जांगे।

14फिर जब गैर यहूदी लोग जिनके धौंरे नियम ना हैं, सौभाब सैई नियम की बातौं मै चलै हैं, तौ उनके धौंरे नियम ना होते भए बी बे अपने ताँई खुदई नियम हैं। 15बे नियम की बात अपने अपने दिलौ मै लिखी भई दिखाबै हैं, और उनको मन बी गभाई देवै है और उनको मन कबी दोसी तौ कबी निरदोस ठैराबै है। 16जौ सब उस दिन पूरो करो जागो, जब परमेसर मेरी अच्‍छी खबर के अनुसार ईसु मसी के दुआरा आदमिऔ के छिपी भंई बातौं को नियाय करैगो।

यहूदी और नियम

17अगर तू यहूदी कैलाबै है, और नियम मै भरोसो रक्‍खै है, और परमेसर के बारे मै घमंड करै है। 18बाकी मरजी कै जानै है और अच्‍छी बातौं कै सई मानै है कैसेकै तुमकै नियम के दुआरा सिक्‍छा देर खाई है। 19-20गियान और सच्‍चाई की खास बात जो नियम मै है, मैंकै मिली है इसताँई तू जो अपने आप मै भरोसो रक्‍खै है, कै मैं अन्धौ कै रस्ता दिखानै बारो और इन्धेरे मै पड़े भए की जोती, और मूरखौं कै सिकानै बारो, और बालकौ कै सिक्‍छा दैनै बारो हौं। 21का तू जो दूसरौं कै सिकाबै है, अपने आपकै ना सिकाबै है? का तू जो चोरी ना कन्‍नै के बारे मै परचार करै है, और खुदई चोरी करै है? 22तू जो कैबै है कै किसी बईयर सै गलत काम मत करौ, पर तू खुदई बईयरौं सै गलत काम करौगे का? तू जो मूरतिऔं सै नफरत करै है, पर खुदई मन्‍दरौं कै लूटै है का? 23तू जो नियम के बारे मै घमंड करै है, तौ नियम कै तोड़कै परमेसर की बेजती काए करै है? 24जैसो कै पबित्‍तर सास्तर मै लिखौ है, “कैसेकै तुमरे बजै सै गैर यहूदी लोगौ मै परमेसर के नाम की बुराई करी जावै है।” 25अगर तू नियम मै चलै तौ खतना सै फाएदा तौ है, पर अगर तू नियम कै तोड़ै है तौ तू खतना बारो होते भए बी बिना खतना बारे गैर यहूदी आदमी के जैसो है। 26इसताँई बिना खतना बारो गैर यहूदी आदमी अगर नियम मै चलै है, तौ का बाकी बिना खतना की हालत खतना के बराबर ना गिनी जागी? 27पर जो आदमी सरीर सै बिना खतना बारो है, अगर बौ नियम कै पूरो करै है, तौ बौ तुमकै दोसी ठैरागो, कैसेकै लिखित नियम और खतना होनै के बाद बी तुम नियम कै तोड़ौ हौ।

28कैसेकै असली यहूदी बौ ना है जो बाहार सै यहूदी दिखै है। और बौ असली खतना ना है, जो सरीर मै बाहार सै दिखाई देवै है। 29पर असली यहूदी बौई है जो मन सै है, और असली खतना लिखे भए नियम के जैसो ना है पर परमेसर की आत्‍मा के दुआरा मन को है, ऐंसे आदमी की बड़ाई आदमी की ओर सै ना, पर परमेसर की ओर सै होवै है।

Dewis Presennol:

रोमियो 2: TKB

Uwcholeuo

Copi

Cymharu

Rhanna