Luuk 10
10
Yeesu hiŋra tokkoahoro ni fidibanɛɛ humaa wia
1Denii yaa Dɔɔri lizi nɛra tokkoahoro ni fi, ú hum baa, banɛɛgaa nɛɛgaa, bá tɔ u see zuu bol maa ani bɔra la maa u himmaa n niŋ wa zuu.#Maak 6:7-11 2U ŋɔ ba be, “Pattikuna lɛɛwɔɔ nɛnnɛ ka huŋhunna waa kpil bá kumaa. Awia, ií ra suŋŋi a pattikuna maa nabɔma Kɔraawiizi, ú nyiŋŋi huŋhunna bá la u koo ga kumaa.
3Ií ra la. Minna hum ia naa, ii ɛɛwɔɔ lugɔ pebizi munuzi biini. 4Ií gilɛɛ waa kpa kebee hure ni gawa di ra la. Ií gilɛɛ waa chi ŋmɛnɛɛ di ra jaami nɛr maa.#Luuk 9:3-5
5Di ii ŋɔ ii zuu dia maa, ií ɔɔ ŋɔ, Kɔ́raawiizi tɛɛ dia naa hiŋ bampirsɔna. 6Di a hiŋ dɛg bampirsɔna la dɔɔi, a daŋ du u ni. Di waa a bampirsɔna dɔɔi dɛkkɛ, a daŋ bir ba ii be. 7Di ii waa zuu dia maa, ií du de di ra di diwee la ban niŋ tɛɛ ia, dikuubɛɛwiai, huŋhunni dɛg u huma kinturgaare. Ií gilɛɛ wa du dia maa ka lii de ga du bɛl di kaa lii de ge ga du bɛl.#1Tim 5:18
8Di ii wa zuu bol maa, a bol hina lɛɛ ia dau, ii daŋ di diwee la ban niŋ ɛɛ tɛɛ ia, 9di ra chaa ba wiila hina, di ra ŋɔ ba maa be, dí Kɔraawiizi Kora dii ra dugli baabuu.
10Di ii wa zuu bol maa, ba waa sɛɛwɛ bá lɛɛ ia dau, ií lii ŋmɛnɛɛ ka ŋɔ, 11‘Ii bol naa doŋa la n pɛli yaa naazi naa, yaa daŋ peezaa ha ii zum lugɔ ii benii a lii. A waa hoo yaawaa be. Ama, ii zum nɛnnɛ lugɔ Kɔraawiizi Kora dii ra dugli iabuu.’ 12Ií gil n ŋɔ wibii maa tɛɛ ia. Kɔraawiizi seriya dii hɔpizii la n niŋ ba la biini, a wàá nuu Sɔdɔm hina gunla an niŋ nuu a bol dee hina la.
Bola la hina n waa yardɛɛ wia
(Mat 11:20-24)
13Kɔrazin hina, wiarɛ huuzi ia. Bɛtseida hina, wia daŋ wa huuzi ii ge, dikuubɛɛwiai, wizenaa la miŋ ɛɛwɛ ii biine la, di n faa ɛɛ a widizi Taaya ni Saidɔn biine, ba bampiree daŋ faa bir, bá vii laali gbɔglɔnzi ra mizi bahinaa hɔɔhri, di ra bagli ba biine n chɔkkɛ dikuu ba wichɔgaa wia. 14Di Kɔraawiizi seriya dii hɔpizii wa hello, a wàá nuu Taaya ni Saidɔn hina la gunla an niŋ wa nuu ia la. 15Kapɛniɔm hina, ii daŋ wer tinni chinchinne la Kɔraawiizi be nii naa? Akai. Ii daŋ tuu di la niŋ bɔr.”
16Yeesu ŋɔ u hiŋra la be, “Nɛr la maa n niŋ nuu ra tɛɛ ia, minuu u nuu ra tɛɛ la. Nɛr la maa n niŋ vɛɛ ia, minuu u vɛɛ la. Nɛr la maa n niŋ vɛɛŋ, unla n humiŋ labuu u vɛɛ la.”
Yeesu hiŋra tokkoahoro ni fidibanɛɛ n bittɛ ba wia
17Yesuu hiŋra tokkoahoro ni fidibanɛɛ la bir ba ni bɔsɔna, di wa ŋɔ, “Yaa Dɔɔri, tinnanchɔgaa gba wettoo sɛɛ yaa dɔɔra dikuu yaa n yir i sɔŋ wia.”#Maak 16:17
18U ŋɔ ba be, “N binnɔɔrɛ di na Sitaani n lii chiŋ chiiri hɛri alugɔ dooŋ n nyɛgzɛɛ.#Wipi 12:9 19Ií ra nuu. N tɛɛ iabuu fɔŋŋa, ii wer fɛrgi hɛrikuna, nuunzi ani yaa dɔm la fɔŋŋa maa. Ka a bɛl maa wàá wer ɛɛ ia wiimaa. 20Ama, tinnanchɔgaa n wette sɛɛ ii dɔɔra naa, aa lɛi niŋ ɛɛ ii bɔsɔna. Ii sɔna la n sɛbɛɛ chɔɔ Kɔraawiizi be labuu niŋ gil ii bɔra sɔɔni ia werge.”#Fili 4:3
21A saŋa, Kɔraawiizi Dumnanii izi Yeesu, u bɔra sɔɔni werge maa. U ŋɔ, “N Mɛ, chiŋ ni hɛri maa Dɔɔri, n na chɔliibuu, dikuubɛɛwiai, i gillɔɔ i wia naa suah nunzunna be, ka pillaa tɛɛ bichalli. Ɛɛh, N Mɛ, i kipattɛ guŋ.”#Mat 11:25-27; 13:16-17
22Yeesu kaa ŋɔ u hiŋra be, “N Mɛɛ kpa wiimaa fɔŋŋaa tɛŋ. Nɛr maa waa Mìŋ́ Kɔraawiizi Biibaal la zummɛ nɛnnɛ di Kɔraawiizi bɛŋ lɛi. Nɛr maa waa Kɔraawiizi ge zummɛ nɛnnɛ di u Biibaal la ani banla maa an niŋ par u bie ú bagli u wia tɛɛ la lɛi.”
23U ni u hiŋra n wa du ba bɛŋ, u ŋɔ ba be, “Ii nuu sumaa ii siwee n na wia naa iin nawɛɛ naa. 24Ií gil n ŋɔ wibii maa tɛɛ ia. Kɔraawiizi dɔgtɛɛzi kpila ni koora maa faa ra nyiŋŋuu ba na wia naa ii siwee n na na naa, ka ba wàá nawɛɛ di ra nyiŋŋi ba nuu wia naa ii digna n na nuu naa, ka ba wàá nuuwɛ.”
Samaria nɛnanii sɛɛlii wia
25Denii Hɔnzunni bɛl izi di ŋɔ ú pɛɛzuu wikpeg bɛl na. U pɛɛzi, “N Nabɔma, ɛrɛɛ ń ɛɛ di wer na miibɔɔ la n waa tunaa dɔɔwɛ lai?”
26Yeesu bir pɛɛzuu, “Ɛrɛɛ ba faa sɛbi Moosis Hɔŋ biini lai? Ɛrɛɛ i ɔɔ ra karmi de lai?”
27U ŋɔ, “Ba sɛbɔɔrɛ, ‘Gil i bampirii maa lau i Dɔɔri Kɔraawiizi la, di nɔŋŋuu ani i biini maa, ni i kpegzi maa, di kpa i nfɛrɛ maa du u ni,#Gbɔg 6:5 di kaa nɔŋŋi i dɔŋhiŋ alugɔ i hiŋ la.’ ”#Levi 19:18
28Yeesu ŋɔ, “Wibiire i ŋɔ gunla. Ɛɛ ra ɛɛ guŋ. Denii í jaa na miibɔɔ la.”#Levi 18:5
29Ka Hɔnzunni la haa vɛɛ ka ra nyiŋŋi u na sɔŋ jaa, di kaa pɛɛzi, “Ka anɛɛ n dɔŋhinɛi?”
30Yeesu jaa ta sɛɛlii bɛl tɛu, di ŋɔ, “Aabuu, baal bɛl izi lii Jɛrusalɛm di ra la Jɛriko. Unna la la, ŋmɛɛna ga lawuu, di foozi u laala maa, ka lɔɔzuu werge maa ka kaali. U chɔɔ ŋmɛnɛɛ di ra nyiŋŋi u siu. 31Tama, di Kɔraawiizi kizeehiŋ bɛl ge vollo ra ba. Unna ba wa na baal la n chɔɔ ŋmɛnɛɛ la, u teŋ ga ŋmɛnikɛrii, di bɛri u ni kaali.
32A kaa ɛɛ tama, di Kɔraawiizi Dia Levi dee bɛl ge ra ba. U ge n na ba wa na baal la n chɔɔ ŋmɛnɛɛ la, u gba teŋ ga ŋmɛnikɛrii, di bɛri u ni kaali.
33Denii hɔɔhri bɛl ge vol ra ba. U ge ɛɛ Samaria hinuurɛ. U ra ba di baallɛ chɔɔwɛ. Uŋ wa nau la, u wia dɔɔu sinyɛna werge. 34U lii u kawee nyuu tuu, di ɛɛ nuu ni siŋ du u bɔra la n mɔnnɛɛzi la, ka vɔɔzaa. Uŋ wa vɔɔzi u bɔmɔnnaa la tuŋ, u lalluu sag kawee la ni, di kpau zuu bol bɛl, di ga zuu diihayii bɛl de, di ra binni u ni.
35Hɔɔŋ wa pizɛɛ, Samaria hinuu la lizi saliŋhuŋŋu kebisau anɛɛ tɛɛ dia la hiŋ, ka ŋɔ u be, ‘A binni baal naa ni, ka ń la ka ba. Di n wa ballɔ di kim wa jaawɔ, n daŋ turgii.’
36Too. Baala bahoro naa maa biini, u bɛliirɛ n ɛɛ baal la ŋmɛɛna n lɔɔzɛɛ la dɔŋhinɛi? Ɛrɛɛ i na a wia biinei?”
37U ŋɔ, “Unla n suŋ u ni labuu ɛɛ a baal dɔŋhiŋ.”
Yeesu bir ŋɔ u be, “Ge la gaa ɛɛ guŋ.”
Maata ni Mɛɛri nai wia
38Ba kaa izi ra la ga zuu bol bɛl. A bol haaŋ bɛl sɔnnɛ Maata. A Maata lɛɛ Yeesu dau u dia.#Jɔɔn 11:1, 2, 5 39U niwee ge sɔnnɛ Mɛɛri. A Mɛɛri ɔɔ so yaa Dɔɔri naazi zɛɛ di ra nuu u baglaa. 40Maata ge ra hum u huma. U huma la wia zuu u nyuu. U ba Yeesu be wa ŋɔ, “N Dɔɔri, n niwee naa n giliŋ ta n na hum ia n bɛŋ kennaa, a wɛɛ tittea? Ŋɔ u be ú ba wa hiiniŋ.”
41Yaa Dɔɔri ŋɔ u be, “Maata, Maata. I gillɔɔ wikpila ra tirii werge di zuu i nyuu. 42Ka wikpaŋ bɛnnɛ du de di ɛɛ wizeŋ. A wii deere Mɛɛri ra ɛɛ la. Awia, màá ŋɔ ú gil.”
Dewis Presennol:
Luuk 10: vag
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.