Ibriniyawa 7
7
Ma̱lkiza̱dek A̱gba̱ndang Pris Swak Ibrahim ma̱ng Shi
1Ma̱lkiza̱dek wuni ku yet a̱gwam a̱keang Sa̱lem. A̱ si̱ bu yet pris#7:1 Wa̱i a̱lyiat: Á̱ kyiak a̱tyoli A̱gwam Da̱wuda nyia̱ a̱ yet pris ma̱nang á̱ ku nkyiak Ma̱lkiza̱dek a̱ni. Za̱b 110:4; Ibr 5:6. A̱gwaza Tswazwa a̱ Swak ma̱ng A̱kyenkyai Shi a̱ni. Jen nang Ibrahim ku mbwuot a̱ naat a̱mali di̱ tyak kwan zwang ji nang gu ku nhyaai á̱gwam a̱naai ba a̱ni, Ma̱lkiza̱dek si̱ myim ma̱ng Ibrahim. A̱ si̱ tyia̱ nggu a̱li̱ba̱rka.#7:1 A̱ts 14:18-20. 2A̱jawa Ibrahim si̱ nwuak Ma̱lkiza̱dek a̱kpa a̱nyiung ma̱ a̱yaakpa nkyang swak nang gu kwok mi̱ zwang ji a̱ni.
A̱lyoot “Ma̱lkiza̱dek” ka fa, “A̱gwam nyia̱ tsotswat.” Á̱ si̱ bu yei nggu “A̱gwam Sa̱lem,” a̱lyoot kani bu fa, “A̱gwam swat nyinyang.” 3Á̱ mbyia̱ a̱vwuo nang á̱ ndyuut tazwa a̱tyia̱, ku a̱yang Ma̱lkiza̱dek a̱ni bah. Da̱ mba, á̱ lyen kwai nggu ji bah. Á̱ mbyia̱ a̱vwuo nang á̱ ndyuut mam byin, ku mam a̱khwu nggu a̱ni bah. Mat a̱nia, Ma̱lkiza̱dek yet tangka̱i pris hwa si̱ nat sang sangba̱p. A̱wot a̱ si̱ tai Nggwon A̱gwaza kya.
4Nyi li tangka̱i a̱gba̱ndang shi Ma̱lkiza̱dek hu! Ku Ibrahim, a̱ yet a̱gba̱ndang a̱tyia̱ a̱khwop Isi̱rela wu a̱ni, a̱ ku fi̱k shi Ma̱lkiza̱dek hu. A̱ si̱ nwuak gu a̱kpa a̱nyiung ma̱ a̱yaakpa nkyang swak nang gu kwok a̱ neet ndyo mi̱ zwang ji a̱ni! 5A̱wot nang doka Musa ji nshim á̱niet ba̱ yet pris ba mi̱ kwai La̱wi ji a̱ni, ku yet ta hwa ba̱ saai a̱kpa nyiung mi̱ a̱yaakpa nkyang swak da̱ a̱vwuo á̱niet Isi̱rela ba,#7:5 Wa̱i a̱lyiat: A̱kpa a̱nyiung mami a̱yaakpa nkyang swak nang A̱gwaza ku nwuak á̱niet Isi̱rela ba a̱ni, ba̱ ku nwuat á̱niet ba̱ ghwut mi̱ kwai La̱wi a̱ ku ghwut mi̱ kwai Ibrahim ji a̱ni Fang 18:26; 2TNA 31:4-6; Neh 10:37-38; 13:5,12. ba̱ yet á̱ka̱mbwon Ibrahim na a̱ni.
6A̱wot Ma̱lkiza̱dek, a̱ ku ghwut mi̱ kwai La̱wi ja bah. A̱mgba̱m ma̱ng a̱nia, a̱ si̱ san a̱kpa a̱nyiung mami a̱yaakpa nkyang swak da̱ a̱vwuo Ibrahim. A̱wot Ma̱lkiza̱dek si̱ nang Ibrahim a̱li̱ba̱rka, nang nggu Ibrahim wa ka̱n gya gado nkyang nang A̱gwaza nyia̱ a̱li̱ka̱uli a̱ na nang nggu a̱ni. 7A̱tyu a̱ na nang a̱ghyang a̱niet a̱li̱ba̱rka a̱ni, a̱ byia̱ tyok a̱ swak a̱tyu a̱ san a̱li̱ba̱rka wu a̱ni. Si̱ a̱hwa yet kyang ya fwuang hwa bah.
8Nang ku ndi a̱nia a̱ni, a̱yaapris ba ni̱ san a̱kpa nyiung mami a̱yaakpa nkyang swak, ba̱ kwi nang á̱nietbishyi a̱ni. A̱wot Ma̱lkiza̱dek swak ba ma̱ng shi. Mat, á̱ tak ma̱ng a̱nzi̱t nang gu ni̱ nswuan si̱ nat sang sangba̱p#7:8 Za̱b 110:4.. 9Kyang nang zi̱ na mbeang a̱ni, huhwa yet; La̱wi ma̱ a̱pyia̱ nggu, a̱ ku yet pris wu a̱ni, ku saai a̱kpa nyiung mami a̱yaakpa nkyang swak da̱ a̱vwuo mman Isi̱rela na. Ku li á ngyei nggu La̱wi ma̱ a̱pyia̱ nggu ku nwuak Ma̱lkiza̱dek a̱kpa nyiung mami a̱yaakpa nkyang swak, di̱n jen nang Ibrahim a̱tyia̱ a̱khwop nggu La̱wi wu, ku nwuak Ma̱lkiza̱dek a̱ni. 10Ibrahim ku nwuak Ma̱lkiza̱dek a̱kpa a̱nyiung mami a̱yaakpa nkyang swak neet nang á̱ ka̱n byin gu La̱wi bah; neet nang La̱wi ni̱ shya̱ mi̱ vam Ibrahim a̱tyia̱ a̱khwop nggu wu.
11Mat ki̱ ta̱m sot pris La̱wi hu, nang á̱niet Isi̱rela ba ku nsan doka ji a̱ni, wa ku nyia̱ ta̱m sot pris hu cha̱chaat a̱zaghyi A̱gwaza, si̱ yihwa mbyia̱ nang A̱gwaza na nchat a̱ kpaat ta̱m sot pris ghyang ku vwuon? Yihwa mbyia̱ nang A̱gwaza na nkpaat tangka̱i ta̱m sot pris Ma̱lkiza̱dek, da̱ a̱kwonu ta̱m sot pris La̱wi ma̱ng si̱ Haruna hu?
12Mat ka̱ á̱ shyak tangka̱i ta̱m sot pris hu, ku yet ta hwa á̱ shim doka ji, ji̱ shyak, ji̱ ka kpaat tangka̱i ta̱m sot pris a̱hwa mameang. 13Mat pris wu nang zi̱ lyiat tazwa nggu a̱ni, a̱ ghwut mi̱ kwai jhyang ja, ji̱ vwuon ma̱ng si̱ La̱wi a̱ni. Á̱ mbyia̱ a̱yin mi̱ kwai pris a̱ja, a̱ ka̱n mak nyia̱ ta̱m pris da̱ a̱tyii nwuat za̱nang A̱gwaza wu a̱ni bah. 14Ku yet a̱tsak a̱lyiat wa nang Yesu A̱tyoli nzi̱t wu nghwut mi̱ kwai Yahuda ja. A̱wot tazwa kwai Yahuda ji, Musa du nkaat kyang nyia̱ sot a̱yaapris ghwut mi̱ kwai a̱ja bah.
Yesu yet Pris Kidee Ma̱lkiza̱dek
15A̱lyiat nani ghwut kpa̱sai za̱m, mat á̱ mbyia̱ tangka̱i pris a̱ghyang a̱ vwuon ma̱ng a̱si̱ La̱wi a̱ni, a̱ bai a̱ si̱ tai pris Ma̱lkiza̱dek. 16Yesu ku yet pris wu. Da̱ mba, á̱ ku byin nggu mi̱ kwai La̱wi ja nang doka ji ntak a̱ni bah. A̱wot mat chet swuan sang sangba̱p hwa, nang a̱yin si̱ mi̱n swuo chet hu a̱ni bah. 17Ma̱nang á̱ ku ndyuut ma̱ A̱lyiat A̱gwaza na a̱ni, nyia̱, “A yet pris wa ma̱nang tangka̱i sot pris Ma̱lkiza̱dek a̱ni, si̱ nat sang sangba̱p.”#7:17 Za̱b 110:4.
18Di̱ nvak ghyang, a̱khwukhwop doka wu tazwa ta̱m sot pris hu, á̱ sak ji da̱ gbang a̱nyiung. Mat ji̱ bu byia̱ chet bah. Da̱ nji, ji̱ si̱ mi̱n nyia̱ ta̱m bah. 19(Mat doka ji ka̱n mak jhyi kyang cha̱chaat bah). Di̱ nvak ghyang, ma̱ninika zi̱ byia̱ gbang a̱lyia̱ mat zi̱ shya̱ a̱tsatsak tyia̱ fwuo a̱ swak doka ji a̱ni. Nggu wa na tyia̱ nzi̱t, zi̱ nnat kpa̱mkpaan ma̱ng A̱gwaza.
20A̱gwaza ku kpaat ta̱m sot pris fai huni ma̱ng shyishyi ji̱ byia̱ chet a̱ni. A̱wot á̱ka̱mbwon Haruna na ku yet sot a̱yaapris di̱ mi̱ tangka̱i shyishyi a̱hwa. 21A̱wot A̱gwaza ku kyiak shyishyi tazwa Yesu, a̱ si̱ nyia̱ ma̱ng a̱nggu,
“Nung, A̱gwaza, n ka̱n kyiak shyishyi.
A̱wot da̱ nung, n na tyat shyishyi ji bah;
‘A yet pris wa
si̱ nat sang sangba̱p.’ ”#7:21 Za̱b 110:4.
22Mat shyishyi nang A̱gwaza kyiak a̱ni, Yesu wa na yong a̱ tyia̱ a̱tsatsak a̱li̱ka̱uli nang A̱gwaza la̱p a̱ni, a̱ nyia̱ ta̱m. 23Di̱n jen a̱khwukhwop ta̱m sot pris ji̱ swak a̱ni, á̱ ku byia̱ susot a̱yaapris ma̱ a̱di̱di̱t ba̱ ku nyia̱ nta̱m pris, ba̱ ghwut mi̱ kwai La̱wi ji a̱ni. A̱wot mat nang ba̱ nkwi a̱ni, ba̱ si̱ ya a̱son ma̱ng nta̱m pris mba na bah. 24A̱wot Yesu, nang gu nswuan si̱ nat sang sangba̱p a̱ni, nta̱m pris nggu na yet si̱ sang sangba̱p nia.
25Mat a̱nia, kuzang jen Yesu byia̱ chet a̱ maai a̱ san á̱niet ba, ba̱ bai da̱ a̱vwuo A̱gwaza mami a̱lyoot nggu ka a̱ni. Mat a̱ ni̱ swuan si̱ nat sang sangba̱p. A̱wot a̱ ni̱ naai A̱gwaza da̱nian mbaa. 26Yesu wa yet tangka̱i a̱gba̱ndang pris nang zi̱ chat a̱ beang nzi̱t a̱ni. Mat, a̱ yet a̱za̱za̱rak, a̱ si̱ sang a̱bun. A̱wot da̱ nggu, a̱ byia̱ a̱ka̱tuk nyia̱ bah. Á̱ wa ka̱n khap gu zan ma̱ng á̱niet a̱ka̱tuk nyia̱ ba. A̱gwaza si̱ ta̱ngam ngguu, a̱ si̱ nwuak gu a̱gba̱ndang a̱vwuo shi tswazwa. 27Yesu li nang a̱cha̱chet a̱yaapris á̱ghyang a̱ni bah. Da̱ nhu ku yet gu ta hwa, gu nwuat za̱náng da̱nian a̱ka̱tuk nyia̱ kuzang a̱tuk bah. A̱wot a̱cha̱chet a̱yaapris ba; ku ni̱ yet ba ta hwa, ba̱ ya ntsa neap za̱nang ji da̱nian a̱ka̱tuk nyia̱ á̱pyia̱ mba wu. A̱wot ba̱ sii du nwuat za̱nang ji da̱nian a̱ka̱tuk nyia̱ á̱kum á̱niet wu. A̱wot Yesu, a̱ ku neap za̱nang da̱ a̱ka̱nyiung kya mgba̱m; di̱n jen nang gu ku nneap a̱pyia̱ nggu a̱ yet za̱nang da̱nian a̱ka̱tuk nyia̱ á̱niet wu a̱ni.
28Mi̱ doka Musa ji, á̱ ku khai á̱niet ba̱ yet a̱cha̱chet a̱yaapris. A̱wot á̱niet a̱bya ku byia̱ lat nang á̱nietbishyi a̱ni. A̱wot nang á̱ nwuak doka ji á̱ tyak a̱ni, A̱gwaza si̱ khai Nggwon nggu ka, a̱ si̱ kyiak shyishyi ji̱ byia̱ chet a̱ni. A̱wot a̱ si̱ khai Nggwon ka, ka̱ yet a̱tsatsak A̱gba̱ndang Pris si̱ nat sang sangba̱p.
Dewis Presennol:
Ibriniyawa 7: TyapNT
Uwcholeuo
Rhanna
Cymharu
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.