Ibriniyawa 10
10
Kristi wa yet A̱mgba̱m Za̱nang wu
1A̱khwukhwop ta̱m pris nang doka Musa ji kpaat a̱ni, na̱ yet mi̱ a̱ghwaghwu a̱tan nkyang na̱ na bai á̱zanson a̱ni. Ni̱nia yet á̱tsatsak nkyang a̱nia bah. Za̱náng ji nang á̱ ku nwuat di̱n jen a̱khwukhwop ta̱m pris hu a̱ni, ji̱ ku maai bah. Á̱ ni̱ nwuat ji kuzang a̱lyia̱. A̱mgba̱m ma̱ng a̱nia, ji̱ si̱ yet a̱tsatsak za̱náng ji jaat a̱ka̱tuk nyia̱ á̱niet ba̱ chong dyep A̱gwaza wu a̱ni a̱mgba̱m bah. 2Ki̱ za̱nang a̱khwukhwop ta̱m pris ji wa ku maai jaat a̱ka̱tuk nyia̱ á̱niet wu a̱mgba̱m, si̱ á̱niet ba ku fwung nwuat za̱nang ji. Mat si̱ á̱ ku jaat a̱ka̱tuk nyia̱ á̱niet dyep A̱gwaza wu a̱ tyak da̱ a̱ka̱nyiung mgba̱m, a̱wot si̱ a̱di̱dam a̱ka̱tuk nyia̱ mba wu, bu ku kpaat ba mi̱ nfwuo bah.
3A̱wot da̱ a̱kwonu a̱kya, mami a̱tsak a̱lyiat, ntangka̱i za̱náng a̱nia ni̱ jhyung mba a̱ka̱tuk nyia̱ mba wu kuzang a̱lyia̱. 4Mat a̱sok nyák ma̱ng á̱si̱ nzón si̱ mi̱n mak chi a̱ka̱tuk nyia̱ á̱niet wu a̱mgba̱m bah. 5Huhwa mbyia̱, jen nang Kristi ku mbai mi̱ swanta hu a̱ni, a̱ si̱ nyia̱ ma̱ng A̱gwaza,
“Za̱náng zón ma̱ng nyák
ku sa̱da̱ka chi a̱ka̱tuk nyia̱,
a chat bah.
A̱wot a nwuak nung vam hwa,
n neap ku yet za̱nang ji.
6A fwuong nyinyang za̱nang nang á̱ fwui,
ku za̱nang jhyang nang á̱ neap
di̱ chi a̱ka̱tuk nyia̱ a̱ni bah.
7A̱jawa n si̱ bu nyia̱,
‘A̱gwaza nung wu, di nung gwa wu!
N mbai n nyia̱ ta̱m hu nang a chat a̱ni,
ma̱nang á̱ ndyuut tazwa nung
ma̱ A̱lyiat A̱gwaza na#10:7a Lyuut cha̱chaat: “Ta̱ka̱da nang á̱ kut di̱n shan a̱ni.” a̱ni.’ ”#10:7b Za̱b 40:6-8.
8Di̱ nwuo a̱lyiat hu, Kristi si̱ nyia̱, “A chat za̱náng nyák ma̱ng zón, za̱náng nang á̱ fwui a̱ni, ma̱ng nsa̱da̱ka njhyang na̱ chi a̱ka̱tuk nyia̱ a̱ni bah. A̱mgba̱m na ma̱ng za̱náng ji, a fwuong nyinyang bah.” (Ku nang doka Musa ji ntyiet á̱niet ba̱ neap za̱náng jini a̱ni).
9A̱jawa Kristi si̱ bu nyia̱, “Di nung gwa wu! N bai n nyia̱ ta̱m nang a chat a̱ni!” Di̱ nvak a̱hwa hwa A̱gwaza si̱ ndyang a̱khwukhwop ta̱m pris. A̱ si̱ nkpaat ta̱m pris fai, huhwa yet si̱ Kristi hu. 10Mat kyang hu nang A̱gwaza la̱p a̱ sak a̱ni, huhwa yet; á̱ jaat zi̱t zi̱ yet á̱za̱za̱rak, nang Yesu Kristi nneap vam a̱pyia̱ nggu, ku yet za̱nang a̱ka̱nyiung, mgba̱m.
11Ma̱ a̱khwukhwop ta̱m pris hu, kuzang a̱tuk, kuzang pris ni̱ nyia̱ ta̱m gu. A̱ bu neap mi̱ tangka̱i za̱nang nyiung hwa nchi̱ri̱ng. A̱wot da̱ nhu, ku si̱ mi̱n chi ku ti̱n a̱ka̱tuk nyia̱ á̱niet wu a̱mgba̱m bah.
12A̱wot Kristi a̱ yet A̱gba̱ndang Pris nzi̱t wu a̱ni, a̱ ku neap vam a̱pyia̱ nggu da̱ a̱vwuo A̱gwaza a̱ka̱nyiung kya. A̱ si̱ yet a̱tan za̱nang ji̱ maai kuzang jen a̱ni, da̱nian a̱ ka chi a̱ ti̱n a̱ka̱tuk nyia̱ á̱niet wu a̱mgba̱m. Ma̱nang á̱ ndyuut a̱ni nyia̱, “A̱jawa, a̱ si̱ swan da̱ a̱vwuo shi a̱zayak A̱gwaza.”#10:12 Ibr 1:13; Za̱b 110:1.
13Ma̱ninika, Yesu swan a̱ja a̱ fwuong jen ji, ma̱nang á̱ ndyuut a̱ni nyia̱, “Si̱ nang n tyia̱ á̱niet lak li ang ba a̱tafa ang, ba̱ yet ang chuk saai a̱ti̱tak.” 14Mat di̱ neap za̱nang ji yet vam a̱pyia̱ nggu hwa a̱ni da̱ a̱ka̱nyiung, Kristi si̱ tyia̱ á̱niet ba nang gu jaat a̱ni, ba̱ ka yet á̱za̱za̱rak. A̱ tyia̱ mba ba̱ yet á̱tsatsak si̱ nat sang sangba̱p.
15A̱wot A̱za̱za̱rak Ntswa wu meang si̱ tak nang a̱nia wa ku ndi, nyia̱,
16“A̱gwaza si̱ nyia̱,
‘La̱p A̱li̱ka̱uli a̱fai huni hwa
nang n na nda̱p ma̱ng á̱niet nung ba di̱n jen a̱ja:
N na tyia̱ doká nung ji mi̱ nfwuo mba na.
A̱wot n bu ndyuut ji mi̱ nfwuo mba na,
ji̱ yet mba kyang a̱di̱dam.’ ”#10:16 Iri̱ 31:33.
17A̱wot A̱gwaza si̱ bu nyia̱,
“N bu na jhyung a̱ka̱tuk nyia̱ mba wu
ma̱ng a̱ka̱kpa̱t mba na bah.”#10:17 Iri̱ 31:34.
18Mat a̱nia, nang A̱gwaza nchi a̱ka̱tuk nyia̱ á̱niet wu a̱ni, ku bu yet ta hwa bah, a̱yaapris ba̱ bu neap za̱nang di̱ chi a̱ka̱tuk nyia̱ á̱niet wu.
Á̱ Yorong Á̱niet Khwi ba̱ Gbang A̱lyia̱
19Mat a̱nia, nyin á̱niet khwi Yesu ba nang n chat a̱ni, mat a̱sok Yesu nia, nang zi̱ mbyia̱ a̱wat a̱fai zi̱ nwuo ma̱ sa̱t da̱ A̱vwuo ka̱ Swak ma̱ng yet A̱za̱za̱rak Ma A̱gwaza tswazwa a̱ni. 20Yesu wa khwuk zi̱t vak fai hu nang zi̱ na nnwuo mami a̱gba̱ndang a̱kpi̱mi̱mi̱t a̱teap#10:20 Wa̱i a̱lyiat: A̱gba̱ndang a̱kpi̱mi̱mi̱t a̱teap a̱ji fa; a̱gba̱ndang a̱toot nang á̱ lya̱u A̱mali Nwuat Za̱nang ka a̱ si̱ nghai A̱swang ka̱ Swak ma̱ng yet A̱za̱za̱rak a̱ni, ma̱ng A̱swang ka̱ yet A̱za̱za̱rak a̱ni. KDok 32:35. a̱ fwun A̱vwuo ka̱ Swak ma̱ng yet A̱za̱za̱rak a̱ni, mat neap vam nggu hu nang za̱nang a̱ni. 21A̱wot nang zi̱ mbyia̱ A̱gba̱ndang Pris a̱ swak ma̱ng Shi, a̱ si̱ nyia̱ tyok tazwa a̱li A̱gwaza ka a̱ni; 22si̱ zi̱ shyei ma̱ sa̱t nat kpa̱mkpaan a̱zaghyi A̱gwaza ma̱ng fwuo nyiung, si̱ zi̱ nwuak fwuo da̱ nggu. Mat á̱ wa ka̱n ya̱sang a̱sok Kristi na da̱ a̱ka̱tuk a̱di̱dam nzi̱t wu, da̱nian na̱ ka jaat nzi̱t. A̱wot á̱ si̱ kwi nvam nzi̱t na ma̱ng a̱za̱za̱rak a̱sa̱khwot.
23Yok zi̱ yong mi̱ chet di̱ mi̱ but mi̱ fwuo, di̱ tyia̱ fwuo nzi̱t hu nang zi̱ shei á̱ghyang á̱niet kpa̱sai a̱ni. Mat A̱gwaza yet a̱tsotswat wa, a̱ na nyia̱ kyang hu nang gu nyia̱ a̱li̱ka̱uli a̱ na nyia̱ a̱ni.
24Yok zi̱ nyia̱ a̱di̱dam, si̱sak ji zi̱ na ntyia̱ á̱ghyang nzi̱t gba̱gbak di̱ chat á̱ghyang ma̱ng nyia̱ a̱tan nta̱m. 25A̱wot zi̱ yok ghwon tung ndung hu nang á̱niet khwi a̱ni bah, ma̱nang á̱ghyang á̱niet ni̱ nnyia̱ a̱ni. Da̱ a̱kwonu a̱kya, zi̱ ni̱ ntyia̱ á̱ghyang nzi̱t gba̱gbak, ma̱ninika, nang zi̱ ndi jen bwuok A̱tyoli Yesu ji mbai kpa̱mkpaan a̱ni.
26Á̱kpa̱ndang nung ba nang nchat a̱ni, ki̱ zi̱ ya a̱son ma̱ng nyia̱ a̱ka̱tuk nyia̱ ma̱ng shim nzi̱t, nang zi̱ ka̱n san zi̱ si̱ lyen a̱chuchuk tyiet wu a̱ni, á̱ bu na mbyia̱ za̱nang jhyang nang á̱ na neap ji̱ chi a̱ka̱tuk nyia̱ nzi̱t wu a̱ni bah. 27Ka̱ a̱nia wa, mi̱ kyang nyiung hwa nang zi̱ fwuong, huhwa yet; zi̱ fwuong a̱wun shi̱ri̱ya A̱gwaza ji̱ chobai a̱ni, ma̱ng a̱gba̱gbai a̱nga̱ngak ndong sang sangba̱p wu, a̱ na fwui á̱niet ba ba̱ lak li A̱gwaza wu a̱ni.
28Mat kuzang a̱yin a̱ tyat doka Musa ji a̱ni, á̱ ni̱ hyat gu di̱ mi̱ fa̱k kunak, ka̱ á̱ shya̱ á̱niet nwuak sheda a̱feang ku a̱tat ba̱ li a̱ka̱tuk nyia̱ nang a̱nyuu nnyia̱, ma̱nang doka Musa ji nhyia̱ a̱ni.#10:28 KDok 17:2-7; Li̱v 24:13-16. 29Ka̱ a̱nia wa, swuo a̱bung hu na yet a̱ka̱tuk a̱ swak di̱ tangka̱i á̱niet ba̱ jhyuai Nggwon A̱gwaza ka a̱ni. A̱wot á̱si̱ ba ba̱ bwuak a̱sok nggu na, na̱ kpaat la̱p a̱li̱ka̱uli a̱fai nang A̱gwaza njaat nzi̱t zi̱ si̱ tyia̱ za̱za̱rak a̱ni; á ngyei a̱sok nggu na yet a̱buk kyang na̱ si̱ bu yet a̱za̱za̱rak bah. A̱wot ma̱ng tangka̱i á̱niet ba̱ fwoi ba̱ si̱ nyia̱ A̱za̱za̱rak Ntswa A̱gwaza wu lihyat, a̱tyu a̱ fa̱k shok zi̱t a̱ni, ba̱ na mun á̱ swuo a̱bung! 30Mat zi̱ lyen A̱gwaza hyia̱ nyia̱,
“Nung gwa na tan a̱ka̱tuk ma̱ng a̱ka̱tuk.
N na tan mba ma̱ cha̱chaat
ma̱ng kyang nang ba̱ nyia̱ a̱ni.”#10:30 Fang 32:35,36.
Á̱ si̱ bu lyuut nyia̱,
“Nung, A̱gwaza, n na nyia̱ á̱niet nung ba shi̱ri̱ya.”
31Ku yet kyang a̱wun hwa za̱m, a̱tyubishyi a̱ nwuo mbwak A̱gwaza a̱ byia̱ swuan a̱ni, a̱ nyia̱ nggu shi̱ri̱ya.
Yok Á̱niet Khwi ba̱ Gbang A̱lyia̱ di̱ Nwuak Fwuo
32Nyi nyia̱ a̱di̱dam tazwa jen ji ka̱n swak a̱ni, nang nyi ku nsan tyiet tazwa Kristi, a̱wot á̱ghyi nyin ba si̱ tat a̱ni. Nyi jhyung si̱sak ji nyi ku ngyong tsotswat, ku nang nyi ku nkwan ba̱t ma̱ng swuo a̱bung a̱ni. 33Jen jhyang á̱ si̱ fwoi nyin, á̱ si̱ bu nyia̱ nyin lihyat kpa̱sai a̱zaghyi á̱niet, ma̱ng ya̱shuk. A̱wot jen jhyang, nyi ni̱ beang á̱niet ba̱ shya̱ mi̱ tangka̱i swuo a̱bung a̱hwa a̱ni.
34Nyi ku swuo a̱bung dundung ma̱ng á̱niet khwi ba nang á̱ ku tyia̱ mi̱ jaru a̱ni. A̱wot a̱mgba̱m nkyang nang nyi ku byia̱ a̱ni, á̱niet nyia̱ tyok ba si̱ ta̱wap naa, ba̱ si̱ ghwon nyin. A̱mgba̱m ma̱ng a̱nia, nyi si̱ san si̱sak nang nyi nnwai nkyang a̱nia a̱ni ma̱ng a̱lyia̱ sai. Mat nyi ku lyen nang nyi na nshya̱ á̱tsatsak nkyang nang á̱ sak nyin dyo Ma A̱gwaza tswazwa, na̱ fwuong nyin si̱ nat sang sangba̱p a̱ni.
35Mat a̱nia, nyi yok ghwon tyia̱ fwuo nyin hu ma̱ng nwuak a̱chuchuk da̱ A̱gwaza bah. Nyi jhyung a̱gba̱mgbam zang nang á̱ na tan nyin a̱ni. 36Ku yet ta hwa, nyi gbang a̱lyia̱, mat nyi ka ya a̱son ma̱ng nyia̱ kyang hu A̱gwaza chat a̱ni. Huhwa na tyia̱ nyi nsan a̱tsatsak nkyang nang A̱gwaza nyia̱ a̱li̱ka̱uli a̱ na nang nyin a̱ni. 37Ma̱nang á̱ ndyuut a̱ni, nyia̱,
“Mat á̱ na labeang bah,
a̱tyu a̱ chobai a̱ni,
a̱ na nwuo di̱ mi̱ byian jen.
38A̱wot a̱mgba̱m ma̱ng a̱nia,
á̱tsotswat á̱niet nung ba,
na yong di̱ nwuak fwuo mba hu.
A̱wot ka̱ a̱yin ma̱ mba teap,
a̱ si̱ bwuok lilyim,
nung, n na fa̱k nyinyang gu bah.”#10:38 Hab 2:3-4.
39A̱mgba̱m ma̱ng a̱nia, nzi̱t zi̱ yet á̱niet ba̱ bwuot lilyim di̱ khwi A̱gwaza, ba̱ bwuk wa a̱ni bah. Da̱ a̱kwonu a̱kya, nzi̱t zi̱ yet á̱niet nwuak fwuo bya da̱ A̱gwaza a̱ na san nzi̱t a̱ni.
Dewis Presennol:
Ibriniyawa 10: TyapNT
Uwcholeuo
Rhanna
Cymharu
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.