Ibriniyawa 1
1
Yesu Kristi wa Tyai A̱gwaza Kpa̱sai
1Gbangbang, A̱gwaza ku lyiat ma̱ng a̱yaatyia̱ a̱khwop nzi̱t ba a̱bwonu a̱yaata̱m a̱kwonu nggu ba di̱n jen ma̱ng nvak ma̱ a̱di̱di̱t. 2A̱wot di̱n jen ngaan jini, A̱gwaza lyiat ma̱ng a̱nzi̱t a̱bwonu Nggwon nggu kya. Kikya nang A̱gwaza nyia̱ a̱li̱ka̱uli a̱ na tyia̱ kuzang kyang bwak nka, ku yet gado nkaa. A̱wot kikya yet vak nang A̱gwaza nnyia̱ swanta hu a̱ni. 3Nggwon kikya tyai a̱kyenkyai shi A̱gwaza wu. A̱wot ka̱ si̱ bu tyai za̱kwa A̱gwaza ji ma̱ cha̱chaat. Kikya ba̱ng a̱mgba̱m kuzang kyang mi̱ swanta hu, mat chet a̱lyiat nka hu. Nang nggwon ka ntyak chi a̱ka̱tuk nyia̱ ka̱ si̱ jaat zi̱t a̱ni, ka̱ si̱ swan di̱n chuk tyok a̱zayak A̱gwaza Tswazwa, A̱ byia̱ A̱tsatsak A̱gba̱ndang Tyok a̱ni.
Kristi Swak A̱yaata̱m Tswá A̱gwaza ba ma̱ng Shi
4Ma̱nang a̱kyenkyai shi nggu wu nswak si̱ a̱yaata̱m tswá A̱gwaza ba a̱ni, ma a̱nia wa a̱lyoot tyok nang A̱gwaza tyia̱ nggu a̱ni, nswak lyulyoot mba hu ma̱ za̱nzan. 5Mat A̱gwaza ka̱n mak hyia̱ ma̱ng a̱ta̱m tswa a̱ghyang kyang nang gu hyia̱ ma̱ng Yesu a̱ni bah, mat A̱gwaza ku nyia̱,
“A yet nggwon nung kya,
N ma ngyet A̱tyia̱ ang wa a̱fwun.”#1:5 Za̱b 2:7.
A̱gwaza si̱ bu nyia̱,
“N na ngyet a̱tyia̱ nggu wu.
Nggu meang, a̱ na yet nggwon nung.”#1:5 2Sa̱m 7:14.
6Ma a̱nia wa, jen ji nang A̱gwaza na nta̱m Nggwon nggu ka ka̱ byia̱ shi#1:6 Lyuut cha̱chaat: “A̱niet khwop nggwon.” a̱ swak kuzang kyang mi̱ swanta hu a̱ni, a̱ si̱ nyia̱,
“Yok a̱mgba̱m a̱yaata̱m tswá A̱gwaza ba,
ba̱ kyuak ntong a̱zaghyi nggu!”#1:6 KDok 32:43.
7A̱wot nang á̱ ndyiat tazwa a̱yaata̱m tswá ba a̱ni, á̱ si̱ nyia̱,
“Nung, A̱gwaza, n ti̱n a̱yaata̱m tswá nung ba,
n ta̱m ndyo nang wun a̱ni.
A̱wot n si̱ nta̱m á̱khwo nung ba
nang a̱ka̱lyera̱p ndong a̱ni.”#1:7 Za̱b 104:4.
8A̱wot tazwa Nggwon ka, á̱ si̱ nyia̱,
“A swan da̱ a̱gba̱ndang
chuk tyok ang wu, A̱gwaza,
a nyia̱ tyok si̱ nat sang sangba̱p.
A nyia̱ tyok hu ma̱ng
a̱tsotswat shan tyok wa.
9A chat tsotswat,
a̱wot a si̱ lak a̱ka̱tuk.
Mat a̱nia, A̱gwaza,
A̱gwaza ang wu
khai ang a nyia̱ tyok,
a̱ si̱ koot ang a̱sham a̱myia̱ a̱gwai,
ka̱ swak a̱si̱ konyan#1:9a Lyuut cha̱chaat: “Á̱kpa̱ndang ang ba.” a̱ni.”#1:9b Za̱b 45:6-7.
10Á̱ si̱ bu nyia̱ ma̱ng Nggwon ka,
“Neet di̱n tsa hu, A̱tyoli,
nwan wa kpaat kuntyin a̱byin hu.
Ma̱ng mbwak ang nia
a si̱ nnyia̱ kyai tswazwa hu.
11Nkyang nani na tyak,
a̱wot nwan, a na nshya̱
si̱ nat sang sangba̱p.
A̱mgba̱m na, na tyak chet
nang á̱khwukhwop a̱yaatoot a̱ni.
12A na kut naa nang gyepto a̱ni.
A̱wot a na ji̱p naa nang
á̱ ni̱ nji̱p a̱khwukhwop a̱toot a̱ni.
A̱wot nwan, a shyak bah,
a na swuan si̱ nat sang sangba̱p.”#1:12 Za̱b 102:25-27.
13A̱gwaza ka̱n mak hyia̱ ma̱ng a̱tyo nyiung ma̱ a̱yaata̱m tswá nggu ba bah nyia̱,
“Swan da̱ a̱gba̱ndang chuk tyok
a̱zayak nung ka,
si̱ nang n tyia̱ á̱niet lak li
ang ba a̱tafa ang,
ba̱ yet ang chuk saai a̱ti̱tak.”#1:13 Za̱b 110:1.
14Mat a̱nia, a̱yaata̱m tswá ba yet ma̱ á̱khwo bya, nang A̱gwaza ni̱ ta̱m, ba̱ beang á̱niet ba̱ na shya̱ san sang sangba̱p ku yet gado mba a̱ni.
Dewis Presennol:
Ibriniyawa 1: TyapNT
Uwcholeuo
Rhanna
Cymharu
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.