1 Timoti 3
3
Za̱kwa A̱tyu Kwak A̱son Á̱niet Khwi A̱gwaza
1A̱lyiat nani yet a̱tsak a̱lyiat wa nyia̱, “A̱tyu a̱ byia̱ di̱dang yet a̱kwak a̱son á̱niet khwi a̱ni, a̱ chat a̱tsatsak ta̱m wa.”
2Mat a̱nia, a̱tyu a̱kwak a̱son á̱niet khwi ba a̱ni, ku yet ta hwa a̱ byia̱ tangka̱i za̱kwa huni, a̱ yet:
A̱tyu sang a̱bun a̱zaghyi á̱niet,
a̱tyu a̱byii̱k a̱nyiung,
a̱tyu ta̱bat a̱pyia̱,
a̱tyu a̱ byia̱ a̱chuchuk a̱di̱dam,
a̱tyu nang á̱ chyin a̱ni,
a̱tyu saai á̱nietchen a̱mali nggu,
a̱tyu a̱ lyen tyiet shansham a̱ni,
3a̱tyu nwai hyeng a̱kan,
a̱tyu nwai nyia̱ zook,
a̱tyu nyia̱ shonshyon,
a̱tyu swan swat nyinyang,
a̱tyu sang shyuo kurum.
4A̱tyu a̱ lyen si̱sak ji nang gu na mba̱ng kyang bwak nggu hu shansham a̱ni. A̱wot a̱ bu yet a̱tyu nang mman nggu na fwuong nggu, á̱ bu nwuat gu shi a̱ni. 5Mat ka̱ a̱yin lyen si̱sak ji nang gu na mba̱ng kyang bwak nggu hu a̱ni bah, a̱ na nyia̱ ni wa, a̱ mba̱ng á̱niet khwi A̱gwaza ba?
6A̱wot gu yok yet a̱niet a̱fai mi̱ khwi Yesu hu bah; kalak gu nwuo gba̱p a̱pyia̱, a̱wot a̱ si̱ kwa mi̱ shi̱ri̱ya nang á̱ na nyia̱ A̱ta̱nyeang ka ndyo a̱ni.
7Ma̱ng a̱tyu nang á̱niet nwai khwi A̱gwaza nwuat gu shi a̱ni; kalak a̱ du kwa mi̱ tsi̱ntsat A̱ta̱nyeang gu khwat a̱pyia̱ nggu nsum.
Za̱kwa Á̱niet Beang Ta̱m A̱gwaza
8Ma a̱nia wa, ku myim á̱niet beang nta̱m A̱gwaza meang, ba̱ byia̱ ntangka̱i za̱kwá jini, ba̱ yet
á̱niet nang á̱ nwuat ba shi a̱ni,
á̱niet nwai lyiat a̱fa feang,
á̱niet ba̱ nwai la̱u hyeng a̱kan a̱ni,
á̱niet ba̱ nwai shyuo á̱niet di̱ kurum a̱ni,
9á̱niet ba̱ ba̱ng tyiet hu ku shya̱ di̱ niat nang A̱gwaza tyai kpa̱sai a̱ni,
a̱wot ba̱ yet á̱niet ba̱ ka̱n nwai nyia̱ a̱ka̱tuk nang nfwuo mba na nkpaat ba a̱ni.
10Di̱ ntsa hu, ku myim á̱ ya mmak ba, ka̱nang á̱ shya̱ mba ma̱ng a̱bun bah, ba̱ sii nnwuo beang ta̱m A̱gwaza hu.
11Ma a̱nia wa, á̱nyiuk mba ba meang, ku yet ta hwa ba̱ yet:
á̱nyiuk nang á̱ nwuat ba shi a̱ni,
á̱nyiuk nwai tyam á̱ghyang á̱niet,
á̱nyiuk ta̱bat a̱pyia̱,
ma̱ng á̱nyiuk ba̱ nyia̱ tsotswat di̱ kuzang kyang a̱ni.
12A̱tyu beang ta̱m A̱gwaza, ku yet ta hwa, a̱ yet:
a̱tyu a̱byii̱k a̱nyiung,
a̱tyu a̱ lyen si̱sak nang gu na mba̱ng mman nggu na ma̱ng a̱mgba̱m kyang bwak nggu hu a̱ni.
13Á̱niet ba̱ nyia̱ ta̱m beang shansham mami sot á̱niet khwi a̱ni, ba̱ ni̱ shya̱ a̱tan a̱lyoot. Ba̱ bu ni̱ gbang a̱lyia̱ di̱ lyiat tazwa nwuak nfwuo mba na di̱ Kristi Yesu.
Kyang ku Shya̱ di̱ Niat mi̱ Nwuak A̱chuchuk di̱ Yesu a̱ni
14N dyuut ang nkyang nani ma̱ninika, ku nang n byia̱ fwuo n chat n bai da̱ a̱vwuo ang ma a̱nggang a̱ni. 15A̱wot ka̱ á̱ tyia̱ nung dyem n si̱ nda beang, n dyuut wusika jini da̱nian nyi ka lyen si̱sak ji nang ku myim zi̱ na nnyia̱ ta̱m mami sot á̱niet khwi ji a̱ni. Sot ji, ji̱ yet si̱ A̱gwaza a̱ byia̱ swuan a̱ni. Sot á̱niet khwi ji yet a̱gba̱ndang a̱ka̱nka̱ra̱ng tsuung ma̱ng kuntyin a̱chuchuk hu a̱ni.
16Kyang ku nshya̱ di̱ niat di̱ tyiet nwuak a̱chuchuk nzi̱t hu a̱ni, shi za̱m. Huhwa yet:
Yesu ku chyok a̱ bai mi̱ vam A̱tyubishyi.
A̱za̱za̱rak Ntswa ku tak
nang nggu ngyet a̱tsatsak wa.
A̱wot á̱za̱za̱rak a̱yaata̱m tswá A̱gwaza si̱ li ngguu.
Á̱ ku shei A̱sham Nkhang nggu ka,
á̱ kai a̱mgba̱m nnwap mi̱ bibyin swanta hu.
A̱mgba̱m á̱niet mi̱ swanta ba
si̱ nwuak a̱chuchuk da̱ nggu.
A̱wot á̱ si̱ kyiak gu á̱ nat ndyo
Ma A̱gwaza tswazwa
mami a̱kyenkyai shi nggu wu.
Dewis Presennol:
1 Timoti 3: TyapNT
Uwcholeuo
Rhanna
Cymharu
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.