Саалтыр 44
44
1Хуор салайааччытыгар. «Сардааналар» матыыптарынан. Корей уолаттарын үөрэтиитэ. Таптал ырыата.
2Сүрэхпиттэн кутуллар үтүөкэн тылларбын,
ырыабын мин Ыраахтааҕыга аныыбын;
мин тылым – түргэн суруксут бөрүөтэ.
3Эн хайа да киһитээҕэр кэрэҕин;
тылыҥ-өһүҥ Эйиэнэ илгэлээх үтүөнэн аллар,
ол курдук Таҥара Эйигин үйэлэргэ алҕаабыт.
4Сүҥкэн Күүстээх, кылыскын өттүккэр иилинэн,
көрдөр кэрэмэн килбиэҥҥин, сүдү Бэйэҕин.
5Сүдү Бэйэҥ, аккын миинэн#44:5 Эбэтэр: колесницаҕар олорон. , кыайыы көтөллөөх айаннаа,
кырдьыгы, көрсүө-сэмэй, көнө быһыыны көмүскээ;
уҥа илииҥ Эйиэнэ сүҥкэн дьайыылары көрдөрүөхтүн.
6Эн оноҕосторуҥ сытыы уһуктаахтар –
Ыраахтааҕы өстөөхтөрүн сүрэхтэригэр дьөлө киирэллэр;
норуоттар атаҕыҥ анныгар самналлар.
7Эн бүрүстүөлүҥ, Айыы Таҥара, үйэттэн үйэҕэ турар;
кырдьыгы өрө тутуу – Эн ыраахтааҕылыыр скипетрыҥ.
8Эн дьиҥ кырдьыгы таптыыгын, хара дьайыыны абааһы көрөҕүн.
Ол иһин Айыы Таҥара, Эн Таҥараҥ,
Эйигин, доҕотторгунааҕар өрө таһааран,
үрдүк үөрүүнү тосхойор елей арыынан аҕаата;
9Эн таҥаһыҥ барыта мирра, алоэ уонна кассия сыттаах.
Слон уҥуоҕа киэргэтиилээх дыбарыастартан
арфа тыаһа намылыйан, Эн сүрэххин сылаанньытар.
10Эйигин арыаллыыр ытык дьахталлар ортолоругар
ыраахтааҕылар кыргыттара бааллар;
уҥа өттүгэр Офир кыһыл көмүһэ симэхтээх сарыысса турар.
11Иһит эрэ, кыыһым, өйдөөн иһит мин эйиэхэ этэрбин:
эн умун норуоккун, аҕаҥ алаһа дьиэтин,
12оччоҕо умсугуйуоҕа Ыраахтааҕы кэрэ бэйэҕэр.
Кини эн Тойонуҥ, онон нөрүөн нөргүй Кини иннигэр.
13Тир норуота эйиэхэ бэлэҕин-туһаҕын аҕалыаҕа,
дьон баайа-талбата эйигин бэйэтигэр тарда сатыаҕа.
14Ыраахтааҕы кыыһын кэрэ килбиэнэ – иһигэр;
кини таҥаһа-саба кыһыл көмүс киэргэтиилээх.
15Дьэрэкээн ойуулаах таҥаһы таҥыннаран,
кинини Ыраахтааҕыга илдьэллэр,
кэнниттэн кыргыттары, дьүөгэлэрин, Эйиэхэ илдьэ бараллар.
16Үөрүү-көтүү, өрөгөй-талаан аргыстаах кэлэннэр,
кинилэр Ыраахтааҕы дыбарыаһыгар киирэллэр.
17Аҕаларыҥ оннуларыгар уолаттарыҥ олоруохтара;
Эн кинилэри сир устун кинээстэринэн туруортуоҥ.
18Эн ааккын мин көлүөнэттэн көлүөнэҕэ ааттатыам,
норуоттар Эйигин үйэттэн үйэҕэ айхаллыахтара.
Dewis Presennol:
Саалтыр 44: СБК
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Институт перевода Библии, 2008-2022