Adnodau Beiblaidd Poblogaidd o Warumi 1

Rhanna

Mimi sione yutswa kuyasumwiiya haya Maagu Mema. Koro haya haya maagu ndiyo nguvu ya Muungu iyonawapfonya wonse weonayahikiza. D̯ura yasumwiijwa kwa Wayahud̯i na wapata mupfonyo, na sasa yakusumwiijwani kwa wantu wa vyeet̯i vingine, nao wakupfonywani.

Koro hi injili inahuyanga wazi tswee namuna ya Muungu evyonawahwaa wantu kuwa wahachi usoni kwakwe. Muungu anamuhwaa muntu kuwa muhachi kuuḅana na hiviḍe amuhikiziyevyo Muungu t̯u. Dza vya matsoro yaneneyevyo yakyamba, “Huyuḍe jwa Muungu eyenamuhwaa kuwa muhachi kwa dzambo ḍya faroye, huyo anaishi maisha ya ḍugha.”

Hangu kuumbwa kwa lumwengu, wantu wesakuviona hiviḍe vyonse vya Muungu aumbiyevyo. Yani kuchiiya na kwa hivi aumbiyevyo, wanaad̯amu wesakuuona hu Umuunguwe na uwezowe usiwo chima, ingawa jeje mwenye nkaonekane na matso. Ndookomu ntawa kipfangizo kiḍechonse cha kutsamut̯ii Muungu!

Koro ingawa wamanya kwamba kuna Muungu, ntawakae na kumuhila dza evyonamala kuhilwa, na wala ntawakae na kumuyaviza ḍuḍa. Ishinu wagala kut̯ara mambo ya upuudhi muhupfu, na ntawaimuke kintu koro akili zao ziwanjia kiza.

Hi hachi dzuu ya Muungu wanaiperuya ikawa nsuwe. Wanakaa na kuviyomba na kuvihumikia hivi vija vya Muungu aviumbiyevyo, ḅad̯ala ya kumuyomba huyu aviumbiye jeje mwenye! Jeje ni Muungu eyenamala kushad̯wa hat̯a pfasipfosia. Amina.

Muungu kakuhuyangani wazi tswee kwamba karejeswa ni haya mazuka na nabvise zonse za wanaad̯amu wezonahenda. Kakuhuyangani kwamba anawahukumu na hukuḍe mbinguni aiko, koro kwa haya mazuka yao weyonahenda, wanaikaiya machingama hi hachi itsemanyikana.

Kwa dzambo ḍyevihivi, Muungu kawayatsa wauḅe hizi t̯amaa zao nzuka nzuka za kimwii. Wake wangine wakuyaani na wake wenzao na hali Muungu nkakuumba kwamba vihendeke dzevyohivyo. Hawa wayume nao wanayatsa hi njia ya sawa ya muke na muyume, wakanjia t̯amaa ya kuyaana wao na wao. Wayume kwa wayume wanakaa na kuhendeana mambo machafu machafu. Ndookomu wanadzingizia kuhukumigwani dza wevyonamala, kwa dzambo ḍya haya mahendo yao mazuka mazuka. Kwa kwamba wadziza kumuhambuya Muungu, nae Muungu kawayatsa wakidzit̯aria haya mat̯aro yao mazuka mazuka, ili kwamba wakidzihendea ḅasi haya mambo wasiyomala kuyahenda.

Wanakaa na kudziona kwamba ni makaro, na hali huku ni maḍyura. Ḅad̯ala ya kumuyomba huyu Muungu mwenye nguvu eyenaishi maishi, wananjia kuyombani miungu ya masanamu. Hi miungu yao ingine ni masanamu ya wanaad̯amu, na hali mwanaad̯amu ni kiumbe chichonafwa kikawowa! Miungu yao ingine ni masanamu ya nyuni ambu ya waḍondo wangine garagara.