Hechos 15
15
Jerusalénchö willanakuyanqan
1Tsë witsanmi Judeapita Antioquíaman ëwëkur wakin nunakuna wawqikunata kënö yachatsiyarqan: <<Moisés qellqashqan leykunachö nishqannö#Lev. 12.3. mana señalakurqa manam salvakuyankitsu>>.
2Tsënö yachatsiyaptinmi Pablo y Bernabé pëkunawan alläpa liryayarqan. Tsëmi Antioquíachö markäkuqkuna willanakurir Pabluta, Bernabéta y wakinkunatapis Jerusalénman kachayarqan apostolkunata y anciänukunata tapukayämunanpaq.
3Jerusalénpa ëwaqnö Feniciapa y Samariapa pasarmi wawqikunata y panikunata willayarqan mana Israel kaq nunakunapis Jesucristuta chaskikuyashqanta. Tsënö willapäyaptinmi llapanpis kushikuyarqan.
4Jerusalénman chäriyaptinnam apostolkuna, anciänukuna y tsëchö këkaq llapan markäkuqkunapis pëkunata kushishqa chaskiyarqan. Tsëpitanam Pabluwan Bernabé willapäyarqan markan markan puriyaptin Teyta Dios imanö yanapashqanta. 5Tsëmi Jesúsman creyikushqa wakin fariseukuna contran shärir kënö niyarqan: <<Jesústa chaskikurpis mana Israel nunakunaqa señalakuyätsun y Moisés qellqashqan leykunatapis cumpliyätsun>> nir.
6Tsënö niyaptinmi apostolkuna y anciänukunapis ëllukëkur parlayarqan. 7Alläpa liryakuyaptinmi Pedro sharkur nirqan: <<Wawqikuna, musyayankim mana Israel nunakuna Jesucristuman manaraq creyikuyaptin willakïninta willapänäpaq Teyta Dios akramashqanta.#Hech. 10.1-43. 8Teyta Diosqa musyanmi nunapa shonqun imata yarpashqantapis. Tsëmi rasunpa creyiyashqanta musyatsimänantsikpaq noqantsikman kachamushqannö#Hech. 2.4. pëkunamanpis Espíritu Santuta kachamushqa.#Hech. 10.44. 9Tsënöpam musyantsik Jesucristuman creyikuq kaqtaqa Israel nuna kaptinpis o mana Israel nuna kaptinpis Teyta Dios shonqunkunata purificar salvashqanta.
10<<Tsënö këkaptinqa ¿imanirtaq Teyta Diosta piñatsir discïpulukunata#15.10 Discïpulukunapaq parlarqa Jesucristuta chaskikuqkunapaqmi parlëkan. niyanki Moisés qellqashqan leykunata cumpliyänanpaq? Tsë leykunataqa unë castantsikkunapis ni kikintsikpis manam cumplita puëdirquntsiktsu. 11Israel nuna kashqapis o mana Israel nuna kashqapis Señor Jesucristo ankupämarnintsikmi salvamantsik>>.
12Pedro tsënö niptinmi tsëchö kaq nunakuna upälläkuyarqan. Tsënam Pabluwan Bernabé willapäyarqan mana Israel nunakuna kaqchöpis milagrukunata rurayänanpaq Teyta Dios yanapashqanta.
13Tsënö willakur ushariyaptinmi Santiago nirqan: <<Wawqikuna, wiyayämë. 14Simónmi#15.14 Simónpa juk kaq shutinmi karqan Pedro. willamarquntsik mana Israel nunakunata willapaptin Teyta Dios salvashqanta. 15Tsënö kananpaqmi profëtakuna qellqayashqanchöpis kënö nikan:
16<< <Tsëpita kutimurmi Davidpa juchutsishqa wayinta yapë shäritsishaq.#15.16 Davidpa wayinpaq parlarqa Davidpita miraq reykunapaqmi parlëkan. Davidpa wayin juchutsishqa kashqanta nirqa Davidpita miraqkuna manana reykuna kayashqanta nikan. Yapë shäritsishaq nirqa Davidpa castanpita rey kananpaq yapë churashaq ninmi.
Unë kashqannö yapë kananpaqmi juchutsishqa kaqkunata altsashaq.#Mat. 1.1; Luc. 23.3.
17Tsënö rurashaq llapan nunakunapis ashiyämänanpaqmi.
Noqa akrashqä mana Israel nunakunapis noqamannam creyikayämunqa.
18Noqa Teyta Diosmi tsënö nï.
Tsënö kananpaqmi unëpita patsa musyatsirqä>.#Amós 9.11-12.
19<<Tsënö niptinmi noqa nï: Mana Israel nunakunapis Jesucristuman creyikuyaptin ama ima atäjutapis churashuntsu. 20Tsëpa rantinqa cartakushun ïdulukunapaq pishtayashqan ëtsata mana mikuyänanpaq,#Éxo. 34.15-17. fornicación jutsata mana rurayänanpaq, jurkakëpa wanushqa wätakunapa ëtsanta mana mikuyänanpaq y wätapa yawarnintapis mana mikuyänanpaq.#Lev. 17.10-16. 21Tsëkunata cumpliyänanpaqqa unëpita patsam Moisés qellqashqan leykunata cada markachö yachatsikuyan. Tsënöllam cada jamakï junaq sinagögakunachö leyikäyan>>.
Jerusalénpita cartakuyanqan
22Tsënö niptinmi apostolkuna, anciänukuna y llapan wawqikuna y panikunapis kushikuyarqan. Tsëmi Pablo y Bernabé Antioquíaman kutiyaptin yanaqäyänanpaq ishkë wawqikunata akrayarqan. Tsë wawqikunam kayarqan Judas y Silas. Judaspa juk kaq shutinmi karqan Barsabás. Judasta y Silastam llapan wawqikuna y panikunapis respetayaq. 23Pëkuna apayashqan cartachömi kënö nirqan:
Antioquíachö, Siriachö y Ciliciachö këkaq mana Israel wawqikuna y panikuna, qamkunapaqmi apostolkuna, anciänukuna y Jerusalénchö këkaq wawqikuna y panikunapis kë cartata cartakayämü. Salüdusnïkunata apëkatsiyämü.
24Noqakuna musyayarqümi wakin wawqikuna Jerusalénpita shamur llutanta yachatsikur llakitsiyäshushqëkita. [Pëkunam Moiséspa leyninta cumplir señalakuyänëkipaq kashqanta niyan.] Pëkunata manam noqakuna kachayämurqütsu. 25Tsëta musyarirmi llapäkuna willanakurir kuyë wawqintsik Pabluwan y Bernabéwan shayämunanpaq ishkë wawqikunata kachëkäyämü. 26Pabluwan Bernabémi wanïtapis mana mantsashpa Señornintsik Jesucristupa willakïninta willakïkäyan. 27Pëkunawanmi Judasta y Silasta kachëkäyämü kë cartachö qellqayämushqäta käyitsiyäshunëkipaq.
28Manam noqakunapis ni Espíritu Santupis qamkunata obligayaqtsu Moisés qellqashqan leykunata cumpliyänëkipaq. 29Imanö kaptinpis ïdulukunapaq pishtayashqan ëtsata, jurkakëpa wanushqa wätakunapa ëtsanta y wätapa yawarninta ama mikuyëtsu. Tsënölla fornicación jutsata ama rurayëtsu. Kë nishqäkunata cumpliyaptikiqa allim kanqa. Ëwallä.
30Despachayaptinmi Judaswan Silas Antioquíaman chärir markäkuqkunata ëllïkur apayashqan cartata qoykuyarqan. 31Tsë cartata leyiriptinmi llapan kushikuyarqan. 32Judaswan Silaspis profëta karmi tukïnöpa käyitsir wawqikunata y panikunata kallpatsayarqan. 33Tsëchö pëkunawan atska junaq täkurirmi Teyta Diosta mañakurir Jerusalénman kutikuyänanpaq wawqikuna y panikuna despachëkuyarqan. 34[Tsënö kaptinpis Silasqa quedakurqanran.] 35Pabluwan Bernabépis Antioquíachö quedëkurmi Jesucristupa alli willakïninta wakin wawqikunawanpis yachatsikuyarqan.
Pablo yapë willapäkuq ëwanqan
36Tsëpita atska killatanam Bernabéta Pablo kënö nirqan: <<Jesucristupa willakïninta willakushqantsik markakunaman kutir wawqikuna y panikuna imanö këkäyashqantapis musyamushun>>.
37Tsënam Bernabéqa Marcos niyashqan Juanta pushëta munarqan. 38Tsënö kaptinpis Pabluqa manam munarqantsu apëta, Panfiliapita#Hech. 13.13. jaqirïkur kutikamushqa kaptin. 39Tsëmi Pabluwan Bernabé alläpa liryar rakikäyarqan. Bernabémi Marcusta pusharkur barcuwan Chipriman ewkurqan. 40Pablunam yanaqänanpaq Silasta akrarqan. Tsëpitanam wawqikuna y panikuna Teyta Diosta mañakurir kachayaptin pëkunapis ewkuyarqan. 41Siria y Cilicia provinciakunachö markakunaman chärirmi Pabluwan Silas wawqikunata y panikunata kallpatsayarqan.
Právě zvoleno:
Hechos 15: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.