Hechos 14
14
Iconio markachö willakuyanqan
1Tsëpitanam Iconio markachö Pabluwan Bernabé sinagögaman yëkuyarqan. Tsëchö alläpa shumaq willapäkuyaptinmi Israel nunakuna y mana Israel nunakunapis Jesucristuman atskaq markäkuyarqan. 2Mana markäkuq kaq Israel nunakunaqa wakin mana Israel nunakunatam willapäyarqan Jesúsman markäkuqkunapa contran shäriyänanpaq.
3Contran shäriyaptinpis Pabluwan Bernabéqa Teyta Diosman markäkurmi atska junaq mana mantsakushpa willapäkuyarqan. Salvamänantsikpaq kaq willakïnin rasunpa kashqanta musyayänanpaqmi Teyta Dios pëkunata yanaparqan milagrukunata rurayänanpaqpis.
4Tsënö kaptinpis tsë markachö täraq nunakuna kikinpura piñatsinakurmi wakinqa Israel nunakunaman qaqäyarqan y wakinnam apostolkunaman qaqäyarqan. 5Tsëmi Israel nunakuna y mana Israel nunakunapis autoridäkunawan parlayarqan apostolkunata tsampipa wanutsiyänanpaq. 6Tsëta musyëkurmi Pabluwan Bernabé ewkuyarqan Listraman, Derbiman y Licaoniachö këkaq wakin markakunamanpis. 7Tsë markakunachöpis Teyta Diospa alli willakïnintam willakuyarqan.
Listra markachö Pabluta tsampiyanqan
8Listra markachömi yurikushqanpita patsa cöju nuna tëkarqan. 9Parlashqankunata wiyar këkaqta rikarmi Pablo tantiyarqan kachakänanpaq Teyta Diosman markäkïkashqanta. 10Tsëmi qaparipa nirqan: <<¡Sharkur shumaq shärë!>>
Tsënö niptinmi raslla sharkur purir qallëkurqan.
11Tsëta rikëkurmi nunakuna kikinkunapa idiömanchö qaparipa kënö niyarqan: <<¡Dioskunam nuna tukurlla noqantsikman shayämushqa!>>
12Tsëmi Bernabéta niyarqan <<Zeus>> nir y Pablutanam willakuq kaptin niyarqan <<Hermes>> nishpa.#14.12 Zeustam latín idiömachö Jupiter niyan. Hermestanam latín idiömachö Mercurio niyan. 13Tsë marka yëkunachömi Zeus niyashqan diosta adorakuyänan templu karqan. Apostolkunata adorayänanpaq törukunata pishtar kayëta munayaptinmi tsë templuchö sirwiq sacerdöti törukunata wëtan wallqashqata marka punkuman qatirqan.
14Tsëta käyirmi apóstol Pabluwan apóstol Bernabé ratashninkunata rachirïkur#Gén. 37.29; Jos. 7.6; 2Rey. 2.12; Mar. 14.63. nunakuna këkäyanqanman ëqillapa ëwar niyarqan: 15<<¡Tëtakuna, ama tsëta rurayëtsu! Noqakunapis qamkunanö nunallam kayä. Shayämurqü manakaq dioskunata jaqirir wiñëpa kawaq Teyta Diostana adorayänëkipaq käyitsiqnikikunam. Pëmi ciëluta, kë patsata, lamarta y llapan imëkatapis kamashqa. 16Nöpataqa kikinkuna munayashqannö kawakuyänanpaqmi nunakunata Teyta Dios jaqirirqan. 17Tsënö jaqirirpis pïmëtam käyitsin rasunpa kaq Dios kashqanta y kuyakuq kashqanta. Pëmi mikïnikikuna alli wayunanpaq tamyatapis tamyatsimun y kushishqa kawanantsikpaq mikïkunatapis qomantsik>>.
18Tsënö nir käyitsiptinpis Pabluta y Bernabéta mana adorayänanpaq sasataran käyiyarqan.
19Tsëpitanam apostolkunata chikiq Israel nunakuna Antioquíapita y Iconiupitapis Listraman chäyarqan. Pablupa contran shäriyänanpaq willapäyaptinmi nunakuna Pabluta wanuqpaq tsampikïkuyarqan. Wanushqana kashqanta yarparmi qarachëpa apëkur markapa jaqninman jitariyarqan. 20Tsëchö discïpulukuna jiruruq këkäyaptinmi kawarimur markaman Pablo kutirqan. Tsëpita waräninnam Derbe markaman Bernabéwan ewkuyarqan.
Pabluwan Bernabé Siriaman kutiyanqan
21Derbiman chärir alli willakïta willakuyaptinmi atskaq nunakuna Jesúsman markäkur discïpulunkuna tikrayarqan. Tsëpitanam kutikuyarqan Listra, Iconio y Antioquía markakunaman. 22Tsë markakunaman chëkurmi Jesúspa discïpulunkunata#14.22, 28 Discïpulukunapaq parlarqa Jesucristuman markäkuqkunapaqmi parlëkan. mana ajayëpa markäkuyänanpaq kallpatsar niyarqan: <<Teyta Diospa mandakïninman yëkunantsikpaqqa tukï jipakïtaran pasashun>>.
23Tsënöllam wawqikunata y panikunata yanapayänanpaq cada iglesiachö anciänukunata churayarqan. Tsëpitanam ayunar y Teyta Diosta mañakur markäkuyashqan Señor Jesucristupa makinman pëkunata churëkuyarqan.
24Pisidia provinciapita kutirnam Panfilia provinciamanna chäyarqan. 25Perge markachöpis Teyta Diospa willakïninta willakurirmi Atalia markaman ëwayarqan. 26Tsëpitam barcuwan Antioquíaman kutikuyarqan. Antioquíapitam puntatapis markäkuqkuna kachashqa kayarqan willakur puriyänanpaq. Kacharmi Teyta Diosta mañakuyarqan pëkunata yanapëkunanpaq. 27Antioquíaman chëkurnam markäkuqkuna ëllukäyaptin willapäyarqan Teyta Dios alli yanapashqanta. Tsënöllam willayarqan mana Israel nunakunapis Jesucristuman markäkuyänanpaq Teyta Dios yanapashqanta. 28Pabluwan Bernabé tsëchö unëyaqmi discïpulukunawan täräyarqan.
Právě zvoleno:
Hechos 14: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.