Génesis 37
37
1Papänin tashqan Canaánlachömi Jacob tarqan.
José sueñushqankuna
2Kaychömi qelqaraykan Jacobpita y surinkunapitapis. Chunka qanchis watayuq kaykarmi José papäninpa uyshankunata y cabrankunata misirqan Bilhapa y Zilpapa wawan kaq wawqinkunawan. Bilhawan Zilpaqa kayarqan taytanpa ashmay kaq warminkunami. Wawqinkuna mana alikunata rurayashqantami Joséqa papäninta imaypis wilapaq.
3Awkinyaynincho surin José yurish kaptinmi Israelqa#37.3 Israelqa Jacobpa jukaq jutinmi karqan. wakin surinkunapitapis payta mas kuyarqan. Saymi kuyaylapaq alinnin tünicata ruraparqan. 4Joséta taytan mas kuyaptinmi wawqinkuna pasaypa chikir ayaq shimilanpa parlapäyaqpis.
5Juk kutichömi sueñushqanta José wilaparqan wawqinkunata. Saymi wawqinkuna masraq chikiyarqan. 6Wilaparmi nirqan: <<Sueñushqäta wilapäyäshayki. 7Sueñuynïchömi chakracho trïguta liyakuykashkansi kash. Liyakuykashqä terciumi kikilan ichikurkunä. Qamkunapa terciuykikunanami ichiraykaq terciüman tumaypa imayka adoraqno umpuraykäyänaq>>.
8Sayno sueñushqanta wilapaptinmi wawqinkuna masraq chikir niyarqan: <<Sayno nishpayki ¿mandayämaq rey kanaykipaq kashqantaku yarpaykanki? ¿Munaynikicho sararäyämänaykipaq kashqantaku yarpaykanki?>>
9Saypita yapaypis sueñushqanta wawqinkunata wilaparmi José nirqan: <<Sueñuynïchömi rikashkä intipis, killapis y chunka juk qoyllarkunapis noqata adoraykäyämaqta>>.
10Say sueñushqanta papänintawan wawqinkunata wilapaptinmi papänin olqutupar nirqan: <<¿Imata yarpartaq sayno wilapäyämanki? ¿Noqapis mamaykipis wawqikikunapis qamman qonqurpakayämunäpaq kashqantaku yarpaykanki?>>
11Sayno wilapaptin wawqinkuna masraqmi chikiyarqan.#Hech. 7.9. Papänin yarpachakurmi nirqan: <<¿Imapaqraq surï sayno sueñuykush?>>
Joséta wawqinkuna rantikuyashqan
12Juk kutimi Josépa wawqinkuna Siquem partiman aywayarqan papäninpa uyshankunata y cabrankunata misiyänanpaq. 13Saymi Joséta taytan Israel nirqan: <<Siquem jirkachömi wawqikikuna uyshansita misiykäyämun. Imano kaykäyashqantapis musyanäpaq ayway watukaramuy>>.
Sayno niptinmi José nirqan: <<Aywä ari, papä>>.
14Saymi papänin nirqan: <<Wawqikikuna y uywansikuna imano kaykäyashqantapis shumaq rikapakaramur apurä kutimunki imano kaykäyashqantapis wilamänaykipaq>>.
Sayno nirmi Hebrón pampapita Joséta Israel kacharqan Siquem jirkakunapa. 15Saymi Siquem partiman chaykur wawqinkunata ashir pantakash purirqan. Sayno puriykaptinmi juk runa Joséwan tinkur tapurqan: <<¿Imatataq ashiykanki?>> nir.
16Saymi José nirqan: <<Wawqïkunatami ashiykä. ¿Manaku rikalashkanki maycho misikuykäyaqtapis?>>
17Saymi nirqan: <<Paykuna kaypita aywakuyashnami. <Dotánläpa aywakushun> nir wilanakuykäyaqtami wiyashkä>>.
Saypita José aywarmi wawqinkunata Dotáncho tarirqan.
18Karulataraq José shamuykaqta rikaykurmi wawqinkuna wilanakuyarqan wanusiyänanpaq. 19Saymi niyarqan: <<¡Sueñuq chölu shamuykan! 20Kanan jukla wanurasir ayanta pipis mana tarinanpaq pözuman jitarpushun. Nirkur papäninsita wilashun ima fiyu uywakunapis mikukurkuyashqanta. Sayno ruraskish mä sueñushqannökush kamakänaq>>.
21Sayno wilanakuyashqanta wiyaykurmi wawqin Rubén imanöpapis sapayta munar nirqan: <<Ama wanusishunsu. 22Wawqinsipa yawarninta jichanansipa trukanqa kay sunyaq jirkacho kaykaq pözuman winaykushun. Ama kikinsi wanusishunsu>>.
Rubén sayno nirqan Joséta imaykanöpapis kawaykaqta taytanman kutisiyta munarmi.
23Saymi wawqinkuna kaqman José chaykuptin kuyaylapaq tünicanta jukla loqtiriyarqan. 24Nikurmi saki pözuman jitarpuyarqan. 25Saypitanami mikapakur jamaraykäyashqancho rikaskiyarqan ismaelita runakuna askaq shamuykäyaqta. Paykunami camëllunkunawan Galaadpita apaykäyarqan perfümikunata, balsamuta y mïrrata Egiptucho rantikuyänanpaq.
26Saymi wawqinkunata Judá nirqan: <<Wawqinsita wanurasir mana musyaq tukushqansiwan manami imatapis jorqushunsu. 27Wanusinansipa trukanqa taqay ismaelita negociantikunata rantikurishun. Jinachöpis pay yawarninsimi>>.
Judá sayno niptinmi wawqinkuna niyarqan: <<Alimi kanman>>.
28Madiánpita ismaelita negociantikuna päsaykaqkunatami pözupita Joséta jorqaskamur ishkay chunka (20) siclo#37.28 Juk siclo qellayqa juk killa arur gänashqannömi karqan. qellaycho rantikuykuyarqan.#Hech. 7.9. Saynöpami Joséta Egiptuman apakuyarqan.
29Pözuman Rubén kutir Joséta mana tarirmi fiyupa lakikushpan mödanantapis rachirqanraq. 30Saypitami wawqinkuna kaqman aywaykur nirqan: <<¡Pözuman winashqansi wawqinsi manami kannasu! Kanan ¿imatataq rurashaq?>>
31Saymi cabrata pishtarkur Josépa tünicanta yawarwan pichuyarqan. 32Sayno rurarkurnami papäninman apasiyarqan. Apaqtami encargakuyarqan wilar ninanpaq: <<Kay tünicata tariyashkä sunyaq jirkachömi. Shumaq reqiy, papä, surikipa tünican kashqanta o mana kashqantapis>>.
33Chaykur wilaptin surinpa tünicanta Jacob reqiykurmi nirqan: <<¡Kayqa surïpa mödananmi! ¡Jirkacho fiyu uywakunachir mikukurkuyash!>>
34Saymi lakikushpan mödananta rachirir lütu mödanatana jatikurqan. Surin wanushqanta asïlaqa mana qonqarmi selläma waqar purirqan. 35Surinkuna warmipis olqupis shoqayaptinpis masraqmi waqar nirqan: <<Wanur paywan tinkushqäyaqmi surïta lütushaq>>.
36Madianita negociantikuna Egiptuman Joséta chaykasirmi Faraónpa wardiankunapa capitannin Potifarman rantikuykuyarqan.
Právě zvoleno:
Génesis 37: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.