Génesis 38
38
Tamar wachashqan
1Say wisanmi wawqinkunawan taykashqanpita Judá aywakurqan Hirapa wayinman. Hiraqa Adulam markapitami karqan. 2Saycho tarmi Súa jutiyuq cananeo runapa surin jipashwan reqinakur majasakarqan. 3Say jipash qeshyaq rikakur olqu wamrata qeshyakurmi jutisirqan Er jutin kananpaq. 4Saypita yapay olqu wamrata qeshyakurmi jutisirqan Onán jutin kananpaq. 5Saypita yapaypis juk olqu wamrata qeshyakurmi jutisirqan Sela jutin kananpaq. Quezibcho Judá taykaptinmi say surinkuna yuriyarqan.
6Qechpa kaq surin Ertami Judá täsirqan Tamar jutiyuq jipashwan. 7Erqa yaqa runa kashpan manami Tayta Dios munashqannösu kawarqan. Sayno mana cäsukushqanpitami Tayta Dios wanusirqan.
8Saymi shulka kaq surin Onánta Judá nirqan: <<Wawqikipa viüdanwan täkuy, hïju. Paycho suriki yuriptin wawqikipa surinnömi kanqa>>.#Deut. 25.5-6.
9Onán musyarqan surin yurirpis wawqinpa surinno kananpaq kashqantami. Saymi cuñädan viüdawan punushqan höra ruraykashqancho jorqurir jukläman juturasiq. Sayno rurarqan wawqinpa surinno kananta mana munarmi. 10Sayno Onán ruraptinmi Tayta Dios fiyupa rabyakur paytapis supaynin aparasirqan.
11Ishkan surinkuna sayno wanuyaptinmi Judá yarparqan surin Selapis Tamarwan tashpan wanunanpaq kashqanta. Saymi Tamarta nirqan: <<Surï Sela maqtayashqanyaq taytaykipa wayincho viüdala täkuykay>>.
Sayno niptinmi Tamar taytanpa wayinman kutikurqan.
12Saypita aska wata päsarkuptinnami Judápa warmin wanurqan. Say warmi karqan Súapa surinmi. Warminta lüturkurnami Judá aywarqan Timnatman. Saychömi minkayninkuna uyshankunapa milwanta rutuykäyarqan. Paytami Adulam markapita reqinakushqan Hira walkirqan.
13Timnatman milwa rutuq suedrun aywaykashqantami Tamarta wilayarqan. 14Saymi lütushqan mödanata trukakurir umanman vëluta shukutakurqan pipis mana reqinanpaq. Nirkurnami Enaim marka yaykunaman jamakuykurqan. Say karqan Timnatman aywana nänichömi. Tamar sayno rurarqan Sela poqush maqtana kaykaptinpis suedrun mana täsiptinmi.
15Qaqlan sapash warmi jamaraykaqta rikarmi Judá yarparqan prostitüta warmi kashqanta. 16Saymi nänipa aywaykashqanpita parlapaq witiparqan. Lumsuynin kashqanta mana musyarmi nirqan: <<¿Manasuraq punukushwan, mamïta?>>
Niptinmi nirqan: <<Punushqaqa ¿imatataq pägamanki?>>
17Saymi Judá nirqan: <<Juk malta cabratachir apasimushaq>>.
Saymi warmi nirqan: <<Rasunpaypa apasimänayki kaptinqa imalaykitapis prendata kachapämay>>.
18Sayno niptinmi Judá nirqan: <<¿Imata kachapänätataq munanki?>>
Saymi nirqan: <<Sëlluykita watuntinta y aptaraykashqayki tukruykita kachapämay, ä>>.
Sayno niptinmi sayninkunata kachapaykur paywan punurqan. Saypitami Tamar qeshyaq rikakurqan. 19Nirkurnami Tamar wayinpa kutiykur jatirashqan vëlunta jorqurir lütu mödananta yapay jatikurqan.
20Saypitanami amïgun Hirawan malta cabrata Judá apasirqan prendankunata shuntamunanpaq. Cabrata apakurkur aywar say warmita manami tarirqannasu. 21Saymi say markacho taq runakunata tapukur nirqan: <<Tapukuläshayki, taytakuna. Kay Enaim markaman yaykunacho jamaraykaq prostitüta warmita ¿manaku rikayashkanki?>>
Sayno tapukuptinmi saycho taq runakuna niyarqan: <<Kaycho manami ima prostitütatapis rikayashkäsu>>.
22Runakuna sayno niyaptinmi Judá kaqman kutiykur wilarqan: <<Manami say warmita tarishkäsu. Runakuna niyämash imaypis saycho prostitüta warmi mana kashqantami>>.
23Saymi Judá nirqan: <<Mana tariptikiqa imanäshuntaq. Yapay ashishqaqa runakuna asipämäshunmi. Prenda kachapamushqäkunata jina apakusunpis>>.
24Saypita kimsa killatanömi runakuna shamur Judáta niyarqan: <<¡Lumsuyniki Tamar pitapis waynäkushqami kanqa! ¡Saymi kanan qeshyaq kaykan!>>
Saymi Judá fiyupa rabyashpan nirqan: <<¡Say niraq warmitaqa wayinpita jorqurir rupasiyay!>>
25Wanusiyänanpaq apaykäyaptinmi suedrun Judáman Tamar wilakasirqan: <<Kay sararaykashqä prendayuqpatami qeshyaq kaykä. Reqiyay watuntin sëllu y tukru pipa kashqantapis>>.
26Sayta rikaykurmi Judá kikinpa kashqanta reqir nirqan: <<Pay manami jusayuqsu. Noqami jusayuq kaykä surï Selawan mana täsishqäpita>>.
Say junaqpitaqa lumsuyninta Judá mananami yataparqannasu.
27Killan tinkuptin Tamar qeshyakurqan milishtami. 28Qeshyakuyta nakaykaptinmi jukaq wamrapa makin yarqamurqan. Sayno yarqamuptinmi partëra puka jïluwan wataparkur nirqan: <<Kay kaqmi qechpa kaykan>>.
29Nirkurmi jinan höra makinta kutisikurkurqan. Saypita wawqin puntata yuriptinmi partëra nirqan: <<¿Imanöparaq kay jukaqta yalimush?>>
Puntata yurishqanpitami say wamrata jutisirqan Fares#38.29 Fares ninanqa kichaq ninanmi. jutin kananpaq. 30Saypitaraqmi puka jïluwan makin watash kaykaq yurirqan. Say wamrata jutisirqan Zara#38.30 Zara ninanqa asikyaq ninanmi. Sayno jutinta churaparqan puka jïluwan watash kashqanpitami. jutin kananpaq.
Právě zvoleno:
Génesis 38: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.