Génesis 35
35
Bet-elcho Jacobta Tayta Dios bendicionninta qoshqan
1Saypitanami Jacobta Tayta Dios nirqan: <<Imaykitapis apakurkur Bet-elcho tänaykipaq aywakuy. Wawqiki Esaúpita qeshpir aywaptiki yuripashqä#Gén. 28.10-22. Bet-elman chaykur altarta perqanki adoramänaykipaq>>.
2Tayta Dios sayno niptinmi surinkunata, warminkunata y ashmayninkunatapis Jacob nirqan: <<Ima ïdulukunatapis sarararqa lapanta jitariyay. Nirkur purificakuyashpayki armakur mödanaykita trukakuyay. 3Kanan Bet-elmannami aywakushun. Saychönami altarta perqashaq imaypis yanapämaq Tayta Diosta adoranansipaq. Paymi fiyupa nakar maypa puriptïpis yanapämash>>.
4Sayno niptinmi sararäyashqan ïdulukunatapis arëtikunatapis#35.4 Say arëtikunaqa rikasikuyänanpaq y ïdulukunata adorayänanpaqmi karqan. Saymi Jacob munarqansu pipis sararänanta. jorqur Jacobta qoykuyarqan. Saykunatami Siquem cercancho kaykaq encina jacha chakinman pampaykurqan.
5Taykäyashqanpita aywakuyaptinmi say particho taq runakunapa shonqunkunata Tayta Dios mansarïsirqan mana qatipäyänanpaq. 6Saymi Jacobwan aywaq kaqqa lapanpis chäyarqan Canaáncho kaykaq Luz markaman. Say markapa jukaq jutinmi kaykan Bet-el. 7Saychömi altarta Jacob perqarkur jutisirqan El-Bet-el#35.7 El-Bet-el ninanqa Bet-elcho yuripashqan Dios ninanmi. jutin kananpaq. Sayno jutinta churaparqan wawqinpita qeshpir aywakuykaptin Tayta Dios saycho yuripashqanpitami.
8Bet-elcho Jacob kaykaptinmi Débora wanurqan. Débora karqan Rebecata pishinpita ashmaq warmimi. Wanuykuptinmi pampayarqan Bet-el marka cercancho kaykaq encina jacha chakinman. Say partitami jutisirqan Alón-bacut#35.8 Alón-bacut ninanqa waqay encina ninanmi. jutin kananpaq.
9Padan-arampita kutiykämuptinnami Jacobta Tayta Dios yapay yuriparkur bendicionninta qor nirqan: 10<<Kananpitaqa mananami Jacobnasu jutiki kanqa, sinöqa Israelnami>>.#Gén. 32.28. Sayno nirmi saycho jutinta trukasiparqan.
11Saynöpis Tayta Dios nirqan: <<Noqami kaykä El-Shaddai.#35.11 El-Shaddai ninanqa lapanpaq munayyuq Dios ninanmi. Qampita miraqkuna askaman mirayäsun. Paykunamanmi bendicionnïta churashaq saysikaman mirar aska nacionkuna kayänanpaq. Paykunapitami reykunapis kayanqa. 12Abrahamtawan Isaacta rikasishqä jalqakunata y raqrakunatami qoykushayki. Wanuptikipis qampita miraqkunatami qoykushaq>>.#Gén. 17.4-8.
13Jacobwan sayno parlarkurmi Tayta Dios aywakurqan.
14Saymi Tayta Dioswan parlashqan kaqcho wanka rumita Jacob ichisirqan. Nirkurmi Tayta Diosta adorashpan say wanka jananman vïnutawan aceitita winaparqan. 15Tayta Dioswan parlashqanpitami say partita Jacob jutisirqan Bet-el#35.15 Bet-el ninanqa Diospa wayin ninanmi. jutin kananpaq.#Gén. 28.19.
Raquel wanushqan
16Bet-elcho taykashqanpitanami Efrataman Jacob aywakurqan. Sayman chaykaptinmi killan tinkuptin Raquelta nanay sarirqan. Saychömi wachayta mana kamäpakur fiyupa nakarqan.
17Sayno nakaptinmi Raquelta partëra nirqan: <<Valorta sariy. Kanan kaq wawaykipis olqumi>>.
18Pasaypa wanuykashqanchönami Raquel nirqan: <<Benoni#35.18a Benoni ninanqa nakarraq wachashqä wawä ninanmi. kasun kay wawäpa jutin>>. Papäninnami say surinta jutisirqan Benjamín#35.18b Benjamín ninanqa kuyay surin ninanmi. jutin kananpaq. 19Nakayta qeshyakuskirmi Raquel päsarpurqan. Wanuykuptinnami Efrataman aywaq näni nawpanman pampayarqan. Say partitami kananqa Belén niyan. 20Raquelta pampayashqan jananmanmi wankata Jacob ichisirqan señal kananpaq. Say wankami kananyaqpis musyasimansi maynincho Raquel pamparashqanta.
Rubén jusalikushqan
21Raquelta pampashqan kaqpita aywakurmi Israel#35.21 Israelqa Jacobpa jukaq jutinmi karqan. posädakurqan Edar törri washaläninman. 22Saycho taykaptinmi Jacobpa surin Rubén papäninpa concubïnan Bilhawan punurqan. Surin sayno rurashqanta musyaykurmi taytan fiyupa rabyakurqan.
Jacobpa surinkuna
1 Crónicas 2.1-2
Israelpa olqu surinkuna kayarqan chunka ishkaymi.
23Leapa qechpa wawanmi karqan Rubén.
Paypa qepanman yuriqkunami kayarqan Simeón, Leví, Judá, Isacar y Zabulón.
24Raquelpa wawankunanami kayarqan Joséwan Benjamín.
25Raquelpa ashmaynin Bilhapa wawankunanami kayarqan Danwan Neftalí.
26Leapa ashmaynin Zilpapa wawankunanami kayarqan Gadwan Aser.
Jacobpa say surinkuna lapanpis yuriyarqan Padan-aramchömi.
Isaac wanushqan
27Saypitanami Jacob aywarqan Mamre partiman taytan Isaacta watukashpan. Mamre karqan Quiriat-Arba cercanchömi. Quiriat-Arbapa jukaq jutin kaykan Hebrónmi. Saychömi Abrahampis unay tarqan.#Gén. 13.18. 28Pachak puwaq chunka (180) watami Isaac kawarqan. 29Pasaypa awkinyashqanyaq kawarkur wanukushpanmi unay ayllunkuna kaqman aywakurqan. Ayantami Esaúwan Jacob pampayarqan.
Právě zvoleno:
Génesis 35: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.