Mateyo 24
24
Jesu mbwaakaamba shakunyonyooka kwa Ŋanda yakwe Lesa
(Maako 13:1-2; Luka 21:5-6)
1Jesu ndyaakaswa muŊanda yakwe Lesa, bashikwiiya bakwe bakamutondesha mbuli mboyakayakwa kabotu Ŋanda iyo. 2Sombi Jesu wakabakumbula ayi, “Te mwashibona shoonse ishi? Ntoomulwiita calushinisho ayi taaku libwe nabi lyomwi lyeshi likacaale palibwenyina, oonse alaakumwayululwa.”
Makatasho alimwi amapensho
(Maako 13:3-13; Luka 21:7-19)
3Jesu ndyaakalinga kushiite paKalundu ka Olifi, bashikwiiya bakwe bakaya kuli nguwe beenka akumwiipusha ayi, “Amutulwiite, ino shintu ishi shilaakucitika lili? Tulaakwishibila kunshi ayi ciindi cakwisa kwanu alimwi amamanino a cishi shashikila?” 4Jesu wakabakumbula ayi, “Amucenjele kwaamba ayi kutakabi muntu nabi womwi eshi akamucenjeeke. 5Mukwiinga bantu baanji balaakwisa muliina lyangu akunokwaamba ayi, ‘Ndime wooyo Usalitwe wakwe Lesa,’ alimwi balaakucenjeeka bantu baanji. 6Mulaakunyumfwa nkondo ampuuwo sha nkondo, sombi mwebo mutakalisukami. Ishi shilaakucitika, sombi teshi kwaamba ayi ngomamanino a cishi. 7Mushobo umwi ulaakubukila ubye, abwalo buleelo bulaakubukila bulelonyina. Kulaakuba nsala ashitentanshi mumisena ipusenepusene. 8Shoonse ishi ngamatalikilobo a mapensho.
9“Lyalo balaakumutola mukupenshekwa alimwi akumucaya. Bantu ba mishobo yoonse balaakumupata ceebo ca liina lyangu.#Mate 10:22 10Ciindi ico, bantu baanji balaakucileka kushoma. Balaakutalika kulyaaba akupatana beene abeene. 11Kulaakwisa balaluki baanji babeshi abo beshi bakabece bantu baanji. 12Ceebo bubi bulaakufula, lyalo lusuno lwa bantu baanji lulaakuceya. 13Sombi uyo eshi akayuminine kushikila kumamanino a mapensho aya, ulaakupulushikwa.#Mate 10:22 14Lyalo Makani Abotu aya aamba shaBweene bwa kwiculu, alaakushimikilwa mucishi coonse kwaamba ayi akabe mbobukamboni kubantu boonse. Kuswawaawo, cishi ndyeshi cikamaane.
Cintu cilya Ciloondesha
(Maako 13:14-23; Luka 21:20-24)
15“Aboobo, na mukabone Cintu cilya Ciloondesha ico ncaakaamba mulaluki mukulukulu Danyelo, kaciimfwi paMusena Usalalite (utoobelenga anyumfwishishe),#Danye 9:27; 11:31; 12:11 16lyalo abo bali kuJudeya bakacicile kutulundu. 17Uyo eshi akanooli paciluli ca ŋanda, atakaseluki kwaamba ayi akushe shili muŋanda yakwe. 18Alakwe eshi akanooli mumuunda atakabooleli kuŋanda mukubwesa cakufwala ca peculu.#Luka 17:31 19Mapensho kubanakashi beshi bakanooli pakati, abeshi bakanoocite baana bayamwa munshiku isho! 20Kamupaila kwaamba ayi kucica kwanu kutakabi ciindi ca mupewo, nabi bushiku bwakookesha bwa Cibelu. 21Mukwiinga mapensho eshi akabeeko ciindi ico taakwe kubonekawo kale, kuswabo Lesa ndyaakalenga cishi ca panshi kushikila asunu. Ncakwiila teshi akabooleewo.#Danye 12:1; Ciyu 7:14 22Nshiku isho sha mapensho neshitakwe kufwimpishikwa, naakwiinga taaku muntu nabi womwi wakacaala kaali muumi. Sombi ceebo ca baabo basalitwe, inshiku isho shilaakufwimpishikwa.
23“Ciindi ico, na umwi muntu akamwaambile ayi, ‘Amubone, Usalitwe wakwe Lesa uli kokuno,’ nabi umwi alakwe akamwaambile ayi, ‘Amubone, ngulya uli kokulya,’ mutakamunyumfwili. 24Mukwiinga abo balyaamba cakubeca ayi, ‘Ndi Usalitwe wakwe Lesa,’ nabi ayi, ‘Ndi mulaluki,’ balaakwisa. Balaakucita shitondesho sha nkusu sha kwiculu alimwi ashaankamiko kwaamba ayi bacenjeeke, na kacikonsheka, abaabo boonse mbwaakasala Lesa. 25Amunyumfwishe mukwiinga nebo ndamulwiitilabo limwi shintu shoonse kashitana kucitika.
26“Nabi na bantu bakamwaambile ayi, ‘Bana uli muluyanga,’ mutakaiiko. Nabi bamwi bakamwaambile ayi, ‘Usalitwe wakwe Lesa uliyubite muŋanda,’ mutakabanyumfwili. 27Ceebo MwanaaMuntu ulaakwisa bweenka mbuli kubeka kwa mfula mwiculu kuswa kwicwe akushika kumbo.#Luka 17:23-24
28“Kuli koonse kuli mutuntu, amakubi nkwaabungana.#Luka 17:37
Kwisa kwa Mwanaamuntu
(Maako 13:24-27; Luka 21:25-28)
29“Na akamanebo mapensho a nshiku isho, lisuba lilaakubabo munshinshe, mweenshi ulaakucileka kumunika, nyenyeenshi shilaakuloka kuswa mwiculu, ashalo nkusu sha mwiculu shilaakutenkaanishikwa.#Isa 13:10; Jowe 2:10, 31; 3:15; Ciyu 6:12; Isa 13:10; Ese 32:7; Jowe 2:10; 3:15; Isa 34:4; Ciyu 6:13 30Lyalo kulaakuboneka citondesho ca MwanaaMuntu mwiculu, mpeeke bantu ba mishobo yoonse ya pacishi ca panshi balaakulila, ndyeshi bakabone MwanaaMuntu keesa mumakumbi ankusu alimwi abulemu bukankamika.#Danye 7:13; Seka 12:10-14; Ciyu 1:7 31Kulaakunyumfwika lupeenga lwa nkusu, lyalo ulaakutuma baanjelo bakwe kwaamba ayi babunganye bantu bakwe basalitwe kuswa kwicwe, kumbo, kumalenge alimwi akumatwa kushikila cishi coonse mpociswa ampoceela.
Ciiyo ca cisamu ca mukuyu
(Maako 13:28-31; Luka 21:29-33)
32“Amwiiye ciiyo kuswa pacisamu ca mukuyu. Na mwabona misampi ya ncico yatalika kutontolatontola, amatewu na atalika kusonsa, muleshiba ayi meensa ali pafwaafwi. 33Mbweeke ubo amwebo, na mukabone shintu shoonse ishi, mukeshibe kwaamba ayi MwanaaMuntu uli pafwaafwi kwisa, ingayi ulibo pamulyango. 34Ntoomulwiita calushinisho ayi shintu shoonse ishi shilaakucitika bantu boonse baliiwo bulya kabatana kumaninina kufwa. 35Liculu alimwi acishi ca panshi shilaakumana, sombi maswi angu teshi akamaneewo, sobwe.
Taaku ushi bushiku nabi ciindi
(Maako 13:32-37; Luka 17:26-30, 34-36)
36“Sombi pamakani a bushiku bwakwisa nabi ciindi, taakuuwo nabi womwi ushi. Baanjelo boonse ba kwiculu tabeshi, nabi MwanaaMuntu teeshiiwo, sombibo baTa beenka. 37Kwisa kwa MwanaaMuntu kulaakuba bweenka mbuli mbocakalinga ciindi cakwe Nowa.#Mata 6:5-8 38Ceebo munshiku shakwe Nowa, muyoba kootana kwisa, bantu bakalinga kulya, kunwa akweebana, kushikila bushiku Nowa ndyaakenjila mubwaato. 39Taaku ncebakalinga kwishi kushikila maanshi ndyaakesa akubalobya boonse. Mbomunya ubo mbweshi cikabe pakwisa MwanaaMuntu.#Mata 7:6-24 40Paciindi ico na basankwa bobilo bakacanike mumuunda, umwi ulaakutolwa, sombi umwi ulaakucaala. 41Banakashi bobilo balaakunoopela, umwi ulaakutolwa, sombi umwi ulaakucaala.
42“Anu kamulibambitebo lyoonse, mukwiinga tamwishi bushiku Mwaami wanu ndyeshi akese. 43Sombi mwishibe ayi, na mwine ŋanda kaashi ciindi mashiku nceshi ashiteemo mwiipi, inga kaalashabo, kwaamba ayi atesi mukwiipa muŋanda yakwe. 44Paceebo ceeco, amwebo mulyeelete kunolibambite lyoonse ceebo MwanaaMuntu ulaakwisa paciindi ncemutamwiingashite.#Luka 12:39-40
Musebenshi ushomeka autashomeki
(Luka 12:41-48)
45“Ino nguli musebenshi ushomeka ucite maano? Ngooyo mwaami wakwe ngwaakapa mulimo wakubona babye, akunoobapa cakulya paciindi ceelete. 46Ulicite coolwe musebenshi uyo Mwaami wakwe ngweshi akacane kaasebensa boobo. 47Ntoomulwiita calushinisho ayi, mwaami wakwe ulaakumupa mulimo wakulama shintu shoonse nshaacite. 48Sombi na ngumusebenshi mubiibi ulaakuyeeya ayi, ‘Mwaami wangu wacelwa kwisa,’ 49lyalo ulaakutalika kuuma basebenshinyina, kulya akunwa pantu pomwi abacakolwa. 50Lyalo mwaami wa musebenshi uyo ulaakwisa pabushiku mbwaatengashite alimwi aciindi ncaateshi. 51Ulaakumupa mulandu akumuwaala kooko nkweshi kukanooli bantu baamba nshebataciti alimwi nkweshi bakanoolila akulumanya meeno.”
Právě zvoleno:
Mateyo 24: BBBLI
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Lenje Bible with Deuterocanon © Bible Society of Zambia, 2003.
