Mateyo 23
23
Jesu mbwaakaambila bantu ayi bacenjele abafundishi ba Milawo alimwi abaFalisi
(Maako 12:38-39; Luka 11:43, 46; 20:45-46)
1Mpomunyaawo Jesu wakaambila bantu baanji baanji abo bakalingaawo alimwi abashikwiiya bakwe ayi, 2“Bafundishi ba Milawo abaFalisi mbobasansulula Milawo yakwe Mose. 3Aboobo mulyeelete kucita akukonkela shintu shoonse nshebamulwiita. Sombi mutanoocita sheesho nshebacita ceebo tabaciti nshebeeisha. 4Balanyamwisha bantu mikuli ilemu, sombi balo beene tabakumiiko nabibo kakumo. 5Balacita shintu shoonse kwaamba ayi bababoone bantu. Balalyaangilila tukomwe tunene ntobabikamo maswi akwe Lesa palyaansa alimwi apankumo, akulaampya mansambaala ashakufwala shabo.#Mate 6:1; Duto 6:8; Shakube 15:38 6Balisuni kwikala mumisena ya bulemu mumibala, akwikala pashuuna shibotu mushoonde shabo. 7Balisuni kwaanshikwa cabulemu mumishika alimwi akwiitwa ayi, ‘Bafundishi’. 8Sombi mwebo tamweelete kwiitwa ayi, ‘Bafundishi’ ceebo noonse muli bamukowa alimwi mulicitebo Mufundishi womwi. 9Muteeti muntu pano pacishi ca panshi ayi, ‘Ta’ ceebo mulicitebo Ishiwanu womwi uyo uli kwiculu. 10Muteetwi nabi ayi, ‘Mutanjilili’ ceebo Mutanjilili wanu ngomwi, eenkabo Usalitwe wakwe Lesa. 11Munene pakati kanu ulyeelete kuba musebenshi wanu.#Mate 20:26-27; Maako 9:35; 10:43-44; Luka 22:26 12Uyo woonse ulisumpula, Lesa ulaakumuceesha alimwi uyo woonse uliceesha, Lesa ulaakumusumpula.#Luka 14:11; 18:14
Jesu mbwaakakalalila bafundishi ba Milawo abaFalisi
(Maako 12:40; Luka 11:39-42, 44, 52; 20:47)
13“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulacalila bantu mulyango wa muBweene bwa kwiculu. Mwebo nobeene tamusuni kwinjila alimwi mulakasha baabo basuni. [ 14Mapensho kuli ndimwe nobafundishi ba Milawo abaFalisi, mwebo nobantu nomwaamba nshemutaciti! Mulabwesa buboni bwa bamukalubinje banakashi akubeca kupaila mipailo ilaamfu. Paceebo ceeco, Lesa ulaakumoombolosha cankusu.]
15“Mapensho kuli ndimwe nobafundishi ba Milawo abaFalisi, mwebo nobantu nomwaamba nshemutaciti! Muleenda nyendo shakusubuka lweenge ashishi kwaamba ayi mukasandule muntu womwi. Na wasanduka, ulaba muntu weelete mumulilo utamaani kwiinda ndimwe nobeene.
16“Mapensho kuli ndimwe, nobamatanjilili boofu! Mwebo muleeisha ayi, ‘Na umwi muntu walumbila Ŋanda yakwe Lesa, ingayi taaku mbocibete. Sombi na umwi walumbila golodi ili muŋanda yakwe Lesa, uyo ulyeelete kucita ceeco ncaalumbila.’ 17Mwebo nobamatanjilili boofu baluya! Ino cinene ncili, golodi nabi Ŋanda yakwe Lesa iyo ilengesha golodi ayi ibe isalalite? 18Muleeisha ayi, ‘Na umwi muntu walumbila cipaililo, ingayi taaku mbocibete. Sombi na umwi walumbila cipo cili pacipaililo, ulyeelete kucita ceeco ncaalumbila.’ 19Mwebo noboofu! Ino cinene ncili, cipo nabi cipaililo ico cilengesha ayi cipo cibe cisalalite? 20Nkokwaamba ayi muntu ulumbila cipaililo, ulalumbila asheesho shoonse shiliiwo. 21Alakwe uyo ulumbila Ŋanda yakwe Lesa, ulalumbila ŋanda aLesa uyo ukalaamo. 22Awooyo ulumbila kwiculu, ulalumbila cuuna cakwe Lesa alimwi aLesa uyo ukalaawo.#Isa 66:1; Mate 5:34
23“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulapa calikumi ca mbewu shinunkila kabotu alimwi ashakubika mucakulya, sombi mulasuula milawo inene yancinencine, mbuli kucita shiluleme kubantu, nkumbu alimwi akushomeka. Mwalinga kweelete kunooshicita, kamutasuuli shimwi isho.#Bene Lefi 27:30 24Mwebo nobamatanjilili boofu, mulasansa loonshi mucakunwa canu, sombi yalo ngamela mulaimina!
25“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulasansha pansengwe lya nkomeshi ambale, sombi mumyoyo yanu muliswitebo bulyabi akulisuna. 26Mwebo nobaFalisi boofu, amutaangune kusansha shili mukati munkomeshi, apalo pansengwe ndyeshi patube.
27“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Muli anga nshuumbwe nshebakashingula, shiboneka kabotu pansengwe, sombi mukati kamuswitebo shifuwa sha bantu bakafwa ashimwi shibiibi shoonse.#Mili 23:3 28Amwebo bweenka mbomubete. Mulaboneka anga muliluleme kubantu, sombi mukati muliswitebo shintu shabubeshi ashibiibi.
Jesu mbwaakaamba shamapensho abo
(Luka 11:47-51)
29“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulayaka shuumbwe shibotu sha balaluki bakulukulu akubotesha shibumbwabumbwa sha bantu baluleme. 30Mulaamba ayi, ‘Netwakalingaako inshiku sha bamashali besu bakulukulu, naakwiinga tatukwe kucita mbobakacita pakucaya balaluki.’ 31Nkokwaamba ayi mulalyaanga nobeene ceebo mulasumina ayi muli baana ba baabo bakacaya balaluki bakulukulu. 32Anu amutolelele, mumanishe mulimo wakatalika bamashali banu bakulukulu! 33Mwebo nobana bansoka, nobana bampili! Ino mulaakuyuba buyani mulilo utamaani?#Mate 3:7; 12:34; Luka 3:7 34Paceebo ceeco, ntoomulwiita ayi ndaakumutumina balaluki, bantu basongo alimwi abafundishi. Bamwi mulaakubacaya akubapopa pamicilingano, abalo bamwi mulaakubakwiipa mushoonde shanu akubapensha kuswa mundabala andabala. 35Aboobo mulaakupekwa mulandu ceebo ca bantu baluleme boonse bakacaikwa, kutalikila kuli Abelo uyo muntu ululeme kushikila kuli Sekaliya mwanaakwe Belekiya, uyo ngomwakacaila muŋanda yakwe Lesa pakati ka Musena Usalalite alimwi acipaililo.#Mata 4:8; 2 Maka 24:20-21 36Ntoomulwiita calushinisho mulandu wa sheeshi shoonse ulaakuwita pabantu ba cecino ciindi.
Jesu mbwaakalinga kusuni ndabala ya Jelusalemu
(Luka 13:34-35)
37“Webo Jelusalemu, Jelusalemu, noocaya balaluki akuuma mabwe bantu abo Lesa mbwaatuma kuli ndiwe! Liinji liinji ndalinga kusuni kubunganya bantu bako bweenka mbuli nkuku mboifukatila twaana twanjiyo mumapapaminwa, sombi webo wakakaka! 38Aboobo Ŋanda yakwe Lesa ili muli ndiwe, yaba litongo.#Jele 22:5 39Ntoomulwiita calushinisho ayi teshi mukamboneewo alimwi kushikila mukaambe ayi, ‘Ulicite coolwe uyo utoosa muliina lya Mwaami Lesa.’ ”#Kulu 118:26
Právě zvoleno:
Mateyo 23: BBBLI
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Lenje Bible with Deuterocanon © Bible Society of Zambia, 2003.
