Matáyoso 18
18
Ányá udɔ́mbaná bɔsɔ́gɔ́ agá Bufuŋ bá muana
1Agá gɛsɛgɛl igiány, bafɔ́nɔfɔ́n gɔbɛ́sɛdɛnɛn Yésu obófún wɔ́: «Ányá uganúdɔ́mbaan bɔsɔ́gɔ́ agá Bufuŋ bá muana e?» 2Uwabɛ́lɛ́gɛn mɔ́nɔmbɔ, uwág wɔ́ gadágadá wɔbɔ, uwɔyɛd sɔ́n ká: 3«Agá meliŋítas, ngúnuɔ́yɔɔn ká númál nudiséndí nuond sɔ́n anyɛ baábayɔ, nudiínubíŋín agá Bufuŋ bá muana. 4Ewe gɔg ugenúbíséli anyɛ mɔ́nɔmbɔ ewe, uwɔ́ uganúdɔ́mbaan bɔsɔ́gɔ́ agá Bufuŋ bá muana. 5Ewe umónugóli mɔ́nɔmbɔ anyɛ ewe agá ɛlɛ́ga gám gá busió, yaŋuá umónúŋgólí.
Nsás
(Mál 9.42-48; Lúk 17.1-2)
6«Ewe uganuál ká mɔnd umányaná udɛgɔ́nɛ́n agá guádáb gua agá gɛfal, búnyɛ bese ká bágɔ́d wɔ́ gɛnɔ́m gá nɛdany agá ekelu, béti wɔ́ agá manáŋ abɔ́sa. 7Bɔbɛ na band bá gus egue bégusenyé bɔsɔ́gɔ́ agá gɛfal. Búnyɛ meliŋítas ká manda anyɛ amaány gúsɛgɛmanan gubá, bɔbɛ gɔg na mɔnd walaná búbiál. 8Ɔmbɔ́g wɔ́w, gúmén gɛgɔnd gɔ́w mágudɔ́maan ká ála bɔbɛ, sɔ́mb mɔ́, ómb mɔ́ ayáyá nɔw; gágual ká búnyɛ́ bese ká ábia gusɔ́d gá kand nɛmanɛ́ná na ɔmbɔ́g ómoom, na gɛgɔnd gímoom, gɔdɔ́mb ká béguéti na ɛmbɔ́g, na bɛgɔnd bɔ́w bim agá gɛgɔ́lɔ́gɔdɔ gá yoóg yá kand nɛmanɛ́ná! 9Niís nɔ́w sɔ́n mágɔdɔ́maan gá guala bɔbɛ, bál nɛ́, ómb nɛ́ ayáyá nɔw; búnyɛ́ bese ká ábia gusɔ́d gá kand nɛmanɛ́ná na niís nímoom, gɔdɔ́mb ká béguéti na eŋís yɔ́w enkim ándɛ agá yoóg yá guɔ́bɛ́g gá kand nɛmanɛ́ná.
Nsab ya gɛdɔ́mbá gíméenyim
(Lúk 15.1-7)
10«Ánubɛ́nyányáŋ! Nudɛsɛ́gɛ́n ta mɔnd umányáná udɛgɔ́nɛ́n agá guádáb, ngúnuɔ́yɔɔn ká ɛngɛlɛs bɔ́b ugumuana nyɛ bɛsɛgɛl bim na babá#18.10 Alɛ́ŋɛ́d Ebe 1.14 unyá ugumuana. [ 11#18.11 Imbɔbɔnɔ símodión guɔ́yɛ́kɔnɛn ká: Gágual ká mɔɔn wá mɔnd móol gá gúsódi ebe béméenyim.] 12Nugúbɛ́dága ká nanyá e? Mɔnd mábianan bɛdɔ́mbá nɔgɔn, gímoom fámɔg, udɛgagɔ́nɛn etín éní na bunyo na bíní agá nɔgɔnd gá gɔb guambá gínyá gɔfamɔg e? 13Úmɔ́ɔfuɔgɛn gɛ́, agá meliŋítas ngúnuɔ́yɔɔn ká ugabia bɛdɔdɛn giod gá gɛ́, gɔdɔ́mb bá etín éní na bunyo na bíní bínyá gulɔb ta gufamɔg. 14Anaány sɔ́n sié wanɔ unyá ugumuana diébílénené ká ta omoom wa ebe guádáb gɔ́b mányaná gúdɛ́gɔ́nɛn nyiím.
Gusɔ́d gá belimen
15«Endimen wɔ́w máal gɛfal, ɛmbɛ gɔfuɔ́g wɔ́, ágálɛ́d gág banuá táŋɛ bándɛ. Úmɔ́gubɛ́dɔ́lɛ́gɛn, amaág wɔ́ agá nŋili. 16Umeén udigubɛ́dɔ́lɛ́gɛ́n, gɔ́l eŋél gɛ́laluá omoom, gúmén bándɛ ká buóny biáyɛŋan agá niɔy nɔ́b, Gɔɔ́gɔ anyɛ́ búnyá buɔ́ŋɔ́n agá mbɔbɔnɔ#18.16 Alɛ́ŋɛ́d Dét 19.15. 17Úmén guɔ́bɛ́n bɔ́, ɛmbán buóny agá giɔ́b gá beédeb; úmeén guɔ́bɛ́n ta gɛ́, gɔ́lɔɔn wɔ́ anyɛ mɔnd udiálɛnsáná Gɔdányá gúmén eduús tás. 18Ngúnuɔ́yɔɔn agá meliŋítas ká: Buanda gidigid nugenuén egegus, bégeen bú sɔ́n ugumuana. Buanda gidigid nuganúgɛ́ndɛ́gɛn egegus, bágagɛ́ndɛ́gɛn bú ugumuana.
Nanyá buófonó gunɛnɛn sɔ́gɔ́
19«Mmánd gúnuɔ́yɛdɛn ká, band bándɛ agán gá ɔlɔŋ egegus mɔɔ́bɔ́n ká bófún buanda agá mbísógól, Babá wam unyá ugumuana geéŋin bɔ́ ubú bósoóguófún. 20Gágual ká kɔɔ́m band bándɛ gúmén bádadɔ ságubɛ́gɔ́sɛ́gan agám gá ɔfɛ́n, inyɛ gadágadá wɔbɔ.»
Nanyá buófonó gunɛnɛn sɔ́gɔ́
(Lúk 17.4)
21Piéle gubɛ́nyɛkɛnɛn gɔg Yésu uganyɛ ká: «Ɔgúnɔ́, endimen wám máŋala bɔbɛ, bɛsɛgɛl bíniík mbiananá ntɛ́nɛn wɔ́ e? Guám bɛsɛgɛl bɛ́tɛ́ndád nomo e?» 22Yésu ganyɛ ká: «Saá bɛsɛgɛl bɛ́tɛ́ndád nomo gusúg, guám bɛsɛgɛl etín ádadɔ na biát, bɛsɛgɛl bɛ́tɛ́ndád nomo.
Eŋeli buól wa kand mahana
23«Bufuŋ bá muana nyɛ anyɛ ofuŋ wambaná gumanɛn na bél buol bág. 24Gá gúbanyɛgɛ, obólín wɔ́ ofínifín omoom umáabiánɛ́n wɔ́ muonyi giod. 25Anyɛ́ umáal udibiánán buanda bágúnam ofín uwaány, ofuŋ uwéŋin bugaga ká bédú wɔ́, na agany waga na baan bág, na buanda gidigid ubiananá, ká únám ofin wág. 26Eŋél buol uwaány máal wɔ́bɔɔ́n anaány, uwagɔɔn wɔ́ agá ambana, uweguns enú, uganyɛ ká: “Mbílímbíd, nganam buanda gidigid oŋófonó.” 27Ofuŋ uwaány uwaán eŋél buol waga mahan, uwatɛ́nɛn wɔ́ ofin uwaány uwadɔ́mb. 28Eŋél buol uwaány máal wámana, uwelumen na ogúl waga umáabiánɛ́n wɔ́ muonyi siɔdɛd; uwadɛgɛn wɔ́ agá ekelu, uwedúm guɔ́dɔ wɔyɔ ká: “Íŋondínyí ubú ambianɛná.” 29Ogúl waga uwaány gubiétínyi wɔ́ agá bɛgɔnd, uwabanyɛg gubísógólonyi wɔ́ wɔyɔ ká: “Mbílímbíd, nganam ofín wɔ́w.” 30Mɔnd uwaány bámáanɛ́nɛ́n wɔ́ waág ofín uwen gunɛnɛn ogúl waga, uwenétí wɔ́ agá gians gá mbíne gutɔ guám anyɛ́ uganúnám ofín wág. 31Bɔsɔ́g bél buol máal bánaan anaány, ubuébisíd bɔ́ agá ɛdɛm, obónd gá guɔyɛ́dɛ́n ɔgɔn wɔbɔ buanda gidigid búmánubɛ́dɔ́mbaán. 32Ɔgɔ́n uwaány uwabɛ́lɛ́gɛn eŋél buol uwaány, anyɛ́ umáasiámá, uganyɛ gág ká: “Giád gá eŋél buol, omombísógolónyí iyagutɛ́nɛn ofín wɔ́w. 33Aŋuá sɔ́n adɛmábá wagutɛ́nɛn endimen wɔ́w anyɛ́ yaŋuá inyá gugutɛ́nɛn e?” 34Ɔgɔ́n waga uwɔ́b ilób, uweti wɔ́ agá gians gá mbíne gá nugényigeny gutɔ guám anyɛ́ uganúnám ofín wág gidigid. 35Anaány Babá unyá ugumuana ganuála na sig mɔnd a agán gá ɔlɔŋ ugenuén gunɛnɛn endimen waga na ɔdɛm wág gidigid.»
Právě zvoleno:
Matáyoso 18: MMU2
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CABTAL
Matáyoso 18
18
Ányá udɔ́mbaná bɔsɔ́gɔ́ agá Bufuŋ bá muana
1Agá gɛsɛgɛl igiány, bafɔ́nɔfɔ́n gɔbɛ́sɛdɛnɛn Yésu obófún wɔ́: «Ányá uganúdɔ́mbaan bɔsɔ́gɔ́ agá Bufuŋ bá muana e?» 2Uwabɛ́lɛ́gɛn mɔ́nɔmbɔ, uwág wɔ́ gadágadá wɔbɔ, uwɔyɛd sɔ́n ká: 3«Agá meliŋítas, ngúnuɔ́yɔɔn ká númál nudiséndí nuond sɔ́n anyɛ baábayɔ, nudiínubíŋín agá Bufuŋ bá muana. 4Ewe gɔg ugenúbíséli anyɛ mɔ́nɔmbɔ ewe, uwɔ́ uganúdɔ́mbaan bɔsɔ́gɔ́ agá Bufuŋ bá muana. 5Ewe umónugóli mɔ́nɔmbɔ anyɛ ewe agá ɛlɛ́ga gám gá busió, yaŋuá umónúŋgólí.
Nsás
(Mál 9.42-48; Lúk 17.1-2)
6«Ewe uganuál ká mɔnd umányaná udɛgɔ́nɛ́n agá guádáb gua agá gɛfal, búnyɛ bese ká bágɔ́d wɔ́ gɛnɔ́m gá nɛdany agá ekelu, béti wɔ́ agá manáŋ abɔ́sa. 7Bɔbɛ na band bá gus egue bégusenyé bɔsɔ́gɔ́ agá gɛfal. Búnyɛ meliŋítas ká manda anyɛ amaány gúsɛgɛmanan gubá, bɔbɛ gɔg na mɔnd walaná búbiál. 8Ɔmbɔ́g wɔ́w, gúmén gɛgɔnd gɔ́w mágudɔ́maan ká ála bɔbɛ, sɔ́mb mɔ́, ómb mɔ́ ayáyá nɔw; gágual ká búnyɛ́ bese ká ábia gusɔ́d gá kand nɛmanɛ́ná na ɔmbɔ́g ómoom, na gɛgɔnd gímoom, gɔdɔ́mb ká béguéti na ɛmbɔ́g, na bɛgɔnd bɔ́w bim agá gɛgɔ́lɔ́gɔdɔ gá yoóg yá kand nɛmanɛ́ná! 9Niís nɔ́w sɔ́n mágɔdɔ́maan gá guala bɔbɛ, bál nɛ́, ómb nɛ́ ayáyá nɔw; búnyɛ́ bese ká ábia gusɔ́d gá kand nɛmanɛ́ná na niís nímoom, gɔdɔ́mb ká béguéti na eŋís yɔ́w enkim ándɛ agá yoóg yá guɔ́bɛ́g gá kand nɛmanɛ́ná.
Nsab ya gɛdɔ́mbá gíméenyim
(Lúk 15.1-7)
10«Ánubɛ́nyányáŋ! Nudɛsɛ́gɛ́n ta mɔnd umányáná udɛgɔ́nɛ́n agá guádáb, ngúnuɔ́yɔɔn ká ɛngɛlɛs bɔ́b ugumuana nyɛ bɛsɛgɛl bim na babá#18.10 Alɛ́ŋɛ́d Ebe 1.14 unyá ugumuana. [ 11#18.11 Imbɔbɔnɔ símodión guɔ́yɛ́kɔnɛn ká: Gágual ká mɔɔn wá mɔnd móol gá gúsódi ebe béméenyim.] 12Nugúbɛ́dága ká nanyá e? Mɔnd mábianan bɛdɔ́mbá nɔgɔn, gímoom fámɔg, udɛgagɔ́nɛn etín éní na bunyo na bíní agá nɔgɔnd gá gɔb guambá gínyá gɔfamɔg e? 13Úmɔ́ɔfuɔgɛn gɛ́, agá meliŋítas ngúnuɔ́yɔɔn ká ugabia bɛdɔdɛn giod gá gɛ́, gɔdɔ́mb bá etín éní na bunyo na bíní bínyá gulɔb ta gufamɔg. 14Anaány sɔ́n sié wanɔ unyá ugumuana diébílénené ká ta omoom wa ebe guádáb gɔ́b mányaná gúdɛ́gɔ́nɛn nyiím.
Gusɔ́d gá belimen
15«Endimen wɔ́w máal gɛfal, ɛmbɛ gɔfuɔ́g wɔ́, ágálɛ́d gág banuá táŋɛ bándɛ. Úmɔ́gubɛ́dɔ́lɛ́gɛn, amaág wɔ́ agá nŋili. 16Umeén udigubɛ́dɔ́lɛ́gɛ́n, gɔ́l eŋél gɛ́laluá omoom, gúmén bándɛ ká buóny biáyɛŋan agá niɔy nɔ́b, Gɔɔ́gɔ anyɛ́ búnyá buɔ́ŋɔ́n agá mbɔbɔnɔ#18.16 Alɛ́ŋɛ́d Dét 19.15. 17Úmén guɔ́bɛ́n bɔ́, ɛmbán buóny agá giɔ́b gá beédeb; úmeén guɔ́bɛ́n ta gɛ́, gɔ́lɔɔn wɔ́ anyɛ mɔnd udiálɛnsáná Gɔdányá gúmén eduús tás. 18Ngúnuɔ́yɔɔn agá meliŋítas ká: Buanda gidigid nugenuén egegus, bégeen bú sɔ́n ugumuana. Buanda gidigid nuganúgɛ́ndɛ́gɛn egegus, bágagɛ́ndɛ́gɛn bú ugumuana.
Nanyá buófonó gunɛnɛn sɔ́gɔ́
19«Mmánd gúnuɔ́yɛdɛn ká, band bándɛ agán gá ɔlɔŋ egegus mɔɔ́bɔ́n ká bófún buanda agá mbísógól, Babá wam unyá ugumuana geéŋin bɔ́ ubú bósoóguófún. 20Gágual ká kɔɔ́m band bándɛ gúmén bádadɔ ságubɛ́gɔ́sɛ́gan agám gá ɔfɛ́n, inyɛ gadágadá wɔbɔ.»
Nanyá buófonó gunɛnɛn sɔ́gɔ́
(Lúk 17.4)
21Piéle gubɛ́nyɛkɛnɛn gɔg Yésu uganyɛ ká: «Ɔgúnɔ́, endimen wám máŋala bɔbɛ, bɛsɛgɛl bíniík mbiananá ntɛ́nɛn wɔ́ e? Guám bɛsɛgɛl bɛ́tɛ́ndád nomo e?» 22Yésu ganyɛ ká: «Saá bɛsɛgɛl bɛ́tɛ́ndád nomo gusúg, guám bɛsɛgɛl etín ádadɔ na biát, bɛsɛgɛl bɛ́tɛ́ndád nomo.
Eŋeli buól wa kand mahana
23«Bufuŋ bá muana nyɛ anyɛ ofuŋ wambaná gumanɛn na bél buol bág. 24Gá gúbanyɛgɛ, obólín wɔ́ ofínifín omoom umáabiánɛ́n wɔ́ muonyi giod. 25Anyɛ́ umáal udibiánán buanda bágúnam ofín uwaány, ofuŋ uwéŋin bugaga ká bédú wɔ́, na agany waga na baan bág, na buanda gidigid ubiananá, ká únám ofin wág. 26Eŋél buol uwaány máal wɔ́bɔɔ́n anaány, uwagɔɔn wɔ́ agá ambana, uweguns enú, uganyɛ ká: “Mbílímbíd, nganam buanda gidigid oŋófonó.” 27Ofuŋ uwaány uwaán eŋél buol waga mahan, uwatɛ́nɛn wɔ́ ofin uwaány uwadɔ́mb. 28Eŋél buol uwaány máal wámana, uwelumen na ogúl waga umáabiánɛ́n wɔ́ muonyi siɔdɛd; uwadɛgɛn wɔ́ agá ekelu, uwedúm guɔ́dɔ wɔyɔ ká: “Íŋondínyí ubú ambianɛná.” 29Ogúl waga uwaány gubiétínyi wɔ́ agá bɛgɔnd, uwabanyɛg gubísógólonyi wɔ́ wɔyɔ ká: “Mbílímbíd, nganam ofín wɔ́w.” 30Mɔnd uwaány bámáanɛ́nɛ́n wɔ́ waág ofín uwen gunɛnɛn ogúl waga, uwenétí wɔ́ agá gians gá mbíne gutɔ guám anyɛ́ uganúnám ofín wág. 31Bɔsɔ́g bél buol máal bánaan anaány, ubuébisíd bɔ́ agá ɛdɛm, obónd gá guɔyɛ́dɛ́n ɔgɔn wɔbɔ buanda gidigid búmánubɛ́dɔ́mbaán. 32Ɔgɔ́n uwaány uwabɛ́lɛ́gɛn eŋél buol uwaány, anyɛ́ umáasiámá, uganyɛ gág ká: “Giád gá eŋél buol, omombísógolónyí iyagutɛ́nɛn ofín wɔ́w. 33Aŋuá sɔ́n adɛmábá wagutɛ́nɛn endimen wɔ́w anyɛ́ yaŋuá inyá gugutɛ́nɛn e?” 34Ɔgɔ́n waga uwɔ́b ilób, uweti wɔ́ agá gians gá mbíne gá nugényigeny gutɔ guám anyɛ́ uganúnám ofín wág gidigid. 35Anaány Babá unyá ugumuana ganuála na sig mɔnd a agán gá ɔlɔŋ ugenuén gunɛnɛn endimen waga na ɔdɛm wág gidigid.»
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CABTAL