Rô-ma 9
9
Baak đoh kwaai teq u bnih Jo-thai u bơl raih nggoor agaih
(9:1–11:36)
Brah Ưn n'hai bơl raih kươt sach
1Knông Yaang Krist hei mor a ngan, hei 'bưn mor lhiat, chưt nuih hei kot lơh ndraanh aan hei knông Brah Wêêng 2laah hei chong rmlơng đat, nuih ji kôr yoot. 3Đươm hei kmbưng awap chhak nơơm dol pơđaai u thot rlach Yaang Krist tơh aan oh bi lah raih bal hei ri; 4nei laa bnih I-sra-ên, raih kươt dơơn lơh koon siêm, chring chraang, baak pơrnơn, ch'bap, baak tư wơơl, u baak pơn;#Sot Rlach 4:22. 5lah raih kươt lgơơch sot đươm yau yi u mbaang au, teq u pêêk pai, ja lgơơch sot Yaang Krist, Yaang lơ leq sêch ơp ntil, laa Brah Ưn dip jah kươt tư wơơl yoot yôw. A-men.
6Mor bei nei 'bưn geh rơih laa baak Brah Ưn ja lơh 'bưn jn'ah. Đươm 'bưn geh leq sêch pal 'bơơn lôh a I-sra-ên kot laa bnih I-sra-ên. 7Kot 'bưn geh leq sêch pal 'bơơn pôl mbaang Ap-ra-ham kot laa koon sau bu ri. Mat baah kươi, bei geh 'bian: “Đươm I-sak, 'bei a kươi geh di mbaang kươt chôôl tênh chhak 'bei;”#Ptơơm 21:12. 8rơih laa 'bưn geh koon sau tênh pêêk pai #9:8 koon sau tênh pêêk pai: Chong u mbaang Ap-ra-ham rlach Ích-ma-ên, koon lgơơch đươm A-ga (mơq Ga 4:22-23). lah koon sau Brah Ưn, dôh koon sau baak pơn ri mơ kươt kơơp laa mbaang ngan. 9Đươm baak au ngan laa baak pơn: “Tơmlai nar khay au Hei a kươi plơq kơơi, u Sa-ra a kươi geh mlơm koon klau.”#Ptơơm 18:10,14. 10'Bưn dơơn bei nei, tơt Rê-bê-ka mbưn koon baar đươm mbu bnih laa I-sak, yau yi bơl bơn; 11paich baar ơơk koon ndah kươt lgơơch, ndah lơh ntil klanh paich ntil ap ơơn — jah pơrkhom ndroong #9:11 S'bt: sglap. Brah Ưn ri knông kaar sach sal, 'bưn tênh u kaar lơh dôh tênh teq u laap Yaang khuôl duôn — 12bnih mei kươt maanh noor nei mor laah: “Pa ttih a kươi chôh pa dêq.”#Ptơơm 25:23. 13Bei ja geh 'bian:
“Hei srlanh Ja-kôp,
dôh a kiêr Ê-sau.”#Mal 1:2,3.
14Bei nei bơl bơn a kươi mor bei êch? Geh lah Brah Ưn bn'ap 'bưn? 'Bưn geh bei nei! 15Đươm Pang lah n'hai Môi-se:
“Hei a kươi bnih l'ưt n'hai bnih êch Hei êch bnih l'ưt,
Hei a kươi gmaak bnih êch Hei êch gmaak.”#Sot Rlach 33:19.
16Bei nei ntil nei 'bưn pơrkhom teq u êch kmbưng paich baak rêh rêêng nar koon bnih ri, đươm baak gmaak Brah Ưn ri. 17Đươm Sm'bưt Brah kot mor n'hai Pha-ra-ôn laah: “Hei ldơk 'bei hao laa jah tơrsau dang kmheng Hei ri knông 'bei, jah saak Hei kươt chhuôr rlum teh.”#Sot Rlach 9:16. 18Bei nei, Brah Ưn êch gmaak 'bơơn nei gmaak, Pang êch lơh kraam chưt 'bơơn nei lơh.
Baak hao hơng u chưt bnih l'ưt Brah Ưn ri
19Nei mơ ay a kươi ôp hei laah: “Mơq bei nei a hay Pang nha gmhaar? Đươm 'bơơn geh awap ta wal kơơi rnđêch Pang kươt?” 20Ơi ay, ay laa 'bơơn baah baanh ta tau kơơi Brah Ưn? Lơh bei êch griêng kươt moon leet geh lah mor n'hai bnih moon bu laah: “A hay ay ja moon hei bei au?”#Êsai 29:16; 45:9. 21Bnih rak mon glaq leet 'bưn geh ch'bap lơ steh uk, jah a pôl knông di bơrnun steh baah moon but til dơrnơơm nhôq aan kaar klanh prêh u til nday nhôq aan kaar dêh laang?#9:21 Asn: ntil beeng thlay u ntil beeng ơih teq. 22Mơq Brah Ưn êch tơrsau baak hao nuih u tơrsau dang kmheng Pang ri, baah Pang ja pơrkhom ơt ơl pal pi dơrnơơm dip jah dol hao nuih jah dol luôch lêêk, nei a hay? 23Mơq Pang êch klơơt klư baak khunh geh chring chraang Pang ri teq n'hai pal pi dơrnơơm dip gmaak, pa Pang ja riap aan baak chring chraang, 24knông nei geh bơl bơn, laa pal bnih Pang ja khuôl, 'bưn dơơn a knông raih Jo-thai baah kot a knông bnih nggoor agaih, nei laang? 25Bei Pang lah knông sm'bưt Ô-sê:
“Hei a kươi khuôl bơl bnih 'bưn geh raih Hei laa raih Hei,
Pal bnih 'bưn kươt êch srlanh lah êch srlanh;”#Ôsê 2:23.
26“U tu ktôk Hei lah n'hai bu: ‘Bơl 'bei 'bưn geh laa raih Hei,’
Nei kot đươm tu nei bu a kươi kươt khuôl laa ‘koon sau Brah Ưn rêh yoot.’ ”#Ôsê 1:10.
27Nha Ê-sai teh baak teq u raih I-sra-ên laah: “Paich nak koon sau I-sra-ên ơk bei rka daak rmưt, dơơn di bôh nha ngroh kơơi a kươi kươt đoh ei; 28đươm Brah a kươi gway u kơndaal lơh dip plak baak Pang lơ teh.”#Êsai 10:22,23. 29Ê-sai kot ja tơmbơh noor:
“Mơq Brah rban lênh 'bưn doom kơơi aan bơl bơn bnih tơrbuôt mbaang,
Nei bơl bơn ja but bei poh Sô-đôm u bei poh Gô-mô-rơ hơơi.”#Êsai 1:9 (LXX).
Baak 'bưn jơ raih I-sra-ên ri
30Bei nei bơl bơn a kươi mor lơh bei êch? Bơl raih nggoor agaih 'bưn wơng joi baak sêch song nei leet kươt baak sêch song; nei laa baak sêch song đươm chưt jơrnơ; 31nha raih I-sra-ên ja pơrkhom chhing teq u ch'bap jah wơng baak sêch song nei 'bưn lơh sơp kươt ch'bap. 32A hay? Đươm bu 'bưn wơng joi drơơl chưt jơrnơ baah drơơl kaar lơh. Bu ja a chêh tmau pơrkhaang, 33bei geh 'bian:
“Au, Hei dơih tu Si-ôn di rklôw tmau pơrkhaang, laa tmau lơh aan bơl nei a kơq;
Dôh 'bơơn jơ mưt u nei a kươi 'bưn dol prêêng.”#Êsai 8:14; 28:16 (LXX).
Právě zvoleno:
Rô-ma 9: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.