Rô-ma 10
10
Baak đoh kwaai aan jôm bnih
1Ơi oh bi, baak kmbưng chưt hei ri u baak r'bon dan hei ri n'hai Brah Ưn laa jah raih I-sra-ên kươt đoh kwaai. 2Hei lơh ndraanh aan bu laah bu geh chưt sang rmeh n'hai Brah Ưn, dôh chưt sang rmeh nei khwaq gưt jhai. 3Đươm 'bưn grnưt baak sêch song Brah Ưn ri u wơng ndroong ldơk baak sêch song êêng aan nơơm, mơ bu 'bưn chôh tênh baak sêch song Brah Ưn ri; 4đươm Yaang Krist laa baak ptut ch'bap ri, jah jôm bnih jơ kot kươt chôôl sêch song.
5Môi-se 'bian teq u baak sêch song lôh a ch'bap laah 'bơơn lơh tênh pal ntil au nei a kươi chkhôm nei baah rêh.#Lêwi 18:5. 6Dôh baak sêch song lôh a chưt jơrnơ mor bei au: “Khơơm mor knông chưt nơơm laah: ‘'Bơơn a kươi hao trôôk?’#Chhuôr Kươi 30:12. n'hai êch mor laa jah liêu Yaang Krist jưr; 7paich laa: ‘'Bơơn a kươi jưr ttu jru?’ n'hai êch mor jah liêu Yaang Krist a ktôk chhưt hao.” 8Dôh baak nei mor ơơn?
“Baak jơ#10:8 Asn: Baak. gôq dơơh oh bi,
Lơ ndôi wiêm u knông nuih oh bi,”#Chhuôr Kươi 30:14.
Nei laa chưt ndap jơ pa bơl hei chhuôr kne. 9Bei nei mơq wiêm oh bi chôôl Brah Jê-sus laa Brah, u chưt oh bi jơ laah Brah Ưn ja lơh Pang a ktôk chhưt rêh kươi nei oh bi a kươi kươt đoh. 10Đươm 'bơơn jơ knông chưt nei kươt chôôl sêch song, 'bơơn chôôl a wiêm nei kươt đoh kwaai. 11Sm'bưt Brah mor: “Bnih êch jơ Pang u kươi 'bưn prêêng mat.”#Êsai 28:16 (LXX). 12'Bưn geh baak chưrleek lwah bnih Jo-thai u bnih Hi-lap, đươm pôl mlơm Brah laa Brah jôm bnih, Yaang ươn smlaang ngroh ngri aan jôm bnih khuôl duôn Pang. 13Đươm, “'bơơn khuôl duôn saak Brah a kươi kươt đoh.”#Jôên 2:32.
14Dôh bu ndah jơ Pang nei khuôl duôn bei êch kươt? Ndah ttang mor teq u Pang nei lơh bei êch baah jơ? 'Bưn geh bnih chhuôr nei ttang ndroong ơơn? 15Mơq 'bưn geh 'bơơn kươt maanh han nei lơh bei êch chhuôr? Bei geh baak 'bian: “Paang jơng pal bnih chhuôr Baak Sroong Klanh ri ngan room klanh gưt pal êch!”#Êsai 52:7. 16Dôh 'bưn geh jôm bnih kot iat tênh Baak Sroong Klanh laang; nơơm Ê-sai ja mor: “Brah ơi, 'bơơn dol jơ baak bơl koon chhuôr?”#Êsai 53:1 (LXX). 17Bei nei, chưt jơrnơ lôh a pal ntil bu nday ttang, pa bu nday ttang laa tơt baak Yaang Krist#10:17 Yaang Krist: Knông m'baak plơơp 'bian ti laa Brah Ưn. ri kươt chhuôr.
18Dôh hei dan ôp: Ait geh laa bu ndah kươt ttang 'bưn? A ngan nei bu ja ttang, đươm:
“Baak bơl ndraanh ri ja a ngôôn rlum teh,
U baak bu ri ja chhuôr tơt ptut play teh.”#Prơơ 19:4.
19Hei ôp nha: Ait lah raih I-sra-ên 'bưn gưt? Noor leq, Môi-se ja mor:
“Hei a kươi lơh aan bơl 'bei skiêr n'hai bơl raih 'bưn dip laa raih;
Hei a kươi lơh aan bơl 'bei hao nuih n'hai di raih kơrlung.”#Chhuôr Kươi 32:21.
20Ê-sai leet baanh khwaan mor laah:
“Pal bnih 'bưn wơng Hei nei ja a mơp Hei;
Hei ja tơrsau nơơm hei aan pal bnih 'bưn ôp dan Hei.”#Êsai 65:1 (LXX).
21Dôh teq u raih I-sra-ên, Pang lah: “Leq nar Hei nong ti wih u di raih 'bưn tênh u a rơk.” #Êsai 65:2.
Právě zvoleno:
Rô-ma 10: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.