Rô-ma 6
6
Kmlơt rêh tơh gơl
(6:1–8:39)
Chhưt teq n'hai dôih 'baap u rêh n'hai Yaang Krist
1Bei nei bơl bơn a kươi mor bei êch? Bơl bơn khang rêh knông dôih 'baap jah brêêng smlaang kươt ngroh ngri laang? 2'Bưn geh bei nei! Bơl bơn ja chhưt teq n'hai dôih 'baap nei lơh bei êch khang rêh ndih knông dôih 'baap kươt? 3Oh bi 'bưn gưt laah leq sêch bơl bơn kot ja dol bap-tem knông Yaang Krist Jê-sus, nei laa dol bap-tem knông baak chhưt Pang ri laang? 4Bei nei, đươm bap-tem, bơl bơn ja kươt rôôp teq u knông baak chhưt n'hai Pang, jah hơơi bei Yaang Krist chkhôm chring chraang Bươp ri kươt rêh kươi a ktôk chhưt bei êch nei bơl bơn kot kươt rêh knông klap mhei bei nei.#Kôl 2:12. 5Đươm mơq bơl bơn ja kươt ta sruôl n'hai Pang knông baak chhưt Pang ri, nei ngan kaar bơl bơn a kươi kot kươt ta sruôl n'hai Pang knông baak rêh kươi rkhơt bei baak rêh kươi Pang ri. 6Bơl bơn gưt laah koon bnih ndơm bơl bơn ri ja pôl dol pơng đênh teq u chhư rglaang n'hai Pang, jah koon bnih#6:6 S'bt: chhak jan. dôih 'baap dol luôch lêêk, n'hai bơl bơn 'bưn nh'ơơm lơh dêch aan dôih 'baap hôm. 7Đươm 'bơơn ja chhưt nei kươt doh rlach dôih 'baap. 8Dôh mơq bơl bơn ja chhưt pôl n'hai Yaang Krist nei bơl bơn jơ laah nơơm a kươi kot rêh n'hai Pang. 9Bơl bơn gưt laah Yaang Krist ja rêh kươi a ktôk chhưt nei a kươi 'bưn khal êch chhưt hôm; baak chhưt 'bưn nh'ơơm kan bôôk Pang. 10Đươm Pang ja chhưt, laa chhưt aan dôih 'baap di wưt sơp leq; dôh Pang rêh, laa rêh aan Brah Ưn. 11Bei nei, oh bi kot phrui krơơ nơơm ja chhưt teq u dôih 'baap u plah rêh aan Brah Ưn knông Yaang Krist Jê-sus.
12Bei nei, khơơm teq dôih 'baap kan bôôk knông pêêk pai ơih chhưt oh bi ri, lơh oh bi phrui tênh sơ ôp bu ri. 13Khơơm piyơ chhak jan nơơm lơh griêng đơơk đaak aan dôih 'baap, dôh phrui piyơ nơơm bơn aan Brah Ưn bei pal koon bnih a ktôk chhưt rêh kươi, u piyơ chhak jan nơơm lơh griêng sêch song aan Brah Ưn. 14Đươm dôih 'baap a kươi 'bưn nh'ơơm kan bôôk oh bi, đươm oh bi 'bưn a teh ch'bap dôh a teh brêêng smlaang.
Dêch baak sêch song ri
15Bei nei a hay? Geh lah đươm bơl bơn 'bưn a teh ch'bap, dôh a teh brêêng smlaang, mơ a kươi bơl bơn khang lơh dôih pau? 'Bưn geh bei nei! 16Oh bi 'bưn gưt laah mơq oh bi liêu chhak lơh dêch jah chôh bnih êch nei oh bi laa dêch aan bnih bơn chôh laang? Paich dêch pa dôih 'baap liêu tơt baak chhưt, paich dêch baak chôh ri liêu tơt baak sêch song. 17Dôh or Brah Ưn, đươm oh bi ja lơh dêch aan dôih 'baap baah au a ngan chưt chôh rkươt tơmbơh kne junh ndơơp aan oh bi, 18u oh bi ja kươt dơrluh rlach dôih 'baap, but koon dêch aan baak sêch song. 19Đươm pêêk pai oh bi lhok lhơơi mơ hei mor tênh ndroong koon bnih. Oh bi u ja piyơ chhak jan nơơm lơh dêch aan baak jrơơk jrơơm n'hai baak đơơk đaak rkơơl bei êch, nei bei au, phrui piyơ chhak jan nơơm lơh dêch aan baak sêch song jah kươt lơh jrah bei nei. 20khal nha laa dêch aan dôih 'baap nei oh bi kươt snôk sroong teq u baak sêch song. 21Plah nei oh bi kach kươt kao play ơơn baah bei au oh bi leet phrui prêêng mat? Baak ptut pal ntil nei ri laa baak chhưt. 22Dôh bei au oh bi ja kươt dơrluh rlach dôih 'baap u but dêch Brah Ưn ri, nei kat kao hao play baah oh bi kươt laa baak lơh jrah, u ptut kươt baak rêh yoot yôw. 23Đươm prak kaih dôih 'baap ri laa baak chhưt, dôh baak ươn Brah Ưn ri laa baak rêh yoot yôw knông Yaang Krist Jê-sus, Brah bơl bơn.
Právě zvoleno:
Rô-ma 6: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.