Rô-ma 5
5
Kat kao hao play baak chôôl sêch song đươm chưt jơrnơ ri
1Bei nei, tơt ja kươt chôôl sêch song đươm chưt jơrnơ, bơl bơn kươt ta tưt#5:1 bơl bơn kươt ta tưt: Knông m'baak plơơp 'bian ti laa bơl bơn phrui ta tưt. n'hai Brah Ưn rlach Brah bơl bơn laa Brah Jê-sus Krist. 2Chkhưm Pang, bơl bơn đươm chưt jơrnơ kươt chwaat u knông brêêng smlaang au, laa brêêng smlaang baah chkhôm nei bơl bơn nha ta yoong khưng u broh s'bai n'hai kơndưng kươt dơơn chring chraang Brah Ưn ri. 3'Bưn dơơn bei nei, bơl bơn kot broh s'bai knông kro rngiêl nha, đươm gưt laah kro rngiêl sot baak pơrkhom, 4pơrkhom sot lgơơch baak kmloh kmlang, kmloh kmlang sot lgơơch baak kơndưng, 5u kơndưng 'bưn lơh bơl bơn prêêng mat, đươm baak srlanh Brah Ưn ri khut teq u chưt bơl bơn đươm Brah Wêêng laa Yaang ja kươt ươn aan bơl bơn.
6Plah bơl bơn nha lhok lhơơi nei dip jơrnơl Yaang Krist dol chhưt đươm bah geh dôih. 7Rngiêl ngan geh 'bơơn dol chhưt gơl aan mbu bnih sêch song, ndêq đat mơ geh bnih baanh chhưt tơh aan mbu bnih lơ ưt. 8Dôh Brah Ưn tơrsau chưt srlanh Pang ri teq u bơl bơn, tơt bơl bơn nha laa dôih 'baap nei Yaang Krist ja chhưt tơh aan bơl bơn. 9Nei bei au bơl bơn ja chkhôm mhaam Pang kươt chôôl sêch song hơơi, nei leq bơl bơn a kươi dươn chkhôm Pang baah kươt đoh rlach baak hao nuih Brah Ưn ri huôih nha. 10Đươm mơq tơt bơl bơn laa bah kmang baah chkhôm baak chhưt Koon Pang ri, bơl bơn nha kươt ta krôih n'hai Brah Ưn nei huôih ơơn au ja kươt ta krôih hơơi, bơl bơn leet dươn kươt đoh chkhôm baak rêh Koon Pang ri laa pal êch. 11'Bưn dơơn bei nei, bơl bơn kơơi nha broh s'bai knông Brah Ưn đươm Brah bơl bơn laa Brah Jê-sus Krist, chkhôm Pang baah bei au bơl bơn pơih kươt baak ta krôih.
A-đam u Yaang Krist
12Nei mơ, đươm bei mbu bnih baah dôih 'baap ja mưt knông swich teh, u đươm dôih 'baap baah geh baak chhưt, nei baak chhưt ja a tơơp tơt jôm bnih đươm jôm bnih kot ja geh dôih. 13Đươm dôih 'baap ja geh knông swich teh geh noor ch'bap; dôh ndah geh ch'bap nei dôih 'baap 'bưn kươt krơơ tơt. 14Đươm bei nei, baak chhưt ja gôq knông A-đam tơt Môi-se, leq lơ pal bnih 'bưn dôih pôl mlơm dôih n'hai A-đam, laa bnih lơh koon gui teq u Yaang phrui lôh. 15Dôh dôih 'baap 'bưn rkhơt bei baak ươn a trôôk prêh. Đươm mơq dôih dơơn mbu bnih ri baah ơk bnih phrui chhưt nei brêêng smlaang Brah Ưn ri ttih huôih, u griêng tkôm đươm brêêng smlaang mbu Bnih ri laa Brah Jê-sus Krist leet ngroh ngri huôih aan ơk bnih nday nha. 16Griêng tkôm au 'bưn rkhơt bei lôh a dôih 'baap mbu bnih ri. Đươm baak pơrkat lôh a mbu bnih dôih ja liêu tơt baak pơrkat; dôh baak ươn trôôk prêh nei a kươi ơk wưt lơh dôih leet liêu tơt baak chôôl sêch song. 17Mơq dơơn đươm dôih mbu bnih ri, baah rlach bnih nei baak chhưt ja kan bôôk bei êch, nei kot dơơn chkhôm mbu Bnih laa Brah Jê-sus Krist, baah pal 'bơơn chơp brêêng smlaang u griêng tkôm sêch song ơk mbơl, a kươi kan bôôk knông baak rêh bei nei.
18Nei mơ, đươm baak geh dôih dơơn mbu bnih ri baah jôm bnih dol pơrkat, nei kot bei nei, đươm lơh kaar sêch song mbu Bnih ri baah jôm bnih kươt chôôl u kươt dơơn baak rêh. 19Nei, đươm baak 'bưn chôh mbu bnih ri baah ơk bnih but geh dôih, nei kot bei nei, đươm baak chôh mbu Bnih baah ơk bnih a kươi but sêch song.
20Ch'bap ja lôh lơh aan dôih 'baap rơq; dôh ktôk êch dôih 'baap rơq nei brêêng smlaang leet ngroh ngri huôih. 21Bei nei, dôih 'baap kan bôôk dơng baak chhưt, nha brêêng smlaang kan bôôk dơng baak sêch song jah liêu kơơi baak rêh yoot yôw rlach Brah Jê-sus Krist, Brah bơl bơn.
Právě zvoleno:
Rô-ma 5: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.