Lu-ka 13
13
Bơl bnih Ga-li-lê dol lưm. – Tơơm lwi 'bưn play
1Tal khal nei, geh pal du a nei chhuôr kươi aan Brah Jê-sus teq u kaar Phi-lat lưm bơl bnih Ga-li-lê, tak lơh mhaam bu ta wat u pai thwaai bu plah piyơ. 2Pang ơh: “Bơl 'bei kơn ơơn bơl bnih Ga-li-lê nei geh dôih jjơk huôih leq sêch bơl bnih Ga-li-lê nday đươm bu dol ji rngiêl bei nei laang? 3Hei lah bơl 'bei, 'bưn laang; dôh mơq bơl 'bei 'bưn teq lơi dôih nei leq sêch a kươi dol saap luôch bei nei đêêl. 4Paich laa jmơt phaam ndu tôw dol naam prêh Si-lô-ê rlêh a lơn chhưt, bơl 'bei kơn ơơn laa bu dôih 'baap huôih jôm bơl nday gôq a poh Jê-ru-sa-lem laang? 5Hei lah bơl 'bei, 'bưn laang; dôh mơq bơl 'bei 'bưn teq lơi dôih nei leq sêch a kươi dol saap luôch bei nei đêêl.”
6Ja nei Pang chhuôr pn'geh ruk au: “Bnih tôw tam di tơơm lwi knông mir nho nơơm; bu han wơng play dôh khah 'bưn sau ơơn. 7Bu mor n'hai bnih tam nho: ‘Tôw ja pei snam hei han tơt au jah pleh play lwi au dôh khah 'bưn sau ơơn. Phrui gôt tơơm nei ơơi, a hay doom lơh ơơn aan rthơm steh 'bưn snơ?’ 8Bnih tam nho ơh: ‘Ơi yau nnơơm, dan teq kươi bu snam au nha, kơp hei pông steh rlum nei hơơi khut phơng teq u nei. 9Awap u kươi bu a kươi kươt play kao; mơq 'bưn, nnơơm a kươi gôt.’”
Baak tơmbah knông nar sa-'bat
10Jơl nar sa-'bat, Brah Jê-sus plah chhuôr kne knông nhi pơrgum. 11Tu nei, geh mei dơur dol wêêng chaak ap rup lơh aan pơrtanh jmơt phaam snam hôm, buq a kơhôq u teh 'bưn geh ta yoong song kươt. 12Tơt sau mei nei, Brah Jê-sus khuôl lôh u lah: “Au 'bei, 'bei ja kươt doh rlach pơrtanh hơơi.” 13U Pang dơih ti lơ mei. Kơndaal, mei ta yoong song kươt, u pơt wơơl Brah Ưn. 14Yau kan bôôk nhi pơrgum sau Brah Jê-sus ja tơmbah tanh knông nar sa-'bat nei hao nuih u lah teq u phung raih laah: “Geh prau nar phrui lơh kaar, bei nei phrui tơt knông pal nar nei jah kươt tơmbah, khơơm laap mưt knông nar sa-'bat.” 15Dôh Brah ơh: “Ơi bơl pưl baar taap, lap nar sa-'bat, 'bưn geh leq sêch bơl 'bei kot krôih gôw paich seh kroih nơơm ri rlach boong deh baah liêu bu han ôn daak laang? 16Nha mei au laa koon ur Ap-ra-ham ri, dol Sa-tan kơt krai u jmơt phaam snam hơơi, leet 'bưn kươt doh aan bu knông nar sa-'bat ơơm?” 17Tơt Pang lah bei nei, leq sêch bơl bah ta wal Pang kot mbaal mat, u leq phung raih broh s'bai teq u jôm kaar êêng aang ngan Pang ja lơh.
Grap kai n'hai kenh
(Ma-thi-ơ 13:31-33; Mak 4:30-32)
18Bei nei, Brah Jê-sus lah: “Nggoor Brah Ưn bei pi ơơn? Hei a kươi pơih pi ơơn baah pndang n'hai bu? 19Nggoor nei bei di grap sbay baah bnih tôw pơih jah tam knông mir, bu hoon but tơơm, u chum trôôk lơh chhôm lơ chông nei.” 20Pang leet lah: “Hei a kươi pndang nggoor Brah Ưn teq u pi ơơn? 21Nggoor nei bei kenh mei dơur tôw pơih tram teq u pei loong bơrnêh, aan tơt khal bơrnêh but kenh leq.”
Lpôông wêt
(Ma-thi-ơ 7:13,14,21-23)
22Brah Jê-sus han jôm poh, jôm poh dêq, đah tti kne đah han ndih tơt poh Jê-ru-sa-lem. 23Geh bnih mor teq u Pang: “Brah ơi, dơơn lah geh m'baak ndêq bnih kươt đoh ei pan?” 24Pang lah teq u bu: “Phrui pơrkhom jah mưt lpôông wêt, đươm Hei lah bơl 'bei, ơk bnih wơng troong jah mưt u nei dôh mưt 'bưn kươt. 25Tơt nnơơm nhi kah kơơt u tang lpôông kươi hơơi, bơl 'bei a gaaih goh lpôông khuôl laah: ‘Brah ơi, dan pơơk aan bơl hei!’ Nnơơm a kươi ơh: ‘Hei 'bưn gưt bơl 'bei lôh a êch.’ 26Bei au bơl 'bei a kươi ơh: ‘Bơl hei ja sôông sa bôôk mat Brah, u Brah ja kne knông pal troong bơl hei ri.’ 27Dôh Nnơơm a kươi mor n'hai bơl 'bei: ‘Hei 'bưn gưt bơl 'bei lôh a êch. Leq sêch bơl bah lơh ntil bn'ap nei, phrui rônh sot rlach hei!’ 28Khal nei, bơl 'bei a kươi sau Ap-ra-ham, I-sak, n'hai Ja-kôp pôl leq sêch bơl grnưt noor kot gôq knông nggoor Brah Ưn, nha bơl 'bei a kươi dol jang sot a gaaih laa ktôk geh nhim ngliêng u kap chhêk.#Mat 22:13; 25:30. #Mat 8:11-12. 29Ja nei a kơơt nar, nhơp nar, chông bri, tơơm bri, bu nday a kươi lôh gôq joq sa knông nggoor Brah Ưn. 30Ngan bei nei, geh bơl bnih ptut a kươi but a bôôk, u bơl bnih a bôôk a kươi but ptut.”#Mat 19:30; 20:16; Mak 10:31.
Snđach Hê-rôt êch lưm Brah Jê-sus
31Tu bêl nei, geh pal du Pha-ri-si lôh mor teq u Brah Jê-sus: “Yau han rlach ktôk au ơơi đươm Hê-rôt êch lưm Yau.” 32Pang ơh: “Phrui han mor n'hai yan khaar nei laah: ‘Nar au, nar ôi, Hei prơh chaak tơmbah tanh, tơt nar pei, Hei a kươi lơh sơp kaar brnơ Hei ri. 33Đươm 'bei nei, nar au, nar ôi, u nar tôw Hei phrui ndih han nha, đươm mbu yaang grnưt noor 'bưn geh chhưt mak gaaih Jê-ru-sa-lem.’”
Brah Jê-sus ngliêng sngaanh poh Jê-ru-sa-lem
(Ma-thi-ơ 23:37-39)
34“Ơi Jê-ru-sa-lem, Jê-ru-sa-lem! 'Bei lưm bơl grnưt noor u jang tmau bơl bnih kươt maanh lôh u 'bei! Gưt pal wưt Hei êch pơrgum koon sau 'bei bei iêr mei kruk koon nơơm, m'ang a teh pnar dôh bơl 'bei 'bưn êch! 35Au, nhi bơl 'bei ri a kươi dol teq rhang. Hei lah bơl 'bei, bơl 'bei a kươi 'bưn nh'ơơm sau Hei aan tơt jơl bơl 'bei mor laah: ‘Tư wơơl Yaang tơmoh chhak Brah baah lôh!’”
Právě zvoleno:
Lu-ka 13: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.
