Lu-ka 12
12
Pơrjat bơl pưl baar taap
(Ma-thi-ơ 10:26-31)
1Khal nei, phung raih pơrgum leq rhiêng rban bnih, lôh aan ta jaq ta tơl. Noor leq, Brah Jê-sus lap lah n'hai bơl jơrnơ Pang laah: “Phrui nhjrang kenh bơl Pha-ri-si ri, laa bơl rnđơơih pưl baar taap.#Mat 16:6; Mak 8:15. 2'Bưn geh ntil ơơn kơndơp pôn baah 'bưn dol tơrsau u 'bưn geh ntil ơơn a ruk baah 'bưn dol klach.#Mak 4:22; Lu 8:17. 3Nei mơ, ơp ntil bơl 'bei ja mor knông ktôk jơ ngôw a kươi kươt ttang a ktôk aang; ơp ntil bơl 'bei ja mor knông lwing ndơp a kươi kươt tơmbơh lơ kmbung nhi. 4Hei lah n'hai bơl 'bei laa gnasaal Hei: Khơơm n'hông bơl lưm chhak jan ja nei 'bưn lơh ơơn kươt nha. 5Dôh Hei chong aan bơl 'bei gưt phrui n'hông 'bơơn: Phrui n'hông Yaang baah tơt ja lưm hơơi, nha geh kmheng jah jang teq u gưndrung ôinh. Dip bei nei, Hei lah bơl 'bei, phrui n'hông Yaang nei! 6'Bưn geh pram pi chum srai tach kươt baar slưng prak laang? Paich bei nei, Brah Ưn 'bưn teq a wich mlơm pa êch ơơm. 7Leq dơng chhok lơ bôôk bơl 'bei kot ja kơơp leq hơơi. Khơơm n'hông, đươm bơl 'bei thlay ơk huôih chum srai. 8Hei maanh bơl 'bei, 'bơơn chôôl saak Hei di mat swich teh nei Koon Bnih a kươi kot chôôl saak bnih nei di mat bơl lênh brah Brah Ưn ri. 9Dôh 'bơơn dmôw teq Hei di mat swich teh nei bnih nei a kươi kot dol dmôw teq di mat bơl lênh brah Brah Ưn ri. 10'Bơơn mor kmang n'hai Koon Bnih nei a kươi kươt krôih; dôh 'bơơn jam joot tơt Brah Wêêng nei a kươi 'bưn kươt krôih laang.#Mat 12:32; Mak 3:29. 11Tơt bu nday liêu bơl 'bei lôh noor nhi pơrgum, di mat bơl bnih kan bôôk u bơl kan kmheng nei khơơm gênh phrui mor bei êch paich mor ntil ơơn jah koh roong nơơm, 12đươm tu bêl nei, Brah Wêêng a kươi kne bơl 'bei pal ntil ơơn chkhôm jah mor.”#Mat 10:19-20; Mak 13:11; Lu 21:14-15.
Bnih khunh kơrlung kơrlong
13Bei au, mbu bnih knông phung raih ơh n'hai Brah Jê-sus: “Ơi Yau, dan maanh bi hei ta cheq griêng mlơ aan hei.” 14Pang ơh: “Ơi bnih tôw, 'bơơn dơih Hei lơh bnih pơrkat paich laa bnih ta cheq griêng mlơ aan bơl 'bei?” 15Pang lah n'hai bu: “Phrui njrang, nhjrang jôm ntil m'oh n'haan, đươm baak rêh koon bnih ri 'bưn khom a griêng grau nơơm ngroh ngri.” 16Pang kươi krơơ aan bu di pn'geh ruk: “Pưng mbu bnih khunh ri tôw khal kươt đat. 17Bu nei gênh ruk: ‘Hei phrui lơh ơơn bei au, đươm 'bưn nh'ơơm sơp ktôk jah dơơm griêng pkao.’ 18Bu nei lah: ‘Hei a kươi lơh bei au: Hei a kươi rươih pal nơm au u sun pal nơm nday ttih huôih, ja nei hei a kươi ơn pơrgum boh ba u griêng grau hei teq u nei. 19Hei a kươi mor n'hai wêêng yaang hei laah: wêêng yaang ơi, 'bei ja geh ơk griêng grau jah ơn teq ơk snam. Phrui rlu rlơk, sôông sa, u broh s'bai.’ 20Dôh Brah Ưn lah n'hai bu nei: ‘Ơi bah kơrlung! Đươm mang au wêêng yaang 'bei a kươi dol drơnan kươi; bei nei griêng grau 'bei ja doom ơn a kươi pơơn teq u 'bơơn?’ 21'Bơơn prap ơn griêng grau aan nơơm baah 'bưn khunh geh a ktôk Brah Ưn kot bei nei đêêl.”
Baak a gênh
(Ma-thi-ơ 6:24-34)
22Brah Jê-sus lah n'hai bơl jơrnơ: “Bei nei, Hei lah n'hai bơl 'bei, khơơm đươm baak rêh baah gênh phrui sa ơơn, kot khơơm đươm chhak jan baah gênh phrui dook ơơn. 23Baak rêh thlay huôih griêng sa u chhak jan thlay huôih khôw ao. 24Phrui mơq pai kn'aak: bu 'bưn siêm, 'bưn kach, kot 'bưn geh mir paich nơm ơơm, nei Brah Ưn nha siêm bu đêêl. Bơl 'bei nha peh thlay huôih pai chum laang! 25Huôih nha, geh 'bơơn knông bơl 'bei chkhôm a gênh baah lơh aan kmlơt rêh nơơm kươt nhjoong di rbôông#12:25 nhjoong di rbôông: Paich laa prêh dơq di ndêq. dơq 'bưn? 26Bei nei, mơq bơl 'bei 'bưn geh lơh kươt di kaar dêq bei au, a hay bơl 'bei leet a gênh teq u pal kaar nday? 27Phrui mơq kao chhư hoon ttih bei êch: Bu 'bưn lơh kaar bool rngiêl, kot 'bưn têêk brai ơơm; dôh Hei lah bơl 'bei, paich snđach Sa-lô-môn khunh khwaan pal êch, kot 'bưn kươt dook klanh bei di kao chhư au. 28Bei nei, ơi bơl bah ndêq chưt jơrnơ, mơq kao deh a srei, au nha rêh, nar ôi dol jang teq u gưndrung ôinh, pa Brah Ưn nha aan bu dook klanh bei nei, huôih ơơn laa bơl 'bei! 29Nei, bơl 'bei khơơm wơng griêng sa, daak ôn, kot khơơm a gênh đat ir leq. 30Đươm jôm ntil nei, bơl raih bal knông swich teh nha rnđơơih wơng joi đêêl, u Bươp bơl 'bei ja gưt jôm ntil rn'êch bơl 'bei ri hơơi. 31Dôh phrui wơng joi nggoor Pang ri,#12:31 Pang ri: Knông m'baak plơơp 'bian ti laa Brah Ưn ri. nei Pang a kươi ươn bơl 'bei jôm ntil nei dơq. 32Ơi phung dêq, khơơm n'hông, đươm Bươp bơl 'bei ja dip chưt jah ươn nggoor aan bơl 'bei hơơi. 33Phrui tach griêng grau nơơm baah lơh kaar klanh. Phrui riêp aan nơơm pal thong prak 'bưn khuich ndơm u nơm preh 'bưn saap wait a lơ trôôk, ktôk bơl ttung 'bưn han dơơh kươt, pi tiêr 'bưn reh kươt. 34Đươm griêng grau bơl 'bei a êch, nei chưt bơl 'bei kot a nei.”
Baak kah rngeh
35“Buq bơl 'bei phrui rêt kươi, đeng bơl 'bei phrui kkaat aang.#Mat 25:1-13. 36Bơl 'bei phrui lơh bei bơl bnih plah kơp ndưng nnơơm bơn a ktôk sa griêng kliêr siq, jah tơt nnơơm siq, goh lpôông nei pơơk kơndaal.#Mak 13:34-36. 37Smlaang aan bơl dêch nei, tơt nnơơm siq sau bu nha kah rngal! A ngan, Hei lah bơl 'bei, nnơơm a kươi rêt buq nơơm bu, siêr bơl dêch gôq teq u bliêng sa u lôh lơh kaar bu. 38Mơq yau nnơơm plơq siq plah nggơl mang paich dơơh aang#12:38 plah nggơl mang paich dơơh aang: Tơmlai sưn bêl mau tơt pei bêl aang., sau bơl dêch bei nei laa smlaang ngan aan bu! 39Phrui gưt ntil au: Mơq nnơơm nhi gưt kươt bah ttung lôh bêl êch nei a kươi 'bưn teq#12:39 a kươi 'bưn teq: Knông m'baak plơơp 'bian ti laa a kươi kray njrang n'hai 'bưn teq. aan bơl nei rkưt nhi nơơm bu. 40Bơl 'bei kot phrui riêp srap, đươm Koon Bnih lôh knông bêl bơl 'bei 'bưn nggưl.”#Mat 24:43-44. 41Phi-e-rơ ơh: “Brah ơi, Brah lah pn'geh ruk au aan bơl hei paich kot aan jôm bnih?” 42Brah ơh: “'Bơơn laa bnih klei klôn gưt jhai u tơt tưt tơt bôl, kươt yau nnơơm ndơơp kan kray nhi nơơm jah ươn griêng sa dip bêl? 43Smlaang aan dêch nei tơt yau nnơơm lôh sau lơh bei nei! 44A ngan, Hei lah bơl 'bei, yau nnơơm a kươi ndơơp aan dêch nei kan krai leq sêch griêng mlơ nơơm ri. 45Dôh mơq dêch nei gênh êêng: ‘Yau nnơơm hei ndah siq ndaal ơơm,’ mơ ptơơm pơm sơmboong dêch klau, dêch ur, ja nei nhêt sa bnhưl bnhoq. 46Yau nnơơm a kươi lôh knông nar bu 'bưn nggưl, knông bêl bu 'bưn gưt, a kươi phaat bu jjơk mơt#12:46 phaat bu jjơk mơt: Paich laa koh bu di pak. u aan bu dol pôl nak rêh n'hai bah 'bưn sang. 47Dêch êch ja gưt rnđêch nnơơm bơn na baah 'bưn riêp srap u 'bưn lơh tênh rnđêch nnơơm nei a kươi dol pơm jjơk huôih. 48Dôh dêch êch 'bưn gưt rnđêch nnơơm baah lơh kaar tih nei a kươi dol pơm hôông. Đươm 'bơơn ja kươt ươn ơk nei a kươi dol drơnan kươi ơk; 'bơơn ja kươt ndơơp aan ơk huôih a kươi dol drơnan kươi ơk huôih.”
Pal baak tti kne nday
49“Hei ja lôh jah jang ôinh u teh. Mơq ôinh sơơr hơơi, Hei kmbưng pi ơơn nha! 50Geh di bap-tem baah Hei phrui dol, Hei ji kôr gưt pal êch aan tơt khal êch kaar nei kươt lơh sơp!#Mak 10:38. 51Bơl 'bei kơn ơơn Hei lôh jah liêu sroong boong aan swich teh neh? Hei lah bơl 'bei, 'bưn geh laang, dôh liêu baak pơrgah nei laa dip dơơn. 52Đươm a au, pram du gôq pôl di nhi a kươi ta pơrgah: pei du kmang n'hai baar du, baar du kmang n'hai pei du. 53Bu a kươi ta pơrgah:
Bươp kmang teq u koon klau,
Koon klau kmang teq u bươp;
Mei kmang teq u koon ur,
Koon ur kmang teq u mei;
Mei pôw kmang teq u koon pơr sa,
Koon pơr sa kmang teq u mei pôw.”
54Pang kươi lah n'hai phung raih: “Tơt sau nduq kn'hao a mak nar nhơp, bơl 'bei lah drơh: ‘A kươi geh mi;’ nei ngan geh bei nei. 55Tơt chaal dêh nar nhơp pơk, bơl 'bei mor: ‘A kươi kơđau kơrhai;’ nei ngan geh bei nei. 56Ơi bơl pưl baar taap! Bơl 'bei gưt chưrleek mi chaal teh trôôk ri, nei a hay 'bưn gưt chưrleek tơt jơl nar au? 57A hay bơl 'bei 'bưn khom gênh êêng chhak nnơơm ntil ơơn laa dip? 58Tơt 'bei han n'hai bơl pnđing nơơm bôôk mat bnih kan bôôk, rgoq troong phrui pơrkhom ta krôih n'hai bu; khơơm teq bu têêk 'bei lôh amat yau pơrkat, yau pơrkat ndơơp aan bnih kan khaam jah teq khaam. 59Hei lah 'bei, 'bei a kươi 'bưn khal êch sot rlach khaam kươt aan tơt jơl kah sơp slưng prak ptut.”
Právě zvoleno:
Lu-ka 12: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.
