I Kô-rinh-tô 4
4
Brah laa Yaang pơrkat mbu ei
1Bei nei, jôm bnih khom mơq bơl hei bei bơl dêch Yaang Krist ri, bơl bnih kan krai pal baak chmlih chmleek Brah Ưn ri. 2Ntil bu nday wơng joi ktôk bnih kan krai laa phrui jơ a ngan. 3Mbôk hei, paich dol oh bi paich ktôk pơrkat êch koon bnih pơrkat nei kot 'bưn peh thlay ơơn. Nơơm hei kot 'bưn pơrkat êêng nơơm. 4Đươm hei 'bưn sau nơơm geh tih ơơn, dôh 'bưn bei nei baah hei kươt chôôl sêch song. Yaang pơrkat hei đươm laa Brah. 5Bei nei, khơơm pơrkat gway ir, phrui kơp Brah lôh; Pang a kươi ndơơp sot rơn aang ntil ơơn krêp kar knông jơ ngôw, u preeng phaal pal jmlôm knông chưt. Khal nei, jôm bnih a kươi pơih kươt baak tư wơơl a Brah Ưn.
Ta wal lwah uôt nhjơơl u krich chhak
6Ơi oh bi, đươm thlay oh bi ri, hei ja pơrdip pal ntil au aan nơơm hei u A-pô-lô, jah oh bi riên a bơl hei rpach ndroong au ri: “Khơơm chloong rlach huôih baak ja 'bian,” jah 'bưn 'bơơn lôh chưt n'hih nhjơơl baah ta sruôl bnih au ta wal kươi bnih tôw. 7Đươm geh 'bơơn sau gnasaal jhai huôih bnih nday pan? Geh ntil ơơn gnasaal geh baah đươm 'bưn dơơp pơih pan? Mơq gnasaal ja dơơp pơih, nei a hay nha pn'hal bei ndah dơơp pơih?
8Oh bi ja hơơm sơp hôm! Oh bi ja khunh geh hơơi! Oh bi ja lơh snđach baah 'bưn chkhôm tơt bơl hei. Kmbưng ơơn oh bi lơh snđach jah bơl hei kươt pôl kan bôôk n'hai oh bi! 9Đươm hei gưt laah, Brah Ưn ja teq bơl jơt jơng bơl hei teq u ktôk 'bưn sơnơ, bei bơl bnih dol lưm chhưt, đươm bơl hei ja but ntil gươm sơch aan swich teh, lênh brah u koon bnih. 10Bơl hei laa bơl ndrơơi đươm u Yaang Krist, nha oh bi kươt jhai rpech knông Yaang Krist. Bơl hei lhok lhơơi, nha oh bi moh dang. Oh bi kươt đing, nha bơl hei dol đam điêl. 11Aan tơt bêl au, bơl hei nha dol nh'hit nh'hiêr, a yah a chhêêk, pơm gêêng u trlêêng trlaih a au a tôw. 12Bơl hei lơh kaar kro rngiêl drơơl baar paang ti nơơm. Khal dol pơđaai sa, bơl hei chak smlaang; tơt dol nhôp kơt, bơl hei ơt ơl;#Kênh 18:3. 13tơt dol mor ap, bơl hei ơh kươi ndrach ndrei. Aan tơt bei au, bơl hei but bei kơrsech swich teh ri, ach diêk koon bnih ri.
Tênh ryơơng bươp wêêng yaang
14Hei 'bian pal ntil au 'bưn geh jah lơh oh bi prêêng mat, dôh jah pn'ak oh bi bei bơl koon srlanh hei ri. 15Paich aan oh bi geh rhiêng rban bnih liêu troong knông Yaang Krist, dôh oh bi 'bưn geh ơk bươp; đươm chkhôm Baak Sroong Klanh, hei ja lgơơch oh bi lôh knông Yaang Krist Jê-sus. 16Bei nei, hei dan oh bi: Phrui kơơt hei.#I Kô 11:1; Phil 3:17. 17Đươm bei nei, hei ja maanh Ti-mô-thê, koon srlanh u tơt tưt tơt bôl hei ri knông Brah, tơt krơơ kươi aan oh bi troong ndroong hei ri knông Yaang Krist, bei hei nha kne knông Phung Jrah jôm ktôk.
18Geh pal du tơrsau n'hih nhjơơl, đươm gênh laah hei a kươi 'bưn lôh u oh bi. 19Dôh mơq Brah êch nei 'bưn pal êch hôm hei a kươi lôh u oh bi; plah nei, hei a kươi gưt 'bưn dơơn baak mor bơl bah n'hih nhjơơl au, baah leq kmlang bu ri nha. 20Đươm nggoor Brah Ưn 'bưn dơơn tơrsau dơng baak mor, baah đươm dang kmheng. 21Oh bi êch ntil ơơn? Êch hei kan kong rbat lôh u oh bi, paich laa lôh u baak srlanh u chưt kmlơt l'ưt lmư?
Právě zvoleno:
I Kô-rinh-tô 4: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.