I Kô-rinh-tô 3
3
Baak kaar phung rhap
1Ơi oh bi, teq u chhak hei, hei 'bưn geh mor n'hai oh bi bei mor n'hai bơl bnih wêêng yaang, dôh bei n'hai bnih pêêk pai, bei bơl koon ksei knông Yaang Krist. 2Hei ja siêm bơl 'bei dơng daak beq 'bưn geh dơng griêng sa kraam, đươm oh bi ndah rnđơơih kươt. Kơndaal tơt bei au oh bi ndah rnđơơih kươt,#Hê 5:12-13. 3đươm oh bi nha nh'hơơm pơơn teq u pêêk pai. Đươm knông oh bi nha geh baak skiêr, ta piit; bei nei, 'bưn geh oh bi pơơn teq u pêêk pai u gôq rêh bei bnih swich teh laang? 4Tơt bnih au mor: “Hei pơơn teq u Phao-lô,” bnih nday mor: “Hei pơơn teq u A-pô-lô,” bei nei, oh bi 'bưn dip laa bnih swich teh laang?#I Kô 1:12. 5Bei nei, A-pô-lô laa 'bơơn? Phao-lô laa 'bơơn? Bu dơơn lah bơl dêch, baah rlach bu oh bi ja jơ, bei Brah Ưn ja chong chôôl aan jôm bnih. 6Hei ja tam, A-pô-lô ja chok, dôh Brah Ưn ja lơh aan hao ttih.#Kênh 18:4-11,24-28. 7Bei nei mơ, bnih tam, bnih chok kot 'bưn laa pi ơơn leq, dôh dơơn geh Brah Ưn laa Yaang lơh aan hao ttih. 8Bnih tam, bnih chok kot nagơna; jôm bnih a kươi pơih kươt prak lơh kaar tênh kaar kmlang nơơm ri. 9Đươm bơl hei laa bơl bnih pôl lơh kaar aan Brah Ưn;#3:9 bnih pôl lơh kaar aan Brah Ưn: Paich laa bnih pôl lơh kaar Brah Ưn ri. oh bi lah pưng srei Brah Ưn ri, laa nhi Brah Ưn ri.
Yaang Krist lah pndơih Phung Jrah ri
10Tênh brêêng smlaang Brah Ưn ja ươn hei, hei ja teq pndơih bei mbu rak mon jhai kaar, nha bnih nday nei sun moon lơ trôôk. Dôh jôm bnih phrui njrang teq u ndroong nơơm sun lơ pndơih nei. 11Đươm 'bưn 'bơơn awap teq di bơrnuôl nday, êêng pndơih ja kươt teq laa Brah Jê-sus Krist. 12Mơq 'bơơn nhôq maih, kaih, tmau thlay, chhư, deh ranh paich blôw jah sun lơ pndơih nei 13nei kaar jôm bnih ri a kươi kươt tơrsau. Nar pơrkat a kươi sau srlah kaar nei; bu a kươi dol preeng phaal knông ôinh, u tuul loong kaar thlay jôm bnih ri. 14Mơq kaar 'bơơn ri sun lơ pndơih kươt nh'hơơm nei bnih nei a kươi pơih kươt tkôm. 15Nha mơq kaar 'bơơn na ri dol chhu luôch nei a kươi saap tkôm; mbôk bnih nei, a kươi kươt đoh dôh bei rlach ôinh.
Bơl jơrnơ lah nhi r'bưn Brah Ưn ri
16Oh bi 'bưn gưt laah oh bi laa nhi r'bưn Brah Ưn ri, u Brah Wêêng Brah Ưn ri gôq knông oh bi laang?#I Kô 6:19; II Kô 6:16. 17Mơq bnih êch lơh khuich nhi r'bưn Brah Ưn ri nei Brah Ưn a kươi lưm luôch bnih nei; đươm nhi r'bưn Brah Ưn ri laa jrah, u nhi r'bưn nei nơơm lah oh bi. 18Khơơm 'bơơn tak lhiat chhak nơơm. Mơq bnih êch knông oh bi kơn ơơn nơơm laa jhai rpech tênh ndroong rêh klap au nei phrui but kơrlung kơrlong jah kươt jhai rpech. 19Đươm baak jhai rpech klap au laa wơơng pniêm di mat Brah Ưn. Bei geh 'bian laah:
“Brah nhôp bơl bnih jhai blau
Drơơl baak sơglap ruk bu ri.”
20U:
“Brah gưt laah pal gơrninh bnih jhai blau ri
Kot laa 'bưn thlay.”
21Bei nei, khơơm 'bơơn pn'hal teq u koon bnih. Đươm jôm baak kot pơơn teq u oh bi: 22paich Phao-lô, A-pô-lô geh paich Sê-pha; paich swich teh, baak rêh paich baak chhưt, nar au paich nar a kươi; leq sêch kot pơơn teq u oh bi, 23oh bi pơơn teq u Yaang Krist, u Yaang Krist pơơn teq u Brah Ưn.
Právě zvoleno:
I Kô-rinh-tô 3: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.