ମାର୍କ 5
5
ଜିସୁ ବାହିନି ବୁତ ଆହାଚ୍ଚି କୁଏଞ୍ଜିକି ନେହି କିଅନ୍
(ମାତିଉ ୮:୨୮–୩୪; ଲୁକ ୮:୨୬–୩୯)
1ଡେଗ୍ଗା ଜିସୁ ଅଟେ ତା ଗ୍ରାମ୍ୱାଗାଟାରି ଗାଲିଲି ସାମ୍ନ୍ଦେର୍ତି ଆନେଟ୍ ୱାଡୁ ଗରାସିୟ ରାଜିଇନ୍ଦା ଏତେରି । 2ଜିସୁ ଡଙ୍ଗାତାୱାଟି ଜାତେଞ୍ଜି ଏଚିୱାଡ଼େ ଡ଼ଃଆନ୍ ଡିଙ୍ଗା ଆହାଚ୍ଚି ରଃଅଞ୍ଜି କୁଏଞ୍ଜି ୱିଚାଙ୍ଗାଜୁତାୱାଟି ହଚାନ୍ ତାଙ୍ଗେ ପୁଁଣ୍ଡିତେଞ୍ଜି । 3ଏୱାଞ୍ଜି ୱିଚାଙ୍ଗାଜୁତାୱା ବାସା ଆଇଚ୍ଚେଞ୍ଜି, ଆଟେ ଏମ୍ୱେନାରି ୱାଡ଼େ ତାଙ୍ଗେ ହିକଲ୍କା ଡ଼ାହି ଗାସାନ୍ ଇଟ୍ଟନ୍ ମୁପେହେଃଲ୍ଲାତେରି, 4ଏୱାଞ୍ଜିକି ଏଚ୍ଚେ ଅଲି ଦାଲ୍ଲା ତାଙ୍ଗେ ହିକଲ୍କା ଡ଼ାହି କାସ୍କା କାଟ୍କା ଗାସ୍ପାୱିଆଚ୍ଚେରି, ମତ୍ର ଏୱାଞ୍ଜି ହିକଲ୍କା ହାବେ କ୍ଡୁପ୍କା କ୍ଡୁପ୍କା କିଆନ୍ ପ୍ଡୁପ୍କାୱିଚ୍ଚେଞ୍ଜି ଅଟେ ତାଙ୍ଗେ ଗାସାନ୍ ଇଟ୍ଟନ୍ତି ବଲ ଇନ୍ଦାରିକି ହେଃଲ୍ଲାତେ । 5ଏୱାଞ୍ଜି ଡାଡ଼ିଙ୍ଗ୍ କାର୍ରାତ୍ ୱିଚାଙ୍ଗାଜୁ ଅଟେ ହରୁ ଏସେନ୍ ଗଲି ଆଇଚ୍ଚେଞ୍ଜି, ଆଟେ ୱାଲ୍ଲିଙ୍ଗ୍ ଡ଼ାହି ତା ଗାଣ୍ଡି ଗାଜା କିଚ୍ଚେଞ୍ଜି ।
6ଏୱାଞ୍ଜି ଜିସୁନିକି ଦେହାଟି ହୁଡ଼ାନାହି ଡେହି ଡେହି ୱାନ୍, ମେଣ୍ଡାଙ୍ଗୁତାନ୍ ଜୁହାରି କିତେଞ୍ଜି । 7ଆଟେ ବେର୍ ଉକୁଡ଼୍ଟି କ୍ଲୁକ୍ଚାନାହି ୱେସ୍ତେଞ୍ଜି, “ଏ ସର୍ଗତାୱା ମାନ୍ନି ହାବେତାୱାଟି ଗାମିନ୍ ମୁଲାପେନୁତି ମ୍ରିଃଏଞ୍ଜି ଜିସୁ, ନି ଡ଼ାହି ନାନ୍ଦି ଇନ୍ନି କାମା ମାନ୍ନେ ? ନାନୁ ନିଙ୍ଗେ ମୁଲାପେନୁତି ପାରୁଟି ଜିଗାନାହି ୱେସ୍ପିଞ୍ଜା, ନାଙ୍ଗେ କସ୍ଟ ହିଆଦାଃଆ ।” 8ଇନାକି ଜିସୁ “ଏ ଡ଼ଃଆନ୍ ଡିଙ୍ଗାତିଦି, ଇ କୁଏଞ୍ଜ୍ତାୱାଟି ହଚାନ୍ ହାଲ୍ମୁ” ଇଞ୍ଜାନ୍ ୱେସ୍ପିଚ୍ଚେଞ୍ଜି ।
9ଆଟେ ଜିସୁ ତାଙ୍ଗେ ୱେଚ୍ଚେଞ୍ଜି, “ନି ପାରୁ ଇନ୍ନି ପାରୁ ?” ଏୱାଞ୍ଜି ତାଙ୍ଗେ ୱେସ୍ତେଞ୍ଜି, “ନା ପାରୁ ବାହିନି, ଇନାକି ମାମୁ ଏଗେଲ୍ ଦାଲ୍ଲା ।”
10ଆଟେ ଏୱାଞ୍ଜି ଇନିସ୍କି ଏୱାରିକି ଏ ରାଜିତାୱାଟି କାଟକ୍ ପାଃଣ୍ଡେଞ୍ଜି, ଏଦାବାଗା ଜିସୁନିକି ଗାପ୍ଚି ଜିଗିତେଞ୍ଜି ।
11ଏଚିତୁକାତାୱା ହରୁ ରେଃଏସ୍ ପାଜ୍ଜିଙ୍ଗ୍ ଗୁଟ୍ଟୁ ତିଞ୍ଜିଚ୍ଚୁ । 12ଆଟେ “ଡ଼ଃଆନ୍ ଡିଙ୍ଗାଙ୍ଗ୍ ଜିସୁନିକି ଜିଗାନ୍ ୱେସ୍ତୁ, ମାଙ୍ଗେ ଏ ପାଜ୍ଜିଙ୍ଗ୍ ଲାଃଇ ହଲ୍ବନ୍ ବାଗା ପାଣ୍ଡିଦାମୁ ।” 13ଜିସୁ ତାଙ୍ଗେ ଆଦେସ୍ ହିଅନେଃଏ, ଡ଼ଃଆନ୍ ଡିଙ୍ଗାଙ୍ଗ୍ ହଚାନାହି ପାଜ୍ଜିଙ୍ଗ୍ ଲାଃଇ ହଟୁ । ଏମ୍ୱାଟି ଏ ବେର୍ ପାଜ୍ଜିଙ୍ଗ୍ ଗୁଟ୍ଟୁ କାର୍ବେକ୍ ଡେହାନାହି ଗାପ୍ଚି ପ୍ଡିତି ଗର୍ରିଟି ସାମ୍ନ୍ଦେର୍ତାୱା ଦିଆନ୍ ମୁଞ୍ଜାନ୍ ହାତୁ । ଏମ୍ୱା ବାଇକ୍ ରି ହଜାର୍ ପାଜ୍ଜିଙ୍ଗ୍ ମାଚ୍ଚୁ ।
14ପାଜ୍ଜିଙ୍ଗ୍ କପେଚ୍ଚି ଦାଲ୍ଲା ଡେହାନ୍ ହାଜ୍ଜାନାହି ଗାଡ଼ାନାସ୍କା ଅଟେ ଡଟି ନାସ୍କାଇନ୍ଦା ଇ ଡୁଣ୍ଡେଲ୍ କୁଲାଟି ୱେସ୍ତେରି, ଏମ୍ୱାଟି ଦାଲ୍ଲା ଇନ୍ନି ଡୁଣ୍ଡେଲ୍ ଆନ୍ନେ ଇଞ୍ଜାନାହି ହୁଡ଼ନ୍ତିକି ୱାତେରି । 15ଆଟେ ଏୱାରି ଜିସୁ ଟାକ୍କେ ୱାନାହି ଇନ୍ଦାରିକି କାହେ ବାହିନି ବୁତ ଆହାଚ୍ଚେ, ଏୱାଞ୍ଜି ଜିରା ହୁଚ୍ଚାନ୍ ନେହି ଏଲୁଟି କକ୍ଚ୍ଚାନାଦା ହୁଡ଼ାନ୍ ଆଜ୍ଜିତେରି । 16ଆଟେ ଏମ୍ବେନାରି ଇ ଡୁଣ୍ଡେଲ୍ ହୁଡ଼ାଚ୍ଚେରି, ଏ ବାହିନି ବୁତ ଆହାଚ୍ଚି କୁଏଞ୍ଜି ଇନିୱାହୁ ନେହିଆତେଞ୍ଜି ଅଟେ ପାଜ୍ଜିଙ୍ଗ୍ ଇନିସ୍ ନାହେଡ୍ ଆତୁ, ଏ କୁଲାଟି ଏୱାର୍ ନକେସି ହାବେତ୍ କୁଲାଟି ୱେସ୍ତେରି ।
17ଏମ୍ୱାଟି ଏ ଦାଲ୍ଲା ଜିସୁନିକି ତା ପାଲି ପିହାନ୍ ହାଲ୍ବନ୍ ବାଗା ଜିଗିତେରି ।
18ଜିସୁ ହାଲ୍ବନ୍ ବାଗା ଡଙ୍ଗାତାୱା ଏଙ୍ଗେଚ୍ଚି ତୁକାତାୱା, ଇମ୍ୱିନ୍ କୁଏଞ୍ଜିକି କାହେ ବୁତ ଆହାଚ୍ଚେ, ଏୱାଞ୍ଜି ଜିସୁ ଡ଼ାହି ହାଲ୍ବନ୍ ବାଗାଟି ଜିଗିତେଞ୍ଜି ।
19ମତ୍ର ଜିସୁ ତାଙ୍ଗେ ଅନୁମତି ହିଃଏଟେଃଏ ୱେସ୍ତେଞ୍ଜି, “ନି ଇଜ୍ଜା, ନି କୁଟ୍ଟୁମ୍ ଟାକ୍କେ ହାଲ୍ମୁ, ଆଟେ ଦାର୍ମୁ ନି ବାଗାଟି ଇନ୍ନା କିଆନ୍ନେଞ୍ଜି ଅଟେ ନିଙ୍ଗେ ଏଚ୍ଚେ ପାପୁଅଲ୍ଚାଞ୍ଜାନେଞ୍ଜି, ଏଦା ହାବେ ଏୱାରିକି ୱେସ୍ମୁ ।”
20ଏମ୍ୱାଟି ଏୱାଞ୍ଜି ହାଜ୍ଜାନାହି, ଜିସୁ ତା ବାଗାଟି ଇନ୍ନା କିଆଚ୍ଚେଞ୍ଜି, ଏଦା ହାବେ ଦେକାପଲିତାୱା ପପ୍କନ୍ ମ୍ରାସ୍ତେଞ୍ଜି, ଏମ୍ୱାଟି ଏଦା ୱେଞ୍ଜାନ୍ ହାବେତାରି ଆକ୍କାବାଡ଼ାଙ୍ଗ୍ ଆତେରି ।
ଜିସୁ ଜାଇରସତି ମ୍ରାଗାନିକି ନିପନ୍ ଅଟେ ବାରା ଅଁଣ୍ଡୁ ଟିକ୍ନା କାଟକ୍ ଆନ୍ ମାଚ୍ଚି ଆଚାଲୁ ନେହି ଆଅନ୍
(ମାତିଉ ୯:୧୮–୨୬; ଲୁକ ୮:୪୦–୫୬)
21ଏଚ୍ଚିକିଃଆ ଜିସୁ ଡଙ୍ଗାତାୱା ରିହିକ୍ ଇନେଟ୍ ୱାଡୁ ୱ୍ଡେଚାନ୍ ୱାତେଞ୍ଜି, ଏଚିତୁକାତାୱା ଦାଲ୍ଲା ହାବେ ତା ରେଃଏସ୍ ରପାଟ୍ଟେ ଆତେରି; ଆଟେ ଏୱାଞ୍ଜି ସାମ୍ନ୍ଦେର୍ ଇଡ଼ାତାୱା ବାସାଆତେଞ୍ଜି । 22ଏଚିତୁକାତାୱା ଜାଇରସ ପାରୁଟି ହାଜା ଇଡ୍ଡୁତି ରଃଅଞ୍ଜ୍ ଗାମିନାଞ୍ଜି ୱାନାହି ଜିସୁନିକି ହୁଡ଼ାନ୍ ତା କାଟ୍କା ନେତେ ବ୍ଡିତେଞ୍ଜି । 23ଆଟେ ଗାପ୍ଚି ଜିଗାନାହି ୱେସ୍ତେଞ୍ଜି, “ନା ମ୍ରାଗା ହାତେଦେ, ଏଦାବାଗା ନିନୁ ୱାନ୍ ତା କୁଃଏଟି କାଜ୍ଜୁ ଇଟ୍ଟିତେସି, ଏଦି ନେହି ଆନ୍ ନିମ୍ୱିନେ ।”
24ଏମ୍ୱାଟି ଜିସୁ ତା ଡ଼ାହି ହାଚ୍ଚେଞ୍ଜି, ଆଟେ ଏଗେଲ୍ ଦାଲ୍ଲା ତା ବେତ ବେତଟ୍ ହାଲ୍ବନ୍ ମ୍ରାସ୍ତେରି, ଆଟେ ଏୱାରି ତା କୁଃଏଟି ନାଚ୍ଚିତ୍ରଚି ଆଇଚ୍ଚେରି । 25ଏଚିତୁକାତାୱା ବାରା ଅଁଣ୍ଡୁ ଟିକ୍ନା କାଟକ୍ ଆନ୍ ମାଚ୍ଚି ରଗୁଗାଟି ରଣ୍ଡି ଆଚାଲୁ, 26ଏମ୍ୱେନାଦିକି ଗାପ୍ଚି ଜୁଗାନାହି ବଇଦଙ୍ଗ୍ଟିଆଟି ଅସାଗୁଣ୍ଡା କିଆନ୍ ତା ହାବେତ୍ କୁଲା ୱିହି କିଆଚ୍ଚେ, ମତ୍ର ଏଦି ଏ ରଗୁଟି ନେହି ଆଅନ୍ ମୁପେହେଃଲ୍ଲାତେ । 27ଏଦି ଜିସୁ କୁଲାଟି ୱେଞ୍ଜାନାହି, ଦାଲ୍ଲା ମାଦ୍ଦେ ବେତଟ୍ ୱାନାହି ତା ଜିରା ଲିଙ୍ଗୁସ୍ ଡିଗିତେ । 28ଇନାକି ଏଦି ତା ହଡାଙ୍ଗ୍ତାୱା ଏଲୁ କିଚ୍ଚେ ଜେ, “ୱାର୍ରି ତା ଜିରା ଡିଗିତେସି ନାନୁ ନେହି ଆଃଇ ।”
29ଏଚିୱାଡ଼େ ଏଦି ଜିସୁତି ଜିରା ଲିଙ୍ଗୁସ୍ ଡିଗନେଃଏ, ତା କାଟକ୍ ଆନ୍ ମାଚ୍ଚି ରଗୁଟିଆଟି ନେହିଆଅନ୍ତାଦା ତା ଗାଣ୍ଡିତାୱାଟି ପୁଚ୍ଚେ । 30ଏଚିୱାଡ଼େ ଜିସୁ ତା ବଲ ତା ଟିଆଟି ହଚାନ୍ ହାଚ୍ଚାଦାଃଆ ହଡାଙ୍ଗିଃଆ ପୁଞ୍ଜାନାହି, ବେତକ୍ ମ୍ଲିଆନ୍ ଦାଲ୍ଲାନିକି ୱେଚ୍ଚେଞ୍ଜି, “ଏମ୍ୱେ ନା ଜିରା ଡିଗିଦାତେ ?”
31ତା ଗ୍ରାମ୍ୱାଗାଟାରି ଜିସୁନିକି ୱେସ୍ତେରି ଜେ, “ନିନୁ ହୁଡ଼େଞ୍ଜି, ଦାଲ୍ଲା ହାବେ ନି ଗୁଞ୍ଜେର୍ ନାଚ୍ଚିତ୍ରଚି ଆନ୍ ସ୍ଡିପିଆଇନ୍ନେରି, ଆଟେ ନିନୁ ୱେଞ୍ଜିଞ୍ଜାଦି, ଏମ୍ୱେ ନାଙ୍ଗେ ଡିଗିଦାତେ ?”
32ମତ୍ର ଏମ୍ୱେ ତାଙ୍ଗେ ଡିଗାଚ୍ଚେ, ଏଦା ପୁନ୍ବନ୍ ବାଗା ଜିସୁ ଗୁଞ୍ଜେର୍ ମେହ୍ପାୱିଅନ୍ ମ୍ରାସ୍ତେଞ୍ଜି । 33ଏମ୍ୱାଟି ଏ ଆଚାଲୁ ତା ନେହିଆଅନ୍ତା ପୁଞ୍ଜାନାହି ଆଜ୍ଜାନ୍ ତ୍ରେଗିତ୍ରେଗି ୱାତେ । ଆଟେ ତା କାଟ୍କା ନେତେ ବ୍ଡିଆନ୍ ହାବେ ନିଜ୍ଜା କାତା ତାଙ୍ଗେ ୱେସ୍ତେ । 34ଏମ୍ୱାଟି ଜିସୁ ତାଙ୍ଗେ ୱେସ୍ତେଞ୍ଜି, “ମ୍ରାଗାନାତି ନି ମାଞ୍ଜାଡ଼ି ନିଙ୍ଗେ ନି ରଗୁତାୱାଟି ନେହି କିଆଞ୍ଜାନେ, ନିନୁ ଲତୁଟି ଇଜ୍ଜା ହାଲ୍ମୁ ।”
35ଜିସୁ ଇ କାତା ୱେସ୍ପିଚ୍ଚି ତୁକାତାୱା, ହାଜା ଇଡ୍ଡୁତି ଗାମିନାଞ୍ଜି ଜାଇରସ ଇଡ୍ଡୁତାୱାଟି ଏଚ୍ଚେ ଦାଲ୍ଲା ୱାନ୍ ଜାଇରସନିକି ୱେସ୍ତେରି, “ନି ମ୍ରାଗା ହାତେଦେ ଗ୍ରାପାଗାଟାଞ୍ଜିକି ଇନ୍ନା ବାଗା ଆଟେ କସ୍ଟ ହିଞ୍ଜି ?”
36ମତ୍ର ଜିସୁ ଏୱାର୍ତି କାତା ୱେଞ୍ଜାନ୍ ୱାଡ଼େ ୱେଃନାନ୍ ଡେହେଙ୍ଗ୍ ହାଜା ଇଡ୍ଡୁତି ଗାମିନାଞ୍ଜି ଜାଇରସନିକି ୱେସ୍ତେଞ୍ଜି, “ଆଃଜ୍ଜାଆ ୱାର୍ରି ମାଞ୍ଜାଡ଼ି କିମୁ ।”
37ଆଟେ ଏୱାଞ୍ଜି ପିତର, ଜାକୁବ ଅଟେ ତା ଆମ୍ୱେସ୍ ଜହନନିକି ପିହାନ୍ ଆଟେ ଇନ୍ଦାରିକି ୱାଡ଼େ ତା ଡ଼ାହି ଜାଇରସତି ଇଡ୍ଡୁ ଲାଃଇ ଅଃଆତେଞ୍ଜି । 38ଏୱାରି ହାଜା ଇଡ୍ଡୁତି ଗାମିନାଞ୍ଜି ଜାଇରସତି ଇଡ୍ଡୁଇନ୍ଦା ଏପନେଃଏ, ଏଦିମ୍ୱା ଦାଲ୍ଲା ଗାପ୍ଚି ଗଲି ଆନ୍ କିରେଡ଼୍ ଅଟେ ଡ଼ିଆୱିଚାନାଦା ହୁଡ଼ିତେଞ୍ଜି, 39ଆଟେ ଇଡ୍ଡୁ ଲାଃଇ ହାଜ୍ଜାନାହି ଏୱାରିକି ୱେସ୍ତେଞ୍ଜି, “ଇନ୍ନା କିଅନ୍ ଗଲି ଆଇଞ୍ଜେରି ଅଟେ ଡ଼ିଆୱିଞ୍ଜେରି ? ବଦାମାଙ୍ଗା ହାହେଃଲ୍ଲେ, ମତ୍ର ହୁଞ୍ଜାନ୍ନେ ।” ଏମ୍ୱାଟି ଏୱାରି ତାଙ୍ଗେ ଗେରୁ କିଅନ୍ ମ୍ରାସ୍ତେରି ।
40ମତ୍ର ଜିସୁ ହାବେ ଦାଲ୍ଲାନିକି ହପ୍ଚ୍ଚାନାହି ବଦାମାଙ୍ଗାତି ଇୟାଆବା ଅଟେ ତା ଡ଼ାହି ମାଚ୍ଚି ଦାଲ୍ଲାନିକି ତା ଡ଼ାହି ଅଚ୍ଚାନ୍, ବଦାମାଙ୍ଗା ମାଚ୍ଚି ବାକ୍ରାତାୱା ହଟେରି,
41ଆଟେ ବଦାମାଙ୍ଗାତି କାଜ୍ଜୁ ଆହାନାହି ତାଙ୍ଗେ ୱେସ୍ତେଞ୍ଜି, “ଟଲିତା କୁମ୍” ଇଚ୍ଚେସି “ଏ ବଦାମାଙ୍ଗା, ନାନୁ ନିଙ୍ଗେ ୱେସ୍ପିଞ୍ଜା, ନିଙ୍ଗାମୁ ।”
42ଏଚିୱାଡ଼େ ବଦାମାଙ୍ଗା ନିଙ୍ଗାନ୍ ତାକନ୍ ମ୍ରାସ୍ତେ; ଇନାକି ଏଦାଡ଼ିକି ବାରା ଅଁଣ୍ଡୁ ଆଇଚ୍ଚେ । ଏମ୍ୱା ମାନ୍ନି ଦାଲ୍ଲା ହାବେ ଏଗେଲ୍ ଆକ୍କାବାଡ଼ାଙ୍ଗ୍ ଆତେରି । 43ଆଟେ ଏମ୍ୱେ ଇନିସ୍ ଇ କୁଲା ପୁଃନ୍ନେରି, ଏଦାବାଗା ଏୱାଞ୍ଜି ଏୱାରିକି ମାଞ୍ଜାଟି ଆଦେସ୍ ହିତେଞ୍ଜି । ଆଟେ “ବଦାମାଙ୍ଗାନିକି ଇନାଆତେସ୍ ତିନ୍ବନ୍ତିକି ହିଦୁ ଇଞ୍ଜାନ୍ ୱେସ୍ତେଞ୍ଜି ।”
Právě zvoleno:
ମାର୍କ 5: DWK
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0
ମାର୍କ 5
5
ଜିସୁ ବାହିନି ବୁତ ଆହାଚ୍ଚି କୁଏଞ୍ଜିକି ନେହି କିଅନ୍
(ମାତିଉ ୮:୨୮–୩୪; ଲୁକ ୮:୨୬–୩୯)
1ଡେଗ୍ଗା ଜିସୁ ଅଟେ ତା ଗ୍ରାମ୍ୱାଗାଟାରି ଗାଲିଲି ସାମ୍ନ୍ଦେର୍ତି ଆନେଟ୍ ୱାଡୁ ଗରାସିୟ ରାଜିଇନ୍ଦା ଏତେରି । 2ଜିସୁ ଡଙ୍ଗାତାୱାଟି ଜାତେଞ୍ଜି ଏଚିୱାଡ଼େ ଡ଼ଃଆନ୍ ଡିଙ୍ଗା ଆହାଚ୍ଚି ରଃଅଞ୍ଜି କୁଏଞ୍ଜି ୱିଚାଙ୍ଗାଜୁତାୱାଟି ହଚାନ୍ ତାଙ୍ଗେ ପୁଁଣ୍ଡିତେଞ୍ଜି । 3ଏୱାଞ୍ଜି ୱିଚାଙ୍ଗାଜୁତାୱା ବାସା ଆଇଚ୍ଚେଞ୍ଜି, ଆଟେ ଏମ୍ୱେନାରି ୱାଡ଼େ ତାଙ୍ଗେ ହିକଲ୍କା ଡ଼ାହି ଗାସାନ୍ ଇଟ୍ଟନ୍ ମୁପେହେଃଲ୍ଲାତେରି, 4ଏୱାଞ୍ଜିକି ଏଚ୍ଚେ ଅଲି ଦାଲ୍ଲା ତାଙ୍ଗେ ହିକଲ୍କା ଡ଼ାହି କାସ୍କା କାଟ୍କା ଗାସ୍ପାୱିଆଚ୍ଚେରି, ମତ୍ର ଏୱାଞ୍ଜି ହିକଲ୍କା ହାବେ କ୍ଡୁପ୍କା କ୍ଡୁପ୍କା କିଆନ୍ ପ୍ଡୁପ୍କାୱିଚ୍ଚେଞ୍ଜି ଅଟେ ତାଙ୍ଗେ ଗାସାନ୍ ଇଟ୍ଟନ୍ତି ବଲ ଇନ୍ଦାରିକି ହେଃଲ୍ଲାତେ । 5ଏୱାଞ୍ଜି ଡାଡ଼ିଙ୍ଗ୍ କାର୍ରାତ୍ ୱିଚାଙ୍ଗାଜୁ ଅଟେ ହରୁ ଏସେନ୍ ଗଲି ଆଇଚ୍ଚେଞ୍ଜି, ଆଟେ ୱାଲ୍ଲିଙ୍ଗ୍ ଡ଼ାହି ତା ଗାଣ୍ଡି ଗାଜା କିଚ୍ଚେଞ୍ଜି ।
6ଏୱାଞ୍ଜି ଜିସୁନିକି ଦେହାଟି ହୁଡ଼ାନାହି ଡେହି ଡେହି ୱାନ୍, ମେଣ୍ଡାଙ୍ଗୁତାନ୍ ଜୁହାରି କିତେଞ୍ଜି । 7ଆଟେ ବେର୍ ଉକୁଡ଼୍ଟି କ୍ଲୁକ୍ଚାନାହି ୱେସ୍ତେଞ୍ଜି, “ଏ ସର୍ଗତାୱା ମାନ୍ନି ହାବେତାୱାଟି ଗାମିନ୍ ମୁଲାପେନୁତି ମ୍ରିଃଏଞ୍ଜି ଜିସୁ, ନି ଡ଼ାହି ନାନ୍ଦି ଇନ୍ନି କାମା ମାନ୍ନେ ? ନାନୁ ନିଙ୍ଗେ ମୁଲାପେନୁତି ପାରୁଟି ଜିଗାନାହି ୱେସ୍ପିଞ୍ଜା, ନାଙ୍ଗେ କସ୍ଟ ହିଆଦାଃଆ ।” 8ଇନାକି ଜିସୁ “ଏ ଡ଼ଃଆନ୍ ଡିଙ୍ଗାତିଦି, ଇ କୁଏଞ୍ଜ୍ତାୱାଟି ହଚାନ୍ ହାଲ୍ମୁ” ଇଞ୍ଜାନ୍ ୱେସ୍ପିଚ୍ଚେଞ୍ଜି ।
9ଆଟେ ଜିସୁ ତାଙ୍ଗେ ୱେଚ୍ଚେଞ୍ଜି, “ନି ପାରୁ ଇନ୍ନି ପାରୁ ?” ଏୱାଞ୍ଜି ତାଙ୍ଗେ ୱେସ୍ତେଞ୍ଜି, “ନା ପାରୁ ବାହିନି, ଇନାକି ମାମୁ ଏଗେଲ୍ ଦାଲ୍ଲା ।”
10ଆଟେ ଏୱାଞ୍ଜି ଇନିସ୍କି ଏୱାରିକି ଏ ରାଜିତାୱାଟି କାଟକ୍ ପାଃଣ୍ଡେଞ୍ଜି, ଏଦାବାଗା ଜିସୁନିକି ଗାପ୍ଚି ଜିଗିତେଞ୍ଜି ।
11ଏଚିତୁକାତାୱା ହରୁ ରେଃଏସ୍ ପାଜ୍ଜିଙ୍ଗ୍ ଗୁଟ୍ଟୁ ତିଞ୍ଜିଚ୍ଚୁ । 12ଆଟେ “ଡ଼ଃଆନ୍ ଡିଙ୍ଗାଙ୍ଗ୍ ଜିସୁନିକି ଜିଗାନ୍ ୱେସ୍ତୁ, ମାଙ୍ଗେ ଏ ପାଜ୍ଜିଙ୍ଗ୍ ଲାଃଇ ହଲ୍ବନ୍ ବାଗା ପାଣ୍ଡିଦାମୁ ।” 13ଜିସୁ ତାଙ୍ଗେ ଆଦେସ୍ ହିଅନେଃଏ, ଡ଼ଃଆନ୍ ଡିଙ୍ଗାଙ୍ଗ୍ ହଚାନାହି ପାଜ୍ଜିଙ୍ଗ୍ ଲାଃଇ ହଟୁ । ଏମ୍ୱାଟି ଏ ବେର୍ ପାଜ୍ଜିଙ୍ଗ୍ ଗୁଟ୍ଟୁ କାର୍ବେକ୍ ଡେହାନାହି ଗାପ୍ଚି ପ୍ଡିତି ଗର୍ରିଟି ସାମ୍ନ୍ଦେର୍ତାୱା ଦିଆନ୍ ମୁଞ୍ଜାନ୍ ହାତୁ । ଏମ୍ୱା ବାଇକ୍ ରି ହଜାର୍ ପାଜ୍ଜିଙ୍ଗ୍ ମାଚ୍ଚୁ ।
14ପାଜ୍ଜିଙ୍ଗ୍ କପେଚ୍ଚି ଦାଲ୍ଲା ଡେହାନ୍ ହାଜ୍ଜାନାହି ଗାଡ଼ାନାସ୍କା ଅଟେ ଡଟି ନାସ୍କାଇନ୍ଦା ଇ ଡୁଣ୍ଡେଲ୍ କୁଲାଟି ୱେସ୍ତେରି, ଏମ୍ୱାଟି ଦାଲ୍ଲା ଇନ୍ନି ଡୁଣ୍ଡେଲ୍ ଆନ୍ନେ ଇଞ୍ଜାନାହି ହୁଡ଼ନ୍ତିକି ୱାତେରି । 15ଆଟେ ଏୱାରି ଜିସୁ ଟାକ୍କେ ୱାନାହି ଇନ୍ଦାରିକି କାହେ ବାହିନି ବୁତ ଆହାଚ୍ଚେ, ଏୱାଞ୍ଜି ଜିରା ହୁଚ୍ଚାନ୍ ନେହି ଏଲୁଟି କକ୍ଚ୍ଚାନାଦା ହୁଡ଼ାନ୍ ଆଜ୍ଜିତେରି । 16ଆଟେ ଏମ୍ବେନାରି ଇ ଡୁଣ୍ଡେଲ୍ ହୁଡ଼ାଚ୍ଚେରି, ଏ ବାହିନି ବୁତ ଆହାଚ୍ଚି କୁଏଞ୍ଜି ଇନିୱାହୁ ନେହିଆତେଞ୍ଜି ଅଟେ ପାଜ୍ଜିଙ୍ଗ୍ ଇନିସ୍ ନାହେଡ୍ ଆତୁ, ଏ କୁଲାଟି ଏୱାର୍ ନକେସି ହାବେତ୍ କୁଲାଟି ୱେସ୍ତେରି ।
17ଏମ୍ୱାଟି ଏ ଦାଲ୍ଲା ଜିସୁନିକି ତା ପାଲି ପିହାନ୍ ହାଲ୍ବନ୍ ବାଗା ଜିଗିତେରି ।
18ଜିସୁ ହାଲ୍ବନ୍ ବାଗା ଡଙ୍ଗାତାୱା ଏଙ୍ଗେଚ୍ଚି ତୁକାତାୱା, ଇମ୍ୱିନ୍ କୁଏଞ୍ଜିକି କାହେ ବୁତ ଆହାଚ୍ଚେ, ଏୱାଞ୍ଜି ଜିସୁ ଡ଼ାହି ହାଲ୍ବନ୍ ବାଗାଟି ଜିଗିତେଞ୍ଜି ।
19ମତ୍ର ଜିସୁ ତାଙ୍ଗେ ଅନୁମତି ହିଃଏଟେଃଏ ୱେସ୍ତେଞ୍ଜି, “ନି ଇଜ୍ଜା, ନି କୁଟ୍ଟୁମ୍ ଟାକ୍କେ ହାଲ୍ମୁ, ଆଟେ ଦାର୍ମୁ ନି ବାଗାଟି ଇନ୍ନା କିଆନ୍ନେଞ୍ଜି ଅଟେ ନିଙ୍ଗେ ଏଚ୍ଚେ ପାପୁଅଲ୍ଚାଞ୍ଜାନେଞ୍ଜି, ଏଦା ହାବେ ଏୱାରିକି ୱେସ୍ମୁ ।”
20ଏମ୍ୱାଟି ଏୱାଞ୍ଜି ହାଜ୍ଜାନାହି, ଜିସୁ ତା ବାଗାଟି ଇନ୍ନା କିଆଚ୍ଚେଞ୍ଜି, ଏଦା ହାବେ ଦେକାପଲିତାୱା ପପ୍କନ୍ ମ୍ରାସ୍ତେଞ୍ଜି, ଏମ୍ୱାଟି ଏଦା ୱେଞ୍ଜାନ୍ ହାବେତାରି ଆକ୍କାବାଡ଼ାଙ୍ଗ୍ ଆତେରି ।
ଜିସୁ ଜାଇରସତି ମ୍ରାଗାନିକି ନିପନ୍ ଅଟେ ବାରା ଅଁଣ୍ଡୁ ଟିକ୍ନା କାଟକ୍ ଆନ୍ ମାଚ୍ଚି ଆଚାଲୁ ନେହି ଆଅନ୍
(ମାତିଉ ୯:୧୮–୨୬; ଲୁକ ୮:୪୦–୫୬)
21ଏଚ୍ଚିକିଃଆ ଜିସୁ ଡଙ୍ଗାତାୱା ରିହିକ୍ ଇନେଟ୍ ୱାଡୁ ୱ୍ଡେଚାନ୍ ୱାତେଞ୍ଜି, ଏଚିତୁକାତାୱା ଦାଲ୍ଲା ହାବେ ତା ରେଃଏସ୍ ରପାଟ୍ଟେ ଆତେରି; ଆଟେ ଏୱାଞ୍ଜି ସାମ୍ନ୍ଦେର୍ ଇଡ଼ାତାୱା ବାସାଆତେଞ୍ଜି । 22ଏଚିତୁକାତାୱା ଜାଇରସ ପାରୁଟି ହାଜା ଇଡ୍ଡୁତି ରଃଅଞ୍ଜ୍ ଗାମିନାଞ୍ଜି ୱାନାହି ଜିସୁନିକି ହୁଡ଼ାନ୍ ତା କାଟ୍କା ନେତେ ବ୍ଡିତେଞ୍ଜି । 23ଆଟେ ଗାପ୍ଚି ଜିଗାନାହି ୱେସ୍ତେଞ୍ଜି, “ନା ମ୍ରାଗା ହାତେଦେ, ଏଦାବାଗା ନିନୁ ୱାନ୍ ତା କୁଃଏଟି କାଜ୍ଜୁ ଇଟ୍ଟିତେସି, ଏଦି ନେହି ଆନ୍ ନିମ୍ୱିନେ ।”
24ଏମ୍ୱାଟି ଜିସୁ ତା ଡ଼ାହି ହାଚ୍ଚେଞ୍ଜି, ଆଟେ ଏଗେଲ୍ ଦାଲ୍ଲା ତା ବେତ ବେତଟ୍ ହାଲ୍ବନ୍ ମ୍ରାସ୍ତେରି, ଆଟେ ଏୱାରି ତା କୁଃଏଟି ନାଚ୍ଚିତ୍ରଚି ଆଇଚ୍ଚେରି । 25ଏଚିତୁକାତାୱା ବାରା ଅଁଣ୍ଡୁ ଟିକ୍ନା କାଟକ୍ ଆନ୍ ମାଚ୍ଚି ରଗୁଗାଟି ରଣ୍ଡି ଆଚାଲୁ, 26ଏମ୍ୱେନାଦିକି ଗାପ୍ଚି ଜୁଗାନାହି ବଇଦଙ୍ଗ୍ଟିଆଟି ଅସାଗୁଣ୍ଡା କିଆନ୍ ତା ହାବେତ୍ କୁଲା ୱିହି କିଆଚ୍ଚେ, ମତ୍ର ଏଦି ଏ ରଗୁଟି ନେହି ଆଅନ୍ ମୁପେହେଃଲ୍ଲାତେ । 27ଏଦି ଜିସୁ କୁଲାଟି ୱେଞ୍ଜାନାହି, ଦାଲ୍ଲା ମାଦ୍ଦେ ବେତଟ୍ ୱାନାହି ତା ଜିରା ଲିଙ୍ଗୁସ୍ ଡିଗିତେ । 28ଇନାକି ଏଦି ତା ହଡାଙ୍ଗ୍ତାୱା ଏଲୁ କିଚ୍ଚେ ଜେ, “ୱାର୍ରି ତା ଜିରା ଡିଗିତେସି ନାନୁ ନେହି ଆଃଇ ।”
29ଏଚିୱାଡ଼େ ଏଦି ଜିସୁତି ଜିରା ଲିଙ୍ଗୁସ୍ ଡିଗନେଃଏ, ତା କାଟକ୍ ଆନ୍ ମାଚ୍ଚି ରଗୁଟିଆଟି ନେହିଆଅନ୍ତାଦା ତା ଗାଣ୍ଡିତାୱାଟି ପୁଚ୍ଚେ । 30ଏଚିୱାଡ଼େ ଜିସୁ ତା ବଲ ତା ଟିଆଟି ହଚାନ୍ ହାଚ୍ଚାଦାଃଆ ହଡାଙ୍ଗିଃଆ ପୁଞ୍ଜାନାହି, ବେତକ୍ ମ୍ଲିଆନ୍ ଦାଲ୍ଲାନିକି ୱେଚ୍ଚେଞ୍ଜି, “ଏମ୍ୱେ ନା ଜିରା ଡିଗିଦାତେ ?”
31ତା ଗ୍ରାମ୍ୱାଗାଟାରି ଜିସୁନିକି ୱେସ୍ତେରି ଜେ, “ନିନୁ ହୁଡ଼େଞ୍ଜି, ଦାଲ୍ଲା ହାବେ ନି ଗୁଞ୍ଜେର୍ ନାଚ୍ଚିତ୍ରଚି ଆନ୍ ସ୍ଡିପିଆଇନ୍ନେରି, ଆଟେ ନିନୁ ୱେଞ୍ଜିଞ୍ଜାଦି, ଏମ୍ୱେ ନାଙ୍ଗେ ଡିଗିଦାତେ ?”
32ମତ୍ର ଏମ୍ୱେ ତାଙ୍ଗେ ଡିଗାଚ୍ଚେ, ଏଦା ପୁନ୍ବନ୍ ବାଗା ଜିସୁ ଗୁଞ୍ଜେର୍ ମେହ୍ପାୱିଅନ୍ ମ୍ରାସ୍ତେଞ୍ଜି । 33ଏମ୍ୱାଟି ଏ ଆଚାଲୁ ତା ନେହିଆଅନ୍ତା ପୁଞ୍ଜାନାହି ଆଜ୍ଜାନ୍ ତ୍ରେଗିତ୍ରେଗି ୱାତେ । ଆଟେ ତା କାଟ୍କା ନେତେ ବ୍ଡିଆନ୍ ହାବେ ନିଜ୍ଜା କାତା ତାଙ୍ଗେ ୱେସ୍ତେ । 34ଏମ୍ୱାଟି ଜିସୁ ତାଙ୍ଗେ ୱେସ୍ତେଞ୍ଜି, “ମ୍ରାଗାନାତି ନି ମାଞ୍ଜାଡ଼ି ନିଙ୍ଗେ ନି ରଗୁତାୱାଟି ନେହି କିଆଞ୍ଜାନେ, ନିନୁ ଲତୁଟି ଇଜ୍ଜା ହାଲ୍ମୁ ।”
35ଜିସୁ ଇ କାତା ୱେସ୍ପିଚ୍ଚି ତୁକାତାୱା, ହାଜା ଇଡ୍ଡୁତି ଗାମିନାଞ୍ଜି ଜାଇରସ ଇଡ୍ଡୁତାୱାଟି ଏଚ୍ଚେ ଦାଲ୍ଲା ୱାନ୍ ଜାଇରସନିକି ୱେସ୍ତେରି, “ନି ମ୍ରାଗା ହାତେଦେ ଗ୍ରାପାଗାଟାଞ୍ଜିକି ଇନ୍ନା ବାଗା ଆଟେ କସ୍ଟ ହିଞ୍ଜି ?”
36ମତ୍ର ଜିସୁ ଏୱାର୍ତି କାତା ୱେଞ୍ଜାନ୍ ୱାଡ଼େ ୱେଃନାନ୍ ଡେହେଙ୍ଗ୍ ହାଜା ଇଡ୍ଡୁତି ଗାମିନାଞ୍ଜି ଜାଇରସନିକି ୱେସ୍ତେଞ୍ଜି, “ଆଃଜ୍ଜାଆ ୱାର୍ରି ମାଞ୍ଜାଡ଼ି କିମୁ ।”
37ଆଟେ ଏୱାଞ୍ଜି ପିତର, ଜାକୁବ ଅଟେ ତା ଆମ୍ୱେସ୍ ଜହନନିକି ପିହାନ୍ ଆଟେ ଇନ୍ଦାରିକି ୱାଡ଼େ ତା ଡ଼ାହି ଜାଇରସତି ଇଡ୍ଡୁ ଲାଃଇ ଅଃଆତେଞ୍ଜି । 38ଏୱାରି ହାଜା ଇଡ୍ଡୁତି ଗାମିନାଞ୍ଜି ଜାଇରସତି ଇଡ୍ଡୁଇନ୍ଦା ଏପନେଃଏ, ଏଦିମ୍ୱା ଦାଲ୍ଲା ଗାପ୍ଚି ଗଲି ଆନ୍ କିରେଡ଼୍ ଅଟେ ଡ଼ିଆୱିଚାନାଦା ହୁଡ଼ିତେଞ୍ଜି, 39ଆଟେ ଇଡ୍ଡୁ ଲାଃଇ ହାଜ୍ଜାନାହି ଏୱାରିକି ୱେସ୍ତେଞ୍ଜି, “ଇନ୍ନା କିଅନ୍ ଗଲି ଆଇଞ୍ଜେରି ଅଟେ ଡ଼ିଆୱିଞ୍ଜେରି ? ବଦାମାଙ୍ଗା ହାହେଃଲ୍ଲେ, ମତ୍ର ହୁଞ୍ଜାନ୍ନେ ।” ଏମ୍ୱାଟି ଏୱାରି ତାଙ୍ଗେ ଗେରୁ କିଅନ୍ ମ୍ରାସ୍ତେରି ।
40ମତ୍ର ଜିସୁ ହାବେ ଦାଲ୍ଲାନିକି ହପ୍ଚ୍ଚାନାହି ବଦାମାଙ୍ଗାତି ଇୟାଆବା ଅଟେ ତା ଡ଼ାହି ମାଚ୍ଚି ଦାଲ୍ଲାନିକି ତା ଡ଼ାହି ଅଚ୍ଚାନ୍, ବଦାମାଙ୍ଗା ମାଚ୍ଚି ବାକ୍ରାତାୱା ହଟେରି,
41ଆଟେ ବଦାମାଙ୍ଗାତି କାଜ୍ଜୁ ଆହାନାହି ତାଙ୍ଗେ ୱେସ୍ତେଞ୍ଜି, “ଟଲିତା କୁମ୍” ଇଚ୍ଚେସି “ଏ ବଦାମାଙ୍ଗା, ନାନୁ ନିଙ୍ଗେ ୱେସ୍ପିଞ୍ଜା, ନିଙ୍ଗାମୁ ।”
42ଏଚିୱାଡ଼େ ବଦାମାଙ୍ଗା ନିଙ୍ଗାନ୍ ତାକନ୍ ମ୍ରାସ୍ତେ; ଇନାକି ଏଦାଡ଼ିକି ବାରା ଅଁଣ୍ଡୁ ଆଇଚ୍ଚେ । ଏମ୍ୱା ମାନ୍ନି ଦାଲ୍ଲା ହାବେ ଏଗେଲ୍ ଆକ୍କାବାଡ଼ାଙ୍ଗ୍ ଆତେରି । 43ଆଟେ ଏମ୍ୱେ ଇନିସ୍ ଇ କୁଲା ପୁଃନ୍ନେରି, ଏଦାବାଗା ଏୱାଞ୍ଜି ଏୱାରିକି ମାଞ୍ଜାଟି ଆଦେସ୍ ହିତେଞ୍ଜି । ଆଟେ “ବଦାମାଙ୍ଗାନିକି ଇନାଆତେସ୍ ତିନ୍ବନ୍ତିକି ହିଦୁ ଇଞ୍ଜାନ୍ ୱେସ୍ତେଞ୍ଜି ।”
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0