Luka 24

marevaaw i Yēsu

(Matay 28.1-10; Maruko 16.1-8; Yohanē 20.1-10)

1kasungalan na wari, a 'iyadenan mu, nazu na vavayan miinurung kanantu pinadang na pakauwalringulr mukuwa i trevelran. 2mena'u nazu kana varasa' za kemay ngawayan na trevelr kinulukulung lra pusaninin, muwaday lra kanantu sulray na trevelran, 3zi kemakawang musavak kana trevelran, mawmu 'azi mena'u kanantu zazek ni Luzu i Yēsu. 4a kemiyaanger 'azi ziya kemuret mu, maherareher za kazu a zazuwa melatrilatri' tu kavang matikezir kanazu i trapingiran; 5salaw mare'alav nazu, hemerupu i dare'. nazu na zazuwa marengay kanazu: <<kemuda zi kazu mu kana minanatrayan i savakan maaya' kana vaaw na trau? 6'azi kazu i kani i intaw; marevaaw lra i intaw! patuangeru nantu nirengay kanmu kazu i Galili; marengay intaw: 7<tu Alrak na trau 'azika'azi ituluz i lima kana mipamelriyan na trau, trehetrehanay i ziyuzika i itras, marevaaw nu katelu wariyan.> >>

8kemani mu paranger lra nazu kanantu ngay ni Yēsu, 9zi muveruk kemay trevelran, tu nina'uwan na lremak ziya pakalrazam kanantu sito na papulu' zi sasa zi kana zuma na trau. 10maregay pakalrazam kana sito nanni na vavayan mapiya muravak i Maliya na Motara, i Yoanna, tainataw ni Yakob i Maliya, zi na kurelrang mukasa na vavayan. 11mawmu na sito kaulra kema kananni na vavayan za pasasevang marengay, 'azi pakutatena' kanantu ngay nazu. 12mawmu i Pētēro marahan, pavekas mukuwa i trevelran, miherupu mena'u kana trevelran, mawmau mena'u kanizu na muwa na inuwan, iniyan za pakazuma. kemazu zi muveruk i intaw, salaw mare'alav kana mupana na lremak.#24.12 ulra pidaya awatranan lulun iniyan za 12 vatras.

auwayan i Ēmaus kana dalan

(Maruko 16.12-13)

13maresan kana saya wari, kana temakesi ulra a zazuwa auwa za saya zekalr. ini na zekalr mingadan za Ēmaus, nantu kaadawilr i Yērusalem karuwa pulu' sa kiro. 14mazazayar nazu kana mupana na lremak peniya i dadalan. 15penauwa za mazazayar mu, mudalrep i Yēsu kanazu, marelrang kanazu kemakawang; 16mena'u nazu kantaw mu, mawmu 'azi pakanumaw kantaw. 17kiyumalr i Yēsu kanazu: <<kemakawang mu, zi mazazayar mu za eman awa?>>

zi matikezir nazu, salaw sipeleng. 18kanazu a sasa mingadan kani Kulēopa mu, kiyumalr kani Yēsu: <<kamelriya lra maw u a muzazangi na lavang i Yērusalem, mawmau izu na sasa na 'azi malrazam kanini na pidawariyan mupana a eman lremak ziyamaw?>>

19marengay i Yēsu: <<a eman lremak ziyamaw?>>

temuvang nazu: <<maw lremak na trau i Nazalē i Yēsu a! maw a patralritralri i intaw, i ngawayan kana Viruwa i itras zi kana trau mapiya i ngawayan, nu marengay nu kikarun mu salaw mikezang; 20naniyam ma'izang na rahan zi na ayawan kemuda zi taw elakaw, zi sayvangaw pinatray, trehetrehanay i ziyuzika i itras. 21a maw ziya kiyalriman mi kantaw za mawna zazuwa venaawa kana Iseraēl izu na sasa! pawnung, mupana ini na lremak teluwa wariyan lra. 22ulra ziya, papida na vavayan kaniyam i savakan salaw paherareher kaniyam, nazu semavalr mukuwa kana trevelran, 23'azi mena'u kanantu zazek. muruma' nazu pakalrazam marengay, mena'u lra nazu kana tēnsi, na tēnsi marengay kanazu vaaw i Yēsu. 24kaniyam i savakan ulra a trau mukuwa mena'uwa kana trevelran, mena'u peniya mararesan kanantu nirengayan na vavayan, aramawana 'azi mena'u kantaw.>>

25kemazu zi marengay i Yēsu kanazu: <<tatena' mu lra za makunaw mahatra a! zantu nirengay na patralritralri kemuda zi kana kakuwalengan mu pakutatena'? 26i Kiristo amelri ka'azi makalrang kananni peniya zi musavak kana lihu ziyamaw?>> 27kemazu zi, tu kurelrangay zantu vinavalrayan ni Mosē zi na patralritralri, kemirakaz venavati kanazu pakapauwa za tu pauwayan kana Sēsiyo za kireeman kanintaw na vinavalrayan peniya.

28nazu adalrep lra kanantu auwayan na zekalr, i Yēsu kamawan za mahelr maranger ziya patrutru kemakawang, 29mawmu venavilin nazu kantaw zi marengay: <<mutenep lra na kadaw, 'aremeng lra, 'alrazi mukasaya ta kikazu mu!>> zi musavak i Yēsu, muwakasa kanazu iyulray. 30kemayan nazu a maekan mu, melak kana pang i Yēsu, lrayuwan kana Viruwa i itras lra, zi penetris kana pang, tuluzanay kanazu. 31maherareher za meli'atr lra tu matra nazu, kemani mu pakanumaw lra kantaw; mawmu maherareher za iniyan lra i Yēsu. 32mazayazayar nazu marengay: <<kazu i dalan venavati kaniyam i intaw, venavati kaniyam pakapauwa za tu pauwayan kana Sēsiyo mu, nanta anger 'azi kamawan kana apuy simerang ziyamaw?>>

33payas masikasik nazu, muveruk mukuwa i Yērusalem. kazu i kazu, mena'u nazu kana papulu' zi sasa na sito zi a zuma papida na trau mukasa muwazuk, 34mararengay: <<tatena' za marevaaw lra i Luzu; kirepana'u lra kani Simon i intaw!>>

35nazu na zazuwa tu nina'uwan i dalan, zi na kemuda penetris kana pang i Luzu zi pakanumaw kantaw na inlrangan, marengay lra kanazu mapiya.

kurepana'u kana temakesi i Yēsu

(Matay 28.16-20; Maruko 16.14-18; Yohanē 20.19-23; Sito 1.6-8)

36penauwa za mararengay kanini na lremak nazu, maherareher, i Luzu kazu matikezir kanazu i savakan, marengay kanazu: <<kiyalriman kanmu ping-an!#24.36 ulra pidaya awatranan lulun iniyan za <<taw kuwayaw marengay nazu: <kiyalriman ping-an mu!> >>>>

37nazu mare'alav purekaud, kaulra mena'u lra za palrar kema. 38marengay kanazu i Yēsu: <<kemuda zi mavangavang mu ziyamaw? kemuda zi 'azi mu kiputatena' ziyamaw? 39na'uwi nanku lima zi kuy! maw i inku, amelri zuma a trau! dikesay ku, zi kalrazam mu; na palrar iniyan za zazek iniyan za ukak, na'uwi i inmu, ulra i inku.>>

40kemani marengay i intaw, pana'uwanay kanazu na lima zi na kuy.#24.40 ulra pidaya awatranan lulun iniyan za 40 vatras. 41'azi ziyan muwai pakutatena' nazu, mawmu makakaud zi semangal marezaul. kiyumalr kanazu i intaw: <<kanmu i kani ulra nay a eman aekanen?>> 42zi melak nazu za saya kana kinerang na vulraw veray kantaw. 43taw kituluzaw, kazu ingawayan kanazu mekan lra.

44i likuzan mu marengay i Yēsu kanazu: <<ini na lremak peniya maw a aziyu ziyan mukasa ku kanmu na nirengayan kanmu: tu kuret ni Mosē, valray na patralritralri, zi na valray, na sihēng tu iyarengay na kireeman kaninku peniya na lremak, 'azika'azi mula'esi peniya.>>

45kemazu zi tu kitruwalray nantu lrazaman i anger, tu pakalrazamay patulre'ay kanantu ngay i Sēsiyo, 46marengay ziya kanazu: <<vinalrayan kana Sēsiyo: uwaelep za kakuwatrengan i Kiristo, katelu wariyan marevaaw kemay kana kininatrayan. 47pakakalrang mu kanantu ngadan, palenak kana uwaasalran za anger zi na lalapusan za pinamelriyan na vati, kemay i Yērusalem meredek i iyan ziya kana kanatal. 48zi maw mu na wasay kananni na lremak. 49ku i vaverayanay kanmu tu iyatuvang kaninku ni Amalri; kaazu mu i kazekalran mengangara, palru za zuwa na kemay i itras na kezang za meredek kanmu.>>

kituluzaw lra puitras i Yēsu

(Maruko 16.19-20; Sito 1.9-11)

50kemazu zi, i Yēsu tu pilralrangaw nazu mupana i kazekalran, mukuwa i Bētaniya. kazu i kazu, puitras tu lima 'emaperez kanazu. 51a kazu za 'emaperez kanazu mu muwaday lra i intaw kanazu, tu kituluzaw lra mukaitrasan.#24.51 ulra pidaya awatranan lulun iniyan za <<tu kituluzaw lra mukaitrasan>>. 52zi semungal kantaw nazu, misemangalan muveruk mukuwa i Yērusalem, 53marayas kazu i vangesar ruma' semenay pulihu kana Viruwa i itras.

Právě zvoleno:

Luka 24: TPN

Zvýraznění

Sdílet

Kopírovat