Luka 18
18
Ko te Talafakatuha o te Fakamahino ma te Fafine kua Oti tana Tāne
1Oi na fai ai e Iehu he talafakatuha ki ona hoko, ke kilātou iloa ai e tatau lava kilātou ke fakamākekeke oi tatalo, ma ke nahe fakavāivai lele. 2Na lea vē atu, “Nae iei he fakamahino i hētahi kakai, nae hē mataku i te Atua ma hē fakaaloalo ki tagata. 3Nae i te kakai foki tēnā he fafine kua oti tana tāne, kua fai ma ana māhani ko te fano pea lava ki te fakamahino ma tauānau vē ki ei, ‘Fehoahoani mai kō kae ke mālō au i to mā fakamahinoga ma te tino e teteke mai kia te au!’ 4Mo he taimi mataloa lele na hēki talia lele e te fakamahino, kae mulimuli ake na vē ifo ia i tona loto, ‘E ui lava ko au e hē mataku i te Atua, ma hē fakaaloalo ki ho he tagata, 5kae ona kua fai pea lava te fafine ma fakahoehā kia te au, ka fehoahoani ai au ki ei, kae ke uma ai toku fītā i te hau ho!’ ”
6Na toe vāgana atu te Aliki, “Fakalogo ki nā fakakupuga a te fakamahino hē āmiotonu na fai. 7Ka hē fehoahoani nei te Atua ki ona tagata e tatalo atu pea lava kia te ia i te ao ma te pō, mo tana fehoahoani? E i na tuai nei oi fehoahoani te Atua kia te kilātou? 8E lea atu au kia te koutou, ka vave lele oi fehoahoani te Atua kia te kilātou. Kae kāfai te Ataliki o te Tagata e hau, e i na ia maua nei he tino fakatuatua i te lalolagi?”
Ko te Talafakatuha o te Falehaio ma te Aolāfoga
9Na fai foki e Iehu te talafakatuha tēnei ki ni tino nae talitonu ko kilātou ni tino āmiotonu, ma nae inoino lele ki iētahi tino. 10“Nae iei ni tamāloa e toka lua na olo oi tatalo i loto o te Mālumalu: ko tētahi he Falehaio, ka ko tētahi he aolāfoga.
11“Ko te Falehaio nae tū tautahi ma tatalo vēnei, ‘Te Atua, ko au e fakafetai atu kia te koe, auā ko au e hē manako lahi, e hē talapepelo, ma e hē mulilua e vē ko iētahi tino. Ko au e fakafetai atu, auā ko au e hē vē ko te aolāfoga tēia. 12E lua ia aho o te vaiaho e fakalāina ai au, ma e kavatu e au mo koe te tahi-vae-hefulu o aku tupe uma e maua.’
13“Kae ko te aolāfoga, nae tū mamao mai, ma nae hē kikila ake foki ona mata ki te lagi, kae kua pōpō tona fatafata#18.13 pōpō tona fatafata He fakailoga o tona fakanoanoa ona ko ana agahala ma lea vē, ‘Te Atua, alofa mai kō kia te au te tagata agahala!’
14“E lea atu au kia te koutou ko te aolāfoga kae hē ko te Falehaio te kua tuku tonu tona vā ma te Atua. Auā ko kilātou uma e fakamaualuga, ka fakamaulalogia; ma ko kilātou uma e loto maulalo, ka fakaeke ki luga.” #Mat 23.12; Luk 14.11
Kua Fakamanuia e Iehu nā Tamaiti
(Mat 19.13-15; Mlk 10.13-16)
15Na kaumai e ni tino a lātou tamaiti kia Iehu ke fakaeke atu ona lima ki o lātou ulu. I te kitea atuga e te kau hoko o te mea tēnei, oi na munaia ai e kilātou nā tino. 16Kae kua kalaga atu ia Iehu ki nā tamaiti ke ōake kia te ia ma na lea vē atu ai, “Tuku nā tamaiti ke ōmamai kia te au nahe vavaoa, auā ko te Mālō o te Atua e mo kilātou e vē ko kilātou iēnei. 17Manatua te mea tēnei! Ko ai lava e hē ia talia te Mālō o te Atua e vē ko he tamaiti, ka hē hao atu lele ia ki ei.”
Ko te Tamāloa Maukoloa
(Mat 19.16-30; Mlk 10.17-31)
18Na fehili atu hētahi o takitaki Iutaia kia Iehu, “Te Faiākoga lelei, heā nei te tatau ke kō faia kae ke maua ai e au te ola e fakavavau?”
19Na fehili mai ia Iehu ki ei, “Heā te lea vēnā mai ai koe ko au e lelei? E hēai he tino e lelei kae nā ko te Atua oioti lava. 20Kua iloa e koe nā fakatonuga: ‘Ia koe nahe mulilua; ia koe nahe tāmate tino; ia koe nahe kaihohoa; ia koe nahe molimau pepelo; āva ki tō tamana ma tō mātua.’ ” #Eho 20.12-16; Teu 5.16-20
21Na tali atu te tamāloa, “Na kāmata mai lava koi tamaiti au, ko au e uhitaki pea lava ki nā fakatonuga uma iēnā.”
22I te lagona atuga e Iehu o te mea tēnei, oi na vāgana atu ai ki ei, “Ko toe tahi lava la te mea e tatau ke kē faia. Fano oi fakatau au mea uma lele ma fōki te tupe mā nā tino mātitiva, ma ka maua ai e koe nā koloa e lahi i te lagi; oi hau ai oi mulimuli mai kia te au.” 23Kae i te lagona atuga e te tamāloa o te mea tēnei, oi na lagona ai e ia te fakanoanoa lahi, auā ko ia ko he tino maukoloa.
24Kua kitea atu e Iehu te fakanoanoa o te tamāloa, oi na vē atu ai tana kupu, “Kai te faigatā lele mo nā tino maukoloa ke hao atu ki te Mālō o te Atua! 25E faigatā lele atu mo he tino maukoloa ke hao atu ki te Mālō o te Atua, i lo mo he kāmela ke ulu i te pū o he gila.”
26Ko nā tino na kilātou lagona atu te fakakupuga tēnei kua fehili vē, “Ko ai nei la te i na mafai ke fakaola?”
27Na tali atu ia Iehu, “Ko nā mea e matuā hē mafai lava e te tagata, e mafai e te Atua.”
28Oi na lea atu ai ia Petelu, “Kikila, kua tuku e kimātou o mātou kāiga kae mulimuli atu kia te koe.”
29“Io e hako,” na vāgana atu ai ia Iehu, “kae e takutino atu e au kia te koutou, ho he tino e ia tukua tona kāiga, pe ko tana āvaga, pe ko ona uho, pe ko ona mātua, pe ko tana fānau, ona ko te Mālō o te Atua, 30ka maua e ia nā mea e hili te lahi i te olaga nei, ma te ola e fakavavau i te olaga fōu koi hau.”
Ko te Fakatolu oi Tautala ia Iehu e Uiga ki Tona Mate
(Mat 20.17-19; Mlk 10.32-34)
31Oi na tataki kehe ai e Iehu ona hoko, ma na lea vē atu ai kia te kilātou, “Kikila, ko kitātou ka olo ki Ieluhalema, te mea ka fakatāunuku ai nā mea uma lele na tūhia e te kau pelofeta e uiga ki te Ataliki o te Tagata. 32Ka tukulima atu ia ki tagata nukukehe, ma ka fakatauemu kilātou kia te ia, fai kupu mātagā ma tūfeanu ki ei. 33Ka kini e kilātou ma tāmate, kae ka toe tū mai ia i te oti i tona tolu o aho.”
34Kae na hēki mālamalama kilātou i he mea e fokotahi o nā mea iēnei; ko te uiga o nā kupu a Iehu na mumuni mai ia te kilātou, ma na hēki kilātou hāfia ai te mea nae lea ake ai.
Kua Fakamālōlō e Iehu he Tāuaho
(Mat 20.29-34; Mlk 10.46-52)
35Kua tāli pa atu ia Iehu ki Ieliko, ma na tau atu ai ki he tamāloa tāuaho nae nofo i tafa o te auala ma kaitagōgō ki tagata e holo ake i te auala. 36Kua lagona atu e ia te kaifenua e gāholo ake, oi na fehili ai pe ko heā te kua tupu.
37Kua tali atu nā tino ki ei, “Ko Iehu te Nahaleta e kui ake i te auala.”
38Oi na kalaga leo lahi ai te tāuaho, “Iehu! Te Ataliki o Tavita! Alofa mai kō kia te au!”
39Ko nā tino nae i mua kua mumuna ki te tāuaho ma lea ki ei ke nahe piha. Kae na ātili ai te tau kalaga leo lahi vē atu, “Te Ataliki o Tavita, alofa mai kō kia te au!”
40Oi na tū ai ia Iehu, ma na fakatonu ai e ia ke kavake te tāuaho kia te ia. Kua tafapili mai te tāuaho oi na fehili atu ai ia Iehu ki ei, 41“Heā te fofou koe ke kō faia mo koe?”
Na tali mai te tāuaho, “Te Aliki, ko au e fofou ke toe pupula nā mata o oku.”
42Kua vāgana atu ia Iehu ki ei, “Pupula la! Ko tō fakatuatua kua mālōlō ai koe.”
43Ko te taimi lava tēnā na mafai ai ke kitea e ona mata, ma na mulimuli ai kia Iehu, ma fakafetai ki te Atua. I te kitea atuga o te mea tēnei e te kaifenua, oi na viviki ake ai kilātou uma ki te Atua.
Právě zvoleno:
Luka 18: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
