Ioane Fakatomuaga
Fakatomuaga
Ko te Tala Lelei kia Iehu e tuha ai ma te mau a Ioane, e fakailoa mai ai ko Iehu ko te Kupu a te Atua ke pa ki te hēgata, ma na liu tino tagata ma nae mau fakatahi ma kitātou. (Kikila ki te 1.14) E vē ona lea mai ai lava te tuhitala, ko te tuhi tēnei na tūhia kae ke talitonu ai nā tino e faitau ki ei, ko Iehu ko te Mehia na folafola e hau, ko te Ataliki o te Atua, ma e maua e kilātou te ola e fakavavau e ala i to lātou fakatuatua kia te ia (20.31).
E uma te fakatomuaga e fakailoa ai ko Iehu ko te Kupu a te Atua ke pa ki te hēgata, oi hohoko ai te vāega muamua e tākua ai nā fakailoga pe ko nā vāvega kehekehe, e fakailoa ai ko Iehu ko te Fakaola na folafolagia, ma ko ia ko te Ataliki o te Atua. Oi hohoko ai ma ni fakamatalaga e fakamālamalama ai nā mea kua fakaalia e ala i nā fakailoga pe ko nā vāvega. Ko te vāega tēnei o te tuhi, e tākua ai nā tino na talitonu kia Iehu ma na mulimuli ai kia te ia; ma nā tino nae teteke kia te ia, ma na hēki fia talitonu. Ko nā matākupu 13—17 e fakamaumau ai te māfutaga tafapili a Iehu ma tona kau hoko i te pō na puke ai, ma ana kupu fakamālohi kia te kilātou, ka ko hēki tuku atua ai ke fakahātaulo. Ko nā toe matākupu e tākua ai te pukega o Iehu ma tona fakamahinoga, tona fakahātauloga ma te toetū, ma te fakakiteaga ki ona hoko i te toetū maiga.
Ko te tala ki te fafine na maua e mulilua (8.1-11), kua tuku ki loto o nā puipui, auā e lahi nā tuhituhiga ma nā fakaliliuga kua leva e hē tūhia ai, kae ko iētahi tuhituhiga tuai ko te tala tēnei e maua i iētahi vāega o te tuhi tēnei, ka ko iētahi e maua i te tuhi a Luka.
E fakamamafa e Ioane te meālofa ko te ola e fakavavau e ala ia Keliho, he meālofa e kāmata maua nei ma e maua e nā tino e talia e kilātou ia Iehu ko te ala, te ala moni e maua ai te ola. Ko tētahi o nā mea e pito hili ona kehe i te tuhi a Ioane, ko te fakaaogāga o nā mea kua māhani ai i te olaga e vē ko te vai, te falaoa, te mōlī, te leoleomāmoe ma ana māmoe, ma te vine ma ona fua, ke fakamāina ai nā mea tau ki te faka-te-agaga.
Fakahologa o nā vāega o te Tuhi
Kupu kāmata (1.1-18)
Ko Ioane te Papatiho ma nā hoko muamua o Iehu (1.19-51)
Te gāluega tautua a Iehu (2.1—12.50)
Nā toe aho i Ieluhalema (13.1—19.42)
Ko te toetū ma nā fakakiteaga o te Aliki (20.1-31)
Nā toe kupu: hētahi fakakiteaga o Iehu i Kalilaia (21.1-25)
Právě zvoleno:
Ioane Fakatomuaga: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust