रोमी 10
10
1आदा-नो़ह दाङ आज्यी-नुहमुया़, किन्ज्योगी इस्राएलीया़ला थार च्य़ू नाङज्यु माएँ ङाहती ज्यिबुराङ सेम्बा येहबा। ओ़ह सोङबे खुङया़ थार ख़ूज्यु म़ेदी ङाह किन्ज्यो ङ्याम्बु सोल्वाङ ताप्ती ओहर-छ्य़े स्युह येहबा। 2ङाह दि पाङबु तेर्के, ख्यागी किन्ज्योला राहङगी सेम तिहङ यिहन्ज्युराङ क्याप्च्येनी क्याप्कु दुबा, यिहॱनाङ ओ़ह काह-ठि पेहती क्याप कोहएँ माएँ तेहन्दाला ख्याला रिहक्स्यीती मिहन्दु। 3च्यिबेमाना किन्ज्यो लाहमले ओहङगेन टाहङदेनकी तेहन्दाला ङोह मा़हस्येबा पेहती खुङया़गी राहङदीराङ टाहङदेनकी छ्याप्स्यीया़ पेहच्ये छोल्गेमु खुङ किन्ज्योकी टाहङदेनकी ओङलेगी फिला काहल्सीन। 4च्यिबेमाना यिह छ्य़ेगेया़ टाहङबु सी़ह ख़ूज्यु म़ेदीराङ मास्यीकागी छ्य़े-ठिम छाङबु जे नाङसीन।
थाम्ज्यीगी तेहन्दाला थार्पा
5मोशागी छ्य़े-ठिम लाहमले ओहङगेन टाहङदेनकी तेहन्दाला दि ल़ेहमु प्रुह नाङदी येह, “छ्य़े-ठिम ची़गे मिह ओ़ह लाहमलेॱराङ थार्च्ये येह।”#लेवी १८:५ 6तेहपा लाहमले किन्ज्योगी दिनला टाहङबु सी़हगेन्की तेहन्दाला छ्य़ेगी दि ल़ेहमु सुङ नाङगे, “ख्येगी सेम-सेमला दि ल़ेहमु माहमा, ‘स्यिहङगामला सु डोएँ’?”#व्य ३०:१२-१४ (पे यिहॱना़: मास्यीकाला माहर नोम फेप्च्येला) 7ओहले राहङगी सेम-सेमला दि ल़ेहमुॱआङ माहमा, “साप्स्यी तिहङला सु डोएँ?” (पे यिहॱना़: टोहङग्योया़लेगी मास्यीकाला याहर नोम फेप्च्येला।) 8यिहॱनाङ दिगी च्यि माएँ? “थार्पाकी सुङ ख्याया़गी पोहलाराङ येहबा। दि ख्यागी खा दाङ यिहला येहबा।” ङ्यिहगी तेहपागी तेहन्दाला स्ये़क्योकी या़हबु लेहङगुकी केच्या दिराङ यिहन। 9च्यिबेमाना का़हलेॱआङ ख्येगी येशूला चो़वो यिहन म़ेदी राहङगी खागी लोक पेहसीन, ओहले किन्ज्योगी मिहरोला टोहङग्योया़लेगी सोम्बो ज़्याङ च्य़ू नाङसीन म़ेदी राहङगी सेमला यिह छ्य़ेसीन माना ख्ये थार्च्ये येह। 10च्यिबेमाना मिहकी यिहगी यिह छ्य़ेदीॱराङ किन्ज्योगी दिनला टाहङबु सी़हगे ओहले खोगी यिह छ्य़ेक्योगी तामया़ राहङगी खागी लोक पेहती थार्पा ज्योर्के। 11सुङरापगी दि ल़ेहमु सुङ नाङगे, “मास्यीकाला यिह छ्य़ेगे सुज्यीॱआङ ङोहजाला छ्यिच्ये म़ेह।”#यशै २८:१६ 12च्यिबेमाना यहूदी दाङ लेहमेन क्यिहपाला च्यिॱआङ ख्येपार म़ेह। ओ़ह चो़वोॱराङ थाम्ज्यीगी चो़वो यिहम्बा, ओहले मिहरोला क्याप्केया़ला मिहरोगी बोलो-छ्योलो मेलाम नाङज्ये येह। 13च्यिबेमाना “चो़वोगी छेनला क्याप्केन मिह थाम्ज्यीगी थार्पा ज्योर्च्ये येह।”#योए २:३२ 14यिहॱनाङ मास्यीकाला यिह मा़हछ्येबा पेहती काह-ठि पेहती मिहरोला क्याप्च्ये? मिहरोगी तेहन्दाला मा़हथेबा पेहती काह-ठि पेहती मिहरोला यिह छ्य़ेज्ये? मिहरोगी तेहन्दाला सुज्यीगी माहस्येपाला काह-ठि पेहती मिहरोगी तेहन्दाला थे़ज्ये? 15स्येकेन्गी मिह माहताङबा पेहतीनी काह-ठि पेहती स्येच्ये ले? छ्य़ेगी दि ल़ेहमु सुङ नाङगे, “या़हबु लेहङगु स्य़ेकेया़की काङबा काहजे या़हबु!”#यशै ५२:७
16यिहॱनाङ खुङ थाम्ज्यीगी या़हबु लेहङगु ची़दे म़ेह, च्यिबेमाना यशैयागी दि ल़ेहमु सुङगे, “ओ़ चो़वो, ङ्यिहगी स्येक्योगी ताम सुगी गा यिह छ्य़ेक्यो येहबा ले?”#यशै ५३:१ 17ओ़ह सोङबे तेहपाती ङ्यिहन्दीमाॱराङ ओहङगे यिहम्बा ओहले ङ्यिहन्गेन्गी ल़ेहती मास्यीकागी सुङ प्रा साल्दी ओहङगे यिहम्बा। 18ओ़हठी यिहन्सीमाना च्यि खुङया़गी ङ्यिहन माहङ्युहङ? मिहम्बा, तेहम्बाराङ खुङया़गी थे़दे येह, च्यिबेमाना
“खुङया़गी क़े लुहङबा थाम्ज्यीला फेल सिहन्दी येह,
ओहले खुङया़गी माक्यो ताम जाम्बुलीङ रेबेलाॱराङ लेप सिहन्दी येह।”#भज १९:४
19ओ़हठी यिहन्सीमाना “च्यि इस्राएलीया़गी दि या़हबु लेहङगु ङोह मा़हस्येबा ले?”
तोहङस्यो किन्ज्योगी मोशा लाहमले खुङया़ला सुङ नाङग्यो येहकें,
“का़हन्दी क्यिहपाॱराङ मिहम्बा यिहन्गे,
ङाह ख्याला खुङ ङ्याम्बु ठादो लाहङ च्य़ूज्ये येह,
उल्दुम्बा क्यिहपा च्यी़ लाहमले ङाह ख्याया़ला स्यिहताङ लाहङ च्य़ूज्ये येह।”#व्य ३२:२१
20किन्ज्योगी सुङ नाङग्यो स्याहल लुहङतेम्बा यशैयागी तोहरोङ खाम छ्यिम्बु जेती सुङ नाङगे,
“ङाहला मेहछोल्गेनया़गी ङाहला च्य़ेह सिहन्दी येह,
ओहले का़हन्दीगी ङाहला छोलॱराङ माहछोल खुङया़गी पाहरक्यीला ङाहगी राहङला तेन्दी येह।”#यशै ६५:१
21यिहॱनाङ इस्राएलीकी तेहन्दाला यशैयागी दि ल़ेहमु सुङ नाङगे, “ङाहती ताम मिहङ्यीहन्गे दाङ ङाहला टाह पेहकें मिहया़ला क़े क्याहप्च्येला ङाहगी ङ्यिहमा काहङ लाहक्पा क्याङदी तेहसीन।”#यशै ६५:२
Právě zvoleno:
रोमी 10: HYLM
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 (Active), Wycliffe Bible Translators, Inc. All rights reserved.