Marke 9
9
1Jesu ovurihi oduhi bo ndi: «Sisyele me eduha be: ake o mpaniŋi e be ŋa ma aka sa kwa ni, yuhu bo i sa mono Onkani o Njyami mo oya na mpari ni.»
Moyise bɨla Eli na Jesu o yulu okuri
2Ecuhu esyami eyira, nde oyahi Pyere bɨla Jake na Jan, nde obiri bo la o yula okuri onini. Olya o nde okalihi osuumbu o miisi a bo, 3amfa a nde aya makyeme aso fɨlee, ofuuma ma ali i buuna obaha o yula ncye ni. 4Eli bɨla Moyise awasihi, bo mawobo bɨla Jesu. 5Pyere oyahi mbari, oduhi na Jesu ndi: «E Rabi#9.5 Rabi omakaaha Nkʉmu, mo juuyi le bo., saabe mo oka ŋa na ove. Lecwa elebe etari, omo a we, omo a Moyise, omo se Eli.» 6Pyere aki i yaa jaa e nde aduha ni, obila bo aki na vwoho bo mini. 7Lengʉri leguhi bo, bo ayuhi juuyi lewa na yulu ndi: «Yu Mwana a me ema vula vʉla odya. Leyuha nde!» 8O nci na nci ŋaa, bo akeesi o mpaniŋi e bo, bo aka mamono mvuuru okɨma ni, o ngula Jesu otu bɨla bo. 9Ntini e bo masuruhi okuri, Jesu oduhi na bo ndi bo i duha na mvuuru maami a bo ma amoni ni, tii ngo na e Mwana mvuuru anyusuha o mpaniŋi akwi. 10Bo anyiimi jaa jya, okoroho bo mapɨsa o mpaniŋi e bo ndi: «“Lenyusuha le mpaniŋi akwi”, mo oduha ndi nki?»
11Bo apɨsi Jesu ndi: «Ayisihi me ekele maduha ndi ove Eli osa aya mo oma?» 12Nde okaali na bo ndi: «Eli ove osa aya mo oyeese maami aso. Ŋa obila ma amateende nca Esaangumu se ndi Mwana mvuuru ove omoni ambaba, omana abesi nde oma? 13Ŋa me eduha be: Eli oyi emana bo asi maami a nde adii aso, mo osuumbu Esaangumu me eduhi o nde.»
Jesu osalihi mwana aki na odidima ekaali nde oya nkɨna
14Ntini e bo mayeni na basaha abuha ma alwoni, bo amoni lemvuuru le enini lemajenehe bo bɨla ayisihi me ekele mawobo bɨla bo. 15Lemvuuru lemono Jesu lekimi, o ŋiŋa baari aya ma aya ma anciini na awooso nde. 16Jesu opɨsi bo ndi: «A be lewobiho bɨla bo a ma?» 17Mvuuru omo o nca lemvuuru okaali nde ndi: «E Nkʉmu, me emiya na we mwana a me a balaha: nde na odidima emakaala nde aya nkɨna. 18Odidima kya ekwaraha nde mpɨni biri, co obala nde o ncye, mwana oya onwa ocuuha awʉru, nde aja mii, nyuru se esii. Me emapɨsa alwoni a we mo ocuura odidima kya, ŋa bo aka buuna ni.» 19Jesu oduhi bo ndi: «Be njubu eli oyalahi kali, me eje oka o paani e be tii jini ntini? Me eje osa okiini o ma be tii jini ntini? Leya na me nde.» 20Ayi na nde mwana. O ŋaa odidima ebi omono Jesu, onyisihi mwana na nkala, mwana ovi o ncye oya abiniŋa, gʉru eya ecuuha nde mo onwa. 21Jesu opɨsi na taara a mwana ndi: «Nde ngaa ji emabaana ntini ma?» Taara okaali ndi: «Esi wa nde obusi. 22Antini ake odidima ociniŋa nde nca mbaa si kali nca anja mo obuma nde. Ŋa yuhu we abuuna osa jaa, mono bisi nkerihi we oyamaŋa bisi!» 23Jesu okaali ndi: «Yuhu we abuuna osa jaa! Maami aso ali nyengele o mvuuru amayalaha.» 24O ŋiŋa, taara a mwana owʉli nkɨma ndi: «Me emayalaha, yamaŋa me mo kaama oyalihi o me!»
25Jesu omoni ndi lemvuuru leselehe okuha, nde obye na odidima ebi, oduhi ndi: «Odidima o mvuuru ali i yuha ni bɨla odidima o nkɨna, me eduha we: cuuha o mwana yu, we okaa mavuriha onyuniŋa o nde ni!» 26Odidima owʉli ankɨma, onyisihi mwana na mpari eso, co ocuuhi o nde. Mwana abalaha oya mva mvuuru amikwa, baari kuna aya maduha ndi: «Nde omikwa.» 27Ŋa Jesu okwari nde o kwoho, osaari mwana se otemiŋi. 28Ntini e Jesu avurihi njo, nde bɨla alwoni bo atu, bo apɨsi nde ndi: «Bisi lekwoni ocuura odidima kya mo oma?» 29Jesu okaali na bo ndi: «Kaka edidima bya, otusuha eso ni ma ovwoni.»
Jesu avuriha otooso leku bɨla enyusihi e nde
30Bo acyehe o ŋaa, bo atini Ngalili, ŋaa Jesu aki njala ndi baari ajyaba jaa jya kali. 31Ŋa mono maami a nde ayisihi alwoni a nde ndi: «Ma aje ompa Mwana mvuuru o jyala e baari mo omwo. Bo ma aje obuma nde, ecuhu etari eyira nde onyusuha.» 32Ŋa alwoni aka yuha mbari jya ni, bo se aki na vwoho mo olehe nde eduhu.
Avʉli abuha na
33Bo ato Kapernaume. Jesu oto njo, nde oya apɨsa bo ndi: «A be lewobihi o njila a ma?» 34Bo aya pi, obila bo aki amatoho o mpaniŋi e bo o njila, mo oya mvuuru avʉli abuha okiimbi. 35Ŋa Jesu oya o nci, nde ocwoli alwoni a kuumi na vwele, oduhi bo ndi: «Mvuuru asaha oka levusu, ove nde oki lembɨsa la abuha nde ojanji o bo aso.» 36Emana nde oyahi mwana omo, nde ocuusi o mpaniŋi e bo. Nde omana ompa nde amfemfe, oduhi na bo ndi: 37«Mvuuru ayamba mwana mva yu o nkuumi e me, nde ayambi me. Ŋa mvuuru ayamba me, ka me nde ayamba ni, ŋaa nde ayambi Mvuuru atumi me.»
Mvuuru akini obele saabe ni oli bɨla saabe
38Jan na Jesu ndi: «E Nkʉmu, bisi lemamono mvuuru acuura edidima me ebi o nkuumi e we, ŋa bisi lemasaha okanaŋa nde obila nde ka a bɨla saabe ni.» 39Ŋa Jesu okaali ndi: «Leka kanaŋa nde ni, obila mvuuru i buuna osa omaa o nkuumi e me, omana paraabu ŋa nde oduhi maami ma abi o me ni. 40Obila mvuuru ali mbele e saabe kali, oli bɨla saabe. 41Mpini mvuuru ampa be kobo anja obila we oli bɨla Krisi, me eduha be sisyele nde aka aje oyele e nde gʉra ni.
Lesa ayiba
42Mpini mvuuru ataasa onkere se omo o nca enkere me emayalaha me bi, tata akuri nde kele enini o nkii, omana atʉni nde mo okeri onini. 43Yuhu kwoho o we etumo osa mbiini, tata we ocebi co. Tata we onyuniŋi nca lebihi le eve kwoho otini, ŋa ka we oyeni na jyala e jyele nca mbaa leku, mpili eli mbaa eli i dɨma ni. [ 44#9.44 Eteendihi e kala eke me eduha o biri ji ndi: biri obiha ali i buuna okwa ni, mbaa se i dɨma ni. ] 45Yuhu kuulu o we etuma we osa mbiini, tata we ocebi co. Tata we onyuniŋi nca lebihi le eve bɨla kuulu omo, ŋa ka bɨla nyiili e jyele o biri ampasi ni .[ 46#9.46 Eteendihi e kala eke me eduha o biri ji ndi: biri obiha ali i buuna okwa ni, mbaa se i dɨma ni. ] 47Yuhu diisi le we letuma we osa mbiini, bɨra lo, tata we onyuniŋi diisi le mo nca Onkani o Njyami, ŋaa ka atʉni we bɨla miisi a we a mwele nca mbaa leku ni. 48Mpili eli obiha i kwa ni, mbaa se i dɨma ni. 49Baari aso ma aje oyira o mbaa ampasi, ma aje ompa bo ongwa mo bu ndi bo akariha baari a ce ce#9.49 Nca esaangumu ma ngɨreke ammateende ndi: mvuuru na mvuuru ma aje okila ongwa o mbaa..
50Ongwa kiila e eve, ŋa ongwa oyele mpye, ovuura nde yo buuni? Ove be leki na ongwa o be anku, be leki na oduusu o mpaniŋi e be.»
Právě zvoleno:
Marke 9: MDT
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
