Marke 8
8
Jesu abuniŋa amile a baari ana
1Ŋa nca ecuhu bya, lemvuuru lo mini levurihi lekusihi abuha. Ŋa bo aki kiila mo oja kali, Jesu ocwoli alwoni a nde oduhi ndi: 2«Me emono lemvuuru li nkerihi, obila lo leya ecuhu etari bɨla me ŋa, lo kiila mo oja kali. 3Me ovuura bo anjo a bo na njala, bo ma aka aje obaha mpari o njila ni. Mo oma, maamo o nca bo magwaha la.» 4Alwoni akaali na nde ndi: «Obuuna ompa baari ba aso biila kuuni o nca biri e kayi ji buni?» 5Jesu opɨsi bo ndi: «Be leli ŋaa na mpeembe kwe?» Bo akaali nde ndi: «Ncaami.» 6Nde oduhi na lemvuuru mo oka o ncye. Emana nde oyahi mpeembe e ncaami, nde omana ompa Njyami leve, nde okabihi bo, ompi na alwoni mo okabaha bo aso. Bo se akabihi lemvuuru. 7Bo se aki na enci ncu me ekyehe. Jesu ompi andosoho o yula a ncu baa, oduhi ndi akabaha se. 8Baari aji ajurihi. Abiri angara ncaami me entiha me esiili. 9Ŋa baari aki mabuuna oto amile ana. Emana Jesu ovuuri bo, 10o ŋiŋa nde okumi o nca mbuungu bɨla alwoni a nde, bo ayeni nca ngaala e Dalemanuta.
Afarisi mapɨsa ndiimi ewa na yulu
11Afarisi awasihi, aya mabaana owobo bɨla Jesu mo olehe nde oyere. Bo asahi ndi nde olaha bo ndiimi ewa na yulu. 12Jesu ocuusi owuumi, oduhi ndi: «Njubu ji esaha ndiimi mo oma? Sisyele me eduha be, ma aka aje olaha jubu ji ndiimi ni.» 13Emana nde onyili bo, ovurihi o mbuungu oyeni sabi e ngulu.
Alwoni oyeri okyehe
14Alwoni alimiŋi obira mpeembe, bo aki lempeembe lemo le tu o nca mbuungu. 15Jesu otibi bo ndi: «Lesa ayiba! Be lesi oyeri ma leviire la Afarisi bɨla ŋa le Erode.» 16Ŋaa alwoni aya mawobo o mpaniŋi e bo, obila bo aki mpeembe kali. 17Jesu obalihi, okaali bo ndi: «Be lewobo o mpaniŋi e be ŋa mo kaama e mpeembe? Be lekini oyuha ni? Be lekini oyalaha ni? Be etima na onono? 18Be na miisi, okoroho be imononi? Be na acwi, okoroho be iyuhani? Be i yubiha ni! 19Ntini e me ecebi mpeembe taani mo ompa amile baari ataani, be lebiri angara ma abuhu a to kwe?» Ba akaali ndi: «Kuumi na mwele.» 20«Ŋa ntini e me ekabihi mpeembe e ncaami mo ompa amile a baari ana, be lebiri angara to me etini kwe?» Bo akaali ndi: «Ncaami.» 21Ŋaa Jesu oduhi bo ndi: «Be lekini oyuha ni?»
Jesu asalaha mvuuru ali i mono ni o Betesada
22Bo ato Betesada, baari ayi na mvuuru ali i mono ni na e Jesu. Bo apɨsi kolo kolo ndi Jesu otiila na nde. 23Jesu okwari mvuuru aki i mono ni o kwoho, obiri nde ocuuhi na nde nca mpuhu. Nde okɨli nde antayi o miisi, ocuusi jyala o yula nde. Nde opɨsi nde ndi: «We oya amono kiila?» 24Balaha e miisi kali onaani miisi oduhi ndi: «Me etaala baari, ŋa me omono bo mva eti, jo me elaana.» 25Jesu ovurihi ocuusi jyala o yula ocwi a balaha jya, balaha jya eya emono celele. Nde oki omiwuuma, nde oya ayimba biibi eso yemihi. 26Ŋa Jesu ovuuri nde njo e nde, oduhi nde ndi: «We oka nyuniŋa se o nca mpuhu ni.»
Pyere ojyabi ndi Jesu Krisi
27Emana Jesu bɨla alwoni a nde ayeni mpili ampuhu a paani e Sesare e Filipe. O njila nde olehi alwoni a nde oduhu ndi: «Mo baari, bo maduha ndi me na?» 28Bo akaali nde ndi: «Ake maduha ndi we Jan Batise, maamo ndi we Eli, akɨma ndi we owobi a mbari e Njyami omo o nca awobi a Mbari e Njyami.» 29Jesu opɨsi bo ndi: «Ŋa mo be, me na?» Pyere okaali nde ndi: «We Krisi.» 30Ŋaa Jesu obye na bo ndi bo i wobo o nde na mvuuru ni.
Jesu atooso ekuuhi bɨla enyusihi e nde
31Jesu oya abaana oyisiha bo ndi eki ove Mwana mvuuru omoni ambaba kuna, akuuru mo okuha bɨla asi ma avwoŋi ma anini na ayisihi me ekele ebese nde. Bo abuma nde omana ecuhu etari oyira, nde onyusihi. 32Nde awobihi mbari jya ni celele. Ŋa Pyere obiri nde o paani, oya abye na nde. 33Ŋa Jesu okalihi omono alwoni a nde, obye na Pyere ndi: «Cyehe ŋa, yira ngula me Sata! Obila ecimiŋi e we ka e Njyami ni, ŋa ecimiŋi e baari mo omwo.»
Osuumbu mo olwono Jesu
34Emana nde ocwoli lemvuuru bɨla alwoni a nde, oduhi bo ndi: «Mvuuru oduha ndi nde adya olwono me, nde onyili ocima o nde anku. Nde oyahi lembanji le nde, nde olwoni me. 35Mo vwa, mvuuru asaha ovusuha lebihi le nde, aje oyele lo. Ŋa aje oyele lebihi le nde obila o me bɨla o Ncya e Mve, aje ovusuha lo. 36Ŋa mvuuru obaha oma ntini e nde ayele lebihi le nde obila mo ontaambu a mo yula ncye, 37Kiila mabuuna ompa o biri lebihi oma? 38Mo oma mvuuru amono okʉru o me na mbari e me, o mpaniŋi e njubu e ncuuma bɨla esyaha mbiini ji, Mwana a mvuuru se aje omono okʉru o nde, ntini e nde aje oya nca lekʉma le Taara a nde bɨla abaanji me epeende.»
Právě zvoleno:
Marke 8: MDT
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
