1 Korinti 1
1
1Nyyai di Bulut, a̱tuba nu Ka̱za ka shim a̱ yei na̱ yet a̱pfong Yesu ni, bu nyyai da̱ a̱wumba njit u ban yei Sastanisu ni,
2Naat di ba̱nyet tssup Ka̱za ba a̱ shyi Korinti ni, ba̱nyet ba Ka̱za ka yei ba yet a̱zizrak ba̱nyet nka ni, ba̱nyet ba a̱ yet ba̱nuu ni i ka̱mon mba bu Yesu Kristi ni, nta̱mak bu ba̱nyet kozan ka̱bvwa, ba̱nyet ba a̱ yei diyrek A̱gwam njit Yesu Kristi, A̱gwam mba ba̱ njiit.
3Zi naai Ka̱za A̱tyyi njit ba̱ A̱gwam njit Yesu Kristi ba hok dizot nyin a̱ ya nang nda.
Ka̱nu-a̱tan nu zi shya di Yesu ni
4Kozan ka̱ram n gwai Ka̱za mi a̱za̱ nyin rot dizot nyin ti ka hok ka̱yat Yesu Kristi ni. 5Mon a̱ccu nyin bu Kristi ya ba di kozan taka̱i ka̱ssok nta̱mak bu bvwo ba̱ryat bu tat a̱ssi sa̱rei, 6rot ba̱ryat ba ba ryat tazwa Yesu ni a̱ ka̱n tyyi dityin ka̱yat nyin. 7Nkpa n byyi yin byyi kozan taka̱i za̱nang nying Tswa Ka̱za ji ka̱ram ka yin shyi tot bai Yesu Kristi na ni. 8Yesu a̱ bo ni ya ryi cet sseng a a̱ bu tat a̱ngbom nom u, rot ka̱tuk ka na̱ nin ba ni ki di ba bu ya shya ba̱ a̱ka̱tuk nkyang ba. 9Ka̱za a̱ byyi ka̱ryong, Ka̱za ka a̱ ya yei ni yi gi mon bu Ka̱won nka ka Yesu Kristi A̱gwam njit.
Ka̱kyyai ka̱yat coc
10N ya naai ba̱wumbeyang, ka̱yat diyrek A̱gwam njit Yesu, sa̱rei nyin, yi mon ka̱nu nyin ka̱yring, ho yi bu ya ghai, seko yi mon a̱ccu nyin ansham, a̱huhwa nyin a̱yring, i tyyi ndya nyin an kyang yring. 11Ba̱wumbeyang nzuk, n dyat a̱mi rot ba̱yanyet nyyai a̱gbang Kuluwi a̱ n tsaai nkhang ka̱sak ka yin hwwon ba̱ nyin-nyin ni. 12Ryok n ya tyyang i ansham, koyan ka̱yat nyin a̱ ryat bu kyang a ku myim i: a̱yanyet a̱ hywa, “Nzuk, n shyi bu Bulut,” a̱yanyet, “N shyi bu Apollot,” a̱yanyet, “N shyi bu Bitut,” a̱yanyet, “N shyi bu Kristi.” 13Ka̱t! Ashe Yesu a̱ ya sang a̱mi e? Ki Bulut ba ma̱ yin hywat a̱zi ka̱kon ka a̱zi hywak nyin? Ki ba yin ya yya baptisma nu i diyrek Bulut?
14N gwai Ka̱za mi n yin wi yya ba̱nyet nyin baptisma, seko bu Kirisbut bu Gayat. 15Ka̱ a̱yin a̱ bo bu hywa di ba yin ku yya baptisma i diyrek nzuk ba. 16Ee, nzuk n bo n yin yya ba̱nyet a̱gbang Istifanat baptisma nu. Ma n bo n yring ba, ki n yin yya a̱yin nyin baptisma nu o-o? 17Ba̱lle ma yya baptisma a̱mi Kristi na̱ yi n ni tom ba, seko n bu tyyei Ka̱sham Ba̱ryat ka, ba ma di bvwo ba̱ryat ba, ho ba̱nyet a̱ bu cat cet dikwu Yesu na a̱zi ka̱kon ka a̱ryin.
Kristi nu a̱ yet cet bu a̱za̱ncyi Ka̱za
18Di ba̱nyet ba a̱ shyi i brik i, ba̱ryat dikwu Yesu tazwa ka̱teyang ba byyi diccu ba, ma da̱ njit ba̱nyet ba byyi sucet a ni, zi bvwo cet Ka̱za a̱mi. 19Da̱ni ba̱ryat Ka̱za ba ban hywa ni,
“N ni ta̱ruk a̱za̱ncyi ba̱nyet a̱za̱ncyi na,
n dak tat a̱ssi ba̱nyet bvwo na.”
20To, naani, ba̱nyet a̱za̱ncyi ba shyi ke? Ba̱nyet bvwo ba hwa? Bu ba̱nyet bvwo ba̱ryat ka̱sa bani? Ka̱za a̱ ka̱n tyyei ka̱sak ka a̱za̱ncyi ka̱sa nani na̱n yet bu bvwon ni.
21Rot Ka̱za, a a̱za̱ncyi nka na, a̱ shim ba̱nyet a̱ ka̱ bvwo i ryen a̱za̱ncyi mba ba. Ka̱yat a̱bvwon ba̱ryat njit ka zi tyyei ni Ka̱za ka tssa a̱ nin san ba̱nyet ba a̱ wrak ka̱ryong ni. 22Ba̱nyet Yahuda cat ryi nkyang ka̱hat, Helenawa i cat a̱za̱ncyi. 23Ma njit zi ryat ba̱ryat dikwu Yesu a̱zi dikum ka̱kon: di ba̱nyet Yahuda ku ba̱ yet kyang dikpak, kpikpit nwap a i ryi ku ba̱ byyi diccu ba, 24ma ba̱nyet ba Ka̱za ka yei ni, di ba̱nyet Yahuda di Helenawa, ba̱ryat njit ba a̱ yet Kristi, nu a̱ yet cet Ka̱za na bu a̱za̱ncyi nka na. 25Rot kyang a zi ryi ku yet bvwon di Ka̱za ni ku ra̱u a̱za̱ncyi ba̱neywu; kyang a zi bu ryi ku yet sang cet Ka̱za na ni ku ra̱u byyi cet ba̱neywu na.
26N cat yi yring kyang a yi yin yet i ka̱ram ka Ka̱za ka yin ya yei ni, ba̱wumbeyang. Ba̱nyet byyi a̱za̱ncyi bu ba̱nyet byyi cet bu ba̱nyet byyi a̱yiyrek, di ryi a̱neywu ni, a̱ yin shii ka̱tswa a nyin ba. 27Ka̱za a̱ ma̱n tssa kyang a ka̱sa ka ka ryi ku sang diccu ni, a̱ gan tyyi ba̱nyet a̱za̱ncyi ba nsum; a̱ bo tssa kyang a ka̱sa ka ka ryi ku sang cet i, a̱ gan tyyi ba̱nyet byyi ncet ba nsum. 28A̱ tssa kyang a ka̱sa ka ka cat i ba rot ba ryi ku byyi kpungtun ba, a̱ ga ta̱ruk kyang a ka̱sa ka ka ryi nkpa byyi kpungtun ji ni. 29Rot a̱mi a̱yin a̱n shyi a̱ ni ta̱za a̱ ya cin a̱ta̱ssi Ka̱za ba. 30Ma Ka̱za a̱ ya kwwat a̱ bu mon bu Yesu Kristi a̱ bo tyyi Yesu nu a̱ yet a̱za̱ncyi njit a, rot nu a̱mi a̱ za tun a̱ wwon a̱ tyyi zi yet a̱tsatsak a̱ta̱ssi Ka̱za, a bo za tyyi zi yet a̱zizrak ba̱nyet nka. 31Rot a̱mi da̱ni di ba̱ryat Ka̱za ba ban hywa ni, “A̱yin nu a̱ byyi ya cin ni na̱ ya cin ka̱yat A̱gwam Yesu.”
Právě zvoleno:
1 Korinti 1: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.