1 Korinti 2
2
Wa'azi Yesu tazwa ka̱teyang
1Ba̱wumbeyang nzuk, ka̱ram ka n yin ba ya tyyei ka̱sham ba̱ryat Ka̱za ba ni, n yin cat ya tyyei i bvwo ka̱nu bu bvwo ka̱sa ba. 2Rot ka̱ram ka n yin shyi ba̱ nyin ni n yi n sook i rya nzuk n ni bring kozan kyang, seko Yesu Kristi bu dikwu nu ti tazwa ka̱teyang ka. 3Ka̱ram ka n nin ba da̱ nyin ni, n yin byyi cet ba, rwam nzuk a i shyi i trim bu ka̱wun, 4zzek nzuk a bu wa'azi ji ba yin byyi tsutswat ba̱ryat a̱neywu ba, seko nkyang a tyyei cet nTswa Ka̱za na ni, 5ki di tyyi ndya nyin na i gi shyi i tsutswat a̱neywu ba, seko cet Ka̱za.
A̱za̱ncyi Ka̱za na a̱ ra̱u a̱nying a̱neywu
6Ma n dyat tsutswat bu ba̱nyet ba a̱ rai a ntswa ni i. Ma ba taka̱i a̱za̱ncyi na yet nying ka̱sa na ni ba, ko a̱za̱ncyi ba̱nyet dityok ka̱sa ba, na̱tyok a cet mba na na kwan ba̱ shot i. 7A̱za̱ncyi na n dyat i nna yet a̱za̱ncyi Ka̱za na a̱ yin shyi nnrang i, a̱ naa ni a̱ shyi ka̱nrang da̱ ba̱neywu ni, ma Ka̱za a̱ wa ka̱n tssa a̱ wwon sabo bu da̱ra̱ja njit nyyai ba ka̱n yya ka̱sa ka ba. 8Sa̱rei ba̱gwam ka̱sa ba, ko a̱neyring mba a̱n shyi a̱ byyi a̱za̱ncyi na ni ba. Ba da yin kpo bvwo da ba yin ka̱teyang A̱gba̱dang A̱gwam njit u ba. 9Nkpa ba̱ryat Ka̱za ba ban za tyyei,
“Kyang a a̱neywu na̱ ka̱n dyi ko a̱ hok i ba,
kyang a a̱yin na̱ ka̱n swrang a̱ hwa ni ba,
nkpa a̱mi Ka̱za ka jyi a̱ sak ba̱nyet ba a̱ ka̱ gwai ni.”
10Ma njit a̱mi Ka̱za ka za tyyei nkyang a shyi i nrang a ni ta ka̱rek nTswa Ka̱za. Tswa ji gyak kozan kyang, sa̱rei bu nkyang a Ka̱za ka yya a̱wwon na shyi i nyat i. 11Da̱ni da̱ a̱neywu ni, tswa nu ji nji bvwo kyang a shyi mpfwa nu ka ni, a̱mi meyang se bu Tswa Ka̱za nji bvwo sa̱rei nkyang a yet nying Ka̱za ni. 12Tswa ba̱neywu nji zi san ba, seko Tswa ji Ka̱za ka za tom i ni, zi gi bvwo sa̱rei nkyang a Ka̱za ka za ryi ni.
13Rot a̱mi zi ryat kyang a yet zzek da̱ a̱za̱ncyi a̱neywu ni ba, ma ba̱ryat ba Tswa Ka̱za zi za zzek i. A̱mi meyang zin kok nkyang a yet nying ntswa ni di ba̱nyet ba a̱ byyi Tswa Ka̱za ji ni. 14Ma a̱yin nu a̱ byyi Tswa ji ni ba a̱n shim nkyang a nyyai di Tswa Ka̱za ji ni ba, rot na ku byyi diccu ba, di na̱ ni maai a̱ bvwo ba. Rot bu ba̱nyet ba a̱ byyi Tswa Ka̱za ni mba a̱mi a̱ ni bvwo nkyang a Tswa Ka̱za ji zi ba̱ tyyei ni. 15A̱yin nu a̱ byyi Tswa ji ni a̱ ni maai a̱ bvwo kozan kyang, ma a̱yanyet a̱ maai ku bvwo ba. 16Da̱ni di ba̱ryat Ka̱za ba ban hywa ni,
“A̱nyan a̱ maai bvwo pfwa A̱gwam Ka̱za?
A̱nyan a̱ maai ku tyyei kyang yya?”
Ma njit, a̱huhwa njit u a̱ yet a̱nying Yesu.
Právě zvoleno:
1 Korinti 2: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.