Amakorwa ga Abhatumwa 4
4
Petero na Yoana bharahirwa mwibharaja erikururya Abhayahudi
1Petero na Yoana hanú bhaaringa bhakyeehigirya abhantu, hayohayo abhasyengeri,#4:1a Abhasyengeri. Maaha eringʼana rinu mu Moonjooro eguru ya Amangʼana Amakongʼu. na omukuru wa abharindi bha mwisyengerero erikuru rya Waryubha na Abhasadukaayo,#4:1b Abhasadukaayo. Abhasadukaayo bhaaringa m-muganda gwa abhatungi bha edini ya Abhayahudi. Maaha Abhasadukaayo mu Moonjooro eguru ya Amangʼana Amakongʼu. bhakahika. 2Abhakuru bhayo, bhaaringa bhajimiri bhukongʼu, kwa okubha, Petero na Yoana bheehigiryanga abhantu na okubharaarikira ega, Yeesu yaahyuka okurwa mubhaku. Ego, obhuhyuki bhwaye bhuroorokya ega, Waryubha arihyukya abhaku. 3Kwa ego, bhaabhagwata Petero na Yoana. Na kwa okubha, obhutiku bhwaringa bhurasoha, bhakabhatuura mwigereja, okuhikira ejo wendeko. 4Nawe, amangʼana ganú Petero na Yoana bhaaringa bhamariri okukeerya abhantu bharya, abhaaru gati yaabho, bhakageekirirya. Ego, erisaabhu rya abhasaaja abheenego, bhanú bhaaringa bhamariri okumwikirirya Yeesu, bhakahika muna ebhiku bhitaanu.
5Ejo wendeko, abhakuru bha Abhayahudi, abhakaruka, na abheehigirya bha amaragiriryo,#4:5 Abhakuru bha Abhayahudi, abhakaruka, na abheehigirya bha amaragiriryo. Mbo bhaaringa abhatungi bha Abhayahudi, na mbo bhaakoranga eribharaja erikuru rya Abhayahudi rinú ryabhirikirwanga ega, Sanihedirini. Maaha Eribharaja erikuru rya Abhayahudi mu Moonjooro eguru ya Amangʼana Amakongʼu. bhakeekumanʼya Yerusaremu hayo. 6Mukiikaro kiyo, bhaaringa-mo, Anasi unú yaaringa omusyengeri omukuru,#4:6 Omusyengeri omukuru. Maaha Abhasyengeri mu Moonjooro eguru ya Amangʼana Amakongʼu. hamwi na Kayafa, Yoana, Arekisaanda, na abhantu abhandi, okurwa kuruganda rwa omusyengeri omukuru. 7Mbe, bhakatuma ega, Petero na Yoana, bhareetwe mwibharaja. Bhakabheemirirya gati yaabho, bhakaamba okubhabhuurya ega, “Amangʼana gayo mwakoreri, m-buturo-ki bhunú mwakoreeri, kasi n-kwa obhutungi bhwawi?”
8Hayo, Petero enu yeejwiri Omutima Omurabhu, akabhakeerya ega, “Bheenyu abhakuru bha abhantu, na abhakaruka bha ekyaro kya Isiraeri! 9Reero muratubhuurya, kwa okubha twamubheera omuntu unú yaaringa omubheeru, na muratubhuuririrya kya ego yaahwenibhwa. 10Mbe, bheenyu bhonsego, hamwi na Abhaisiraeri abhandi bhonsego, ndeenda mumanye obhuheene ega, unú yeemiriiri embere weenyu, ahweneri kwa obhuturo bhwa eriina rya Yeesu Kiristu wa Najareeti. Yeesu ngʼo urya mweetira kumusarabha, nawe, Waryubha akamuhyukya okurwa mubhaku. 11Weeki ngʼo Amangʼoore Amarabhu garagamba eguru yaaye ega,
‘Erigina rinú bheenyu abhahagaaji mwaanga,
bhoono ndyo ryabheeri erigina erikuru rya obhurusa.’#4:11 Maaha mukitabho kya Egijabhuri 118:22.
12Obhutuurya bhwa ekyaro kyonsego, bhuratuuka kuweeki omwenego! Ritariho eriina erindi mukyaro okukira Yeesu, rinú Waryubha yaahaana abhantu, naho bhatuuribhwe!”
13Abhakuru bha eribharaja bhayo, hanú bhaarora kya ego Petero na Yoana bharahaira kwa obhuteremu, bhakaruguura bhukongʼu, kwa okubha bhaaringa bhabhamanyiri ega, bhataringi abhasomi kora bhataringi abhangʼeeni. Nho, bhakamanya ega, bhaaringa hamwi na Yeesu. 14Na hanú abhakuru bhayo, bhaaroranga omuntu unú ahweniibhwe, yeemiriiri hamwi na Petero na Yoana, bhakabhurwa eringʼana rya okukyukya. 15Kimwi, bhakaamura ega, bhahuruke okurwa mwibharaja muyo. Bheeki, bhakasaaga bhararagiriranʼya 16na bharabhuuranʼya ega, “Tubhakore egaki abhantu bhanu? Abhamenyi bha Yerusaremu hanu, bhonsego bhamanyiri ega, bhakoreri ekika ekikuru kinu, kora tutakunagya okukihakaana. 17Nawe, nyoore tureenda eringʼana rinu ritige okunyaragana bhukongʼu kubhantu, tubhakaanʼye okuhaira na omuntu wowonse kweki, kwa okutumira eriina rya Yeesu.”
18Kimwi, abhakuru bha eribharaja bhayo, bhakabhabhirikira Petero na Yoana. Bhakabhakaanʼya kwa obhuhaari ega, “Mutaaja okurigamba kora muteehigirya kweki kwa eriina rya Yeesu riyo!” 19Nawe, Petero na Yoana bhakabhakyukya ega, “Bheenyu abheene, mwamure, nyoore m-bujomu embere ya Waryubha, okubhasuuka bheenyu okukira okusuuka Waryubha omwene. 20Nawe bheetu, tutakutiga okugamba, eguru ya amangʼana ganú twarora na okwigwa!”
21-22Hanú Petero na Yoana bhaamara okugamba ego, abhakuru bha eribharaja bhayo, bhataanyoora omweya gwa okubhajibhya, kwa okubha abhantu bhonsego bhaaringa bharamugungya Waryubha bhukongʼu eguru ya ekika kya obhuhweni bhwa omubheeru. Bhaaringa bhamanyiri ega, omuntu unú ahweniibhwe, yaabheera okurwa okwibhurwa kwaye. Omuntu uyo, yaaringa ahikirye emyaka mirongo ena, okurwa kya ego yeebhurwa. Mbe, kweki abhakuru bhayo, bhakabhakanga Petero na Yoana kwa obhuhaari bhukongʼu, kimwi bhakabhahaatira bhagye gyabho.
Abheekirirya bha Yeesu bharamusabha Waryubha abhateremye
23Petero na Yoana, hanú bhaahaatirwa, bhakahinda kubheekirirya abharikyabho. Bhakabhakeerya amangʼana gonsego ganú bhaakeeribhwa na abhasyengeri abhakuru na abhakaruka bha Ekiyahudi. 24Abharikyabho bhayo, hanú bheegwa amangʼana gayo, bhonsego hamwi bhakaamba okumusabha Waryubha kwa omutima gumwi ega, “Ee Omukuru Waryubha, uuwe nuuwe Omukuru wa bhyonsego. Uuwe nuuwe waabhumba orwire, ekyaro, na enyanja na bhyonsego bhinú bhirimo. 25Uuwe waagamba kwa Omutima Omurabhu, okuhitira omunwa gwa jaaji weetu Daudi, omugaya waaho, ega,
‘N-kwaki, abhantu bha ebhyaro ebhindi bharajima?
Na n-kwaki abhantu bha amakabhira gareeganirirya okukora amangʼana ganú gataana obhwera?
26Abhakama bha ekyaro na abhatungi bheekumeenʼye hamwi,
naho bhamwange Omukuru Waryubha, na Kiristu omusorwa waaye.’#4:25-26 Maaha mukitabho kya Egijabhuri 2:1-2.
27M-maheene ega, omukama Herode Antipa#4:27 Herode Antipa. Maaha eringʼana rinu mu Moonjooro eguru ya Amangʼana Amakongʼu. na Ponsio Pirato, bheekumanʼya hamwi na abhantu bha ebhyaro ebhindi na Abhaisiraeri mumugi gunu, naho bhamwange Yeesu, omugaya waaho omurabhu, unú waasora okamuhaka amaguta abhe Kiristu. 28Bheeki, bhaakora ganú obhuturo bhwaho na ameega gaaho geendanga gabhe okurwa kubhwambiro. 29Bhoono, Omukuru Waryubha, omanyiri kya ego bharatukangirirya! Otubheere bheetu abhagaya bhaaho, okuraarika eringʼana ryaho kwa obhuteremu obhunene. 30Wimye okubhoko kwaho okuhwenʼya abhantu, ebhimanyiiriryo na ebhiruguuryo bhikoreke kuriina rya Yeesu, omugaya waaho omurabhu!”
31Hanú bhaamara okumusabha Waryubha, ahasi hayo bhaaringa bheekumeenʼye, hakasingisibhwa. Bhonsego bhakeejuribhwa Omutima Omurabhu, bhakagendererya okwihigirya abhantu eringʼana rya Waryubha kwa obhuteremu.
Abheekirirya bharatumira ebhintu bhyabho hamwi
32Abheekirirya bhonsego, bhaaringa na obhumwi, kumeetegeerero na omutima. Ataaringa-ho kora omuntu oumwi unú yaagambanga ega, ebhintu bhinú yaanabhyo m-byaye omwenego. Bhaatumiranga ebhintu bhyonsego, kwa obhumwi. 33Abhatumwa bha Yeesu, bhaaringa bhararaarikira abhantu kwa ekituunyo bhukongʼu ega, Omukuru Yeesu yaahyuka. Na Waryubha yaabhanonka bhukongʼu. 34Ataaringa-ho omuntu gati yaabho unú yaasuuhirwanga ekintu. Bhataasuuhirwanga, kwa okubha bhanú bhaaringa na emigunda na eginyumba bhaabhiguryanga, bharareetera 35abhatumwa egimbirya ginú bhaanyooranga. Abhatumwa bhaagabhanʼyanga egimbirya giyo kubheekirirya, okuringʼaana na kya ego kira omuntu yeendanga.
36Mbe, yaaringa-ho Omuraawi umwi. Omuraawi uyo, yaabhirikirwanga Yusufu, omwibhurwa wa kwiginga rinú ryabhirikirwanga ega, Kipuro. Abhatumwa bha Yeesu, bhaaringa bhamutogeri ega, Bharinabha, ensonga yaaye niiga, “Owa okubhateremya omutima”. 37Wonse akagurya omugunda gwaye. Na egimbirya ginú yaanyoora, akagihaana abhatumwa bhayo.
Právě zvoleno:
Amakorwa ga Abhatumwa 4: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.