Amakorwa ga Abhatumwa 3
3
Petero aramuhwenʼya omubheeru kwa eriina rya Yeesu
1Orusiku rumwi, ensa kenda gya omubhasu, Petero na Yoana bhakagya murubhanja rwa erisyengerero erikuru rya Waryubha. Ensa iyo, ngʼyo yaaringa ya abhantu okumusabha Waryubha. 2Kwisyengerero riyo, kyaringa-ko ekiseku kinú kyabhirikirwanga ega, Ekijomu. Kukiseku hayo, yaaringa-ho omuntu umwi omubheeru okurwa okwibhurwa kwaye. Kira orusiku, yaatuurwanga kukiseku hayo, asabhiirirye egimbirya kubhantu bhanú bhaasohanga mwisyengerero muyo.
3Omubheeru uyo, hanú yaarora Petero na Yoana bharasoha murubhanja rwa erisyengerero muyo, akabhasabha egimbirya. 4Petero na Yoana bhakamumaahirira bhukongʼu, kimwi Petero akamukeerya ega, “Otumaahirire bheetu!” 5Wonse akabhamaahirira, enu araganyirira okunyoora ekintu kyokyonse.
6Mbe, Petero akamukeerya ega, “Oni ntaana embirya yoyonse, nawe, kinú niinakyo nkyo ndaakuhaane.” Kimwi akamukeerya ega, “Kwa eriina rya Yeesu Kiristu wa Najareeti, imirira na ogende!” 7Kimwi Petero akamugwata okubhoko kwa obhuryo, akamwimirirya. Hayohayo, amaguru na egintengʼe gyaye gya amaguru bhikanyoora eginguru. 8Akeebhururuka, akaamba okugenda omwene. Akasoha murubhanja rwa erisyengerero rya Waryubha hamwi na Petero na Yoana, enu areebhururukabhururuka na okumutogoonʼya Waryubha. 9Abhantu bhonsego bhakamurora aragenda enu aramutogoonʼya Waryubha. 10Na hanú bhaamanya ega, ngʼ-unú yaaringa arasabhiirirya kukiseku kya kwisyengerero kinú kyabhirikirwanga ega, Ekijomu, bhonsego bhakatungʼaara, kuganú gamunyooreri.
Petero arabheehigirya abhantu eguru ya Yeesu
11Eribhaga riyo, omuntu uyo, yaaringa abhagwatiriri Petero na Yoana. Abhantu bhonsego bhaaringa bhararuguura bhukongʼu, bhakakenya hamwi, bhakagya ahasi hanú haabhirikirwanga ega, Eribharaja rya Soromoni murubhanja rwa erisyengerero erikuru muyo, bhakabheehundirira enu bharuguuriri bhukongʼu. 12Petero hanú yaarora abhantu bhayo, akabhabhuurya ega, “Bheenyu abhantu bha mukyaro kya Isiraeri, kwaki amangʼana gayo garabharuguurya? Ndeegwa, muratutunurira ameeso? Murakanya ega, omuntu unu ahweniibhwe kwa obhuturo bhwetu, kasi kwa okubha bheetu tureekara kya ego Waryubha areenda? 13Waryubha wa bhajaaji weetu, Abhurahamu, Esaaka, na Yakobho, amutogoonerye Yeesu, omugaya waaye, ngʼo omuhwenʼya wa uyo. Na Yeesu uyo, ngʼo bheenyu mwagwatya kuserikari abhuturirwe ekiina okukwa! Kora hanú omwanangwa Pirato, yaaringa yaamwiri ega, ahaatirwe, mukaanga. 14Yeesu yaaringa omurabhu na omuheene, nawe, bheenyu mwamwanga, mweenda ega, omwiti ahaatirwe. 15Ego, mweeta unú yaaringa omukuru wa obhuhoru. Nawe, Waryubha yaamuhyukya okurwa mubhaku, na bheetu mbo abheemiririri bha obhuhyuki bhwaye. 16Mbe, omuntu unú murarora hanu, mumumanyiri bhujomu. Anyooreri eginguru kwa obhuturo bhwa eriina rya Yeesu, kwa okuriikirirya eriina riyo. Ahweneri kimwi, kya ego bheenyu abheene muramurora.
17“Bhoono, abhahiiri bhaani, mmanyiri ega, mweeta Yeesu, kwa okwanga okumanya kinú murakora, kya ego abhatungi bheenyu bhaakora. 18Nawe, kwa enjira inu, Waryubha yaakunaanʼya amangʼana ganú yaagamba okuhitira kubharooti bhaaye bhonsego ega, Kiristu Omutuurya arinyankibhwa. 19Kwa ego, mumwihunjurire Waryubha okurwa mubhusarya bhwenyu, naho weeki abhaabhire obhusarya bhwenyu. Kwa okukora ego, Omukuru Waryubha aribhamuunyia kwa okubha-ho kwaye, 20na arimutuma Yeesu Kiristu unú yaasorwa okurwa kubhwambiro kurusumo rwenyu. 21Nawe Yeesu, weeki areenderwa asaage murwire, okuhikira eribhaga rinú Waryubha arikora ebhintu bhyonsego bhuhya, kya ego yaagamba akare hayo, kwa enjira ya abharooti bhaaye abharabhu bha omutima.
22“Musa#3:22 Musa. Maaha eringʼana rinu mu Moonjooro eguru ya Amangʼana Amakongʼu. yaagamba ega, ‘Gati yeenyu, Omukuru Waryubha weetu aribhasorera omurooti kya oni. Mumwitegeerere bhujomu kira eringʼana rinú aribhakeerya. 23Omuntu wowonse unú atarimwitegeerera omurooti uyo, aryahurwa na okusikibhwa, okurwa kubhantu bhanú bharamwikirirya Waryubha, koko.’#3:22-23 Maaha mukitabho kya Obhuhiituki bhwa Amaragiriryo 18:15, 18:18-19. 24Kora abharooti bhonsego, okwambira Samweri na bhanú bhaamurwa enyuma, bhaaraarika amangʼana ganú garakoreka kuginsiku ginu. 25Egindago ginú Waryubha yaaruusya kwa enjira ya abharooti, n-kurusumo rwenyu. Na murasanga eriragano#3:25a Eriragano. Maaha eringʼana rinu mu Moonjooro eguru ya Amangʼana Amakongʼu. rinú Waryubha yaakora na bhajaaji weenyu, kya ego yaakeerya Abhurahamu#3:25b Abhurahamu. Maaha eringʼana rinu mu Moonjooro eguru ya Amangʼana Amakongʼu. ega, ‘Kwa okuhitira orwibhuro rwaho, abhantu bhonsego bharinonkwa.’#3:25c Maaha mukitabho kya Obhwambiro 22:18, 26:4. 26Mbe, Waryubha hanú yaamusora#3:26 Yaamusora. Ensonga eindi eratura okubha ega, yaamuhyukya. Yeesu, omugaya waaye, yaamutuma kubheenyu mbere, naho abhanonke kwa okubhahunjura kira oumwi okurwa mubhusarya bhwaye.”
Právě zvoleno:
Amakorwa ga Abhatumwa 3: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.