Wulu-ayi-sob 32
32
1«Salom i, ƴãw tobr, ɩ̃ ƴɛ̀rɛ na,
tẽw i, bɛrɛ wone a lɛ ɩ̃ na yere a.
2A ɩ̃ wulu, a cire,
mɛ̃ saa na waar ƴãwn tɩɩr a,
a ɩ̃ ƴɛ̀rʋ, a ƴɛ̀r pàw a ziir
mɛ̃ ɓɩɛlʋ na lo pàw mʋ̃ɔ a.
3Ɩ̃ na íre nɩ a Sore yúor.
Ɩsɩrayɛl nɩbɛ ɛ, nyɩ sàw k'aa
tɩ Naaŋmɩn ɩ n kpɛ̃ɛ!
4A Sore ɩ n pì-kpɛ̃w.
A ʋ tome vɩɛl'ɩ a za.
Lɛ za ʋ na yel a mɩ́ tu n yel-mɩŋa,
a tɩ Naaŋmɩn ŋmɛ̃ n ʋ ŋmɛ̃a,
ʋ bɛ ɩrɛ faa towtow ɛ,
nɩ-mɩŋa nɩ nɩ-dẽdẽ n'ʋ kʋralɛ.
5Ɛcɛ a nyɩɩm, nɩ-bʋʋr-faa nɩ nɩ-bʋʋr-sãwna,
nyɩ sãw nɩ a Sore. Nyɩmɛ so vĩ wɛ!
Nyɩ bɛ cãà ɩ a ʋ bibiir ɛ.
6Nɩ-bʋʋrɛ na bol ɛ́ bɛ bãw yã a,
a ɩb'ɩ à ŋá nyɩ na ɩrɛ a Sore zie a?
Ʋlɛ bɛ n'ɩ a nyɩ sãà, a nyɩ íre,
a sob nɛ na ɩ nyɩ ɩ a ʋ nɩ-bʋʋrɛ a ɩ?
7Nyɩ lɛb tɩɛrɩ a koro za bibie,
nyɩ lɛb bɩɛrɩ a yome na tɔl a,
a nɩbɛ na dɔw dɔw lɩɛrɩ taa a.
Nyɩ sowri a nyɩ sãà mɩnɛ,
bɛ na manɩ nyɩ na,
nyɩ sowri a dɛb-nyamɛ,
bɛ na yel'ɩ bom nɛ na ɩ a kʋ̀ nyɩ.
8A lɛ a Naaŋmɩn-na-do-saa-bɛ-pɩɛl-a na tɩ põ
a ten kʋ̀ a tẽw zu dem a,
ʋ ƴãw nɩ a nɩ-bʋʋrɛ tʋr-bɔwrɩ,
ʋ de nɩ a nɩ-bʋʋrɛ been been,
kʋ̀ salom zu nɩr kãw,
9ɛcɛ ʋ kaa na ír so a Ɩsɩrayɛl bʋʋrɛ,
ʋlɛ n'ʋ gùre a Zakɔb bʋʋrɛ.
10A Sore nyɛ̃ nɩ a ʋ nɩ-bʋʋrɛ a wɛja-kpalɛ pʋɔ
na tɩ ɩ gbõgbo-cili kon tɛwr'a.
Ʋ kaa nɩ bɛ zie, ʋ wul bɛ na,
ʋ gù bɛ na mɛ̃ a ʋ mimi-biir a.
11Mɛ̃ sɩla na bɔbr k'aa ʋ bili ƴaw a,
ʋ laarɛ nɩ a ʋ cow zu-sɔw.
Ʋ yɛ̀r'ɩ a ʋ pɩgɛ pɛpɛɛ k'ʋʋ de a,
ɛ́ tɛr a a ʋ pɩgɛ zu.
12A Sore yõ n'ʋ tɛr a ʋ nɩ-bʋʋrɛ,
ŋmɩn-yoru kãw za bɛ pʋɔ a ʋ ƴãw ɛ.
13Ʋ ƴãw na bɛ zɩ̃ tan pʋɔ
ʋʋ guoli bɛ nɩ a póru bʋ̃-kʋ́ɔrɩ.
Ʋ ɩ na bɛ dɩ pìe bɔwrɩ sɩwr,
ɛ́ ɩ olivʋ tɩɩr bul zi-kʋsɛbɛ pʋɔ, a bɛ ƴãw.
14A nĩi nɩ a píir tɩ kʋ̀rɛ bɛ nɩ bʋ̀rʋ,
a peli, a pʋr-'wɔɛ nɩ a bʋrɩ
tɩ kʋ̀rɛ bɛ nɩ nɛn.
Ble na ɩ ble a n'a bɛ tɩ dɩrɛ,
ɛ́ nyúur a bɛ divɛ̃ tɩɩr divɛ̃.
15A Yesurun#32:15 Yesurun: A Ɩsɩrayɛl yúor kãw n'ʋ. na wa kpɛ bɛ́rʋ baar'a, ʋ gaarɩ na.
Ʋ na wa kpɛ bɛ́rʋ a, ʋ na wa 'wɔr a, ʋ na wa tɩbrɛ baar'a,
ʋ zawr'ɩ a Naaŋmɩn bɛr, a ʋ Íre,
ʋ ƴãw nɩ a ʋ pì-kpɛ̃w vĩ, a ʋ faarɛ.
16A Ɩsɩrayɛl nɩbɛ tɩ ɩrɛ nɩ ɩb na bɛ maal'ɩ wob a,
ƴãw a Sore nyɛrɛ suur.
Bɛ tɩ maalɛ nɩ ŋmɩn-yoru ɩ kɛ̀ nyuur#32:16 Nyuur ɩrɛ ʋ: Bʋnʋ ƴãw? A Sore yõ n'ɩ a Naaŋmɩn, ʋ bɛ bɔbr k'aa nɩsaalbɛ puore ŋmɩn-yoru ɛ. Ʋ bɔbr'a kɛ́ bɛ sàwr a ʋ nɛ́ɛ. ɩrɛ ʋ.
17Bɛ tɩ maalɛ nɩ bàwr kʋ̀rɛ kɔ̃tɔmɛ
na bɛ ɩ a Naaŋmɩn a, ɛ́ bɛ bɛ tɩ dãw bãw a ɩ.
Ŋmɩn-paalɛ n'a, a bɛ sãàkʋm-kore tɛɛ za bɛ tɩ bãw a ɩ.
18Yel-mɩŋa za, Ɩsɩrayɛl i,
fʋ bɛr'ɩ a fʋ pì-kpɛ̃w, a ʋl na dɔw fʋ a,
fʋ yiir'ɩ a Naaŋmɩn na kʋ̀ fʋ a nyɔ-vʋʋrʋ a bɛr!
19A Sore na wa nyɛ̃ a lɛ
a ʋ bidɛbr nɩ a ʋ pɔwyaar na ɩrɛ ʋ laar a,
ʋ bɛ bʋɔlɩ bɛ nɩbɛ ɩ.
20Lɛ n'a ʋ tɩ yel:
“Nɩr bɛ sàwr dier a bɛ ƴɛ̀rʋ ɛ,
nɩ-faar bʋʋrɛ sɩrɩ nɛbɛ.
Ɩ̃ kʋ̃ cãà kaarɛ a bɛ zie ɩ,
ɛ́ nyɛ̃ a lɛ a na na ŋmɛ̃ bɛ a.
21Bɛ tɛr'ɩ ŋmɩn-ziri,
ƴãw k'ɩ̃ kpɛ nyuur.
Bɛ ɩ na nɩ a bɛ tɩɩb-zawlɛ, a ɩ̃ suur ìr.
Mãa a, nɩbɛ na bɛ ɩ nɩ-bʋʋrɛ mɩ̀ a nɛbɛ,
ɩ̃ na ɩ na kɛ̀ bɛ kpɛ nyuur.
Nɩ-bʋʋrɛ na bɛ bãw yã a nɛbɛ,
ɩ̃ na ɩ na a bɛ suur ìr.
22Sɩza n'a, a ɩ̃ suur ìr'ɩ kel mɛ̃ vũu a,
ʋ dɩ na tɩ sãá a kpɩmɛ tẽw.
Ʋ dɩrɛ nɩ a tẽsɔw bʋ̃-bule za,
ʋ dɩrɛ nɩ a tan sɩɩr.
23Ɩ̃ na ɩ na a kpɩɛrʋ do ta a bɛ zu,
a ɩ̃ pime za n'a ɩ̃ na baw nɩ bɛ.
24A kɔ̃ wa kpɛ bɛ kʋ bɛr a,
a ƴã-tʋlʋ bɩɩ a bàal-faar wa ɩ bɛ bʋ̃-zaalɛ a,
ɩ̃ na ƴãw na wɛ-dʋ̃-faar wa a bɛ ƴãw,
nɩ wɩɩr na tɛr lɔw yaga a.
25A zɛbr-sɔ-kpɛ̃ɛ na kʋrɛ nɩ a yẽw,
ɛ́ a pʋl-vʋ̃ɔ kʋrɛ a dĩó.
A kũu na kʋrɛ nɩ bɛ za,
a pɔlbili nɩ a pɔwsɩrali,
a dɛb-nyamɛ nɩ a bibiir.”
26Ɩ̃ tɩ yel'a k'ɩ̃ɩ na kʋ bɛ na pàw pɛr,
ɛ́ ɩ nɩr za ta cãà tɛr bɛ tɩɛrʋ a tẽw zu ɛ.
27Ɛcɛ ɩ̃ zɔ n dɛ̃bɩ̃ɛ,
a bɛ dɔ̃ dem nãà wa ɩrɛ mɛ̃ laar a,
bɛ nãà wa tuli yere:
“A Sore bɛ n'ʋ kʋ bɛ pàw pɛr ɛ,
tɩmɛ nɛbɛ ɩ à á ŋá za!”
28A Ɩsɩrayɛl nɩbɛ bɛ ŋa bɛ tɛr tɩɛrʋ ɛ, bɛ bɛ tɛr yã ɩ.
29Bɛlɛ tɩ ɩ yã-bãwnbɛ a, bɛ nãá bãw nɩ a pɛr,
bɛ nãá bãw nɩ be à á ŋá za na wɩɛr'ɩ bɛ a.
30Dɔ̃ sob been yõ na tʋ̃ɔ́ na
diw Ɩsɩrayɛl nɩbɛ túr (1 000) bɛ zɔ ɔ?
Dɔ̃ dem ayi na tʋ̃ɔ́ na diw
Ɩsɩrayɛl nɩbɛ tùr-pie (10 000) bɛ zɔ ɔ?
Ʋ̃ʋ, a na tʋ̃ɔ́ na ɩ a lɛ,
a mãa Sore na ɩ a bɛ pì-kpɛ̃w a
wa ƴãw bɛ a bɛ dɔmɛ nuru pʋɔ a.
31Ɛcɛ a bɛ dɔ̃ dem tɛɛ za bãwnɩ a na,
k'aa bɛ ŋmɩn na gùre bɛ a,
bɛ ta a Ɩsɩrayɛl Naaŋmɩn ɛ.
32Bɛl ƴãw a, bɛ bɛ sa
a Sodɔm nɩ a Gomɔɔr ten dem ɛ.
Bɛ ŋmɛ̃ na taa nɩ divɛ̃ tɩɛ,
na na wɔnɛ wɔ̃-tuor na tɛr lɔw a,
33a bɛ divɛ̃ ɩ na mɛ̃ waab lɔw a,
dɔpan lɔw-tuo kalkal.
34Nyɛ̃ a ʋlɩ bom nɛ a mãa Sore na sɔwlɩ cɔbrɩ a,
a ʋlɩ bom nɛ ɩ̃ na bin gùre nɩ bɛ a.
35Ɩ̃ na yáa nɩ a san,
ɩ̃ na ya bɛ na tu n a bɛ ɩb,
a bɛ loba bibir wa vɩɛ a.
A kpɩɛrʋ bibir ŋa bɛ cɛlɛ ɩ,
a bɛ loba bibir pɩɛl'a.
36A Sore na sɩrɩ na dɩ a ƴɛ̀rʋ nɩ mɩnʋ kʋ̀ a ʋ nɩ-bʋʋrɛ,
ʋ na zɔ n a ʋ tõ-tõ-biir nɩbaalʋ,
ʋlɛ wa nyɛ̃ a bɛ fãw za baarɩ a,
ʋlɛ wa nyɛ̃ tɩ̀ɛrɛ nɩ sõwne za bɛ ka be a.
37Ʋ na sowri bɛ na:
“A ŋmɩmɛ al zie nyɩ na tɩ sɔwlɛ a, a wa?
38Nyɩ tɩ maalɛ nɩ bàwr,
kʋrɛ dʋn ƴãwn a a 'wɔbr.
A tɩ nyuur'ɩ a divɛ̃
nyɩ na mɩ́ lãw nɩ a nyɩ de-kʋ̀b bome a.
Á pãa ìr sõw nyɩ!
Á wa gù nyɩ!”
39Ƴɛrɛŋa a, nyɩ nyɛ̃,
mãa yõ n'ʋ ɩ a Naaŋmɩn,
ŋmɩn bɛ lɛb ka be, a bɛ ɩ a mãa ɩ.
Mãa n'ʋ mɩ́ ɩ a nɩr kpi, ɛ́ ɩ ʋ vʋʋrɛ,
mãa n'ʋ mɩ́ ƴãw a bàalʋ, ɛ́ lɛb sanɩ.
Nɩr bɛ faarɛ nɩr a ɩ̃ nũú ɛ.
40Ɩ̃ ture nɩ nũu cɔwr a salom, ɛ́ pɔrɛ yere à ŋá:
“Yel-mɩŋa n'a, ɩ̃ vʋʋrɛ nɩ kʋralɛ.
41Mãa n'ɩ ŋan saalɛ a ɩ̃ zɛbr-sɔ-kpɛ̃ɛ,
ɩ̃ kàrɛ ʋ na k'ʋʋ nyɩwrɛ.
Ɩ̃ kʋ̃ yaa kɛ́ dɩ n a ɩ̃ dɔ̃ dem ƴɛ̀rʋ ɛ,
ɩ̃ na yáa nɩ a san a bɛ zu,
ɩ̃ na ɩ n a bɛlɩ dem na hɩ̃ɛn mɛ̃ a
mɛ̃ a lɛ bɛ na ɩ m a.
42A ɩ̃ pime na ɩ n a bɛ zɩ̃ɩ tɛwr,
a ɩ̃ zɛbr-sɔ-kpɛ̃ɛ na baarɩ bɛ nɩ bɛ za.
A dɔ̃ dem zɛbr nɩr kãw za bɛ cɩ̃ɛnɛ ɩ,
bɛ ƴãw bɛ nɩ bàalʋ, bɩɩ bɛ nyɔw bɛ na a,
bɛ za na kpi na.”
43Salom i, cɩlɛ lãwnɩ a Sore!
A salom zu dem za,
bɛ puore ʋ nɩ bɛ tʋɔra-siwru!
A Sore na yáa nɩ a ʋ bibiir kũu san.
Ʋ na yáa nɩ a san a ʋ dɔ̃ dem zu.
Ʋ na kʋ̀ n a bɛlɩ dem na hɩ̃ɛn ʋ a,
a ʋlɩ bom nɛ bɛ na sɛw taa nɩ a,
ɛcɛ ʋ na lɛb'a ɩ a ʋ nɩ-bʋʋrɛ tẽw ʋ vɩɛl.»
44A Moyiir nɩ a Nun bidɛb Zozue tɩ wa na wa yel a yielu ŋa ƴɛ̀r-bie za ƴãw a nɩbɛ tobe pʋɔ.
45A Moyiir na wa ɩ a Ɩsɩrayɛl nɩbɛ bãw a Sore wulu baar'a, 46ʋ yel bɛ na: «A ƴɛ̀rʋ ɩ̃ na ƴɛ̀r kʋ̀ nyɩ a dɩ̃a a, nyɩ de a a ɩ ƴɛ̀r-sɩza. A nãà wa dɩ n a dãsɩɛ nyɔw nyɩ. Nyɩ wul a a nyɩ bʋʋrɛ, ɛ́ yel kʋ̀ bɛ kɛ́ bɛ sàwr a wulu ŋa ƴɛ̀rʋ za. 47Bʋ̃ʋ n'ʋ vɛ̃, a ƴɛ̀rʋ á ŋá bɛ ɩ ƴɛ̀r-zawlɛ ɩ. A na ɩ na nyɩ vʋʋrɛ, ɛ́ kpɛ a tẽw nyɩ na na so a Zurdɛ̃ gãwn a cɛlɩ.»
A Sore yel'ɩ a Moyiir na na kpi a
48A ʋlɩ bibir nɛ tɔr za a, a Sore tɩ yel'ɩ a Moyiir à ŋá: 49«Cen a Avarim tã-kɔlkɔl zu, a Mowab tẽw, na tori a Zeriko a. Do a Nebo tãw nyʋɔrɩ́, ɛ́ jɩ́r a Kanãa tẽw ɩ̃ na kʋ̀rɛ a Ɩsɩrayɛl nɩbɛ kɛ́ bɛ so a. 50Al pùorí, a tãw ŋa zu fʋ na na do a, kpi a be cen tɩ páw a fʋ sãà mɩnɛ, mɛ̃ a lɛ tɔr za a fʋ yɛb Aarɔ̃ na kpi a Hoor tãw zu, cen tɩ páw a ʋ sãà mɩnɛ a. 51Fʋ̃ʋ nɩ a Aarɔ̃ a, nyɩ sãw mɛ̃ nɩ faa faa a Ɩsɩrayɛl nɩbɛ niŋé, a Meriba kʋ̃ɔ yele pʋɔ a Kadɛsɩ, a Tisin wɛja-kpalɛ pʋɔ. Nyɩ bɛ tɩ sàw a ɩ̃ sonu sãá a ʋlɩ bibir nɛ a Ɩsɩrayɛl nɩbɛ zie ɩ. 52Alɛ n'a so fʋ na nyɛ̃ a tẽw ɩ̃ na kʋ̀rɛ a Ɩsɩrayɛl nɩbɛ a zi-zãána, ɛcɛ fʋ bɛ kpɩɛr a ʋ pʋɔ ɩ.»
Právě zvoleno:
Wulu-ayi-sob 32: DBDC
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en Dagara © Alliance Biblique du Burkina Faso, 2013.