Wulu-ayi-sob 31
31
A MOYIIR KŨU DAAR ƳƐ̀RƲ NƖ A Ʋ KŨU
31—34
Zozue n'ʋ na lɩɛrɩ a Moyiir
1A Moyiir tɩ cãà na lɛb yel a Ɩsɩrayɛl nɩbɛ za: 2«Ɩ̃ tɛr'ɩ yome lɩz'a ayʋɔb (120) ƴɛrɛŋa, ɩ̃ kʋ̃ tʋ̃ɔ́ cãà ɩ a nyɩ nɩ-kpɛ̃ɛ ɩ, ɛ́ a Sore yel mɛ̃ k'ɩ̃ɩ kʋ̃ gãw a Zurdɛ̃ ɩ. 3A Sore nyɩ Naaŋmɩn mɩŋa n'ʋ na de nyɩ a niwn. Ʋ na kʋ n a nɩ-bʋʋr-yoru nyɩ na na tuore a, ɛ́ nyɩ mɩ́ so a bɛ tẽw. Ɛ́ Zozue n'ʋ na ɩ a nyɩ nɩ-kpɛ̃ɛ, mɛ̃ a lɛ a Sore na yel a. 4A Sore na sãw nɩ a nɩ-bʋʋr-yoru bɛ ŋa, mɛ̃ a lɛ ʋ na sãw a Amoritɩ mɩnɛ na-mɩnɛ, Sihon nɩ Ɔgɩ, nɩ a bɛ ten a. 5A Sore na ƴãw bɛ nɩ a nyɩ nuru pʋɔ, ɛ́ nyɩ na ɩ bɛ na mɛ̃ a lɛ tɔr za ɩ̃ na yel kʋ̀ nyɩ a. 6Nyɩ kpɛ socir ɛ́ kpɛmɛ, nyɩ taa wa zɔrɛ dɛ̃bɩ̃ɛ màwr a bɛ niŋé ɩ. Bʋ̃ʋ n'ʋ vɛ̃, a Sore nyɩ Naaŋmɩn na de nyɩ nɩ niwn. Ʋ bɛ tɩ̀ɛrɛ nyɩ bɛrɛ ɩ, ʋ bɛ zawrɛ nyɩ bɛrɛ ɩ.»
7Al pùorí, a Moyiir tɩ bʋɔl'ɩ a Zozue wa yel ʋ a Ɩsɩrayɛl nɩbɛ za niŋé: «Kpɛ socir ɛ́ kpɛmɛ! Fʋ̃ʋ n'ʋ na tɛr a Ɩsɩrayɛl nɩbɛ kpɛ n a tẽw ʋl pʋɔ, a Sore na pɔ yel a bɛ sãàkʋm-kore zie k'ʋʋ na kʋ̀ bɛ na a, fʋ̃ʋ n'ʋ na põ ʋ kʋ̀ bɛ. 8A Sore na de fʋ nɩ niwn, ʋ na be n a fʋ zie. Ʋ bɛ tɩ̀ɛrɛ fʋ bɛrɛ ɩ, ʋ bɛ zawrɛ fʋ bɛrɛ ɩ. A na ɩ à ŋá a, ta zɔrɛ dɛ̃bɩ̃ɛ ɩ, ta sàw bom za tʋ̃ɔ́ fʋ ɛ.»
A wulu bɛ na na mɩ́ kanɩ yome ayopõi za baarʋ daar a
9A Moyiir tɩ sɛb'ɩ a Naaŋmɩn wulu#31:9 Naaŋmɩn wulu ŋa: A tub al za a Naaŋmɩn na yel k'aa Ɩsɩrayɛl nɩbɛ tɩ tuur a Kanãa tẽw ɛ́ a be a Wulu-ayi-sob sɛbɛ pʋɔ a n'a. ŋa, ɛ́ de ʋ kʋ̀ a bàwr-maalbɛ na ɩ a Levi bʋʋrɛ ɛ́ so a wõ-taa daga tuofʋ a, nɩ a Ɩsɩrayɛl nɩbɛ nɩ-kore za. 10-11A Moyiir tɩ yel bɛ na: «Yome ayopõi mɩ́ wa ta a, a samɛ lɛb-bɛrʋ yũon a, nyɩ na mɩ́ kanɩ nɩ a wulu ŋa, a Sɛwr cuw daar. Nyɩ na mɩ́ kanɩ ʋ na à yi, nyɩ kʋ̀ a Ɩsɩrayɛl nɩbɛ za na na mɩ́ wa a Sore nyɩ Naaŋmɩn niŋé, a zie ʋl ʋ nãà wa kaa ír a. Ɛ́ bɛ za na mɩ́ bɛr'a wõ. 12Nyɩ na mɩ́ bʋɔl'ɩ a nɩbɛ za ɓã taa, dɛbr, pɔwbɛ, bibiir nɩ a nʋʋrɩ na kpɩɛr a nyɩ zie a, kɛ́ bɛ tʋ̃ɔ́ wõ a kanʋ ŋa, bãw a Sore nyɩ Naaŋmɩn ƴãwfʋ nɩ a wulu ŋa ƴɛ̀rʋ za sàwfʋ. 13A bibiir na bɛ bãw a wulu ŋa sɛr a mɩ̀ na mɩ́ wõ ʋ na, ɛ́ bãw a Sore nyɩ Naaŋmɩn ƴãwfʋ, lɛn daar za nyɩ na na be a tẽw ŋa, nyɩ na na so a Zurdɛ̃ gãwn a pʋɔ a.»
A Ɩsɩrayɛl nɩbɛ kʋ̃ tu a Naaŋmɩn ɛ
14A Sore tɩ yel'ɩ a Moyiir à ŋá: «A fʋ kũu daar pɩɛlɛ na. Bʋɔlɩ a Zozue nyɩ wa nyɩ za ayi a tuor-taa pɛn-sɛw niŋé. Ɩ̃ na wa ƴɛ̀r'ɩ a ɩ̃ ƴɛ̀rʋ kʋ̀ ʋ a be.»
Lɛ n'a a Moyiir nɩ a Zozue tɩ cen a tuor-taa pɛn-sɛw pɛr. 15A Sore tɩ ɩ na bɛ nyɛ̃ ʋ zũzuwr na tɩ ba àr mɛ̃ kul a pʋɔ, a pɛn-sɛw dɩ̃dɔr nʋɔr a. 16A Sore tɩ yel'ɩ a Moyiir à ŋá: «Fʋ kʋ̃ yaa kɛ́ kpi cen tɩ páw a fʋ sãà mɩnɛ ɩ. Al pùorí, a Ɩsɩrayɛl nɩbɛ na zɔ na tu ŋmɩn-yoru, a tẽw ʋl pʋɔ bɛ na na kpɛ a ŋmɩmɛ. Bɛ na zawrɩ mɛ̃ na bɛr, sãw a wõ-taa ɩ̃ na maal'ɩ bɛ a bɛr. 17Ɩ̃ na nyɛ̃ nɩ bɛ nɩ suur a al ƴãw, ɩ̃ na jɛ bɛ na bɛr, ɩ̃ na gùr'ɩ pùor cɔw bɛ. Lɛ n'a a nɩ-bʋʋr-yoru na vɔl bɛ. Kpɩɛrʋ nɩ wʋ̀ʋr na lo n bɛ zu. A lɛn daar'a a Ɩsɩrayɛl nɩbɛ na yel bɛ tʋɔra: “A kpɩɛrʋ á ŋá wa páw tɩ a, a tɩ Naaŋmɩn na bɛ cãà be a tɩ sɔgɔ a bɛ n'a so ɩ?” 18Ɛcɛ mãa a, ɩ̃ na cãà na gùr pùor cɔw bɛ a faa al za bɛ na na maalɩ lɩɛbɩ tu ŋmɩn-yoru a ƴãw. 19Ƴɛrɛŋa a, nyɩ sɛb a yielu ŋa. A fʋ̃ʋ Moyiir, zanɩ nɩ ʋ a Ɩsɩrayɛl nɩbɛ. Bɛ zanɩ ʋ bãw, a yielu ŋa tʋ̃ɔ́ ɩ a ɩ̃ dãsɩɛ bom a bɛ zie. 20Bʋ̃ʋ n'ʋ vɛ̃, ɩ̃ na tɛr'ɩ a nɩbɛ bɛ ŋa cen nɩ tẽw bʋ̀rʋ nɩ sɩwr na gbɔlɛ a, a tẽw ɩ̃ na pɔ yel a bɛ sãàkʋm-kore k'ɩ̃ɩ na kʋ̀ bɛ na a. Bɛ na mɩ́ nyɛ̃ a na dɩ tɩ sɛw, bɛ na 'wɔr'ɩ bɛ za. Al pùorí, bɛ na lɩɛb'a tu ŋmɩn-yoru, maalɛ a, bɛ kʋ̃ bʋɔlɛ mɛ̃ nɩr ɛ, bɛ na sãw nɩ a ɩ̃ wõ-taa bɛr. 21A kpɩɛrʋ nɩ a wʋ̀ʋr wa páw bɛ a lɛn daar a, a yielu ŋa na dɩ n a bɛ sãwna dãsɩɛ, bʋ̃ʋ n'ʋ vɛ̃, a bɛ bʋʋrɛ tɛɛ za kʋ̃ bɛr a ʋ yielu towtow ɛ. A dɩ̃a a, ɩ̃ bɛ tɛr bɛ kpɛ n a tẽw ɩ̃ na pɔ yel k'ɩ̃ɩ na kʋ̀ bɛ na a pʋɔ sɛr ɛ, ɛ́ bãw a lɛ bɛ na tɩɛrɛ a.»
22A ʋlɩ bibir nɛ a, a Moyiir tɩ sɛb'ɩ a yielu ŋa, ɛ́ zanɩ nɩ ʋ a Ɩsɩrayɛl nɩbɛ.
23Al pùorí, a Sore tɩ ƴɛ̀r'ɩ a ʋ ƴɛ̀rʋ kʋ̀ a Nun bidɛb Zozue, ɛ́ yel ʋ: «Kpɛ socir ɛ́ kpɛmɛ! Fʋ̃ʋ n'ʋ na tɛr a Ɩsɩrayɛl nɩbɛ kpɛ n a tẽw ʋl pʋɔ ɩ̃ na pɔ yel k'ɩ̃ɩ na kʋ̀ bɛ na a. Ɛ́ mãa a, ɩ̃ na be n a fʋ zie.»
24A Moyiir na tɩ sɛb a Naaŋmɩn wulu ƴɛ̀r-bie za ƴãw sɛbɛ zu baar'a, 25ʋ yel'ɩ à ŋá kʋ̀ a levitɩ mɩnɛ na tuore a Sore wõ-taa daga a: 26«Nyɩ de a Naaŋmɩn wulu sɛbɛ ŋa, bin kɔwlɩ a Sore nyɩ Naaŋmɩn wõ-taa daga. Ʋ na be n a be, ɩ dãsɩɛ bom, wule a Ɩsɩrayɛl nɩbɛ sãwna. 27Bʋ̃ʋ n'ʋ vɛ̃, ɩ̃ bãwnɩ a na bɛ na ɩ nɩ-gaarɩ a, ɩ̃ bãw nɩ a bɛ zu-kpɛnʋ. Bɛlɛ wa gaarɛ a Sore zie, a dɩ̃a ɩ̃ na cãà vʋʋrɛ be a bɛ sɔgɔ a, a ɩ̃ kũu pùorí a, a na ɩ n towtow. 28Ƴɛrɛŋa a, nyɩ bʋɔlɩ a nɩ-kore za nɩ a nyɩ sɛ-sɛbrbɛ ɓã taa a ɩ̃ zie. Ɩ̃ na zɛw nɩ kɔkɔr yel a yielu ŋa ƴɛ̀r-bie kʋ̀ bɛ, a salom nɩ a tẽw na na mɩ́ dɩ a dãsɩɛ nyɔw bɛ a niŋé. 29Bʋ̃ʋ n'ʋ vɛ̃, ɩ̃ bãwnɩ a na k'aa ɩ̃ kũu pùorí a, a Ɩsɩrayɛl nɩbɛ na sãw nɩ bɛ za, bɛ na bɛr'ɩ a sɔ́r ɩ̃ na wul bɛ a. A kpɩɛrʋ na páw bɛ nɩ nɩdaar, a yel-faa bɛ na na maalɩ a Sore zie, ɩ a ɩb ƴãw k'ʋ nyɛ̃ suur a.»
A Moyiir yielu
30Al pùorí, a Moyiir tɩ yel'ɩ a yielu ŋa ƴɛ̀r-bie za kpɛ̃lɛ̃kpɛ̃lɛ̃ ƴãw a Ɩsɩrayɛl lãw nɩbɛ tobe pʋɔ:
Právě zvoleno:
Wulu-ayi-sob 31: DBDC
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en Dagara © Alliance Biblique du Burkina Faso, 2013.