Wulu-ayi-sob 29
29
A alɩ bome nɛ a Naaŋmɩn na ɩ a Ɩsɩrayɛl nɩbɛ ƴãw a
1A Moyiir tɩ bʋɔl'ɩ a Ɩsɩrayɛl nɩbɛ za wa yel bɛ à ŋá: Nyɩ na tɩ be a Eziptɩ a lɛn daar a, nyɩ nyɛ̃ nɩ nɩ mimir, a lɛ a Sore na ɩ a Faarawɔ̃, a ʋ tõ-tõ-bi-bɛrɛ nɩ a ʋ tẽw za a. 2Nyɩ nyɛ̃ nɩ a kpɩɛrʋ na bɛ dɩ vuo ʋ na ƴãw bɛ a, a nɔ-ɓãa-yele nɩ a yel-bɛ-dãw-nyɛrɩ ʋ na maalɩ a. 3Ɛcɛ, wa tɩ tɔ dɩ̃a a, a Sore bɛ tɩ kʋ̀ nyɩ tɩɛrʋ na na tʋ̃ɔ́ bãw ʋlɩ bom nɛ na ɩrɛ a ɩ. Ʋ bɛ tɩ kʋ̀ nyɩ mimir na na tʋ̃ɔ́ nyɛ̃ a ɩ, nɩ tobe na na tʋ̃ɔ́ wõ a ɩ. 4Ʋ ƴãw na nyɩ cen a wɛja-kpalɛ pʋɔ yome lɩz'a ayi: a nyɩ bʋ̃-suuri nɩ a nyɩ nafawr-ɓɛwlɩkɛl bɛ zaw ɛ. 5Dipɛ̃ bɛ n'a nyɩ 'wɔb ɛ, divɛ̃ bɩɩ dã-kpɛn bɛ n'a nyɩ nyũ ɛ. À á ŋá za ɩ na, kɛ́ nyɩ tʋ̃ɔ́ bãw k'aa Sore nyɩ Naaŋmɩn a, ʋlɛ n'ʋ. 6Tɩ na wa ta a ka a, Hɛsɩbon nãà Sihon nɩ Basan nãà Ɔgɩ tuori tɩ na, ŋmãa nɩ tɩ zɛbr, ɛ́ tɩ zɛb tʋ̃ɔ́ bɛ. 7Tɩ de nɩ a bɛ tẽw, põ kʋ̀ Urubɛn nɩ Gadɩ dɔwlʋ nɩbɛ, lãwnɩ Manase dɔwlʋ nɩbɛ põ-zɛ̃-taa zie. 8Alɛ n'a so a fɛr kɛ́ nyɩ maal tɛr a wõ-taa, a Naaŋmɩn na maal'ɩ nyɩ a, ƴɛ̀rʋ vla, ɛ́ sàwr a. À ŋá n'a a nyɩ yele za na mɩ́ cere vla.
A Sore wõ-taa bɛ tɛr dɩ̃ɛnʋ ɛ
9Ɩsɩrayɛl nɩbɛ ɛ, nyɩmɛ n'ɩ bɛ ŋa àr nyɩ za a Sore nyɩ Naaŋmɩn niŋé a dɩ̃a: a nyɩ nɩ-bɛrɛ, a nyɩ dɔwlʋ nɩ-bɛrɛ, a nyɩ nɩ-kore nɩ a nyɩ sɛ-sɛbrbɛ, a Ɩsɩrayɛl dɛbr za, 10a nyɩ bibiir nɩ a nyɩ pɔwbɛ, nɩ a nʋʋrɩ na kpɩɛr a nyɩ sɔgɔ a nyɩ laɩ pʋɔ kɛ́ bɛ cɩɛr a dàar bɩɩ 'wɔ̃wnɛ a kʋ̃ɔ kʋ̀rɛ nyɩ a. 11Ƴɛrɛŋa a, a Sore nyɩ Naaŋmɩn maalɛ nɩ nyɩ nɩ wõ-taa, ɛ́ yel kɛ́ nyɩ sàw ʋ lãwnɩ pɔb. 12À ŋá n'a a dɩ̃a ʋ na ɩ nyɩ ɩ a ʋ nɩ-bʋʋrɛ, ʋʋ ɩ a nyɩ Naaŋmɩn, mɛ̃ a lɛ ʋ na yel kʋ̀ nyɩ a, nɩ a lɛ ʋ na pɔ a nyɩ sãàkʋm-kore Abraham, Ɩzaakɩ nɩ Zakɔb zie a. 13A wõ-taa ŋa ɩ̃ na yel kɛ́ nyɩ sàw, lãwnɩ pɔb a, nyɩɩm yõ bɛ nɛbɛ ɩ̃ maalɛ nɩ ɛ. 14Ɩ̃ maalɛ nɩ nɩ nɩr za na àr a ka, a ƴɛrɛŋa, a Sore nyɩ Naaŋmɩn niŋé a, ɛ́ mɩ̀ maalɛ nɩ a bɛlɩ dem za na bɛ be a tɩ zie ka a dɩ̃a a.
15Nyɩ cãà na bãwnɩ a lɛ tɩ na tɩ be a Eziptɩ a, nɩ a lɛ tɩ na tu tɔl a nɩ-bʋʋr-yoru ten pʋɔ a. 16Nyɩ nyɛ̃ nɩ a tɩb-faar faar bɛ na tɛr maalɛ a: dàar, kʋsɛbɛ, salm-pla nɩ salm-zɩɛ tɩbɛ! 17A na ɩ à ŋá a, nɩr kãw za a nyɩ pʋɔ, dɛb bɩɩ pɔw, dɔwlʋ nɩ yir kãw za ta be be bɛr a Sore tɩ Naaŋmɩn a ƴɛrɛŋa, ɛ́ puore a nɩ-bʋʋrɛ bɛ ŋa ŋmɩmɛ ɩ. Nɩr kãw za a nyɩ pʋɔ taa wa ɩ mɛ̃ tɩ-nyɩwr na tɛr lɔw-tuo a ɩ. 18A nyɩ kãw wa wõ a ŋmɛ-ƴãw ƴɛ̀r-bie á ŋá baarɩ, ɛ́ mʋʋrɛ ʋ tʋɔra yere nɩ: «Bom za na tu n vla a ɩ̃ zie, mãa saa ɩrɛ ɩ̃ ɩb a. Bʋ̃ʋ n'ʋ vɛ̃, tẽsɔw na faa bur baar'a bɛ nyúur kʋ̃ɔ ɩ»#29:18 A ƴɛ̀r-bie a pĩi-kɔrɛ na ŋmãa pàw a tɔ̃w na ɩ n zʋkpar na wule kɛ́ nɩr na tɛr bom za a, bom za tuo bɛ cãà kpɩɛr ʋ ɛ., 19a Sore kʋ̃ sàw dɩ suur kʋ̀ ʋ ɛ. A ʋ suur nɩ a ʋ nyuur na ír'ɩ a nɩr ŋa ƴãw. Ʋ na ɩ na a ŋmɛ-ƴãw na be a sɛbɛ ŋa pʋɔ a páw ʋ. Ʋ na ɩ na a ʋ yúor bɛ cãà pore a tẽw zu ɛ. 20A Sore na ír ʋ na bɛr a Ɩsɩrayɛl nɩbɛ pʋɔ, a tu a wulu sɛbɛ ŋa pʋɔ wõ-taa ŋmɛ-ƴãw, ɛ́ a na ɩ n a ʋ zu-bio.
A Sore na ɩ n a lɛ ʋ na yel a
21A bɛlɩ dem na na dɔw a nyɩ pùorí a, a pɛr lɛ k'aa nyɩ bibiir nɩ a nɩ-sãanbɛ na yi a tẽ-zãánɩ wa a, bɛlɛ wa nyɛ̃ a nyɩ tẽw kpɩɛrʋ nɩ a bàalʋ a Sore na ɩ a páw ʋ a, bɛ na yere na: 22«Cirbi nɩ nyaarʋ dɩ n a tẽw ŋa za, bɛ kʋ̃ tʋ̃ɔ́ bʋ̀r bom za ɩ, kʋ̃ tʋ̃ɔ́ sɛl bom ɛ, mʋ̃ɔ za bɛ bule ɩ. Ʋ ŋmɛ̃ na mɛ̃ Sodɔm nɩ Gomɔɔr a, mɛ̃ Adima#29:22 Adima nɩ Sevoyim: Tẽ-bɛrɛ na tɩ pɩɛlɩ a Sodɔm nɩ a Gomɔɔr a n'a. Nyɛ̃ Yzt 14.8 nɩ 19.24-25. nɩ Sevoyim a, a tẽ-bɛrɛ a Sore na tɩ sãw bɛr a ʋ su-kẽkẽ pʋɔ a.» 23Lɛ n'a a nɩ-bʋʋrɛ za na sowre: «Bʋ̃ʋ n'ʋ so a Sore dɔwrɩ a tẽw ŋa à à ŋá? Bʋ̃ʋ n'ʋ so a su-kpɛ̃ɛ kẽkẽ ŋa tɔ?» 24Ɛ́ a sɔwfʋ na sɔw nɩ à ŋá: «A Sore, a bɛ sãàkʋm-kore Naaŋmɩn, wõ-taa ʋ na tɩ maal'ɩ bɛ, a lɛn daar ʋ na ɩ bɛ yi a Eziptɩ a, ʋlɛ n'ʋ bɛ zawrɩ bɛr so lɛ. 25Bɛ tĩ na tone ŋmɩn-sãanbɛ tome, ɛ́ puore a, ŋmɩmɛ bɛ na bɛ tɩ dãw bãw, ɛ́ a Sore mɩ̀ bɛ kʋ̀ bɛ a. 26Alɛ so a Sore suur ír a tẽw ŋa ƴãw, ʋ ɩ a ŋmɛ-ƴãw za na be a sɛbɛ ŋa pʋɔ a páw bɛ. 27A Sore su-kpɛ̃ɛ, su-kẽkẽ pʋɔ a, ʋ ír'ɩ a ʋ nɩbɛ a bɛ tẽw pʋɔ, cen nɩ tẽ-yoru pʋɔ, be n'a bɛ cãà be a dɩ̃a.»
28A Sore tɩ Naaŋmɩn so a yele al na sɔwlɩ a. Ɛcɛ a yele al ʋ na wul kɛ̀ tɩ bãw a, tɩmɛ nɩ a tɩ bibiir so a al kʋralɛ, kɛ́ tɩ tʋ̃ɔ́ sàwr a Naaŋmɩn wulu nɛ-ƴãwnɩ za.
Právě zvoleno:
Wulu-ayi-sob 29: DBDC
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en Dagara © Alliance Biblique du Burkina Faso, 2013.