Wulu-ayi-sob 28
28
A maalʋ al a nʋɔr-sàwfʋ na na wa n a
1Nyɩmɛ wa sɩrɩ bɛrɛ wone a Sore nyɩ Naaŋmɩn ƴɛ̀rʋ a, nyɩmɛ wa ƴãw fãw sàwr a nɛ-ƴãwnɩ za ɩ̃ na kʋ̀rɛ nyɩ a dɩ̃a a, a Sore nyɩ Naaŋmɩn na ɩ na nyɩ zuo a tẽw zu nɩ-bʋʋr-yoru za. 2Nyɛ̃ a maalʋ al za na na ta nyɩ ɛ́ paalɩ nyɩ, nyɩ na na bɛr wõ a Sore nyɩ Naaŋmɩn ƴɛ̀rʋ a ƴãw a:
3Ʋ na mɩ́ maal'ɩ a bɛlɩ dem na kpɩɛr a tẽ-bɛrɛ pʋɔ a, ɛ́ maalɩ a bɛl na kpɩɛr a kura pʋɔ a. 4Ʋ na mɩ́ kʋ̀ nyɩ nɩ a dɔwfʋ, ɛ́ ɩ a nyɩ bʋ̃-kʋ́ɔrɩ a maalɩ vla. A nyɩ dʋn na mɩ́ yɛ̀r'a yãwmɛ: a nĩi, a píir nɩ a bʋʋr. 5Ʋ na mɩ́ paal'ɩ a nyɩ pèli nɩ a nyɩ dipɛ̃ zɔ̃-nawfʋ-dawr nɩ bʋ̃-dɩrɩ. 6Ʋ na mɩ́ maalɩ nyɩ nɩ a nyɩ yele za pʋɔ.
7A nyɩ dɔ̃ dem mɩ́ wa ìr a nyɩ ƴãw a, a Sore na mɩ́ ɩ na nyɩ zɛb tʋ̃ɔ́ bɛ. Bɛlɛ wa lãw lo sɔr-been wa a, bɛ na tu n sɛ́ɛ ayopõi zɔ a nyɩ niŋé. 8A Sore nyɩ Naaŋmɩn na mɩ́ gù n a bome a nyɩ boge pʋɔ, ɛ́ ɩ a nyɩ yele za a maalɩ. Ʋ na ɩ na nyɩ nyɛ̃ maalʋ a tẽw ʋl ʋ na na kʋ̀ nyɩ a pʋɔ.
9Nyɩmɛ wa sàwr a Sore nyɩ Naaŋmɩn nɛ-ƴãwnɩ, ɛ́ ɩrɛ a lɛ ʋ na bɔbr a, ʋ na ɩ na nyɩ ɩ nɩ-bʋʋrɛ ʋ na sʋ̃ɔmɩ bul so a, mɛ̃ a lɛ ʋ na yel kʋ̀ nyɩ a. 10A tẽw zu nɩ-bʋʋrɛ za na nyɛ̃ na k'aa Sore so nyɩ na a ʋ tome ƴãw, ɛ́ bɛ na zɔrɛ nyɩ na. 11A Sore na ɩ na nyɩ tɛr a yaga za, a tẽw ʋ na pɔ yel a nyɩ sãàkʋm-kore zie k'ʋʋ na kʋ̀ nyɩ na a pʋɔ: a dɔwfʋ na tu nyɩ na, a nyɩ dʋn na yɛ̀r'a yãwmɛ, a nyɩ bʋ̃-kʋ́ɔrɩ na maal'ɩ vla za. 12A Sore na yuo nɩ a salom kʋ̀ nyɩ, a be ʋ na maal bin a bʋ̃-sɩza ŋa na ɩ a kʋ̃ɔ a. Ʋ na mɩ́ ɩ na a saa wa a ʋ daar ƴãw a nyɩ tẽsɔw, ɛ́ a nyɩ tome za na mɩ́ maal'a. Nyɩ kʋ̃ tɛr libir pɛ̃wfʋ yel-ɩra ɩ. Nyɩmɛ nɛbɛ na nɩ̃ɛ mɩ́ pɛ̃w nɩ-sãanbɛ yaga libie. 13A Sore na ɩ na nyɩ mɩ́ de niwn a nɩ-bʋʋrɛ za pʋɔ, ɛ́ ta pàw a pɛr ɛ. Nyɩ na mɩ́ zuo nɩ a nyɩ taabɛ kʋralɛ, nyɩ kʋ̃ mɩ́ be a bɛ pile ɩ. Ɛcɛ a al ƴãw a, a fɛr'a kɛ́ nyɩ bɛrɛ wone a Sore nyɩ Naaŋmɩn nɛ-ƴãwnɩ ɩ̃ na yere kʋ̀rɛ nyɩ a dɩ̃a kɛ́ nyɩ tɛr ɛ́ tuur a. 14Nyɩ bɛ be za na bɛr a ƴɛ̀rʋ á ŋá kãw za ɩ̃ na ƴɛ̀rɛ kʋ̀rɛ nyɩ a dɩ̃a a ɛ́ tuur ŋmɩn-yoru maalɛ a ɩ.
A ŋmɛ-ƴãw al a nʋɔr-zawrʋ na na wa n a
15Ɛcɛ nyɩmɛ bɛ wa bɛrɛ wone a Sore nyɩ Naaŋmɩn ƴɛ̀rʋ a, nyɩmɛ bɛ wa ƴãw fãw sàwr a nɛ-ƴãwnɩ nɩ a wulu za ɩ̃ na kʋ̀rɛ nyɩ a dɩ̃a a, nyɛ̃ a ŋmɛ-ƴãw al na na lo a nyɩ zu a, na na páw nyɩ a:
16A Sore na ŋmɛ na ƴãw a bɛlɩ dem na kpɩɛr a tẽ-bɛrɛ pʋɔ a, nɩ a bɛl na kpɩɛr a kura pʋɔ a. 17Ʋ kʋ̃ paalɩ a nyɩ pèli nɩ a nyɩ dipɛ̃ zɔ̃-nawfʋ-dawr nɩ bʋ̃-dɩrɩ ɛ. 18Ʋ kʋ̃ mɩ́ kʋ̀ nyɩ a dɔwfʋ ɛ, a nyɩ bʋ̃-kʋ́ɔrɩ kʋ̃ mɩ́ maalɩ vla ɩ, a nyɩ dʋn kʋ̃ mɩ́ yɛ̀r yãwmɛ ɩ: a nĩi, a píir nɩ a bʋʋr. 19Ʋ na mɩ́ ŋmɛ na ƴãw nyɩ a nyɩ yele za pʋɔ.
20A Sore na ɩ na a ŋmɛ-ƴãw, a dɛ̃bɩ̃ɛ nɩ a niw-sʋba tuur nyɩ a nyɩ yel-maalɩ za pʋɔ, ɛ́ gù bɛ wa tɩ kʋ nyɩ pàw pɛr, ɛ́ gù nyɩ wa tɩ baarɩ fɔ̃wlɛ, a yel-faa nyɩ na na maalɩ zawrɩ a Sore bɛr a ƴãw. 21Ʋ na ɩ na bàal-faa kãw bɛ na bʋɔlɛ jɛ̀lmɛ̃ a, ʋ nyɔw nyɩ ɛ́ gù nyɩ tɩ baarɩ a tẽw ʋl nyɩ na na so a pʋɔ. 22A Sore na ɩ na a nyɩ ƴã-gamɛ sɩrɛ, zi-ɓori ɓore nyɩ, ƴã-tʋlɛ tɛr nyɩ. Ʋ na ɩ na wɛr nyɔw. Ʋ na ɩ na a bʋ̃-kʋ́ɔrɩ al na mɩ́ tɛr bie a, a ko a dàar zu bɩɩ pɔ̃. A bʋ̃-faar á ŋá na tɛr'ɩ lɛɛɛ tɩ baarɩ nyɩ. 23A salom na kpawl'ɩ a nyɩ zu-sɔw mɛ̃ kur-zɩɛ a, ɛ́ a tẽsɔw kpɛmɛ a nyɩ pile mɛ̃ kure a. 24Saa bɛ n'ʋ a Sore na mɩ́ ƴãw ʋ wa a nyɩ póru pʋɔ ɩ, uuru nɩ biire n'a ʋ na mɩ́ ƴãw a waar, ɛ́ gù nyɩ tɩ kpi pàw pɛr. 25A Sore na mɩ́ ɩ na a nyɩ dɔ̃ dem tʋ̃ɔ́ nyɩ. Nyɩmɛ wa lo sɔr-been wa ŋmãa nɩ bɛ a zɛbr a, sɛ́ɛ ayopõi n'a nyɩ na tu lɛb zɔ a bɛ niŋé. A tẽ-daa naalʋ-ten za na mɩ́ nyɛ̃ nyɩ na dɛ̃bɩ̃ɛ ɩrɛ a. 26Sidume nɩ gbõgbo-cili na so a nyɩ ƴã-gamɛ dɩrɛ, ɛ́ nɩr za kʋ̃ wa diw a ɩ.
27A Sore na ɩ na a nyɩ ƴã-gamɛ ɓuure ŋmɛrɛ mɛ̃ a Eziptɩ tẽw dem a. Natɩ-tɛbrɩ, zãkpanɛ nɩ natɩ-kpawlɛ na mɩ́ tɛr nyɩ na, ɛ́ bɛ tɛr sanʋ ɛ. 28A Sore na ɩ na nyɩ yaar, nyɩ zɔ̃w ɛ́ a nyɩ yã za yi. 29Mʋ̃tɔ̃w-gbawl, nyɩ na bɔblɛ na mɛ̃ zɔn na bɔblɛ lige pʋɔ a. Bom za kʋ̃ tuur nyɩ ɛ, a nɩbɛ na nɛbr nyɩ nɩ kʋralɛ, ɛ́ zure nyɩ, ɛ́ nɩr za kʋ̃ wa faa nyɩ ɛ.
30A nyɩ kãw wa ƴãw nɩ powle yúor a, nɩ-yũo n'ʋ na gã nɩ ʋ. A kãw wa ŋmãa yir a, ʋ kʋ̃ kpɛ ʋ ɛ. Kãw wa sɛl divɛ̃ tɩɩr púo a, ʋ kʋ̃ pɔr a divɛ̃ tɩɩr wɔ̃-dan ɛ. 31Bɛ na mɩ́ kʋ n a nyɩ nĩi a nyɩ niŋé, ɛ́ nyɩ kʋ̃ 'wɔb a nɛn ɛ. Bɛ na mɩ́ zu n a nyɩ bòn a nyɩ mimirí, ɛ́ nyɩ kʋ̃ lɛb nyɛ̃ a ɩ. A nyɩ dɔ̃ dem na mɩ́ diw nɩ a nyɩ píir cen nɩ, ɛ́ nɩr za kʋ̃ wa faa nyɩ ɛ. 32A nyɩ bidɛbr nɩ a nyɩ pɔwyaar na kpɛ n nɩ-bʋʋr-yoru nuru pʋɔ ɩ gbãgbaar. Nyɩ na mɩ́ úor'ɩ a bɛ lɛb-waa a bibi-ɓil za, ɛ́ kʋ̃ tʋ̃ɔ́ ɩ bom ɛ. 33Nɩ-bʋʋrɛ nyɩ na bɛ bãw a nɛbɛ na dɩrɛ a nyɩ bʋ̃-kʋ́ɔrɩ nɩ a nyɩ nuru tome bome za. Bɛ na nɛbr nyɩ na ɛ́ dɔwrɛ nyɩ kʋralɛ. 34A yele nyɩ na na nyɛrɛ a na ƴãw nyɩ nɩ yãyaar.
35A Sore na ɩ na natɩɛ na ɓuure ŋmɛrɛ ɛ́ bɛ tɛr sanʋ a, a pàw a nyɩ dume nɩ a nyɩ gbɛbɛrɛ, al pùorí, a pàw a ziir za, a zu tɩ tɔ a gbɛ́ɛ.
36A Sore na ɩ na, nyɩɩm nɩ a nyɩ nãà nyɩ na na kaa ír a, nyɩ cen nɩ-bʋʋrɛ pʋɔ nyɩɩm nɩ a nyɩ sãàkʋm-kore na bɛ bãw a, ɛ́ nyɩ na tɩ puore nɩ ŋmɩn-yoru a be: dàar nɩ kʋsɛbɛ dasuli. 37A nɩ-bʋʋrɛ bɛl za pʋɔ a Sore na na tɛr nyɩ cen nɩ a, a na tɩ ɩ n nɔ-ɓãan a bɛ zie, a yel na ta nyɩ a ƴãw. Bɛ na ɩrɛ nyɩ na laar ɛ́ tʋʋr nyɩ.
38Nyɩ na mɩ́ bʋ̀r'ɩ a nyɩ póru yaga, ɛ́ wa cɛ̀ a bɛ saalɩ ɛ, a sãsoge na na mɩ́ 'wɔb a za a ƴãw. 39Nyɩ na mɩ́ sɛl'ɩ divɛ̃ tɩɩr, kaa a vla, ɛ́ kʋ̃ nyũ divɛ̃ ɩ. Nyɩ kʋ̃ mɩ́ pɔr a wɔmɛ mɩ̀ ɛ, bʋ̃ʋ n'ʋ vɛ̃, a zãzule na mɩ́ dɩ n a za. 40Nyɩ na tɛr'ɩ olivʋ tɩɩr a tẽw za pʋɔ, ɛ́ kʋ̃ mɩ́ páw kãá zɛ ɩ, bʋ̃ʋ n'ʋ vɛ̃, a wɔmɛ kʋ̃ mɩ́ mʋ̃ɔ sɛr ɛ, ɛ́ pɔr lo a za. 41Nyɩ na mɩ́ dɔw nɩ bidɛbr nɩ pɔwyaar, ɛ́ bɛ kʋ̃ be a nyɩ zie ɩ, bʋ̃ʋ n'ʋ vɛ̃, bɛ na mɩ́ nyɔw bɛ na cen nɩ tẽ-yũo gbãgbaalʋ pʋɔ. 42Sãsoge na so a tɩɩr nɩ a nyɩ tẽsɔw bʋ̃-kʋ́ɔrɩ za.
43A nʋʋrɩ na kpɩɛr a nyɩ pʋɔ a fãw na kɛrɛ na dɔwlɛ, ɛ́ a nyɩɩm dem siwre cere. 44Bɛlɛ nɛbɛ na mɩ́ pɛ̃w nyɩ libie, ɛ́ nyɩɩm kʋ̃ mɩ́ tɛr bom za pɛ̃w bɛ ɩ. Bɛ na so nyɩ na, ɛ́ nyɩ tone a bɛ tome.
45A kpɩɛrʋ á ŋá za na ta nyɩ na, ɛ́ kʋ̃ bɛr nyɩ ɛ, ɛ́ gù nyɩ tɩ kpi pàw pɛr, nyɩ na bɛ bɛr wõ a Sore nyɩ Naaŋmɩn ƴɛ̀rʋ a ƴãw, nɩ nyɩ na bɛ sàw a nɛ-ƴãwnɩ nɩ a wulu ʋ na kʋ̀ nyɩ a ƴãw. 46A yele á ŋá na ta nyɩ na, ɩ kpãàfʋ na ta kpãàfʋ a, nyɩɩm nɩ a nyɩ bʋʋrɛ ƴãw kʋralɛ.
47A na ɩ à ŋá a, nyɩmɛ bɛ wa tone a Sore nyɩ Naaŋmɩn nɩ pʋ-pɩɛlʋ, nɩ a nyɩ pʋɔ za, a lɛn daar bom za nãà wa ʋr a nyɩ zie a, 48nyɩ na lɩɛb'ɩ a dɔ̃ dem a Sore na na ɩ bɛ wa a nyɩ ƴãw a gbãgbaar, nyɩ na ɩ n kɔ̃ nɩ kʋ̃ɔ-nyúur dem, nyɩ kʋ̃ tɛr bʋ̃-suuri ɛ, nyɩ kʋ̃ tɛr bom za ɩ. Kure dàa n'ʋ a Sore na dĩ nɩ a nyɩ nyuru, ɛ́ gù ʋ tɩ kʋ nyɩ pàw pɛr. 49A Sore na ɩ na nɩ-bʋʋrɛ nyɩ na bɛ wone a ƴɛ̀rʋ a, yi zi-zãána, yi a tẽw baarʋ zie, ɛ́ wa a nyɩ ƴãw. Bɛ na wa siw nɩ a nyɩ zu, mɛ̃ sɩla na mɩ́ siw a ʋ bʋ̃-nyɔwra zu a. 50Bɛ na ɩ n nɩbɛ na ko niŋé a, bɛ kʋ̃ tɛr ƴãwfʋ dɛb-nyãw zie ɩ, bɛ kʋ̃ zɔ pɔlbile nɩbaalʋ ɛ. 51Bɛ na de nɩ a nyɩ dʋn nɩ a nyɩ bʋ̃-kʋ́ɔrɩ, ɛ́ a nyɩɩm kpi kɔ̃. Bɛ bɛ bɛrɛ ble, divɛ̃, kãá nɩ a nyɩ nĩi, píir nɩ bʋʋr bili kʋ̀rɛ nyɩ ɛ, ɛ́ nyɩ na tɛr'ɩ lɛɛɛ tɩ kpi baarɩ. 52Bɛ na wa jil'a koli nyɩ, a tẽw a Sore nyɩ Naaŋmɩn na na kʋ̀ nyɩ a tẽ-bɛrɛ za pʋɔ. Bɛ na zɛb'ɩ nyɩ na ɛ́ gù a dacĩ-bɛrɛ al pùor nyɩ na be manɛ kɛ́ bom bɛ ɩrɛ nyɩ a tɩ lo. 53A nyɩ dɔ̃ dem na na jil koli nyɩ à à ŋá a, nyɩ kʋ̃ tɩ cãà tɛr bom za ɩ bãw gù 'wɔbr a nyɩ bibiir. Nyɩ na 'wɔbr'ɩ a bidɛbr nɩ a pɔwyaar a Sore na na kʋ̀ nyɩ a ƴã-gã-nɛnɛ. 54A dɛb ʋl na ƴãwnɛ ʋ tʋɔra, ɛ́ tɛr mimi-baalʋ a nyɩ pʋɔ a kʋ̃ mɩ́ jɩ́r a ʋ yɛb, a ʋ pɔw-kula nɩ a ʋ bibiir na cɛ a, jɩ́r-vla ɩ. 55Bʋ̃ʋ n'ʋ vɛ̃, a nãà mab'a fɛr ʋ ŋmãa a ʋ bibiir ƴã-gã-nɛn ʋ na 'wɔbr a kʋ̀ a bɛ kãw. A nyɩ dɔ̃ dem na na jil koli nyɩ à à ŋá a, nyɩ na be n kpɩɛrʋ na bɛ dɩ vuo a pʋɔ, ɛ́ bʋ̃-dɩra za kʋ̃ cãà be a dɛb ŋa dɩ ɛ. 56A pɔw ʋl na ƴãwnɛ ʋ tʋɔra, ɛ́ tɛr mimi-baalʋ a nyɩ pʋɔ a mɩ̀ na ɩ n a lɛ: ʋl na bɛ tɩ sàwr ʋ tʋɔra ƴãw, bɛ sàwr íre gbɛ́r nɛbr'ɩ tẽw a, ʋ na mɩ́ jɩ́r'ɩ a ʋ sɩr-kula, a ʋ bidɛb nɩ a ʋ pɔwyaa, jɩ́rʋ na bɛ vɩɛl a, 57lãwnɩ a bi-pɩɩla tɛɛ za ʋ na dɔw a, nɩ a zɛl na yi a ʋ púorí a. A nyɩ dɔ̃ dem na na jil koli nyɩ à à ŋá a, nyɩ na be n kpɩɛrʋ na bɛ dɩ vuo a pʋɔ, a nyɩ tẽ-bɛrɛ za pʋɔ. Alɛ n'a so a pɔw ŋa na bɔbr k'ʋʋ sɔwlɩ 'wɔb a ʋ bibiir, ʋ na bɛ tɛr bom za a ƴãw.
58Nyɩ ƴãw fãw sàwr a Naaŋmɩn wulu nɛ-ƴãwnɩ za na sɛb a sɛbɛ ŋa pʋɔ a. Nyɩ ƴãwnɛ a sob nɛ na tɛr a yúor ŋa na ɩ yúor a, yúor na bɛ tɛr dɩ̃ɛnʋ a, ɛ́ dɩ kɛ́ «Sore nyɩ Naaŋmɩn» a. 59Alɛ bɛ ɩ lɛ, a Sore mɩŋa na ƴãw nɩ nyɩɩm nɩ a nyɩ bʋʋrɛ, wʋl-pɛ-bʋʋrɛ za lãwnɩ bàal-faar faar na mɩ́ nyɔw cɛlɩ a. 60A bʋ̃-faar al za dɛ̃bɩ̃ɛ nyɩ na tɩ zɔrɛ a Eziptɩ a, ʋ na ɩ na a páw nyɩ, ɛ́ tɛr nyɩ. 61Mɔ̃ mɩ̀, a bàalʋ al za, nɩ a wʋlɛ al za, bɛ na bɛ por a yúor a wulu sɛbɛ ŋa pʋɔ a, a Sore na ɩ na a páw nyɩ, ɛ́ gù nyɩ tɩ baarɩ. 62Nɩbɛ blã lɛ tɛwr'a na cɛ a nyɩ pʋɔ, nyɩɩm na tɩ yãwmɛ mɛ̃ a saa ŋmar-bie a. Bʋ̃ʋ n'ʋ vɛ̃, a nyɩ na kʋ̃ bɛr wõ a Sore nyɩ Naaŋmɩn ƴɛ̀rʋ a ƴãw n'a. 63Mɛ̃ a lɛ a Sore na tɩ nɔnɛ k'ʋʋ kaarɛ a nyɩ zie, nyɩ wone nʋ̃ɔ̀ ɛ́ yãwmɛ a, lɛ n'a ʋ mɩ̀ na nɔnɛ k'ʋʋ kaarɛ a nyɩ zie, ɩ nyɩ baarɩ, nyɩ kpi pàw pɛr. Ʋ na ír nyɩ nɩ a tẽw nyɩ na na so a pʋɔ. 64A Sore na diw nyɩ na yaarɩ a nɩ-bʋʋrɛ za pʋɔ, a tẽ-daa tib zie tɩ tɔ a baarʋ zie. Nyɩ na tɩ puore nɩ ŋmɩn-yoru a be, ŋmɩmɛ nyɩɩm nɩ a nyɩ sãàkʋm-kore na bɛ bãw a: dàar bɩɩ kʋsɛbɛ dasuli. 65Nyɩ kʋ̃ tɛr ƴã-ɓaarʋ towtow a nɩ-bʋʋrɛ bɛl sɔgɔ ɩ, nyɩ kʋ̃ nyɛ̃ gbɛ́r binu zie tɛwr mɩ̀ ɛ. A be a, a Sore na ɩ na a nyɩ tɩɛrʋ bɛ mɩ́ gã zoom ɛ, a nyɩ mimi-biir kpiir, a nyɩ kanyir za baarɩ. 66A nyɩ nyɔ-vʋʋrʋ na ɩ na mɛ̃ ʋ tɛw na àr a, nyɩ kʋ̃ cãà gùre bom za a ʋ pʋɔ ɩ. Dɛ̃bɩ̃ɛ mawfʋ na mɩ́ tɛr nyɩ nɩ mʋ̃tɔ̃w nɩ tɩ̃ɩsɔw. 67Nyɩmɛ wa nyɛ̃ a ʋlɩ bom nɛ na ɩrɛ a, a nyɩ socie na tʋɔr'ɩ ger ger, a dɛ̃bɩ̃ɛ zũú. Nyɩ na mɩ́ yel'ɩ a biɓaara: «Zaanʋɔra kʋ̃ʋ tɩ n'a a!» Ɛ́ a zaanʋɔra nyɩ yel: «Biɓaara kʋ̃ʋ tɩ n'a a!» 68A Sore na tɛr nyɩ nɩ gbee pʋɔ lɛb wa n a Eziptɩ. Ʋ na ɩ na nyɩ lɛb wa a tẽw ŋa pʋɔ, ɩ̃ na tɩ yel kʋ̀ nyɩ kɛ́ nyɩ kʋ̃ lɛb nyɛ̃ ʋ towtow a. A be a, nyɩ na tɩ bɔbr'a kɛ́ nyɩ kʋɔrɩ nyɩ tʋɔra ɩ gbãgbaar, ɛ́ daarɛ kʋ̃ ka be ɩ.
A MOYIIR ƳƐ̀R-PƐ-BAARA
28:69—30:20
69A wõ-taa a Sore na ƴãw a Moyiir maal'ɩ a Ɩsɩrayɛl nɩbɛ a Mowab tẽw pʋɔ a ƴɛ̀r-bie n'ɩ à á ŋá. A wõ-taa ŋa wa na wa ƴãw pʋɔ a ʋl ƴãw, ʋ na tɩ maal'ɩ bɛ a Orɛb tãw zu a.
Právě zvoleno:
Wulu-ayi-sob 28: DBDC
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en Dagara © Alliance Biblique du Burkina Faso, 2013.