Jonás 3
3
Nínivichö täraq runakuna jutsa rurayta dëjayanqan
1Tsaypitanam Jonásta Tayta Dios yapay nirqan: 2<<Nínive jatun markaman aywar noqa ninqäta willakuy>>.
3Tsaymi Tayta Dios ninqannö Nínive jatun markaman Jonás aywarqan. Tsay markataqa kimsa junaqrämi pipis puriyta ushayaq.
4Níniviman chaykurmi juk junaq qoyat willakur Jonás purirqan. Willakurmi nirqan: <<¡Chusku chunka (40) junaq manarä kaptinmi kay markata Tayta Dios ushakätsinqa!>>
5Tsaynö willakunqanta wiyarmi Nínive runakuna criyirnin rïcupis pobripis lütu röpata jatikurkur ayunayarqan.#Mat. 12.41; Luc. 11.32.
6Jonás willakunqanta wiyaykurmi Nínivichö mandaq reypis lütu röpata jatikuskir uchpaman jamaykur Tayta Diosta mañakurqan. 7Tsaynöllam Nínive runakuna ayunayänanpä autoridäninkunawan willakatsir niyarqan: <<Pipis ama mikuyätsuntsu ni yakutapis ama upuyätsuntsu. Ashmankunatapis ama qarayätsuntsu ni yakütsiyätsuntsu. 8Tsaypa rantinqa llapan runakunapis lütu röpata jatikurkur llapan shonqunkunawan Tayta Diosta mañakuyätsun. Tsaynölla jutsa rurayta y wanutsinakuyta dëjaskir allina kawayätsun. 9Tsaynö rurashqaqa capazchi Tayta Dios kuyapämarnintsik ushakätsimäshuntsu>>.
10Nínive runakuna jutsankunata dëjayaptinmi ushakätsinanpä willakatsirpis Tayta Dios ushakätsirqannatsu.
Právě zvoleno:
Jonás 3: qxo
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2002, 2008, Wycliffe Bible Translators, Inc. All rights reserved.